Mayın 16-da elm və təhsil naziri Emin Əmrullayevin media üçün brifinqi keçirilib.   Brifinqdə Emin Əmrullayev aşağıdakı məsələləri xüsusi olaraq qeyd edib:   - Mayın 18-də sertifikatlaşdırılma prosesində iştirak edəcək müəllimlərin imtahan tarixləri, saatı və imtahan məkanı şəxsi səhifələrə göndəriləcək;    - Sertifikatlaşdırma prosesi ilə bağlı yaşı 60 və daha çox olan şəxslərin bu prosesdə könüllü əsaslarla iştirakı, ilk dəfə işə qəbul olunan təhsilverənlərin  5 il müddətinə deyil, 3 il müddətinə sertifikatlaşdırmadan keçməməsi kimi yeniliklər nəzərdə tutulur. Bu dəyişikliklər hazırda Milli Məclisdə müzakirədədir;   - Müəllimlərin işə qəbulu üzrə müsabiqənin elektron sənəd qəbuluna növbəti həftə ərzində start veriləcək. Bu il 10 minə yaxın vakansiya elan olunacaq;    - Növbəti 3 il ərzində məktəbəqədər təhsil üzrə pedaqoji və idarəetmə heyəti üzrə 17 000 nəfərin sertifikatlaşmaya cəlb olunması əsas hədəflərdəndir;     - Şagird sayı 500-dək olan 387, 500-dən çox olan 148 məktəbdə direktor vəzifəsi vakantdır;    - “2022-2026 Dövlət Proqramı” çərçivəsində hazırda 14 prioritet sahə üzrə dünyanın 18 ölkəsinə aid 107 xarici ali təhsil müəssisəsində 80 bakalavriat, 258 magistratura təhsil səviyyələrində olmaqla, ümumilikdə 338 nəfər tələbə təhsil alır.    Sonda media nümayəndələrini maraqlandıran çoxsaylı suallar cavablandırılıb.  

16/05/2023 18:00

Mayın 16-da “Azərbaycanda təhsil sisteminin dayanıqlığının gücləndirilməsi və AzMKÇ 5-ci səviyyə kvalifikasiyalarının təkmilləşdirilməsi üçün Elm və Təhsil Nazirliyinə dəstək” adlı texniki yardım layihəsinin açılış konfransı baş tutub. Təhsil İnstitutunun (ARTİ) benefisiar olduğu layihə Avropa İttifaqının (Aİ) maliyyə dəstəyi ilə həyata keçirilir.   Açılış nitqi ilə çıxış edən ARTİ-nin Təhsildə İnnovasiyalar şöbəsinin müdiri, layihənin koordinatoru Abutab Abbasova bildirib ki, konfransın məqsədi ömürboyu təhsil kontekstində peşə təhsili və təlimi də daxil olmaqla təhsil sisteminin modernləşdirilməsi və keyfiyyətinin artırılması istiqamətində maraqlı tərəflərin dialoqunu tərtib etmək və məzunların əmək bazarına inteqrasiya prosesini asanlaşdırmaqdır.   Elm və təhsil nazirinin müavini İdris İsayev çıxış edərək orta ixtisas təhsilinin təhsil sistemində yeri, yüksək texniki peşə təhsilinin əmək bazarının tələblərinə uyğun inkişaf etdirilməsindən danışıb, yüksək texniki peşə təhsilində institutsional və proqram akkreditasiyasının vacibliyini vurğulayıb. Nazir müavini təhsil proqramlarının məzmununun əmək bazarının tələbləri nəzərə alınmaqla hazırlanmasının mümkünlüyünü qeyd edib.   Avropa İttifaqının (Aİ) Azərbaycandakı nümayəndəliyinin Əməkdaşlıq şöbəsinin rəhbəri Viktor Boykov çıxışında Aİ-nın təhsil sektoruna verdiyi dəstəklə bağlı ətraflı məlumatı iştirakçıların diqqətinə çatdırıb.   Daha sonra Təhsil İnstitutunun direktoru Rüfət Əzizov rəhbərlik etdiyi qurum tərəfindən həyata keçirilən layihələrdən danışıb. Rüfət Əzizov layihənin komponentləri üzrə məzmun hazırlığında sənaye ilə əməkdaşlıq mexanizmlərinin, səmərəli peşəyönümü işinin təşkili məqsədilə tövsiyələrin hazırlanması, həmçinin institutsional potensialın gücləndirilməsində Təhsil İnstitutunun gözləntilərini açıqlayıb.   Sonra layihənin əsas ekspertləri  layihənin məqsədi, 3 komponenti və həmin komponentlərin Azərbaycan hökumətinin və Aİ-nin prioritetləri ilə əlaqələndirilməsi barədə təqdimatla çıxış ediblər.   Konfransda layihə ilə bağlı əməkdaşlıq imkanları da müzakirə olunub.   Qeyd edək ki, layihənin əsas məqsədi Azərbaycanda Milli Kvalifikasiyalar Çərçivəsinin 5-ci səviyyəsinə daxil olan orta ixtisas (subbakalavr) və yüksək texniki peşə təhsili üzrə təhsil, təlimin gücləndirilməsi, bu istiqamətdə inkişafa töhfə vermək məqsədilə Azərbaycanda müvafiq qurumlara əsaslı dəstəyin göstərilməsidir.

16/05/2023 17:00

Mayın 16-da Təhsilin İnkişafı Fondunun təşəbbüsü ilə ümummilli lider Heydər Əliyevin anadan olmasının 100-cü ildönümünə həsr olunmuş “Təhsilin inkişafında innovativ metodlar” müsabiqəsi qaliblərinin mükafatlandırılması mərasimi keçirilib. Tədbir Dövlət Himninin səsləndirilməsi ilə başlayıb.   Azərbaycan Texniki Universitetinin rektoru Vilayət Vəliyev açılış nitqi ilə çıxış edərək Təhsilin İnkişafı Fondunun təşəbbüsü ilə keçirilən müsabiqəni tələbələrin potensialının qiymətləndirilməsi istiqamətində təqdirəlayiq addım hesab edib.  Daha sonra Təhsilin İnkişafı Fondunun İdarə Heyətinin sədri Elnur Nəsibov fondun fəaliyyət istiqamətləri və məqsədi barədə məlumatları iştirakçıların diqqətinə çatdırıb. Elnur Nəsibov sözügedən müsabiqənin keçirilməsində əsas məqsədin ulu öndərin elmə, təhsilə və gənclərə qayğısını rəhbər tutaraq, tələbələrin təhsilin inkişafına töhfə verəcək ideyalarının dəstəklənməsi olduğunu qeyd edib. Bildirilib ki, müsabiqə zamanı 28 dövlət və özəl ali təhsil müəssisəsindən 150 müraciət daxil olub. Tələbələr “İnklüziv təhsilin inkişafı”, “Qeyri-formal təhsil metodları”, “Təhsildə texnologiyanın tətbiqi” və “Təhsildə idarəetmə” mövzuları üzrə ideya və təkliflərini təqdim ediblər. Çıxışının sonunda Elnur Nəsibov qalibləri təbrik edib, onlara uğurlar arzu edib. Tədbirdə iştirak edən elm və təhsil nazirinin müşaviri Nicat Məmmədli ümummilli liderin təşəbbüsü ilə 15 mindən çox gəncin Azərbaycandan kənarda 170-ə yaxın ali təhsil müəssisəsinə təhsil almağa göndərildiyini, bu siyasətin müstəqillik illərində ölkə Prezidenti cənab İlham Əliyev tərəfindən uğurla davam etdirildiyini diqqətə çatdırıb.  Daha sonra müsabiqə ilə bağlı videoçarx nümayiş etdirilib.  Sonra I, II və III yerlərin sahibləri elan olunub və qaliblər mükafatlandırılıblar. 1-ci yerə Bakı Ali Neft Məktəbinin tələbəsi Zahid Abdullayev, 2-ci və 3-cü yerlərə isə müvafiq olaraq Azərbaycan Dövlət Neft və Sənaye Universitetinin tələbələri Nuray Nəzərli və Asim Əzizov layiq görülüblər. Tədbirdə Bakı Ali Neft Məktəbinin rektoru Elmar Qasımov və Azərbaycan Dövlət Neft və Sənaye Universitetinin prorektoru Lətafət Qardaşova çıxış edərək bu cür müsabiqələrin əhəmiyyətini vurğulayıb və təşkilatçılara təşəkkürlərini bildiriblər.  Sonda münsiflər heyətinin üzvləri Təhsilin İnkişafı Fondu tərəfindən mükafatlandırılıbar. Təltif fotoları

16/05/2023 16:00

Malayziya 2023-2024-cü tədris ili üçün təqaüdlə təhsil imkanı elan edib.   Təqaüd Malayziya universitetlərində magistratura və doktorantura təhsil səviyyələri üçün ayrılır.     Son müraciət tarixi 18 may 2023-cü ildir.    Qeyd edək ki, proqram çərçivəsində əlavə məlumatIarla elan vasitəsilə tanış ola bilərsiniz.

16/05/2023 12:07

2023-2024-cü tədris ili üzrə Bakı şəhəri və ölkənin müxtəlif bölgələrində yerləşən bir sıra lisey və gimnaziyalara şagird qəbulu davam edir. Sözügedən lisey və gimnaziyalara ərizə qəbulu https://sy.edu.az portalı üzərindən həyata keçirilir. Ərizə qəbulu prosesi 6 iyun tarixinədək davam edəcək.     Valideyn (və ya qanuni nümayəndə) portal üzərindən şəxsi kabinetində “Sorğu yerləşdir” bölməsinə daxil olaraq “Mərkəzi imtahanla qəbul” düyməsini sıxmaqla imtahanın keçiriləcəyi mərkəzi seçməlidirlər. Şagirdlər əvvəlcə mərkəzləşdirilmiş qəbul imtahanında iştirak etməli, sonra isə topladıqları bala uyğun olaraq təhsil almaq istədikləri lisey və ya gimnaziyanın seçimini aparmalıdırlar.    İmtahan zamanı şagirdlərə tədris dili və riyaziyyat fənləri üzrə tapşırıqlar təqdim ediləcək.    Lisey və gimnaziyalara siniflər üzrə şagird qəbulu aşağıdakı tarixlərdə aparılacaq:  • 16 iyun 2023-cü il tarixində VII və VIII siniflərə qəbul (hazırda VI və VII sinifdə təhsil alanlar üçün);  • 17 iyun 2023-cü il tarixində VI siniflərə qəbul (hazırda V sinifdə təhsil alanlar üçün); • 18 iyun 2023-cü il tarixində V siniflərə qəbul (hazırda IV sinifdə təhsil alanlar üçün).   Aşağıda mərkəzləşdirilmiş qaydada qəbul prosesi keçiriləcək lisey və gimnaziyaların siyahısı təqdim edilib. Lisey və gimnaziyalar barədə ətraflı məlumat ilə https://sy.edu.az elektron sistemində “Mərkəzi imtahan liseyləri” bölməsindən tanış ola bilərsiniz.    Dövlət hesabına yataqxana və yeməkxana ilə təmin olunan lisey və gimnaziyalar:   - Bakı şəhəri S.C.Pişəvəri adına humanitar fənlər gimnaziyası; - Bakı şəhəri A.S.Makarenko adına humanitar fənlər təmayüllü gimnaziya; - Bakı şəhəri S.Bəhlulzadə adına xarici dillər təmayüllü gimnaziya; - Bakı şəhəri Fizika, riyaziyyat və informatika təmayüllü lisey;- Bakı şəhəri Kimya, biologiya təmayüllü respublika liseyi; - Şəki şəhəri Kimya, biologiya təmayüllü lisey; - Şəmkir şəhəri Kimya, biologiya təmayüllü lisey; - Şirvan şəhəri Kimya, biologiya təmayüllü lisey; - Quba şəhəri Fizika, riyaziyyat və informatika təmayüllü lisey; - Gəncə şəhəri Fizika, riyaziyyat və informatika təmayüllü lisey; - Ağdaş şəhəri M.Şeyxzadə adına humanitar və təbiət fənləri təmayüllü gimnaziya;   - Biləsuvar şəhəri texniki fənlər təmayüllü məktəb-lisey;   - Gəncə şəhəri Xarici dillər təmayüllü gimnaziya.    Digərləri:    - Bakı şəhəri akademik Zərifə Əliyeva adına lisey; - Bakı şəhəri 16 nömrəli texniki-humanitar lisey; - Bakı şəhəri 2 nömrəli texniki-humanitar lisey;  - Bakı şəhəri 147 nömrəli texniki-humanitar lisey; - Bakı şəhəri Texniki-humanitar lisey; - Bakı şəhəri 291 nömrəli ekologiya liseyi;  - Bakı şəhər 173 nömrəli tam orta məktəb; - Bakı şəhəri S.Rüstəm adına xarici dillər təmayüllü gimnaziya; - Ağstafa şəhəri Texniki-humanitar təmayüllü lisey;   - Şamaxı şəhəri Texniki, humanitar və təbiət təmayüllü lisey;  - Oğuz şəhəri E.Abdullayev adına 2 nömrəli tam orta məktəb; - Mingəçevir şəhəri S.Vurğun adına 16 nömrəli tam orta məktəb; - Lənkəran şəhəri S.Kazımbəyov adına 6 nömrəli məktəb-lisey; - Sumqayıt şəhəri İstedad liseyi; - Sumqayıt şəhəri N.Gəncəvi adına texniki və təbiət elmləri liseyi; - Sumqayıt şəhəri Təfəkkür liseyi; - Sumqayıt şəhəri Təbiət elmləri təmayüllü gimnaziya; - Qobustan şəhəri 2 nömrəli tam orta məktəb; - Masallı şəhəri Dəfinə məktəb-liseyi.

16/05/2023 11:39

Mayın 15-də "eTwinning" layihəsi çərçivəsində “İnnovasiya və təhsil” adlı beynəlxalq seminar öz işinə başlayıb.     Seminarda Albaniya, Bolqarıstan, Çex Respublikası, Finlandiya, Portuqaliya, Slovakiya və Sloveniyanı təmsil edən 25 təhsil işçisi, müvafiq ölkələrin təhsil nazirliklərinin nümayəndələri, həmçinin ölkə üzrə 8 regiondan ümumilikdə 28 müəllim iştirak edir.   Tədbirdə çıxış edən elm və təhsil nazirinin müavini Həsən Həsənli “eTwinning” layihəsinin təhsil sisteminə inteqrasiyası və ölkəmizdə uğurlu icrası barədə danışaraq layihəəsaslı dərs modelinin qurulması və təcrübə mübadiləsinin aparılması baxımından layihənin əhəmiyyətini vurğulayıb. Nazir müavini bildirib ki, layihə çərçivəsində müəllimlər İKT-nin təhsilə səmərəli tətbiqi və onlayn peşəkar inkişaf imkanlarından faydalanmaq imkanı əldə edirlər.     Daha sonra təmsil olunan ölkələrin layihə rəhbərləri çıxış edərək “eTwinning” layihəsinin tətbiqi və pedaqoji işçilərə yaratdığı imkanlardan bəhs ediblər.     Seminarın növbəti günlərində İKT-nin təhsilə tətbiqi, layihəəsaslı tədris və müəllimlərin XXI əsr bacarıqlarını inkişaf etdirəcək təlim və panel müzakirələr təşkil olunacaq. Təlimlər həm xarici, həm də yerli mütəxəssislər tərəfindən keçiriləcək.   Tədbirin sonunda iştirakçı müəllimlər innovativ öyrənmə metodlarının tədrisdə istifadəsinə yol açan ortaq dərs modellərini “eTwinning” platformasında yaradacaqlar.   Qeyd edək ki, “eTwinning“ layihəsi Avropa İttifaqının Fasiləsiz Təhsil Proqramının tərkib hissəsidir və məktəbəqədər, orta məktəb və ali təhsil sahələrində çalışan təhsil işçilərinə peşəkar inkişaf təlimlərində iştirak, beynəlxalq əməkdaşlıq, ortaq dərs modelləri yaratmaq və Avropada ən böyük öyrənmə icmasının bir hissəsi olmaq imkanı verir.   

15/05/2023 17:11

Mayın 15-də ümummilli lider Heydər Əliyevin anadan olmasının 100-cü ildönümü münasibətilə təşkil olunmuş “Ən yaxşı təqdimat” müsabiqəsi qaliblərinin mükafatlandırılması mərasimi keçirilib.    Tədbirdə elm və təhsil naziri Emin Əmrullayev, Milli Məclisin Elm və təhsil komitəsinin sədri Bəxtiyar Əliyev, millət vəkilləri, nazirlik yanında İctimai Şuranın üzvləri və digər qonaqlar iştirak ediblər.    Tədbir Dövlət Himninin səsləndirilməsi ilə başlayıb.     Elm və təhsil naziri Emin Əmrullayev müsabiqənin məktəblilər arasında müstəqil Azərbaycanın dövlət quruculuğunda Heydər Əliyev irsinin yaşadılması və daha dərindən öyrənilməsi baxımından əhəmiyyətini qeyd edib. Nazir ulu öndərin 100 illik yubileyi münasibətilə təhsil müəssisələrində çoxsaylı tədbirlərin keçirilməsinin müstəqillik tariximizin şagirdlərə düzgün çatdırılması və bu istiqamətdə ideoloji işin təşkili baxımından önəmli olduğunu vurğulayıb.    Ulu öndər Heydər Əliyevin Azərbaycan təhsilinə göstərdiyi xüsusi diqqət və qayğıdan söz açan Emin Əmrullayev yeni məktəblərin tikintisi, ali təhsildə əhatəliliyin artırılması, xaricdə təhsil ənənəsinin yaradılması baxımından ümummilli liderin rolundan bəhs edib.    Nazir çıxışının sonunda müsabiqə qaliblərini, müəllim və valideynlərini təbrik edib, şagirdlərə uğurlar arzulayıb.     Daha sonra “Ən yaxşı təqdimat” müsabiqəsinin nəticələrinə əsasən 5 nəfər I, 10 nəfər II, 15 nəfər isə III dərəcəli diplomla təltif olunub və onlara hədiyyələr təqdim edilib.      Tədbirdə Azərbaycan Milli Konservatoriyasının nəzdində Respublika İncəsənət Gimnaziyası şagirdlərinin və 2 nömrəli Uşaq - Gənclər İnkişaf Mərkəzinin “Təbəssüm” rəqs qrupunun ifasında musiqi nömrələri səsləndirilib, rəqslər nümayiş etdirilib.  Təltif fotoları “Ulu öndər Heydər Əliyevin anadan olmasının 100-cü ildönümünə həsr olunmuş “Ən yaxşı təqdimat” müsabiqəsinin qaliblərinin təltif edilməsi barədə Azərbaycan Respublikası elm və təhsil nazirinin əmri

15/05/2023 14:55

15 may tarixindən Elm və Təhsil Nazirliyinin Ümumi və Məktəbəqədər Təhsil Məsələləri üzrə Vətəndaşlara Xidmət Mərkəzi (Ünvan: Bakı şəhəri, Fətəli xan Xoyski 109, https://goo.gl/maps/KiQX4ba6bjBR7TFU6) fəaliyyətə başlayır.    Vətəndaşlar sözügedən mərkəzə yaxınlaşmaqla aşağıdakı məsələlərə dair müraciətlərini ünvanlaya və yerindəcə həllini tapa bilərlər:    - birinci siniflərə şagird qəbulu ilə bağlı qeydiyyat prosesi;  - məktəbəhazırlıq qruplarına qəbulla bağlı qeydiyyat prosesi;  - məktəbəqədər təhsil müəssisələrinə uşaqların qeydiyyat prosesi;  - şagirdlərin elektron yerdəyişməsi.      Qeyd edək ki, Bakı şəhərinin sakinləri yuxarıda qeyd olunan xidmətlər üzrə 5 və 7 saylı “ASAN xidmət” mərkəzlərinə və Bakı Şəhəri üzrə Təhsil İdarəsinin Vətəndaşların Qəbulu Mərkəzinə də müraciət edə bilərlər. Regionlarda yaşayan sakinlər isə regional təhsil idarələrinin qəbul mərkəzlərinə, eləcə də təhsil xidmətləri təqdim olunan “ASAN xidmət” mərkəzlərinə yaxınlaşa bilərlər.    Eyni zamanda, yuxarıda qeyd edilən məsələlərlə bağlı Elm və Təhsil Nazirliyinin “WhatsApp” xidməti (+994 051 206 78 48), 146 – 1 Çağrı Mərkəzi və portal.edu.az üzərindən də müraciət ünvanlamaq mümkündür. 

15/05/2023 14:26

15 may saat 11:00-dan etibarən 2023-2024-cü tədris ili üzrə ümumi təhsil müəssisələrinin birinci siniflərinə Azərbaycan bölməsi üçün sorğuların yerləşdirilməsi (məktəb seçimi) həyata keçiriləcək.    Eyni zamanda, bu gün 11:00-dan 31 may saat 18:00-a qədər dövlət ümumi təhsil müəssisələrinin tədris digər dillərdə aparılan birinci siniflərinə qəbulla bağlı uşaqların həmin dil üzrə şifahi nitq bacarıqlarının yoxlanılması məqsədilə təşkil olunan müsahibəyə yazılmaq üçün qeydiyyat aparılacaq.    Qeyd edək ki, qəbul prosesi www.mektebeqebul.edu.az elektron portalı vasitəsilə aparılır.

15/05/2023 10:08

Kimya fənni üzrə respublika fənn olimpiadalarının nəticələri açıqlanıb.  Belə ki, hər iki yaş qrupu üzrə 1-5 və 5-ci yerlə eyni nəticəni göstərən şagirdlər qızıl, 6-15 və 15-ci yerlə eyni nəticəni göstərən şagirdlər gümüş, 16-30 və 30-cu yerlə eyni nəticəni göstərən şagirdlər isə bürünc medala layiq görülüblər.  Qeyd edək ki, respublika fənn olimpiadaları Kapital Bankın dəstəyi ilə təşkil edilir.  Müvafiq nəticələrlə aşağıdakı cədvəldən tanış ola bilərsiniz:   Kimya fənni üzrə nəticələr - aşağı (8-9-cu sinif) yaş qrupu Kimya fənni üzrə nəticələr - yuxarı (10-11-ci sinif) yaş qrupu

15/05/2023 09:27