Gürcüstanın təhsil və elm naziri Giorgi Amilaxvarinin dəvəti ilə elm və təhsil naziri Emin Əmrullayevin rəhbərlik etdiyi nümayəndə heyəti Gürcüstanda səfərdədir. Səfər çərçivəsində Azərbaycan nümayəndə heyətinin üzvləri Tbilisi şəhərində yerləşən Heydər Əliyev parkında ümummilli liderin abidəsini ziyarət edib, önünə əklil qoyub və xatirəsini ehtiramla yad ediblər. Daha sonra Emin Əmrullayev ilə Giorgi Amilaxvarinin görüşü keçirilib. Görüşdə ADA Universitetinin rektoru Hafiz Paşayev də iştirak edib. Müzakirələr zamanı iki ölkə arasında təhsil sahəsində əməkdaşlığın cari vəziyyəti  və gələcək perspektivləri barədə fikir mübadiləsi aparılıb. Hər iki ölkədə Azərbaycan və gürcü dillərində tədris aparılan məktəblərin fəaliyyəti, bu məktəblər üçün dərsliklərin qarşılıqlı mübadiləsi yüksək qiymətləndirilib. Görüşün sonunda ADA Universiteti ilə İvane Cavaxişvili adına Tbilisi Dövlət Universiteti, Gürcüstan Texniki Universiteti və Kutaisi Beynəlxalq Universiteti arasında əməkdaşlıq müqavilələrinin imzalanma mərasimi keçirilib. 

18/05/2023 17:48

“Məktəblilər üçün muzey həftəsi” layihəsi çərçivəsində ümummilli lider Heydər Əliyevin 100 illik yubileyi ilə əlaqədar olaraq “Muzeylər və Heydər Əliyev ili” adlı interaktiv proqrama start verilir. Proqram 18-25 may tarixlərini əhatə edir.     Elm və Təhsil, Mədəniyyət nazirliklərinin əməkdaşlığı və Respublika Uşaq-gənclər İnkişaf Mərkəzinin təşkilatçılığı ilə icra edilən proqramın məqsədi ümummilli lider Heydər Əliyevin irsinin tədqiqi və təbliği, məktəblilərin ulu öndərin dövlətçilik fəlsəfəsi və azərbaycançılıq ideologiyası, həyat və fəaliyyətinin müxtəlif dövrləri barədə məlumatlandırılması, təhsilalanların muzey, qoruq və Heydər Əliyev mərkəzləri kolleksiya fondunun elmi-mədəni, tarixi, ekoloji, davamlı inkişaf konsepsiyası, etnoqrafik aspektləri ilə tanış olmasından ibarətdir.    Proqram çərçivəsində məktəblilərin Bakı şəhərində yerləşən muzeylərə, həmçinin ilk dəfə olaraq regionlarda fəaliyyət göstərən tarix-mədəniyyət qoruqları və Heydər Əliyev mərkəzlərinə, ümumilikdə Mədəniyyət Nazirliyinin tabeliyində fəaliyyət göstərən 100 mədəniyyət müəssisəsinə ekskursiyaların təşkili planlaşdırılır. Ekskursiyalara məktəblilər və Bakı şəhəri ilə yanaşı, respublikanın digər regionlarında fəaliyyət göstərən uşaq-gənclər inkişaf mərkəzlərinin dərnək üzvləri də cəlb ediləcəklər.     “Muzeylər və Heydər Əliyev ili” adlı interaktiv proqram 100 mədəniyyət müəssisəsini əhatə etdiyi üçün ekskursiyalarda 100 000 məktəblinin iştirakı nəzərdə tutulur.   

18/05/2023 17:24

Elm və təhsil nazirinin müavini Firudin Qurbanov Mingəçevir şəhərinə səfəri çərçivəsində 13 və 14 nömrəli tam orta məktəbləri ziyarət edib.    Firudin Qurbanov sözügedən məktəblərdə tədris prosesini izləyib, yaradılmış şəraitlə tanış olub, şagird və müəllim kollektivi ilə görüşüb.    14 nömrəli tam orta məktəbdə pilot layihə kimi tədris olunan şahmat dərsində iştirak edən nazir müavini şagirdlərin oyununu da izləyib.

18/05/2023 17:00

Mayın 18-də Abşeron rayonu, Xırdalan şəhərinin “Kristal – 2” adlanan ərazisində inşa olunan 2000 şagird yerlik tam orta məktəbə mediatur keçirilib. Mediaturun məqsədi bu ərazidəki ümumi təhsil müəssisələrində şagird sıxlığının azaldılmasına kömək edəcək yeni məktəbin inşası ilə tanışlıq olub.   Qeyd olunub ki, məktəb ümumilikdə 6 korpusdan ibarətdir. Məktəbdə STEAM Mərkəzi, kitabxana, oxu zalı, 600 yerlik akt zalı və 74 sinif otağı var. Hazırda məktəb binasının daxilində son tamamlanma və həyətin abadlıq işləri aparılır. Cari ilin iyulunda tikinti-quraşdırma işlərinin yekunlaşdırılması nəzərdə tutulur.   Bildirilib ki, Xırdalan şəhərindəki 8 nömrəli tam orta məktəb binasının da yenidən inşası nəzərdə tutulur. Bu da sıxlıq probleminin azalmasına və 960 şagirdin bir növbədə təhsil almasına şərait yaradacaq.   Xatırladaq ki, ötən il Abşeron rayonunun Saray qəsəbəsində yeni inşa edilmiş 2000 şagird yerlik 2 nömrəli, Masazır kəndində isə 960 şagird yerlik 6 nömrəli tam orta məktəb istifadəyə verilib.

18/05/2023 16:50

Mayın 18-də Təhsildə Keyfiyyət Təminatı Agentliyinin (TKTA) təşkilatçılığı ilə “Ali təhsildə keyfiyyət təminatı və keyfiyyətin gücləndirilməsi” adlı beynəlxalq forumun açılış mərasimi keçirilib.    Forumun məqsədi xarici keyfiyyət təminatı prosesində müstəqillik və məsuliyyətin önəmi, maraqlı tərəflərin prosesdə iştirakına dair müzakirələr, həmçinin bu sahədə qabaqcıl təcrübənin öyrənilməsidir.     Açılış nitqi ilə çıxış edən TKTA-nın İdarə Heyətinin sədri Ülkər Səttarova agentlik tərəfindən keyfiyyət təminatı istiqamətində görülən işlər, əldə edilmiş nəticələr, həmçinin agentliyin potensialının gücləndirilməsi istiqamətində beynəlxalq donorlarla əməkdaşlıq və gələcək planlar haqqında tədbir iştirakçılarını məlumatlandırıb.    Əsas məruzəçilərdən olan elm və təhsil nazirinin müavini  İdris İsayev Azərbaycanın ali təhsilində keyfiyyət təminatı sahəsində atılmış addımlar barədə tədbir iştirakçılarını məlumatlandırıb. İdris İsayev “Ali təhsil müəssisələrinin institusional və proqram akkreditasiyası üzrə qiymətləndirmə meyarları”nın hazırlanması zamanı istifadə edilən yanaşma və müvafiq meyarların ali təhsil müəssisələrinə verəcəyi töhfələr barədə danışıb. Nazir müavini qarşıda duran əsas vəzifələrdən biri kimi akkreditasiya prosesinin elektronlaşdırılması üzrə aparılan işləri forum iştirakçılarının diqqətinə çatdırıb və ali təhsil müəssisələrinin akkreditasiya qiymətləndirilməsi prosesinin rəqəmsal idarəedilməsinə keçidin təmin olunacağını bildirib.    İdris İsayev sonda beynəlxalq forumun ali təhsildə keyfiyyət təminatı mövzusunda aktual mövzuları əhatə etməsinin, həmçinin sahə üzrə qabaqcıl xarici agentliklərin rəhbər şəxsləri və tanınmış beynəlxalq ekspertlərin dəvətinin xüsusi əhəmiyyətini vurğulayıb.    Qeyd edək ki, iki gün davam edəcək konfransın ilk günündə çıxışlar zamanı ali təhsildə daxili və xarici keyfiyyət təminatı sisteminin Avropa ali təhsil məkanında keyfiyyət təminatı üzrə standart və təlimatlara (ESG) uyğun təşkil edilməsi, ali təhsil müəssisələrinin beynəlxalq reytinqlərdə mövqeyinin yaxşılaşdırılmasında xarici keyfiyyət təminatının rolu və digər məsələlərə toxunulub.     Eyni zamanda, panel müzakirələr zamanı təhsil proqramlarının dizaynı, xarici keyfiyyət təminatında tələbə təmsilçiliyinin önəmi və probleməsaslı öyrənmənin təmin edilməsində istifadə olunan yanaşma və strategiyalar haqqında fikir mübadiləsi aparılıb.   

18/05/2023 16:36

Mayın 18-də təhsilverənlərin sertifikatlaşdırılması  prosesinin test imtahanı ilə bağlı məlumat iştirakçıların şəxsi kabinetlərinə göndərilib.    Belə ki, 20-23 iyun tarixlərində ibtidai sinif, 24 iyunda isə Azərbaycan dili və ədəbiyyat fənnini tədris edən təhsilverənlər sertifikatlaşdırma prosesinin test imtahanı mərhələsinə cəlb olunacaqlar.   Müəllimlər portal.edu.az platformasından qeydiyyatdan keçərək “Sertifikatlaşdırma” bölməsinə daxil olmaqla test imtahanlarının vaxtı və yeri barədə məlumatlarla tanış ola bilərlər.    Portal.edu.az platformasının “Sertifikatlaşdırma” altsistemindən istifadə üçün hazırlanmış təlimat videosuna keçidə daxil olaraq baxa bilərsiniz:  https://youtu.be/lpLKFasQtm4   Bütün müəllimlərə uğurlar arzulayırıq!    

18/05/2023 12:55

Əlavə təhsilin “Təkrar ali və orta ixtisas təhsili” növü üzrə sənəd qəbulu prosesi davam edir. “Təhsil Mərkəzləşdirilmiş İnformasiya Sistemi”nə qoşulmuş ali təhsil müəssisələrinə müraciət etmək istəyənlər https://www.portal.edu.az/ vasitəsilə sənədlərini elektron formada təqdim edə bilərlər.   Sənəd qəbulu prosesi 31 avqust 2023-cü il saat 18:00-da bitəcək.   Qeyd edək ki, qəbul qaydaları ilə aşağıdakı fayldan tanış ola bilərsiniz: Əlavə təhsilin “Təkrar ali və orta ixtisas təhsili” növü üzrə suallar və cavabları

18/05/2023 10:30

Mingəçevir Dövlət Universitetinin (MDU) “Heydər Əliyev İli” çərçivəsində reallaşdırdığı “Heydər Əliyev xatirələrdə” adlı layihə ilə bağlı görüş keçirilib.    Görüşdə elm və təhsil nazirinin müavini Firudin Qurbanov, MDU-nun tələbə və əməkdaşları, Mingəçevir şəhəri üzrə ümumtəhsil məktəblərinin direktorları, gənc müəllim və şagirdlər iştirak ediblər.   Görüşdən əvvəl ümummilli liderin MDU-nun inzibati binasındakı büstü önünə güllər düzülüb, xatirəsi ehtiramla yad edilib.   Sonra Heydər Əliyevin 100 illik yubileyi münasibətilə  MDU tələbələrinin əl işlərindən ibarət sərgi ilə tanışlıq olub.   Giriş nitqi ilə çıxış edən MDU-nun rektoru Şahin Bayramov layihə barədə məlumat verib. Bildirib ki, layihənin məqsədi ümummilli liderin zəngin irsinin təbliği sahəsində ölkəmizdə reallaşdırılan kompleks və sistemli fəaliyyətlərə töhfə verməkdir. Layihə çərçivəsində ulu öndərin Azərbaycana rəhbərlik etdiyi dövrlərdə çalışmış ziyalılar və ictimai-siyasi xadimlərin MDU-nun tələbə və professor-müəllim heyəti ilə görüşlərinin keçirilməsi nəzərdə tutulur. Görüş iştirakçılarını salamlayan Firudin Qurbanov Heydər Əliyevin zəngin irsinin öyrənilməsi və təbliğinin önəmindən bəhs edib, gənc nəslin bu irsdən örnək götürməsinin vacibliyini bildirib. Ulu öndərin Azərbaycan dövlətinə və xalqına misilsiz xidmətlərini vurğulayan nazir müavini akademik Zərifə xanım Əliyevanı qlobal səviyyəli siyasətçinin əsas silahdaşı kimi dəyərləndirib. Heydər Əliyevin Azərbaycana rəhbərlik etdiyi bütün dövrlərdə elm və təhsilin inkişafına xüsusi diqqət ayırdığını bildirən Firudin Qurbanov təhsilin bütün səviyyələri üzrə müvafiq göstəricilərin dinamik artımını əks etdirən məlumatlar bölüşüb.   Ümummilli lideri gənclərin ən böyük himayədarı kimi xarakterizə edən nazir müavini tələbə və şagirdləri məsuliyyətli və təşəbbüskar olmağa səsləyib. Müstəqilliyimizi əbədi edən ulu öndərin siyasətinin bu gün uğurla davam etdirildiyini bildirən Firudin Qurbanov 44 günlük Vətən müharibəsi nəticəsində Heydər Əliyevin ən böyük arzusunun reallaşdırıldığını diqqətə çatdırıb.   Daha sonra Firudin Qurbanov görüş iştirakçılarının suallarını cavablandırıb.    Sonda xatirə şəkilləri çəkdirilib.

18/05/2023 10:00

Mayın 17-də Mədəniyyət və Sənətkarlıq üzrə Bakı Dövlət Peşə Təhsil Mərkəzində yeni inşa edilən televiziya  studiyasının açılış mərasimi keçirilib. Açılış mərasimində qonaqlara məlumat verilib ki, televiziya studiyası kameralar, işıqlandırma vasitələri, səsyazma cihazları və müvafiq köməkçi alətlər daxil olmaqla media sənayesində mövcud olan ən son texnologiyalarla təchiz edilib. Studiyada sinif otağı, səsyazma və peşəkar videomontaj bölmələri, prodüser otağı, həmçinin 115 kvadrat metr çəkiliş sahəsi təklif edən səs keçirməyən divarlar mövcuddur. Studiya müasir və qabaqcıl öyrənmə mühiti yaratmaqla tələbələrə yaradıcı sənaye məhsulları istehsal etmək və peşə bacarıqlarını təkmilləşdirmək üçün dəstək məqsədi daşıyır. Bildirilib ki, televiziya studiyasının rəqəmsal öyrənmə resurslarının inkişafı mərkəzinə çevrilməsi əsas hədəflərdən biridir. Bununla yanaşı, studiyanın müxtəlif sağlamlıq imkanlarına malik şəxslərin təliminə dəstək məqsədilə istifadəsi də nəzərdə tutulur. Tədbirdə çıxış edən elm və təhsil nazirinin müavini İdris İsayev son illər ölkə miqyasında peşə təhsilinin inkişafı istiqamətində atılan addımlara diqqət çəkib və yaradıcı sənaye üçün kadr hazırlığının əhəmiyyətini vurğulayıb. Birləşmiş Millətlər Təşkilatı İnkişaf Proqramının (BMTİP) Azərbaycandakı rezident nümayəndəsi səlahiyyətlərini icra edən Nuno Queniros isə qeyd edib ki, praktik və bazarın tələblərinə əsaslanan biliklərin öyrənilməsi üçün belə məkanların yaradılması olduqca əhəmiyyətlidir. Qeyd edək ki, yenidənqurmaya dəstək fəaliyyətləri Avropa İttifaqı tərəfindən maliyyələşdirilən və BMTİP tərəfindən Peşə Təhsili üzrə Dövlət Agentliyi ilə birgə həyata keçirilən “Gələcək üçün peşə təhsili və təlimi: Azərbaycanda qabaqcıl peşə təhsili mərkəzlərinin yaradılmasına dəstək” layihəsi çərçivəsində təşkil olunur. Layihənin məqsədi əmək bazarının tələblərinə uyğun tədrisin təşkilinə dəstək olmaq və bu istiqamətdə Azərbaycandakı peşə təhsili müəssisələrinin müasirləşdirilməsinə yardım etməkdir.

17/05/2023 15:36

Şagird sayı 500-dən çox olan ümumi təhsil müəssisələrinə direktorların işə qəbulu üzrə elektron sənəd qəbulu başa çatıb. Elektron qeydiyyat prosesində 2956 namizəd iştirak edib.   Hazırda elektron ərizələrin yoxlanılması həyata keçirilir. Yoxlama prosesi başa çatdıqdan sonra test imtahanı mərhələsi barədə məlumat namizədlərin şəxsi səhifələrinə göndəriləcək.   Test imtahanı mərhələsində namizədlərə pedaqogika və metodika üzrə 20 sual, tənqidi oxu bacarığı, təhsil və əmək qanunvericiliyi, liderlik və menecment, riyazi məntiq üzrə hər birinə aid 10 sual olmaqla ümumilikdə 60 test tapşırığı təqdim ediləcək. Test imtahanında uğur qazanmış namizədlər yazı işi mərhələsinə dəvət olunacaqlar.

17/05/2023 14:45