Elm və Təhsil Nazirliyinin rəsmi “YouTube” kanalı 100,000 abunə sayını keçdiyi üçün gümüş plaket mükafatına layiq görülüb. Bu nailiyyət nazirliyin rəqəmsal kommunikasiya və ictimaiyyətlə əlaqələr sahəsində uğurlu fəaliyyətinin nəticəsi olaraq qiymətləndirilir.   Nazirliyin 100 mindən çox izləyicisi olan “YouTube” kanalı vasitəsilə elm və təhsil sahəsinə dair maarifləndirici videolar, elmi-innovativ layihələrlə bağlı videoçarxlar, müsahibələr, müəllim və şagirdlərə dair motivasiyaedici süjetlər, habelə müxtəlif tədbirlər barədə məlumatlar ictimaiyyətə təqdim olunur. Platformada indiyədək 9776 video yayımlanıb və ümumi baxış sayı 20.000.000 nəfəri keçib.   Qeyd edək ki, Elm və Təhsil Nazirliyi yalnız “YouTube”da deyil, digər sosial media platformalarında da geniş təmsil olunur: Facebook – 241000 izləyici Instagram – 152000 izləyici LinkedIn – 23000 izləyici X (Twitter) – 22000 izləyici Telegram – 19000 abunəçi TikTok – 17000 izləyici "Whatsapp" kanalı - 38000 izləyici   Bu platformalarda nazirliyin ümumi fəaliyyəti, elm və təhsil sahəsinə dair bütün məlumatlar ictimaiyyətə operativ şəkildə çatdırılır.   Bizi izləməyi unutmayın! - https://linktr.ee/edu.gov.az

16/05/2025 12:55

Mayın 1-dən 14-dək Elm və Təhsil Nazirliyi, eləcə də qurumlarına 30 688 vətəndaş müraciəti daxil olub.   Müraciətlərin 19 459-u çağrı mərkəzləri, 4 781-i elektron, 814-ü isə yazılı formada yönləndirilib. Həmçinin vətəndaş qəbulu zamanı 5 634 müraciət qeydə alınıb.  Müraciətlər xarici diplomların tanınması, texniki işlə təminolunma, təhsil tələbə krediti, birinci sinfə qəbul və digər məsələlərlə bağlı olub.

16/05/2025 12:38

Mayın 15-də Azərbaycan İlahiyyat İnstitutunda (Aİİ) “Ailə dəyərlərimizə gənclərin baxışı” mövzusunda tədbir keçirilib. Tədbirdə Dini Qurumlarla İş üzrə Dövlət Komitəsinin sədri Ramin Məmmədov, elm və təhsil nazirinin müavini Firudin Qurbanov, gənclər və idman nazirinin müavini İndira Hacıyeva, Milli Məclisin İctimai birliklər və dini qurumlar komitəsinin sədri Fazil Mustafa, Milli Məclisin Elm və təhsil komitəsinin sədri Anar İsgəndərov, Ailə, Qadın və Uşaq Problemləri üzrə Dövlət Komitəsinin sədr müavini, Mənəvi Dəyərlərin Təbliği Fondunun Himayəçilik Şurasının sədri Aynur Sofiyeva və digər qonaqlar iştirak ediblər. Tədbir iştirakçıları öncə Aİİ nəzdində fəaliyyət göstərən “İslam incəsənəti” dərnəyi tərəfindən hazırlanmış “Ailə dəyərləri İslam incəsənətinin gözü ilə” sərgisi ilə tanış olublar. Açıq dərs formatında davam edən tədbirdə ali təhsil müəssisəsinin tələbələri İslamda ailə dəyərləri, uşaq tərbiyəsi, ailə institutunun ictimai əhəmiyyəti, erkən nikahın qarşısının alınmasında təhsilin rolu mövzularında təqdimatlarla çıxış ediblər. Dini Qurumlarla İş üzrə Dövlət Komitəsinin sədri Ramin Məmmədov tələbələrin nümunəvi çıxışlarını, xüsusilə aktual problemlərdən olan erkən nikahın fəsadlarının qabardılmasını müsbət hal kimi dəyərləndirib. Gənclərimizin milli-mənəvi dəyərlərimizə sadiq, cəmiyyətin tərəqqisinə, dövlətimizin inkişafına töhfə verəcək şəxsiyyət kimi yetişdirilməsinin önəmli olduğunu diqqətə çatdırıb.  Elm və təhsil nazirinin müavini Firudin Qurbanov tələbələrin çıxış etdikləri mövzuların aktuallığını vurğulayıb, cəmiyyətə ötürmək istədikləri mesajların xüsusi əhəmiyyət daşıdığını qeyd edib. Bildirib ki, tələbələr mühazirələrdə ənənə və müasirliyi bir araya gətirərək ailə dəyərlərimizi təqdim etdilər. Gənclər və idman nazirinin müavini İndira Hacıyeva da tələbələrin çıxışlarını yüksək qiymətləndirib. Qeyd edib ki, milli-mənəvi dəyərlərimizin qorunması istiqamətində mövzunun aktuallığını və həssaslığını nəzərə alsaq, belə bir açıq dərsin keçirilməsi təqdirəlayiqdir. Ailə, Qadın və Uşaq Problemləri üzrə Dövlət Komitəsinin sədr müavini, Mənəvi Dəyərlərin Təbliği Fondunun Himayəçilik Şurasının sədri Aynur Sofiyeva tələbələrin təhsil aldıqları müddətdə göstərdikləri ictimai-sosial aktivliyin önəminə toxunub.  Milli Məclisin İctimai birliklər və dini qurumlar komitəsinin sədri Fazil Mustafa isə öz növbəsində müxtəlif ixtisaslar üzrə təhsil alan tələbələrin fərqli mövzularda araşdırmalarını, o cümlədən tədqiqatları zamanın tələbinə uyğunlaşdırmaq səylərini yüksək qiymətləndirib.  Milli Məclisin Elm və təhsil komitəsinin sədri Anar İsgəndərov da çıxış edərək gənclərimizin milli-mənəvi dəyərlərimizin qorunması, cəmiyyətin maarifləndirilməsi istiqamətində səylə çalışmalarının gələcək fəaliyyətlərində özünü büruzə verəcəyinə əminliyini bildirib. Dini Qurumlarla İş üzrə Dövlət Komitəsi yanında İctimai Şuranın sədri Elnur Mustafayev çıxışında ailə işinin fərdi, ictimai, eyni zamanda, dövlət məsələsi olduğunu vurğulayıb. Sonda Azərbaycan İlahiyyat İnstitutunun rektoru Aqil Şirinov çıxış edərək qeyd edib ki, institutun əsas məqsədi Vətəninə, xalqına layiq, məntiqi təfəkkürü formalaşmış, zəngin dünyagörüşlü, yüksəkintellektli kadrların hazırlanmasıdır. Tədbirdə “Ailə dəyərlərimizə gənclərin baxışı” mövzusunda keçirilən esse müsabiqəsinin qalibləri və iştirakçıları, həmçinin sərginin hazırlanmasında və açıq dərsdə fəallıq göstərənlər təltif olunublar.

15/05/2025 17:00

Mayın 15-də Heydər Əliyev Mərkəzində ümumi təhsil müəssisələrinin IX-XI sinif şagirdlərinin iştirakı ilə “Zəkaların mübarizəsi” olimpiadasının final mərhələsi keçirilib.   Heydər Əliyev Fondu və Elm və Təhsil Nazirliyinin birgə layihəsi olan olimpiadanın final mərhələsi ümummilli lider Heydər Əliyevin anadan olmasının 102-ci ildönümünə həsr edilib. Bu mərhələ bilik yarışı və şahmat turnirindən ibarət olmaqla komanda yarışı formatında baş tutub.    Əvvəlcə Heydər Əliyev Mərkəzi ilə tanışlıq olub.    Final mərhələsinin rəsmi açılış mərasimində çıxış edən Heydər Əliyev Fondunun nümayəndəsi Cəmil Əliyev qeyd edib ki, Fondun fəaliyyətində əsas prioritet istiqamətlərdən biri təhsil sahəsidir. Fond, təhsilin inkişafı məqsədilə ölkənin bütün bölgələrində – hətta ən ucqar kəndlərində belə – yeni məktəb binalarının tikintisinə və mövcud məktəblərin əsaslı təmirinə xüsusi önəm verir. Bu layihələrin başlıca məqsədi şagirdlərimizin keyfiyyətli təhsil almasını təmin etməkdir.  Bildirilib ki, sözügedən tədbir şagirdlər arasında həm elmi biliklərin, həm də dostluq və sosial bacarıqların inkişafına yönəlib.   Çıxış edən Təhsil İnstitutunun direktor müavini Fuad Qarayev Elm və Təhsil Nazirliyi tərəfindən istedadlı şagirdlərin aşkar olunması və inkişaf etdirilməsi məqsədilə bir çox layihələrin həyata keçirildiyini, bu olimpiadanın da həmin təşəbbüslərdən biri olduğunu deyib. Fuad Qarayev finalda iştirak edən şagirdlərin müxtəlif regionları təmsil etdiyini vurğulayaraq bu yarışın həm bilik, həm də zəka üzərində qurulmuş bir mübarizə olduğunu diqqətə çatdırıb. Əlavə edib ki, bu tədbir həm də milli və mənəvi dəyərlərin təşviqinə, azərbaycançılıq ideyasının möhkəmləndirilməsinə xidmət edir.    Çıxışlardan sonra yarışlara start verilib.    Final mərhələsində bilik yarışı istiqaməti üzrə Bakı şəhərinin Xəzər, Nəsimi, Yasamal, Xətai, Nərimanov rayonları, Gəncə, Naxçıvan, Mingəçevir, Şəki şəhərləri, Abşeron, İsmayıllı, Lerik, Saatlı, Bərdə, Qazax, Qusar, Zəngilan, Neftçala rayonları, şahmat turniri üzrə isə Bakı şəhərinin Xətai, Xəzər, Sabunçu, Səbail, Yasamal rayonları, Gəncə, Naxçıvan, Sumqayıt, Şəki şəhərləri, Ağcabədi, Ağsu, Beyləqan, Cəbrayıl, Göyçay, Quba, Masallı, Neftçala, Tovuz rayonlarından olan komandalar mübarizə aparıb.    Bilik yarışı üzrə finalda iştirak hüququ əldə edən komanda sayı 18, iştirakçı sayı isə 108 nəfər olub. Olimpiadanın bilik yarışında məktəblilər riyaziyyat, rəqəmsal texnologiyalar, təbiət və humanitar elmlər, mədəniyyət və incəsənət sahələri üzrə sualları cavablandırıblar.    Şahmat turniri üzrə isə 12 müxtəlif regiondan 1 qalib komanda, Bakı şəhərindən 5 ən yaxşı komanda, Naxçıvan MR-dan 1 komanda olmaqla cəmi 90 iştirakçıdan ibarət 18 komanda final mərhələdə iştirak hüququ əldə edib.   Qeyd edək ki, yaxın günlərdə qaliblərin mükafatlandırılması həyata keçiriləcək.    Sözügedən olimpiadanın keçirilməsində əsas məqsəd müxtəlif sahələrdə bilik və bacarığı ilə seçilən istedadlı gəncləri aşkarlamaq, şagirdlərdə əməkdaşlıq, effektiv ünsiyyət, liderlik keyfiyyətləri, müzakirə mədəniyyəti, qərar vermə, komanda ilə işləmə, analitik və məntiqi düşünmə, planlaşdırma və strategiya qurma bacarıqlarını inkişaf etdirmək, onlar arasında sağlam rəqabət mühitini formalaşdırmaq və region gəncləri arasında ünsiyyət mühitini genişləndirməkdir.

15/05/2025 16:00

Elm və Təhsil Nazirliyinin təşəbbüsü və Təhsilin İnkişafı Fondunun dəstəyi ilə həyata keçirilən III “Maarifçi” tələbə-məzun təcrübə proqramına qəbulun ilkin mərhələsinin nəticələri elan olunub.    3542 nəfərin iştirak etdiyi qeydiyyat prosesində müsabiqə şərtlərinə cavab verən 2037 namizəd test imtahanında iştirak şansı qazanıb.    İmtahan 17 may saat 11:00-da “Microsoft Teams” platforması üzərindən onlayn formatda həyata keçiriləcək. Test imtahanında namizədlərə məntiq, dünyagörüşü, informasiya texnologiyaları, davranış səriştələrinin yoxlanılması üçün situasiya tipli mövzuları əhatə edən 60 sual təqdim olunacaq. İlkin mərhələdə seçdiyi sahəyə əsasən keçid balını toplayan namizədlər müsahibə mərhələsinə buraxılacaqlar.    Qeyd edək ki, 4 ay davam edəcək “Maarifçi” proqramının məqsədi tələbə və yeni məzun olmuş gənclərə təcrübə imkanı yaratmaq, onların bilik və bacarıqlarını artırmaq, nəzəri biliklərini real iş mühitində tətbiq etmələrinə və peşəkar vərdişlər qazanmalarına dəstək olmaqdır. Seçilmiş iştirakçılar Elm və Təhsil Nazirliyinin müxtəlif struktur bölmələri və tabe qurumlarında, regional təhsil idarələrində, eləcə də Naxçıvan Muxtar Respublikasının Təhsil Nazirliyində təcrübə keçmək imkanı əldə edəcəklər.    Xatırladaq ki, I və II “Maarifçi” tələbə-məzun təcrübə proqramı çərçivəsində 24 iştirakçı Elm və Təhsil Nazirliyinin tabe qurumlarında, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində işlə təmin olunub.

14/05/2025 11:53

Elm və Təhsil Nazirliyinin dəstəyi ilə həyata keçirilən “Məktəblilərarası Milli Hakaton - 2025” müsabiqəsinin növbəti mərhələsində yarışacaq iştirakçıların siyahısı açıqlanıb.    22-25 aprel tarixlərində keçirilən seçim mərhələsində 15 000-dən çox şagirdin texnoloji və analitik bacarıqları müxtəlif tapşırıqlar vasitəsilə qiymətləndirilib. Nəticələrə əsasən 1640 şagird növbəti mərhələdə iştirak şansı qazanıb. Həmin iştirakçıların siyahısı codehour.edu.az saytında yerləşdirilib.    Qeyd edək ki, dörd mərhələ və finaldan ibarət olan hakaton müddətində iştirakçılar test tapşırıqları, komanda işi və layihə hazırlığı kimi yaradıcı və innovativ fəaliyyətlərdə iştirak edəcəklər. III və IV mərhələlər 5 müxtəlif regionda təşkil ediləcək. Bu mərhələlərdə iştirakçılar üçün onların bilik və bacarıqlarının inkişafına töhfə verəcək maarifləndirici sessiya və seminarlar təşkil ediləcək.  Müsabiqənin final mərhələsində isə 120 iştirakçıdan ibarət 30 komanda yarışacaq. Qalib komandaları dəyərli mükafatlar və xüsusi hədiyyələr gözləyir.

14/05/2025 10:56

Elm və Təhsil Nazirliyi və tabe qurumların əməkdaşlarının davamlı inkişafının təmin olunması, liderlik və idarəetmə bacarıqlarının artırılması, müasir çağırışlara hazır olan kadrların yetişdirilməsi məqsədilə həyata keçirilən “Danışır təcrübə” layihəsi davam edir.   Layihənin budəfəki qonağı Azərbaycanın siyasi və dövlət xadimi, diplomat və tarixçi Həsən Həsənov olub.    Uzun illər ulu öndər Heydər Əliyevlə birgə çalışmış Həsən Həsənov “Ümummilli lider Heydər Əliyevin böyük siyasət yolu xatirələrdə” mövzusunda çıxış edib, ulu öndər haqqında maraqlı xatirələrindən danışıb.   Görüş iştirakçıları ümummilli liderin hakimiyyəti illərində təhsilin inkişafı ilə əlaqədar verilən mühüm qərarlarla maraqlanıb, həyata keçirilən tədbirlər ətrafında müzakirə aparıblar.   Nazirlik və tabe qurumların əməkdaşları 1992-ci ildən xarici siyasət və diplomatiya sahəsində fəaliyyət göstərmiş Həsən Həsənovun iş və idarəetmə təcrübəsi ilə tanış olmaq imkanı da əldə edib, dövlət qulluqçuları olaraq onlar üçün Həsən Həsənovun təcrübəsinin çox faydalı olduğunu vurğulayıblar.   Sonda görüş iştirakçılarının çoxsaylı sualları cavablandırılıb.

13/05/2025 17:00

Ümummilli lider Heydər Əliyevin anadan olmasının 102-ci ildönümü münasibətilə ümumi təhsil müəssisələrinin IX–XI sinif şagirdləri arasında təşkil olunmuş “Ən yaxşı təqdimat” müsabiqəsinin mayın 13-də mükafatlandırılma mərasimi keçirilib.   Tədbir Dövlət Himninin səsləndirilməsi ilə başlayıb. Ardınca müsabiqəyə həsr olunmuş videoçarx nümayiş etdirilib.    Açılış mərasimində Milli Məclis sədrinin birinci müavini, Yeni Azərbaycan Partiyası sədrinin müavini Əli Əhmədov, elm və təhsil naziri Emin Əmrullayev, Dövlət Statistika Komitəsinin sədri, YAP sədrinin müavini Tahir Budaqov çıxış ediblər.   Çıxışı zamanı Əli Əhmədov 2007-ci ildən bəri keçirilən müsabiqənin kifayət qədər uğurlu olduğunu diqqətə çatdırıb. Bildirib ki, Azərbaycanın gələcəyinin təmin olunması üçün gənclərə göstərilən diqqət və qayğı Heydər Əliyevin həyata keçirdiyi siyasətin ən mühüm istiqamətlərindən birini təşkil edirdi. Bu gün Azərbaycanda istedadlı, təşəbbüskar və müasir düşüncəli gənclər formalaşıb. Onlar yüksək keyfiyyətli təhsil alır, beynəlxalq arenada ölkəmizi layiqincə təmsil edirlər.   Çıxışının sonunda qalibləri təbrik edən Əli Əhmədov əlavə edib ki, bu günün və gələcəyin çağırışlarına cavab verə biləcək əsas amillər bilik, bacarıq, müasir texnologiyalara yiyələnmək qabiliyyətidir. Bütün bu meyarlar isə təhsilin və elmin cəmiyyətdəki rolunu getdikcə daha da artırır.   Müsabiqə qaliblərini təbrik edən elm və təhsil naziri Emin Əmrullayev fənlər üzrə müxtəlif müsabiqələrin keçirildiyini, şagirdlərin müxtəlif sahələrdə bilik və bacarıqlarının ölçüldüyünü, amma  “Ən yaxşı təqdimat” müsabiqəsinin bu müsabiqələr arasında xüsusi əhəmiyyət daşıdığını diqqətə çatdırıb. Nazir bildirib ki, müsabiqənin məqsədi Azərbaycanlı kimliyinin, milli məfkurəmizin, ümumilikdə isə Azərbaycanın bir dövlət və azərbaycanlıların bir xalq kimi formalaşmasında misilsiz rolu olmuş irsimizin öyrənilməsidir. Bu, ideoloji baxımdan çox önəmli bir təşəbbüsdür. Nazir əlavə edib ki, təhsilin digər mühüm istiqaməti milli kimliyin formalaşmasıdır.    İşğaldan azad olunmuş ərazilərdəki təhsil müəssisələrinin fəaliyyətindən də söz açan Emin Əmrullayev qeyd edib ki, yaxın illərdə həmin  ərazilərdə təhsilin bərpası və inkişafı istiqamətində böyük irəliləyişlər olacağını əminliklə deyə bilərik.    Tahir Budaqov isə öz növbəsində ulu öndər Heydər Əliyevin Azərbaycanın inkişafı üçün misilsiz xidmətlərindən söz açıb, çıxışının sonunda qalibləri təbrik edib.    Mərasimdə İncəsənət Gimnaziyası və uşaq-gənclər inkişaf mərkəzlərinin şagirdlərinin ifasında müxtəlif musiqi və rəqs nömrələri də təqdim olunub.    Sonda səhnəyə dəvət olunan 35 qalibə diplomlar və hədiyyələr təqdim olunub, xatirə şəkli çəkdirilib.   Qeyd edək ki, ümumi təhsil müəssisələrinin IX-XI sinif şagirdləri arasında keçirilən müsabiqəyə ölkəmizin regionlarından ümumilikdə 3952 şagird qatılıb. 90 nəfər şagird ölkə mərhələsində iştirak hüququ qazanıb. Onların təqdimat çıxışları müsabiqə komissiyası tərəfindən qiymətləndirilib və nəticədə 6 nəfər I, 13 nəfər II, 16 nəfər isə III yerə layiq görülüb.   Müsabiqə Elm və Təhsil Nazirliyi , Heydər Əliyev Fondu, Yeni Azərbaycan Partiyası, Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkilatçılığı ilə keçirilib. 

13/05/2025 14:50

13 may saat 11:00-dan ali təhsil pilləsinin doktorantura səviyyəsinə sənəd qəbulu prosesinə başlanılıb.   Sənəd qəbulu prosesi elektron qaydada  portal.edu.az vasitəsilə həyata keçirilir.    Sənəd qəbulu 2 iyun saat 18:00-da başa çatacaq.    Doktoranturaya sənəd qəbuluna dair ən çox soruşulan suallar və cavabları ilə aşağıdakı linkə daxil olaraq tanış ola bilərsiniz:    https://edu.gov.az/uploads/Ali-tehsil/2025/dokturantura-qebul-telimat.pdf  

13/05/2025 11:30

Mayın 12-də elm və təhsil naziri Emin Əmrullayev Dünya Bankının Cənubi Qafqaz üzrə regional direktoru xanım Rolande Praysın rəhbərlik etdiyi nümayəndə heyəti ilə görüşüb.    Görüş zamanı Dünya Bankı ilə təhsil sahəsində ikitərəfli əməkdaşlıq və gələcək inkişaf perspektivləri müzakirə edilib.

12/05/2025 17:55