Noyabrın 8-də elm və təhsil nazirinin müavini İdris İsayev Fransanın Paris şəhərində keçirilən UNESCO baş konfransının 42-ci sessiyası çərçivəsində qlobal sülhün təminatında təhsilin roluna həsr olunmuş iclasda çıxış edib.   İdris İsayev çıxışında 30 ilə yaxın müddət davam etmiş Azərbaycan Respublikası ərazilərinin işğalının ümumilikdə təhsil sisteminə və təhsilalanların hüquqlarına törətdiyi mənfi fəsadlardan danışıb. Nazir müavini işğaldan azad olunan ərazilərdə təhsil infrastrukturunun bərpası istiqamətində görülən işlərə toxunaraq ölkəmizdə etnik mənsubiyyətindən asılı olmayaraq, hər kəsin keyfiyyətli təhsilə çıxışının təmin edildiyini vurğulayıb. İdris İsayev bölgədə davamlı sülhün əldə olunmasının vacibliyini və bu prosesə UNESCO-nun verə biləcəyi töhfəni önə çəkib.   Nazir müavini konfrans çərçivəsində Cibutinin milli təhsil və peşə təlimi naziri Mustafa Mohamed Mahamud ilə görüşüb. Görüş zamanı tərəflər arasında əməkdaşlığın perspektivləri, o cümlədən Cibuti vətəndaşlarının ölkəmizdə təhsil almaq imkanları müzakirə olunub.   Nazir müavini həmçinin Türkiyə Respublikasının milli təhsil naziri Yusuf Tekin və Çin Xalq Respublikasının təhsil naziri Huai Jinpeng ilə işçi qaydada müzakirələr aparıb.

09/11/2023 16:25

Noyabrın 7-də Elm və Təhsil Nazirliyinin təşkilatçılığı ilə Heydər Əliyev sarayında 8 Noyabr – Zəfər Gününə həsr olunmuş “ZəfərFest – 3” yaradıcılıq sərgi-festivalı keçirilib.   Festivalda tanınmış mədəniyyət və incəsənət xadimləri, şəhid övladları, təhsil müəssisələrinin pedaqoji, şagird kollektivləri, rəsmi qurumların nümayəndələri və digər qonaqlar iştirak ediblər.    Tədbirin sərgi hissəsində nazirlik sistemində fəaliyyət göstərən uşaq-gənclər inkişaf mərkəzlərinin yetirmələrinin Zəfər Günü ilə bağlı hazırladıqları rəsm və əl işlərinə baxış keçirilib.   Bədii hissədə Elm və Təhsil Nazirliyi sistemində fəaliyyət göstərən uşaq-gənclər inkişaf mərkəzlərinin özfəaliyyət kollektivləri, Azərbaycan Milli Konservatoriyası tərkibində İncəsənət gimnaziyası, həmçinin Bülbül adına orta ixtisas musiqi məktəbinin simfonik orkestri, Cövdət Hacıyev adına 3 nömrəli onbirillik musiqi məktəbinin kollektivi, ümumilikdə isə 300-dən çox məktəblinin iştirakı ilə ədəbi-bədii kompozisiyalar nümayiş olunub, məktəblilərin ifasında vətənpərvərlik mövzusunda şeir və mahnılar səslənib.   Qeyd edək ki, sərgi-festivalın məqsədi Vətən müharibəsində şəhid olmuş qəhrəmanlarımızın əziz xatirəsinin ehtiramla yad edilməsi, Azərbaycan ordusunun zəfər yürüşü, şanlı qələbəsi və dünya hərb tarixində açdığı yeni səhifə ilə bağlı uşaq və gənclərin maarifləndirilməsi, qazanılan zəfərin bütün türk dünyasının qələbəsi olduğunun gənc nəslə çatdırılmasından ibarət olub.

07/11/2023 18:00

Noyabrın 7-də Azərbaycan Respublikasının Prezidenti İlham Əliyev və birinci xanım Mehriban Əliyeva Şuşa şəhərində “Qızlar gimnaziyası” tarixi abidə binasında həyata keçiriləcək işlərlə tanış olublar. Dövlətimizin başçısına və birinci xanıma tarixi abidə barədə məlumat verildi.   Bildirildi ki, Şuşada müstəqil qız məktəbi 1875-ci il oktyabrın 26-da Şuşa əhalisinin təşkil etdiyi “Xeyriyyə cəmiyyəti” tərəfindən təsis olunub. Dini etiqadından və mənşəyindən asılı olmayaraq, bütün qızlara burada təhsil almaq imkanı yaradılmışdı. Tədris planına rus dili, hesab, ana dilində oxuma, yazma, hüsnxət, rəsm, rəsmxət, ümumi coğrafiya, tarix, ölkəşünaslıq daxil idi. Eyni zamanda, məktəbdə milli mahnılar öyrədilir, təbiət, tarix və fizikadan dərs verilirdi. Məktəbdə təhsil ödənişli olsa da, kasıb ailələrin övladları təhsil haqqından azad idilər. Əlavə təhsil haqqı verənlərə fransız və alman dilləri də tədris edilir, musiqi öyrədilirdi. Qızların rus dilində təhsilinə diqqəti artırmaq və xərcin bir qismini xəzinədən ödəmək şərti ilə Şuşa qız məktəbi 1894-cü ildə Şuşa Marinski qız məktəbi adını aldı və dördsinifli məktəbə çevrildi. Məktəb 120 şagirdlə fəaliyyətə başladı. Artıq 1895-1896-cı tədris ilində burada 147 qız təhsil alırdı. Bu məktəbin təşkili azərbaycanlı qızların da rus dilində təhsilinə şərait yaratmışdı. Şuşa Marinski qız məktəbi qadınların təhsili sahəsində, azərbaycanlı qızların dünyəvi təhsil almasında mühüm rol oynayıb. 1894-cü ildə Şuşada iki şəxsi qız məktəbinin əsasında Müqəddəs Mariya qız məktəbi yaradılmış, bununla da azərbaycanlı qızların Avropa təhsilinə yolları açılmışdı.   Qeyd edildi ki, bina sovet dövründə internat məktəbi kimi də fəaliyyət göstərib. Gələcəkdə buranın dekorativ tətbiqi sənət mərkəzi və mədəni sahələr üzrə inzibati bina kimi istifadə olunması planlaşdırılır.   https://president.az

07/11/2023 17:02

15 noyabr saat 11:00-dan məktəbəhazırlıq qrupları və 1-ci siniflərin elektron yerdəyişməsi prosesinə start veriləcək.   Şagirdlərin yerdəyişməsi prosesi www.sy.edu.az portalı vasitəsilə həyata keçiriləcək.

07/11/2023 16:31

Azərbaycan Respublikasının Prezidenti İlham Əliyev və birinci xanım Mehriban Əliyeva noyabrın 7-də Şuşa şəhəri 1 nömrəli tam orta məktəbin açılışında iştirak ediblər.   Dövlətimizin başçısına və birinci xanıma məktəbdə yaradılan şərait barədə məlumat verildi.   Bildirildi ki, 960 şagird yerlik üçmərtəbəli bina beş blokdan ibarətdir. Burada hər biri 24 nəfərlik 40 sinif otağı, 2 fizika, 2 kimya, 2 biologiya, 2 texnologiya, 2 informatika otağı, STEAM mərkəzi, kitabxana, oxu zalı, gənclərin ibtidai hərbi hazırlığı, rəssamlıq və musiqi kabinetləri, yeməkxana, akt və idman zalları, tibb, müayinə və inzibati heyət üçün iş otaqları var. Məktəb üçün ayrılan ərazidə futbol meydançası və digər zəruri yardımçı binaların inşası yekunlaşıb.   Azərbaycan dövlətinin Qarabağda və Şərqi Zəngəzurda həyata keçirdiyi bərpa və yenidənqurma prosesi çərçivəsində müasir, innovasiyalara əsaslanan təhsil ocaqlarının qurulmasına xüsusi diqqət ayrılır. Şuşadakı 1 saylı orta məktəb bunun daha bir əyani təsdiqidir. Müasir tələblərə cavab verən yeni təhsil müəssisəsi Şuşanın bərpa səviyyəsi ilə uzlaşmaqla yanaşı, Böyük Qayıdış Proqramı çərçivəsində şəhərə qayıdacaq şagirdlərin ən qabaqcıl standartlara uyğun təhsil almasına xidmət edəcək.   Qeyd edək ki, ölkəmizin mədəniyyət paytaxtı Şuşa Azərbaycanın ictimai-siyasi həyatında özünəməxsus rol oynayıb. Azərbaycanın ictimai-siyasi fikir tarixində mühüm yer tutan bir sıra görkəmli şəxsiyyətlər, maarifçi ziyalılar məhz Şuşada doğulub boya-başa çatıblar. Həmin şəxslər Şuşada fəaliyyət göstərən, dövrün qabaqcıl təhsil müəssisələrinin yetirmələri idilər. Belə ki, Şuşada fəaliyyət göstərən xəttatlıq, teatr, musiqi, vokal, eləcə də ilk qızlar, rus-tatar məktəbləri, qızlar seminariyası, realnı məktəb yerli əhalinin intellektual səviyyəsini, dünyagörüşünü inkişaf etdirməyə, şəhərin ziyalı səviyyəsini qoruyub saxlamağa imkan verdi. Şuşada 1 saylı tam orta məktəbin inşası da məhz bu baxımdan xüsusi əhəmiyyət daşıyır. Belə ki, məktəbin inşası bu qədim şəhərin təhsil mərkəzi şöhrətinin qaytarılması missiyasına xidmət edən növbəti addımdır.   https://president.az

07/11/2023 16:00

Azərbaycan Respublikasının Prezidenti İlham Əliyev və birinci xanım Mehriban Əliyeva noyabrın 7-də Şuşa şəhərində peşə məktəbinin və kollecin binalarına baxış keçiriblər.   Elm və təhsil naziri Emin Əmrullayev dövlətimizin başçısına və birinci xanıma görüləcək işlər barədə məlumat verdi.   Bildirildi ki, peşə məktəbi və kollec Şuşanın tarixi Hamamqabağı, Seyidli və Culfalar məhəllələrində yerləşir. Sovet dövründə həmin ərazidə keçmiş kənd təsərrüfatı texnikumu və onun yataqxanası yerləşirdi. Həmin ərazidə peşə məktəbi də tikilmişdi.   Prezident İlham Əliyev peşə məktəbinin və kollecin ərazisinə baxıb, tapşırıq və tövsiyələrini verib.   https://president.az

07/11/2023 15:40

Birləşmiş Ərəb Əmirliklərinin “Əbu-Dabi gələcək enerji” şirkəti “Gələcəyin dayanıqlılıq liderləri – 2024” adlı birillik təlim proqramı elan edir. Proqramın təşkil olunmasında məqsəd tələbə və gənc mütəxəssislərin dayanıqlı inkişaf liderləri olmaları üçün onlara sahə üzrə bilik və təlim kursları, həmçinin elmi təcrübələr təqdim etməklə həmin şəxslərin davamlılıq gündəliyinə nail olmaqda fəal iştiraklarına şərait yaratmaqdır. Təlim proqramına müraciət üçün son tarix 19 noyabr 2023-cü ildir. Proqram barədə ətraflı məlumatIa elan vasitəsilə tanış ola bilərsiniz.

07/11/2023 11:39

“Parlaq gələcəyim” layihəsi çərçivəsində Xızı rayonunun Mikayıl Müşfiq adına Giləzi qəsəbə tam orta məktəbinin şagirdləri ilə görüş keçirilib.    Görüşdə “2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində İtaliyanın “Polytechnic School of Design” Universitetindən məzun olmuş Xatirə Hüseynəliyeva dizayn ixtisası barədə uşaqları məlumatlandırıb.    Görüşdə iştirak edən Azərbaycanlı Tələbələr və Məzunlar Platformasının (ASAP) baş katibi Güldanə Dadaşova təhsil müddətində və sonra azərbaycanlı tələbələrin, məzunların yaratdığı birliklərdən, eləcə də dövlətin gənclərə dəstəyi, keçirilən tədbir və görüşlərdən danışıb.    150-yə yaxın şagirdin iştirak etdiyi görüşdə həmçinin “2022–2026-cı illər üzrə Dövlət Proqramı” və Hökumətlərarası Təqaüd Proqramlarına qəbul barədə məlumat verilib, daha sonra uşaqlarla keçirilən intellektual oyunlar çərçivəsində onlara hədiyyələr təqdim olunub.    Qeyd edək ki, layihənin məqsədi xaricdə təhsil alan gənclərin, o cümlədən dövlət proqramları və Hökumətlərarası Təqaüd Proqramları məzunlarının şagirdlərlə təcrübələrini bölüşməsini təmin etmək, müasir ixtisas sahələri, gələcəyin tələbləri, peşə seçimi barədə onları məlumatlandırmaqdır.

07/11/2023 10:38

Noyabrın 6-da Elm və Təhsil Nazirliyi Müdafiə Nazirliyi ilə birgə Laçın şəhərində “Bayraq yürüşü” keçirib.   2014-cü ildən keçirilən “Bayraq yürüşü” bu il ilk dəfə işğaldan azad edilmiş ərazidə təşkil olunub. Yürüşdə 300-dən çox şəxs iştirak edib.   Yürüşün keçirilməsində məqsəd Vətən müharibəsində qazanılmış şanlı qələbəni, bayrağımızın daşıdığı milli-mənəvi dəyərləri təbliğ etmək, şəhid və qazilərimizin tarixi zəfər yolunu uca tutmaqdır. 9 Noyabr – Dövlət Bayrağı Günü ilə əlaqədar keçirilən yürüşdə elm və təhsil nazirinin müavini Firudin Qurbanov, Şərqi Zəngəzur iqtisadi rayonuna daxil olan Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov, Müdafiə Nazirliyinin rəsmiləri, Şərqi Zəngəzur Regional Təhsil İdarəsinin rəhbərliyi və əməkdaşları, Milli Qəhrəman Polad Həşimovun həyat yoldaşı Ofelya Salmanova, Şəhid Əlihüseyn Məmmədovun anası, Bakı şəhəri 226 nömrəli tam orta məktəbin direktoru Arzu Məmmədova, hərbçilər, 44 günlük Vətən müharibəsi iştirakçısı olan müəllimlər, media qurumlarının rəhbərləri, idman sahəsində nailiyyətlər əldə edən şəxslər, sertifikatlaşdırmada yüksək bal toplayan müəllimlər, KİV nümayəndələri, şagird və müəllimlər iştirak ediblər.   Yürüşün rəsmi tədbir hissəsi Dövlət Himninin səsləndirilməsi ilə başlayıb. Sonra şəhidlərin xatirəsi birdəqiqəlik sükutla yad edilib.   Açılış nitqi ilə çıxış edən elm və təhsil nazirinin müavini Firudin Qurbanov bu gün Laçında "Bayraq yürüşü"nün keçirilməsini qürurverici hadisə olaraq qiymətləndirib. Nazir müavini ulu öndər Heydər Əliyevin uzaqgörən siyasəti nəticəsində Azərbaycanın güclü iqtisadiyyatının formalaşdığını və bütün sahələrdə uğurlu işlərin həyata keçirildiyini vurğulayıb. Ölkə Prezidenti cənab İlham Əliyev tərəfindən ümummilli liderin uğurlu siyasətinin müasir çağırışlara uyğun davam etdirildiyini bildirən Firudin Qurbanov dövlətimizin başçısının uzaqgörənliyi, cəsarəti və diplomatik səyləri nəticəsində 44 günlük Vətən müharibəsinin qələbə ilə sonlandığını bir daha xatırladıb.   Bu gün Azərbaycan Bayrağının işğaldan azad edilmiş ərazilərdə dalğalanmasına görə şəhidlərimizə, qazilərimizə borclu olduğumuzu vurğulayan nazir müavini bildirib ki, gənc nəsil bunu heç zaman unutmamalıdır.   Gənclərin vətənpərvər ruhda formalaşmasında təhsil sisteminin də müstəsna rolunu vurğulayan Firudin Qurbanov çıxışının sonunda hər kəsi Zəfər Günü və Dövlət Bayrağı Günü münasibətilə təbrik edib.   Daha sonra çıxış edən Şərqi Zəngəzur iqtisadi rayonuna daxil olan Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov uzun illərdir hər kəsin Laçında belə bir tədbir keçirilməsini həsrətlə gözlədiyini deyib. Laçının bu gün inkişaf etdiyini, burada həyatın yenidən canlandığını qeyd edən Məsim Məmmədov Laçında görülən quruculuq işlərindən də danışıb.   Çıxış edən Milli Qəhrəman Polad Həşimovun həyat yoldaşı Ofelya Salmanova, Şəhid Əlihüseyn Məmmədovun anası Arzu Məmmədova Laçında belə bir tədbirin keçirilməsini tarixi hadisə olaraq qiymətləndiriblər. Çıxışçılar tarixi köklərinə bələd vətənpərvər gənclərin yetişdirilməsinin əsas məqsədlərdən olduğunu vurğulayıblar.   Çıxışlardan sonra muğam ifaçıları Eytiram Hüseyinov, Fehruz Səxavətin, eləcə də şagirdlərin ifasında mahnılar səsləndirilib.   Tədbir yekunlaşdıqdan sonra yürüşə start verilib. Laçın şəhəri 2 nömrəli tam orta məktəbdən başlayan yürüş "Seyrangah" adlı ərazidə başa çatıb.

06/11/2023 21:15

Noyabrın 6-da elm və təhsil nazirinin müavini Firudin Qurbanov Laçın şəhəri 2 nömrəli tam orta məktəbdə olub. Cari ildə istifadəyə verilən məktəbdə yaradılmış şəraitlə tanış olan Firudin Qurbanov müəllim və şagird kollektivi ilə görüşüb, onlarla səmimi söhbət aparıb.   Bildirilib ki, Laçın şəhəri 2 nömrəli tam orta məktəb ümumilikdə 510 şagird yerlikdir. Binada 24 yerlik doqquz, 18 yerlik beş və 12 yerlik dörd sinif otağı, 1 informatika, 1 texnologiya kabineti, 3 laboratoriya, 18 yerlik məktəbəhazırlıq otağı və 24 yerlik hərbi hazırlıq kabineti var. Hazırda məktəbdə 69 şagird təhsil alır, onların təlim-tərbiyəsi ilə 17 müəllim məşğul olur.

06/11/2023 17:55