Aprelin 9-da elm və təhsil naziri Emin Əmrullayev Qəbələ rayonuna səfəri çərçivəsində Vəndam qəsəbəsi 1 nömrəli tam orta məktəbin kollektivi ilə görüşüb. Nazir həmçinin məktəbdə tədris prosesini izləyib və təhsilalanlar üçün yaradılmış şəraitlə tanış olub.    Daha sonra elm və təhsil naziri buraxılış imtahanında 300 bal toplamaqla ən yüksək nəticə göstərmiş Səidə Rəhimovanın təhsil aldığı Nohurqışlaq kənd tam orta məktəbində olub. Emin Əmrullayev XI sinif şagirdləri ilə görüşərək səmimi söhbət edib, məktəblilərə gələcək fəaliyyətlərində uğurlar arzulayıb.

09/04/2024 22:00

Azərbaycan Respublikasının Prezidenti İlham Əliyev aprelin 9-da Qəbələ rayonunda 624 şagird yerlik Təbriz Yaqubov adına Bum qəsəbə tam orta məktəbinin yeni binasının açılışında iştirak edib.   Elm və təhsil naziri Emin Əmrullayev dövlətimizin başçısına məktəbdə yaradılan şərait barədə məlumat verdi.   Bildirildi ki, qəsəbədə 1983-cü ildə tikilmiş məktəb binasının müasir tələblərə cavab verməməsi və qəzalı vəziyyətdə olması yeni binanın inşası zərurətini yaratmışdı. Bum qəsəbə tam orta məktəbinin tikintisinə 2021-ci ilin dekabrında başlanılıb. Məktəb binası 26 sinif otağından, kimya, fizika və biologiya laboratoriyalarından, 2 informatika kabinetindən, 2 texnologiya otağından, gənclərin çağırışaqədərki hazırlıq kabinetindən, kitabxana, 195 yerlik akt zalı, idman zalı və 80 yerlik yeməkxanadan ibarətdir.   Yeni dövrün çağırışlarına uyğun olaraq, müasir məktəblərin qurulması Azərbaycan dövlətinin prioritetləri sırasında başlıca yer tutur. Son 20 ildə Azərbaycanın mərkəzi şəhərlərindən tutmuş ən ucqar kəndlərinə qədər yaşayış məntəqələrində 3600 yeni məktəb binası tikilib və ya əsaslı təmir olunub. Ölkəmizdə təhsil müəssisələrinin əsaslı təmiri, yenidən qurulması və yenilərinin inşası, onların zəruri tədris avadanlığı ilə təchizi gənc nəslin daha savadlı və bilikli yetişməsinə hesablanıb. Yeni məktəb binalarının və tədris korpuslarının inşası şagird sıxlığını aradan qaldırmaqla, həm də onların daha keyfiyyətli təhsil almasına şərait yaradır.   https://president.az  

09/04/2024 17:20

Aprelin 16-da saat 11:00-dan portal.edu.az vasitəsilə ali təhsil pilləsinin doktorantura səviyyəsinə sənəd qəbulu prosesinə başlanılır.     Sözügedən xidmət sayəsində Təhsil Mərkəzləşdirilmiş İnformasiya Sisteminə qoşulmuş ali təhsil müəssisələrinə, elmi müəssisə və təşkilatlara doktorantura üzrə qəbul olmaq istəyənlər “Şəxsi kabinet” vasitəsilə elektron formada müraciət edə, cari status və növbəti addımları izləyə biləcəklər. Müraciətlərinə müəssisələr tərəfindən müsbət rəy verilən şəxslər xarici dil imtahanında iştirak hüququ qazanacaqlar.      Müraciətlərin elektron formada həyata keçirilməsi tələbələrə təhsil haqqını müəssisəyə getmədən ödəmək, imtahan nəticələri və digər yeniliklər barədə məlumat əldə etmək imkanı da yaradır. Sənəd qəbulu prosesi mayın 15-i saat 18:00-da başa çatacaq.

09/04/2024 15:21

Aprelin 8-də elm və təhsil naziri Emin Əmrullayev beynəlxalq və respublika fənn olimpiadalarının qalibləri, dünyanın nüfuzlu universitetlərinə qəbul olunan gənclərlə görüşüb.  Nazir onları qazandıqları uğurlara görə təbrik edərək gələcək təhsil həyatlarında nailiyyətlər arzulayıb. Sonra nazir gənclərə öz tövsiyələrini verib, onlarla səmimi söhbət aparıb və suallarını cavablandırıb.  Görüşün sonunda hədiyyələr təqdim edilib. Təltif olunanlar

08/04/2024 15:50

Elm və təhsil naziri Emin Əmrullayev 19 aprel tarixində Samux rayonunda vətəndaşları qəbul edəcək. Qəbulda Samux, Gəncə, Naftalan, Göygöl, Daşkəsən, Goranboy və Kəlbəcər sakinləri iştirak edə bilərlər.   Adları çəkilən şəhər və rayonların sakinləri 15 aprel (saat 18:00-dək) tarixinədək Elm və Təhsil Nazirliyinin Çağrı Mərkəzinin 146 – 2 və 146 – 6 nömrəli telefonlarına (yalnız iş günləri və saatları ərzində) zəng etməklə qəbula yazıla bilərlər. Bununla yanaşı, nazirliyin rəsmi saytının https://edu.gov.az/az/contact_us bölməsinə elektron formada və ya +994 51 206 78 48 nömrəsinə “WhatsApp” vasitəsilə müraciət göndərmək mümkündür.

08/04/2024 14:46

Aprelin 8-də elm və təhsil naziri Emin Əmrullayev Dünya Bankının Azərbaycan üzrə ölkə meneceri Ştefani Ştelmayster ilə görüşüb.   Görüş zamanı Elm və Təhsil Nazirliyi ilə Dünya Bankı arasında əlaqələrin cari vəziyyəti, əməkdaşlıq perspektivləri müzakirə olunub.

08/04/2024 12:59

Aprelin 6-da Elm və Təhsil Nazirliyi, Məktəbəqədər və Ümumi Təhsil üzrə Dövlət Agentliyinin təşkilatçılığı ilə nazirlik, agentlik və Bakı Şəhəri üzrə Təhsil İdarəsində çalışan bir qrup əməkdaş üçün təlim keçirilib.    Təlimdə ümumi təhsil müəssisələrində təhsilin dövlət standartlarına uyğun təşkilinə nəzarətin həyata keçirilməsi, hüquqpozmalar, hüquqpozmaya şərait yaradan halların müəyyənləşdirilməsi, təlim-tərbiyə prosesində şəffaflığın təmin olunması, həmçinin monitorinqlərdə iştirak edəcək şəxslərin işgüzar keyfiyyətlərinin artırılması, səmərəli əməkdaşlığın qurulması istiqamətində nəzəri və praktik maarifləndirmə həyata keçirilib, fikir mübadiləsi aparılıb.   Təlim nazirliyin Daxili nəzarət şöbəsinin aparıcı məsləhətçisi Xəqani Qurbanov və agentliyin Ümumi təhsilin təşkili şöbəsinin baş mütəxəssisi Yeganə Abdullayevanın təqdimatları əsasında keçirilib.    Təlim müddətində eyni zamanda cari ildə ümumi təhsil müəssisələrində aparılacaq monitorinqlərlə bağlı meyar, indikator və qiymətləndirmə istiqamətləri üzrə hazırlanmış çərçivə sənədi haqqında məlumat verilib.

08/04/2024 12:44

May ayında PISA 2025 – Beynəlxalq Şagird Qiymətləndirilməsi Tədqiqatının sınaq mərhələsi təşkil olunacaq.   PISA ümumi təhsil müəssisələri üzrə 15 yaşlı şagirdlərin oxu, riyaziyyat, təbiət elmləri və yaradıcı düşünmə üzrə bilik, bacarıqlarını qiymətləndirmək, eyni zamanda onları real həyatda tətbiq etmək qabiliyyətlərini müəyyənləşdirmək məqsədilə İqtisadi Əməkdaşlıq və İnkişaf Təşkilatı (İƏİT) tərəfindən 3 ildən bir keçirilən beynəlxalq qiymətləndirmə tədqiqatıdır.    Qeyd edək ki, sözügedən tədqiqatın ölkəmizdə həyata keçirilməsi Təhsil İnstitutu tərəfindən təşkil olunacaq.

06/04/2024 16:07

Aprelin 5-dən “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” çərçivəsində namizədlərlə müsahibələrin keçirilməsinə başlanılıb.  Müsahibədə Dövlət Proqramı çərçivəsində bakalavriat və magistratura səviyyələri üzrə dünyanın nüfuzlu universitetlərində təhsil almaq üçün sənədlərini uğurla təqdim etmiş və müsbət qiymətləndirilmiş namizədlər iştirak edirlər.  Müsahibə mərhələsində Elm və Təhsil Nazirliyi, Dövlət Neft Fondunun nümayəndələri və müvafiq sahə üzrə ekspertlər iştirak edirlər. Müsahibənin nəticəsinə uyğun olaraq, müvafiq balı toplamış namizəd müsabiqə mərhələsinə keçir.  Dövlət Proqramına sənəd qəbulu iyunun 15-dək davam edəcək.  Dövlət Proqramının 2022–2026-cı illər üzrə hədəfi hər il 400 nəfərədək olmaqla ümumilikdə 2000 nəfərədək Azərbaycan vətəndaşının xarici ölkələrin nüfuzlu universitetlərində təhsilinin təmin edilməsidir. Proqram çərçivəsində təhsil yerlərinin ən azı 80 faizi magistratura səviyyəsini əhatə edəcək.

06/04/2024 14:36

Aprelin 27-də “Qərbi Azərbaycana qayıdış” olimpiadasının ilkin mərhələsi təşkil olunacaq.    Olimpiadada iştirak etmək istəyən məktəblilər aprelin 20-dək https://anket.edu.az/link/267 keçidi vasitəsilə qeydiyyatdan keçməli və ya təhsil aldıqları müəssisəyə müraciət etməlidirlər.    Olimpiadanın təşkilində məqsəd şagirdlər arasında Qərbi Azərbaycanın tarixi, coğrafiyası, mədəniyyəti, ədəbiyyatı, görkəmli ictimai xadimləri, tarixi şəxsiyyətləri, toponimləri, folkloru haqqında maarifləndirmə işlərini aparmaq və biliklərin dərindən öyrənilməsini təmin etməkdir.    Ölkənin ümumi təhsil müəssisələrinin IX və X sinif şagirdlərinin iştirak edəcəyi olimpiada 3 mərhələli olacaq. Olimpiadanın yarımfinal turu may ayında zonalar üzrə, final mərhələsi isə iyun ayında Naxçıvan Muxtar Respublikasında keçiriləcək.   Bundan əlavə, şagirdlərin bilik və bacarıqlarının artırılması, eləcə də olimpiadaya hazırlıqla bağlı tövsiyə edilən materiallar barədə məlumatlar ümumi təhsil müəssisələrinə göndəriləcək.   Qeyd edək ki, olimpiada Azərbaycan Respublikası Elm və Təhsil Nazirliyi, Naxçıvan Muxtar Respublikasının Təhsil Nazirliyi, Azərbaycan Respublikasının Təhsil İnstitutu, Naxçıvan Dövlət Universiteti və Qərbi Azərbaycan İcmasının birgə tərəfdaşlığı ilə həyata keçirilir.

06/04/2024 12:08