Avqustun 1-dən 14-dək Elm və Təhsil Nazirliyi, eləcə də qurumlarına 46 419 vətəndaş müraciəti daxil olub.   Müraciətlərin 30 149-u çağrı mərkəzləri, 563-ü sosial media, 5 532-si "WhatsApp" vasitəsilə, 3 203-ü elektron, 1 080-i yazılı formada yönləndirilib. Vətəndaş qəbulu zamanı isə 5 892 müraciət qeydə alınıb.    Müraciətlər şagird yerdəyişməsi, müəllimlərin işə qəbulu, məktəbəqədər təhsil müəssisələrinə qəbul, tələbə köçürülməsi, Dövlət Proqramı, peşə təhsili müəssisələrinə qəbul və digər məsələlərlə bağlı olub.

15/08/2024 15:45

Avqustun 15-də elm və təhsil nazirinin müavini İdris İsayev Belarus Respublikasının Peşə Təhsili üzrə Respublika İnstitutunun (PTRİ) rektoru Valeri Nikolayeviç Qolubovski ilə görüşüb.     Görüş zamanı Elm və Təhsil Nazirliyi yanında Peşə Təhsili üzrə Dövlət Agentliyi ilə PTRİ arasında imzalanan Anlaşma Memorandumu və Tədbirlər Planının icrası ilə bağlı cari vəziyyət, seçilmiş peşə təhsili müəssisələrində Belarus tərəfindən emalatxanaların qurulması, bir sıra ixtisaslar üzrə mühəndis-pedaqoji və inzibati idarəetmə heyətinin PTRİ və Belarusun peşə təhsili kolleclərində ixtisasartırma kurslarında iştirakı, kənd təsərrüfatı maşın və avadanlıqlarının istismarı sahəsində Belarus Respublikasının təcrübəsinin öyrənilməsi məsələləri müzakirə edilib.   Bununla yanaşı, görüş müddətində Belarus Respublikasının peşə təhsili sisteminin strukturu, bu strukturda yer alan qurumların öhdəlik və rolları, peşə ixtisasları üzrə təsnifatın formalaşması, həmçinin peşə təhsilinin idarə edilməsində müvafiq nazirliklərin rolu ilə bağlı müzakirələr aparılıb.    Görüşdə prioritet istiqamətlər üzrə əməkdaşlıq və təcrübə mübadiləsinə dair konkret addımların atılması qərara alınıb.

15/08/2024 15:00

UNICEF və Elm və Təhsil Nazirliyinin əməkdaşlığı ilə keçirilən “STEAM vasitəsilə yaşıl bacarıqlar” layihəsinin ikinci mərhələsinə start verilib. Layihənin məqsədi uşaq və yeniyetmələr arasında iqlim dəyişmələri barədə məlumatlılığı artırmaq və ekotexnoloji bacarıqları inkişaf etdirməkdir.  Layihə Azərbaycanın müxtəlif bölgələrindən olan 10-17 yaşlı gəncləri əhatə edir. Seçilmiş iştirakçılara Ağdaş, Gəncə, Quba, Lənkəran, Mingəçevir, Şirvan, Şəmkir və Zaqatalada yerləşən STEAM mərkəzlərində iqlim və digər sahələr üzrə mütəxəssislər tərəfindən təlimlər keçirilir.

15/08/2024 10:07

Avqustun 14-də elm və təhsil nazirinin müavini, nazirliyin Apellyasiya Şurasının sədri Firudin Qurbanovun rəhbərliyi ilə şuranın növbəti iclası keçirilib.   İclasda Elm və Təhsil Nazirliyinin Hüquq şöbəsinin müdir müavini vəzifəsinə namizəd Kamal Aslanovun, Strateji planlaşdırma və icraya nəzarət şöbəsinin Strateji planlaşdırma və koordinasiya sektorunun aparıcı məsləhətçisi vəzifəsinə namizəd Sənan İbişlinin, Məktəbəqədər və Ümumi Təhsil üzrə Dövlət Agentliyinin Gəncə – Daşkəsən Regional Təhsil İdarəsinin Tədrisin keyfiyyəti sektorunun müdiri vəzifəsinə namizədlər Alqış Həsrətov və Adil Aşurovun müsahibə nəticələri ilə əlaqədar şikayətlərinə baxılıb.   İclasda müsahibə komissiyası üzvlərinin təqdim etdikləri məlumat və videogörüntülər əsasında şikayətlər araşdırılıb və 2 şikayətin təmin edilməsi, 1 şikayətin qismən təmin edilməsi, 1 şikayətin isə təmin edilməməsi barədə qərarlar qəbul olunub.

14/08/2024 17:04

Avqustun 14-dən müəllimlərin işə qəbulu (MİQ) üzrə müsabiqənin müsahibə mərhələsinə başlanılıb. Müsahibələrə 5 740 nəfər dəvət edilib.  Sözügedən mərhələnin ilk günündə riyaziyyat, informatika, musiqi, rus dili, fransız dili, texnologiya, Azərbaycan dili və ədəbiyyat fənləri üzrə müsahibələr təşkil olunacaq. 22 avqust tarixinədək davam edəcək müsahibələr zamanı namizədlərin peşəkar kompetensiyaları, psixoloji hazırlıq və ümumi dünyagörüşü müvafiq komissiyalar tərəfindən yoxlanılacaq. Xatırladaq ki, namizəd şəxsi səhifəsində qeyd olunan tarixdə müsahibə mərhələsində iştirak etməsə, bu, tutduğu vakant yerdən imtina kimi qeydə alınacaq və həmin namizədin müddətli müqavilə ilə işə qəbul turlarında iştirakı təmin olunmayacaq.

14/08/2024 10:00

Elm və Təhsil Nazirliyinin Çağrı Mərkəzi (146) yeni istiqamət üzrə vətəndaşların sorğularını cavablandıracaq. Belə ki, Çağrı Mərkəzinin 146 – 10 xidməti artıq istifadədədir. Vətəndaşlar Naxçıvan Muxtar Respublikasının Təhsil Nazirliyi ilə əlaqə yaratmaq üçün müvafiq nömrəyə zəng edə bilərlər.

13/08/2024 11:17

“Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”na 2024–2025-ci tədris ili üzrə həyata keçirilən sənəd qəbuluna dair növbəti siyahı açıqlanıb. Siyahıya əsasən, daha 205 namizəd proqram iştirakçısı adını qazanıb.   Beləliklə, növbəti tədris ilində Dövlət Proqramı çərçivəsində bakalavriat səviyyəsi üzrə 125, magistratura səviyyəsi üzrə 375 nəfər olmaqla ümumilikdə 500 namizəd xaricdə təhsil alacaq.    Təqaüd qazanan 500 gəncin 135-i universitetlər üzrə dünya reytinq cədvəllərində ilk onluqda olan ali təhsil müəssisələrində təhsil alacaq. Cari ildə təqaüd hüququ əldə etmiş namizədlərdən 15 nəfəri "Columbia University", 7-si "Harvard University", 7-si "University of Cambridge", 6-sı “Yale University”, 5-i "University of California, Berkeley", 4-ü "National University of Singapore", 3-ü "University of Oxford", 3-ü "ETH Zurich", 3-ü "University of Chicago" və digər nüfuzlu universitetlərdə təhsil alacaq.    Elm və Təhsil Nazirliyi ilə bağlanılacaq müqavilənin müvafiq şərtinə əsasən, proqram iştirakçısı təhsili bitdikdən sonra 2 ay ərzində ölkəyə qayıtmalı və 5 il müddətinə əmək fəaliyyəti ilə məşğul olmalıdır.   Qeyd edək ki, Dövlət Proqramı çərçivəsində həyata keçirilmiş müsahibə mərhələsindən müsbət nəticə qazanan, lakin müsabiqə mərhələsindən keçməyən namizədlərə aid ehtiyat siyahısı mövcuddur. 2024–2025-ci tədris ili üzrə proqram iştirakçısı adını qazanmış namizədlərdən bu və ya digər səbəbdən imtina edənlər olarsa, Seçim Qaydalarının 4.20-ci bəndi rəhbər tutulmaqla həmin siyahıya istinadən növbəti iştirakçılar seçiləcəklər.

13/08/2024 10:00

12 avqust saat 18:00-dan 2024–2025-ci tədris ili üçün peşə təhsili müəssisələrinə tələbə qəbulu prosesinə yekun vurulub.  29 iyul tarixindən başlayan tələbə qəbulunun I mərhələsində www.portal.edu.az platforması vasitəsilə 27 269 şəxs 87 656 ixtisas üçün müraciət edib. Peşə təhsili almaq istəyən şəxslər daha çox İKT, turizm, sənaye, kənd təsərrüfatı və iaşə istiqamətlərində olan ixtisasları seçməyə üstünlük veriblər. Müsabiqə nəticələrinin 17 avqust tarixində elan olunması nəzərdə tutulur. Nəticələrlə bağlı məlumat SMS vasitəsilə göndərilməklə yanaşı, www.portal.edu.az platformasındakı “Şəxsi kabinet” bölməsində də yerləşdiriləcək.  Qeyd edək ki, peşə təhsili pilləsi üzrə boş qalmış plan yerlərinə tələbə qəbulunun II mərhələsinin 27 avqust – 3 sentyabr tarixlərində həyata keçirilməsi planlaşdırılır.

12/08/2024 19:00

“2024–2025-ci tədris ilində icma əsaslı məktəbəqədər təhsil xidmətlərinin təşkili” qrant müsabiqəsinə sənəd qəbulunun müddəti 26 avqust 2024-cü il tarixinədək uzadılır.   Qrant müsabiqəsinin məqsədi 2024–2025-ci tədris ilində müəyyən səbəblərdən məktəbəqədər təhsildən kənarda qalmış uşaqları bu təhsilə cəlb etməkdir.     Ətraflı məlumatla https://edu.gov.az/uploads/elan/2024/07/icma-esasli-mektebe-qeder-tehsil-qrant.pdf keçidi vasitəsilə tanış olmaq mümkündür.

12/08/2024 16:30

Azərbaycan Respublikasının Prezidenti İlham Əliyev “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı”nın təsdiq edilməsi haqqında” 2022-ci il 28 fevral tarixli 3163 nömrəli Sərəncamda dəyişiklik edilməsi barədə Sərəncam imzalayıb.   Dəyişikliklərə əsasən, Dövlət Proqramının müddəti uzadılıb və 2022–2028-ci illər olaraq müəyyən edilib.   Bundan başqa, hər il 500 nəfərədək Azərbaycan Respublikası vətəndaşının xaricdə nüfuzlu ali təhsil müəssisələrində ali təhsilin bakalavriat, magistratura və doktorantura səviyyələrində təhsil alması təmin olunacaq. 2022–2024-cü illərdə Dövlət Proqramı çərçivəsində xarici ali təhsil müəssisələrində təhsil yerlərinin 80 faizədək hissəsi magistratura səviyyəsini, 2025-ci ildən başlayaraq isə 25 faizindən çox olmayan hissəsi bakalavriat səviyyəsini və 20 faizindən çox olmayan hissəsi doktorantura səviyyəsini əhatə edəcək.

12/08/2024 14:00