Xocalı soyqırımının iyirmi altıncı ildönümü ilə əlaqədar “Təhsil” Respublika İdman Mərkəzinin təşkilatçılığı ilə Xocalı soyqırımı qurbanlarının xatirəsinə həsr olunmuş Respublika şahmat turnirinə start verilib. Turnirin keçirilməsində məqsəd Xocalı soyqırımı haqqında gənc şahmatçıları məlumatlandırmaq, onlarda vətənpərvərlik hisslərini gücləndirilmək, dostluq və idman əlaqələrinin möhkəmləndirməkdən ibarət olub. Ağcabədi rayonunda keçirilən turnirə ölkənin müxtəlif rayonlarından 5 yaş qrupu üzrə 194 şahmatçı qatılıb. Turnirə 28 fevral tarixində yekun vurulacaq. Qaliblər “Təhsil” Respublika İdman Mərkəzinin kubok və diplomları ilə təltif ediləcək.

26/02/2018 11:45

Fevralın 23-də Bakı şəhəri Arif Hüseynzadə adına 20 nömrəli məktəb-liseydə  “Məktəblinin dostu” pilot layihəsi ilə bağlı ictimaiyyət nümayəndələri ilə görüş keçirilib. Tədbirdə Bakı şəhəri üzrə Təhsil İdarəsinin müdiri Məhəbbət Vəliyeva, Azərbaycan Respublikasının Prezidenti yanında Gənclər Fondunun icraçı direktoru  Fərhad Hacıyev, media qurumlarının rəhbərləri, tanınmış ictimaiyyət nümayəndələri, təhsil ekspertləri, jurnalistlər iştirak edib. Qonaqlar “Məktəblinin dostu” pilot layihəsi üzrə fəaliyyət göstərən əməkdaşlarla görüşüb, onların gündəlik iş fəaliyyətini izləyiblər. Daha sonra "Məktəblinin dostu" layihəsinin rəhbəri Rüstəm Ağayev təqdimatla çıxış edərək layihənin məqsəd və vəzifələrindən danışıb. Layihə rəhbəri əməkdaşların işəgötürülmə prosesindən, onlar üçün təhsil qanunvericiliyi, fövqəladə hallarda davranış qaydaları və təcili tibbi yardım xidmətinin hadisə yerinə çatanadək ilkin müayinələrin aparılması ilə bağlı təlimlər keçirildiyi, habelə tərəfdaşlıq qurumlarla birgə  fəaliyyət və layihə çərçivəsində fəaliyyət göstərən Psixoloji Mərkəzin iş istiqamətləri barədə məlumat verib. Görüşdə layihə ilə əlaqədar rəy və təkliflər səsləndirilib, icra edilmiş təşəbbüslərə dair müzakirələr aparılıb. Qeyd edək ki,  “Məktəblinin dostu” pilot layihəsi Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə tərəfdaşlığı ilə Bakı şəhərindəki 32 ümumi təhsil müəssisəsində həyata keçirilir. Layihənin əsas məqsədi müəllim və şagirdlər üçün təhlükəsiz mühit yaratmaq, fövqəladə hal baş verdikdə ilkin tibbi və psixoloji yardım göstərmək, mütəmadi olaraq şagird, valideyn, təlim-tərbiyə müəssisələrinin kollektivi ilə maarifləndirmə və diaqnostik işlər aparmaqdır.

23/02/2018 18:18

2016-cı ildən tələbələrin köçürülmə prosesinin sadələşdirilməsi və şəffaflığın təmin edilməsi məqsədi ilə transfer.edu.az portalı istifadəyə verilib. Tələbələr bu portal vasitəsi ilə çox asan və rahatlıqla köçürülmə imkanı əldə edirlər. Cari ildə bakalavriatura üzrə yerli ali təhsil müəssisələrindən 650, xaricdəki universitetlərdən 26, magistratura üzrə 15, orta-ixtisas təhsili üzrə 186 nəfərin sorğusuna müsbət cavab verilib. Portal vasitəsilə köçürülən tələbələrin təəssüratlarını təqdim edirik: Röya Hüseynova   “Mənim fikrimcə, transfer.edu az portalı vasitəsilə tələbə köçürülməsi Azərbaycanda ən böyük tələbə layihəsidir. Həm də uğurlu və şəffafdır. Təsəvvür edin, kimsə universitetə qəbul olur və öz sevdiyi, arzuladığı ixtisasa qəbul olmur. Anaq indi cəmi iki sənəd yükləməklə köçürülmə işini həyata keçirmək olur. Mən magistratura səviyyəsində təhsil alıram. Bu portaldan istifadə etməklə universitetimi dəyişdim”.     Nərgiz Vəliyeva   “Sumqayıt Dövlət Universitetində tarix müəllimi ixtisası üzrə təhsil alırdım. Gəncə Dövlət Universitetinə köçürüldüm. Sistem təsəvvür edəcəyimdən də artıq rahat və şəffafdır. Bu sistemin tələbələr üçün yaradılan ən yaxşı imkandır”.     Kənan Əliyev   “Bakı Slavyan Universitetində ingilis dili üzrə təhsil alırdım. Yaşayış yerim və maddi cəhətdən mənə Gəncədə təhsil almaq daha rahat olduğu üçün köçürülmək istədim. Sistemin elektron olması onun şəffaflığına bir daha zəmin yaradır. Heç kimlə görüşmədən, fərdi qaydada qeydiyyatdan keçdik. Vaxtımız getmədi, ən əsası isə heç bir məbləğ ödəmədik”.

23/02/2018 15:01

Gənclərimiz ölkəmizin inkişafında mühüm töhfələr verir   Qloballaşan dünyada  hər bir ölkənin gələcəyini təmin edəcək  gənc nəslin dövrün tələblərinə uyğun surətdə yüksəkixtisaslı mütəxəssis kimi yetişməsi strateji əhəmiyyət daşıyır.  Son illər Azərbaycan Respublikası Təhsil Nazirliyinin  istedadlı gənclərin dünyanın nüfuzlu ali məktəblərində təhsil almalarını və peşəkarlar kimi yetişməsini hədəfləyən məqsədyönlü tədbirləri  nəticəsində tələbələrimiz öz uğur hekayələrini yazmaqdadır.  “2007-2015-ci illərdə Azərbaycan gənclərinin  xarici ölkələrdə təhsili üzrə Dövlət Proqramı” çərçivəsində dünyanın reytinqli ali məktəblərindən məzun olan gənclərimiz artıq ölkəmizin inkişafı naminə öz töhfələrini  verməkdədir. Budəfəki yazımız da elm, təhsil, iqtisadiyyat, sənaye,  bank, İKT,  dövlət qulluğu və digər sahələrdə öz uğurlu  karyera tarixçələrini yazan məzunlarımıza həsr olunub. Beləliklə, Dövlət Proqramı təqaüdçüləri harada işləyirlər?   Vüqar HEYDƏROV, Böyük Britaniyanın Edinburq Universitetinin məzunu 1991-ci il 14 iyun tarixində Bakı şəhərində anadan olub.  2009-cu ildə 287 nömrəli   “Zəkalar” liseyini bitirib.    2009-cu ildə ali məktəblərə keçirilən  qəbul imtahanında iştirak edərək II  qrup üzrə 680 bal toplayaraq  Azərbaycan Respublikasının  Prezidenti yanında Dövlət İdarəçilik Akademiyasının “İnzibati idarəetmə”  fakültəsinin “Menecment”  ixtisasına qəbul olunub. Qəbulda göstərdiyi  yüksək göstəriciyə görə Prezident təqaüdünə layiq görülüb.  2013-cü ildə İdarəçilik Akademiyasını bitirib,  həmin ildə də Azərbaycan Dövlət Neft və Sənaye Universitetinin MBA proqramına qəbul olunub.   2014-cü ildə həmin proqramın birinci kursunu bitirdikdən sonra xaricdə təhsillə bağlı akademik məzuniyyət götürüb.  “2007-2015-ci illərdə Azərbaycan gənclərinin xarici ölkələrdə təhsili üzrə  Dövlət Proqramı” çərçivəsində  2014-2015-ci illərdə Böyük Britaniyanın Edinburq Universitetində “İnsan resurslarının idarə olunması”  ixtisası üzrə  magistratura təhsili alıb.   2016-cı ilin iyun ayında Azərbaycan Dövlət Neft və Sənaye Universitetində MBA proqramını müvəffəqiyyətlə bitirib. 2012-2014-cü illərdə  Fairmont Bakı Otelində heyətin idarəedilməsi üzrə koordinator vəzifəsində çalışıb. 2015-ci ilin sentyabrından 2017-ci ilin mayına kimi  “PMD Group”da əvvəlcə insan resursları üzrə mütəxəssis, daha sonra isə baş mütəxəssis kimi fəaliyyət göstərib. Hazırda “PMD Group”un  kənd  təsərrüfatı bölümünə tabe olan “Grand-Agro” MMC-də insan resursları üzrə menecer vəzifəsində çalışır.     Namiq QULİYEV, Böyük Britaniyanın Queen Mary Universitetinin  məzunu 11 fevral 1988-ci il tarixində Naxçıvan şəhərində anadan olub.  Bakıdakı   45 nömrəli tam orta məktəbi  bitirib. 2005-2009-cu illərdə Azərbaycan Dövlət İqtisad Universitetinin “İqtisadiyyatın tənzimlənməsi”  ixtisası üzrə yüksək qiymətlərlə bakalavriat təhsili alıb. Hərbi xidmətini tamamladıqdan sonra 2011-ci ildə Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın (indiki Azərbaycan Respublikasının Dövlət İmtahan Mərkəzi) keçirdiyi müsabiqə və müsahibə mərhələlərində yüksək nəticə göstərərək Qiymətli Kağızlar üzrə Dövlət Komitəsində dövlət qulluğuna qəbul olunub.  Dörd ilə yaxın müddətdə işlədiyi dövr ərzində nümunəvi dövlət qulluqçusu kimi kollektivin hörmətini qazanıb,  daxili audit, qiymətli kağızlar və törəmə maliyyə alətləri kimi bir çox təlim və treninqlərdə iştirak edib.   2014-cü ildə  maliyyə sahəsində biliklərini daha da dərinləşdirmək məqsədilə “2007-2015-ci illərdə Azərbaycan  gənclərinin  xarici ölkələrdə təhsili üzrə  Dövlət Proqramı”na keçirilən müsabiqədən müvəffəqiyyətlə keçərək Böyük Britaniyada təhsilini davam etdirmək imkanı əldə edib.  Queen Mary  Universitetində “Maliyyə”  ixtisası üzrə magistr dərəcəsi  alıb.  “Rusiyada bank sektorunun rəqabətlik dərəcəsi”  dissertasiya işi fərqlənmə (distinction) ilə qiymətləndirilib. Hazırda Maliyyə Bazarlarına Nəzarət Palatasında çalışır. Bununla yanaşı, Azərbaycan Dövlət İqtisad Universitetində və Bakı Mühəndislik Universitetində də  pedaqoji fəaliyyətini davam etdirir.     Kənan HƏSƏNOV, Böyük Britaniyanın  Nottingem Universitetinin məzunu 1992-ci il  15 avqust tarixində  Rusiya Federasiyasının İrkutsk şəhərində anadan olub. 2009-cu ildə Xətai  rayonundakı  245 nömrəli tam orta məktəbi  bitirib.  Elə həmin ildə Azərbaycan Memarlıq və İnşaat Universitetinin “Sənayenin təşkili və idarə edilməsi” fakültəsinə daxil olub.  Bakalavr pilləsində təhsil aldığı  zaman müxtəlif  intellektual oyunlarının qalibi olub.  2013-cü ildə “Bakinskaya Jemçujina - Bakı İnciləri” adlı beynəlxalq turnirə vəsiqə qazanmış və  “Mister X” adlı komandanın kapitanı kimi iştirak edib. Ulu öndər Heydər Əliyevin anadan olmasının 88-ci ildönümünə həsr edilmiş tələbələr və magistrantların XXVIII elmi konfransında iştirak edib və məqaləsi  birinci yerə layiq görülüb. 2014-cü ildə “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın  təqaüdünü qazanmış və magistr dərəcəsi üzrə Birləşmiş Krallığın Nottingem Universitetinin “İT-nin idarəedilməsi”  fakültəsinə daxil olub. 2015-ci ildə Nottingem Universitetini  fərqlənmə diplomu ilə bitirib. Təhsil aldığı zaman qrup rəhbəri vəzifəsinə təyin edilmiş və Xarici Əlaqələr Departamentində Asiya ölkələri üzrə koordinator vəzifəsində çalışıb. 2012-ci ildən etibarən ERA Marketing Center mərkəzində  baş mühasib vəzifəsində,  Şimal-Qərb MMC internet provayder şirkətinin təsisçisi kimi fəaliyyət göstərib. Hazırda ERA Consulting MMC şirkətində layihə rəhbəri və baş analitik, həmçinin Azərbaycan Memarlıq və İnşaat Universitetində “Marketinq və marketinqin əsasları” fənni üzrə mühazirəçi müəllim  vəzifələrində çalışır. Xaricdə təhsil aldığı təcrübəyə əsaslanaraq hazırda Distant Təhsil portalı üzərində işləyir.     Bəhruz MEHDİYEV, Böyük Britaniyanın Heriot Watt Universitetinin məzunu 14 mart 1992-ci il tarixində Bakıda ziyalı ailəsində anadan olub.  Orta təhsilini Bakıdakı Ərəstun  Mahmudov adına  220 nömrəli  məktəb-liseydə müvəffəqiyyətlə (məktəb birincisi kimi) başa vurub. 2008-ci ildə  Bakı şəhəri məktəblərarası fizika  fənn  olimpiadasında I yerə layiq görülərək Təhsil Nazirliyinin  diplomu ilə təltif olunub. 2009-cu ildə Azərbaycan Dövlət Neft ve Sənaye Univesitetinin  bakalavr pilləsində “Neft-qaz mühəndisliyi”  fakültəsinə daxil olub.  2011-ci ildə Böyük Britaniyanın Aberden Universitetində   “Neft -qaz mühəndisliyi” ixtisası üzrə  bakalavr təhsilini davam etdirib.  2015-ci ildə bu təhsil ocağını  əla qiymətlərlə başa vuraraq məzun olub.  2015-2016-cı  ildə vətənə qayıdaraq “bp-Azərbaycan”  şirkətində  10 ay müddətində məzun proqramında sınaq müddəti keçib.   bp-də məzun proqramında iştirak edərkən sahəsi üzrə  ixtisaslı mütəxəssis olmaq  üçün magistr dərəcəsində  təhsil almaq qərarına gəlib.  “2007-2015-ci illərdə Azərbaycan gənclərinin  xarici ölkələrdə təhsili üzrə Dövlət Proqramı”  çərçivəsində  Böyük Britaniyanın Edinburq şəhərində yerləşən Heriot Watt Universitetinin “Neft-qaz yataqlarının qiymətləndirilməsi və idarə olunması”  ixtisası üzrə magistratura  təhsilini uğurla başa vurub. Hazırda Bakıda  “Halliburton Eurasia Ltd.”  neft  şirkətində çalışır. Bu sahədə  ölkəmizə xeyir verməyi, əldə etdiyi nailiyyətləri praktik  istiqamətdə daha da artıraraq  ixtisaslı kadr kimi ali tədris ocaqlarında uyğun  ixtisası  üzrə tədqiqatlar aparmağa dair gələcək planları var.     Mətin İBRAHİMOV, ABŞ-ın Harvard Universitetinin məzunu 1983-cü ildə Sumqayıt şəhərində  anadan olub.  2000-ci  ildə  Sumqayıtda texniki və təbiət elmləri liseyini əla qiymətlərlə bitirib. 2000-ci ildə Azərbaycan Tibb Universitetinin “Müalicə-profilaktika”  fakültəsinə daxil olub. 2003-cü ildə dövlət  xətti ilə Türkiyəyə göndərilərək İstanbul Universitetinin   “Tibb” fakültəsində təhsilini davam  etdirib.  2006-cı  ildə  baza ali  tibb  təhsili  dərəcəsi  alıb. 2006-2012-ci illərdə İstanbul Universiteti “Cərrahpaşa” tibb fakültəsində  “Qulaq-burun-boğaz cərrahiyyəsi”  ixtisası üzrə rezidentura  təhsilini başa vurub.  Türkiyədə 15 min  həkim arasında TUS sınavında birinci olub.   “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində 2012-2014-cü illərdə  Harvard Universitetində “Qulaq-burun-boğaz xəstəlikləri” üzrə ixtisasartırma təhsili alıb. Hazırda Bakıdakı “Oksigen” klinikasında  qulaq-burun-boğaz xəstəlikləri üzrə uzman həkim olaraq çalışır.     Fariz QULİYEV, Kanadanın Alberta Universitetinin məzunu 22 oktyabr 1984 tarixində Bakı şəhərində anadan olub. 2001-ci ildə  Bakıdakı  5 nömrəli  kimya-biologiya təmayüllü Respublika  liseyini bitirib. Elə həmin ildə  663 balla Azərbaycan Dövlət İqtisad Universitetinin  “Beynəlxalq iqtisadi münasibətlər” fakültəsinə daxil olub. Ümummilli lider Heydər Əliyevin tələbələrlə görüşündə iştirak edib. 2005-ci ildə Azərbaycan Dövlət İqtisad Universitetinin  “Xüsusi İstedadlar Qrupu”nu fərqlənmə ilə bitirib. 2005-2007-ci illərdə Roçester Texnologiya İnstitutunda (Nyu York, ABŞ) biznes təhsili alıb və tələbəlik müddətində aktiv ictimai fəaliyyət göstərib. 2008-2009-cu illərdə Azərbaycan Respublikasının İqtisadi İnkişaf Nazirliyində (İqtisadiyyat və Sənaye Nazirliyi) Xarici Əlaqələr şöbəsinin Beynəlxalq İqtisadi Təşkilatlarda Əməkdaşlıq sektorunda mütəxəssis vəzifəsində çalışıb. “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində 2011-2013-cü illərdə Kanadanın Alberta Universitetində “Təbii resurslar, enerji və ətraf mühitin idarə edilməsi” ixtisası üzrə MBA təhsili alıb. Hazırda UNEC Biznes Məktəbinin direktor müavini və “İqtisadiyyat və biznesin idarəedilməsi” kafedrasında müəllim vəzifələrində çalışır.     Hənifə QOCAMANOVA, Böyük Britaniyanın Nottingem Universitetinin məzunu 1 oktyabr 1992-ci il tarixində Bakı şəhərində anadan olub. 1999 - 2010-cu illərdə Bakıdakı 83 nömrəli tam orta  məktəbdə  təhsil alıb. 2010-cu ildə  ali məktəblərə keçirilən qəbul imtahanlarında iştirak edərək dövlət sifarişi əsasında Bakı Dövlət Universitetinin “Hüquq” fakültəsinə qəbul olunub,   2014-cü ildə universiteti fərqlənmə diplomu ilə bitirib. 2013-cü ildə Bakı Dövlət Universiteti Tələbə Həmkarlar İttifaqı Komitəsinin keçirdiyi müsabiqədə   “İlin ən yaxşı tələbəsi” fəxri adı ilə təltif edilib.  2014-cü ildə Birləşmiş Krallığın Nottingem Universitetində  “Beynəlxalq kommersiya hüququ”  ixtisası  üzrə təhsil almaq hüququ qazanıb və “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın müsabiqəsindən müvəffəqiyyətlə keçərək Nottinqem Universitetində dövlət hesabına magistratura təhsili almağa başlayıb. Hazırda özəl konsaltinq şirkətində hüquqşünas vəzifəsində çalışır.     Cavid MƏMMƏDOV, Böyük Britaniyanın London İmperial Kollecinin məzunu 1988-ci ildə Bakıda anadan olub.  X sinfi Bakıdakı N. Tusi adına Gimnaziyada, XI sinfi isə Amerika Birləşmiş Ştatlarının  Vermont ştatında bitirib.  2004-cü ildə ali məktəblərə keçirilən qəbul imtahanlarında iştirak edərək   Azərbaycan Memarlıq və İnşaat Universitetinin “Nəqliyyat”  fakültəsinin “Tətbiqi-geodeziya”  ixtisasına qəbul olunub. 2008-ci ildə  təhsilini  başa vuraraq bakalavr dərəcəsi alıb.  Daha sonra “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”  çərçivəsində 2011-2013-cü illərdə Böyük Britaniyanın London İmperial Kollecində “Mühəndislik”  ixtisası üzrə magistratura  təhsilini başa vurub.   2007-2008-ci illərdə bp-də  və ABŞ-ın  KBR  mühəndis - tikinti  şirkətlərində iş təcrübəsi qazanıb. 2008-ci ildən Beynəlxalq Mühəndislər  İnstitutunun (Institution of Civil Engineers)  üzvüdür. Hazırda BP şirkətində konstruksiya üzrə mühəndis vəzifəsində çalışır.   “Azərbaycan müəllimi” qəzeti

23/02/2018 14:13

Azərbaycan Memarlıq və İnşaat Universitetinin memarlıq ixtisası üzrə SABAH qruplarının məzunları Yaqub Mehdiyev və Nəriman Abdinli Moskva şəhərinin məşhur “Zaryadye” parkının ərazisində inşa edilmiş “Üzən körpü” unikal piyada estakadasının layihəsində iştirak ediblər. “Üzən körpü” estakadasının unikallığı onun konsolunun 70 metr uzunluğunda olmasıdır. Estakada Ginnesin Rekordlar kitabına daxil olmağa namizəddir. Layihənin baş mühəndisi Azərbaycan Memarlıq və İnşaat Universitetinin SABAH müəllimi Qulam Əliyevdir.

23/02/2018 11:09

Təhsil nazirinin müavini Firudin Qurbanov Dünya Skaut Hərəkatı Təşkilatının nümayəndə heyəti ilə görüşüb. Görüşün məqsədi Dünya Skaut Hərəkatının qeyri-formal təhsil sahəsindəki təcrübəsi haqqında ətraflı məlumat əldə edərək bunu ölkəmizin məktəbdənkənar  təhsil müəssisələrində tətbiq etmək olub. Hərəkatın Təşkilati inkişaf üzrə qlobal direktoru Devid Berq 2017-ci ildə 41-ci Dünya Skaut Konfransı və 13-cü Dünya Skaut Gənclər Forumunun Azərbaycanda keçirilməsinin çox böyük əhəmiyyət daşıdığını nəzərə çatdırıb, Avrasiya regionu,  həmçinin Azərbaycanda skaut hərəkatının genişləndirilməsinin onlar üçün vacibliyini qeyd edib. Firudin Qurbanov məktəbdənkənar fəaliyyətin, uşaq və gənclərin asudə vaxtlarının səmərəli təşkil edilməsinin zəruriliyini vurğulayaq qarşılıqlı əməkdaşlığın gücləndirilməsi istiqamətində danışıqların aparılmasının əhəmiyyətini diqqətə çatdırıb. Görüşün sonunda tərəflər mövcud əməkdaşlığın genişləndirilməsində maraqlı olduqlarını bir daha ifadə ediblər.                

22/02/2018 18:06

Fevralın 22-də (saat 10:00) 2018-2019-cu tədris ili üçün elektron sistem vasitəsilə Təhsil Nazirliyinin birbaşa tabeliyindəki lisey və gimnaziyaların, eləcə də Bakı şəhərindəki dövlət ümumi təhsil müəssisələrinin I sinfinə şagird qəbuluna start verilib. “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Azərbaycan Respublikası Prezidentinin 23 may 2011-ci il tarixli fərmanının tələblərinin həyata keçirilməsini təmin etmək məqsədilə 2018-2019-cu dərs ilində Bakı şəhərindəki ümumi təhsil məktəblərində I sinfə şagird qəbulu elektron sistem vasitəsilə həyata keçirilir. Təhsil Nazirliyinin birbaşa tabeliyindəki lisey və gimnaziyalara, eləcə də Bakı şəhəri üzrə ümumi təhsil müəssisələrinə I sinfə şagird qəbulu valideynin (qanuni nümayəndənin) elektron ərizəsinin mektebeqebul.edu.az saytında qeydiyyatı yolu ilə həyata keçirilir. Sentyabrın 15-dək davam edən qeydiyyat prosesində valideynlər məktəbi, təlim dilini və müəllimi seçməlidirlər. Hər hansı səbəbdən özü elektron qeydiyyatdan keçə bilməyən şəxslər Bakı şəhəri üzrə 52 məktəbdə yaradılmış Alternativ Qeydiyyat Mərkəzinə müraciət edə bilərlər. Həmçinin, Bakı şəhəri üzrə 6 ümumi təhsil müəssisəsində Apelyasiya Komissiyası təşkil olunub. Məktəbəhazırlıq qruplarında təhsil alan uşaqların valideynlərinin istəyini nəzərə alaraq, onların I sinifdə də eyni sinifdə komplektləşdirilməsi və eyni müəllimə həvalə olunması nəzərdə tutulur. Bu qayda 2017-2018-ci tədris ilində məktəbəhazırlıq qruplarında dərs deyən, 2018-2019-cu tədris ilində I sinifdə tədris aparması planlaşdırılan müəllimlərin dərs dediyi siniflərə şamil olunur. 2018-2019-cu tədris ilində elektron sistem vasitəsilə uşaqların I sinfə qəbulu barədə videotəlimat (https://www.youtube.com/watch?v=KRMGV9hTHq8) hazırlanaraq Təhsil Nazirliyi və Bakı Şəhəri üzrə Təhsil İdarəsinin internet resurslarında yerləşdirilib. Vətəndaşları maraqlandıran məsələlərə daha geniş aydınlıq gətirmək üçün BŞTİ-nin rəsmi “Facebook” səhifəsində 22 fevral-2 mart 2018-ci il tarixlərində I sinfə qəbulla bağlı suallara cavab verilir. Qeyd edək ki, 2018-2019-cu tədris ili üçün Sumqayıt, Gəncə şəhərləri və Abşeron rayonlarında da uşaqların I sinfə qəbulu elektron qaydada aparılacaq. Bu rayon və şəhərlərdə ərizələrin onlayn qeydiyyatı prosesinə martın 12-dən start veriləcək. Hər hansı səbəbdən özü elektron qeydiyyatdan keçə bilməyən şəxslər Gəncə şəhəri üzrə 5, Sumqayıt şəhəri üzrə 4, Abşeron rayonu üzrə 6 məktəbdə yaradılmış Alternativ Qeydiyyat Mərkəzlərinə müraciət edə bilərlər. Eyni zamanda, Gəncə şəhəri üzrə 1, Sumqayıt şəhəri üzrə 1 və Abşeron rayonu üzrə 1 ümumi təhsil müəssisəsində Apelyasiya Komissiyaları təşkil olunacaq. Qeyd edək ki, 2015-2016-cı tədris ilindən Bakı şəhərində dövlət ümumi təhsil məktəblərinin və Təhsil Nazirliyinin birbaşa tabeliyindəki lisey və gimnaziyaların I sinfinə şagird qəbulu elektron sistem vasitəsilə həyata keçirilir. 2015-2016-cı tədris ilində paytaxtdakı dövlət ümumi təhsil məktəbləri üzrə I sinfə 46 578 uşaq qəbul olunub. Onlardan 43 883 nəfəri ümumi təhsil məktəblərini, 2 695 nəfəri isə lisey və gimnaziyaları seçib. 2016-2017-ci tədris ili üzrə paytaxtda I sinfə 47 619 uşaq qəbul olub. Onlardan 44 960 nəfəri ümumi təhsil məktəblərinə, 2 659 nəfəri isə lisey və gimnaziyalara sənəd verib. 2017-2018-ci tədris ili üzrə Bakı şəhərinin ümumi təhsil məktəblərinin və Təhsil Nazirliyinin birbaşa tabeliyindəki lisey və gimnaziyaların I sinfinə elektron sistem vasitəsilə qəbul prosesi çərçivəsində 49 342 uşaq qeydiyyatdan keçib. Onların 46 694 nəfəri ümumi təhsil məktəblərinə, 2 648 nəfəri isə lisey və gimnaziyalara qəbul olub. 2018-2019-cu tədris ili üzrə Bakı şəhərinin ümumi təhsil məktəblərinin və Təhsil Nazirliyinin birbaşa tabeliyindəki lisey və gimnaziyaların I sinfinə isə 50 000-dən artıq uşağın qəbulu nəzərdə tutulur.

22/02/2018 13:02

Fevralın 21-də təhsil nazirinin müavini Firudin Qurbanov Efiopiya Federativ Demokratik Respublikasının Azərbaycan Respublikasındakı fövqəladə və səlahiyyətli səfiri Ayalev Qobezie Vorkneh ilə görüşüb. Görüş zamanı ölkələrimiz arasında tarixi əlaqələrə toxunan Firudin Qurbanov təhsil sahəsində də əməkdaşlıq imkanları üçün əlverişli zəmin olduğunu, ötən əsrin 60-80-cı illərində 700-dən çox efiopiyalının Azərbaycanın ali məktəblərində təhsil aldığını qeyd edib. Nazir müavini həmin məzunların hazırda Efiopiyanın müxtəlif dövlət və özəl qurumlarında fəaliyyət göstərdikləri barədə məlumatlı olduğunu diqqətə çatdırıb. Firudin Qurbanov “Azərbaycan Respublikasında təhsilin inkişafı üzrə Dövlət Strategiyası”nın müəyyən etdiyi hədəflərə uyğun olaraq aparılan islahatlar barədə səfirə məlumat verib. Səfir Ayalev Qobezie Vorkneh Azərbaycanda təhsil sahəsində aparılan islahatlarla bağlı təcrübənin öyrənilməsində maraqlı olduğunu, iki ölkənin ali məktəbləri arasında əlaqələrin yaradılmasını, həmçinin akademik mübadilənin vacibliyini vurğulayıb. Görüşdə Azərbaycan və Efiopiya arasında təhsil sahəsində əlaqələrin cari vəziyyəti və gələcək inkişaf perspektivləri müzakirə edilib.

22/02/2018 12:36

Fevralın 21-də  Təhsil Nazirliyində  I sinfə  şagird  qəbulunun  elektron sistem  vasitəsilə   təşkilinə    həsr olunmuş mətbuat konfransı keçirilib. Mətbuat konfransında Təhsil Nazirliyinin və Bakı Şəhəri üzrə Təhsil İdarəsinin müvafiq struktur bölmə rəhbərləri I sinfə şagird qəbulunun elektron sistem vasitəsilə həyata keçirilməsi və tətbiq olunan yeniliklərlə bağlı məlumat veriblər. Qeyd olunub ki, “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Azərbaycan Respublikası Prezidentinin 23 may 2011-ci il tarixli fərmanının tələblərinin həyata keçirilməsini təmin etmək məqsədilə 2018-2019-cu dərs ilində Bakı ilə yanaşı, Gəncə, Sumqayıt şəhərləri və Abşeron rayonu üzrə ümumi təhsil məktəblərində I sinfə şagird qəbulu elektron sistem vasitəsilə həyata keçiriləcək. Bakı şəhərində I sinfə şagird qəbulunun elektron sistem vasitəsilə həyata keçirilməsi prosesinə fevralın 22-dən (saat 10:00), Gəncə və  Sumqayıt şəhərləri, eləcə də Abşeron rayonunda martın 12-dən start verilir. Təhsil Nazirliyinin birbaşa tabeliyindəki lisey və gimnaziyalara, eləcə də Bakı, Gəncə, Sumqayıt şəhərləri və Abşeron rayonu üzrə ümumi təhsil müəssisələrinə I sinfə şagird qəbulu valideynin (qanuni nümayəndənin) elektron ərizəsinin mektebeqebul.edu.az saytında qeydiyyatı yolu ilə həyata keçiriləcək. Sentyabrın 15-dək davam edən elektron ərizənin qeydiyyatı prosesində valideynlər məktəbi, təlim dilini və müəllimi seçməlidirlər. Hər hansı səbəbdən özü elektron qeydiyyatdan keçə bilməyən şəxslər Bakı şəhəri üzrə 52, Gəncə şəhəri üzrə 5, Sumqayıt şəhəri üzrə 4, Abşeron rayonu üzrə 6 məktəbdə yaradılmış Alternativ Qeydiyyat Mərkəzlərinə müraciət edə bilərlər. Həmçinin I sinfə şagird qəbulu prosesində valideynlərlə (qanuni nümayəndələrlə) qeydiyyat və sənəd qəbulu üzrə yarana biləcək mübahisəli məsələlərin həlli məqsədilə Bakı şəhəri üzrə 6, Gəncə şəhəri üzrə 1, Sumqayıt şəhəri üzrə 1 və Abşeron rayonu üzrə 1 ümumi təhsil müəssisəsində Apelyasiya Komissiyaları təşkil olunub. Ümumi təhsil müəssisələrinin I sinfinə 15 sentyabr 2018-ci il tarixinədək 6 yaşı tamam olan, eləcə də Təhsil Nazirliyi tərəfindən müəyyən edilmiş qaydada xüsusi istedadlı uşaqların vaxtından əvvəl I sinfə qəbulu üzrə müsahibədən uğurla keçmiş 16 sentyabr 2012-ci il tarixindən 31 dekabr 2012-ci il tarixinədək olan dövrdə anadan olmuş və dövlət ümumi təhsil müəssisələrində ödənişsiz məktəbəhazırlıq qrupunu bitirmiş uşaqlar qəbul edilir. Təhsil Nazirliyinin birbaşa tabeliyindəki ümumi təhsil müəssisələrində və Bakı Şəhəri üzrə Təhsil İdarəsinin tabeliyində fəaliyyət göstərən 287 nömrəli “Zəkalar” liseyi, eləcə də 160 nömrəli Klassik Gimnaziyada 2018-2019-cu dərs ili üçün birinci sinfə, ilk növbədə, həmin ümumi təhsil müəssisələrinin müəyyən edilmiş mikroərazisində yaşayan vətəndaşların ərizələrinin qeydiyyatı aparılır. Digər ərazilərdə yaşayan valideynlərin (qanuni nümayəndələrin) uşaqları qeyd olunan ümumi təhsil müəssisələrinə yalnız müsabiqə yolu ilə qəbul üçün qeydiyyatdan keçə bilərlər. Məktəbəhazırlıq qruplarında təhsil alan uşaqların valideynlərinin istəyini nəzərə alaraq, onların I sinifdə də eyni sinifdə komplektləşdirilməsi və eyni müəllimə həvalə olunması nəzərdə tutulur. Bu qayda 2017-2018-ci tədris ilində məktəbəhazırlıq qruplarında dərs deyən, 2018-2019-cu tədris ilində I sinifdə tədris aparması planlaşdırılan müəllimlərin dərs dediyi siniflərə şamil olunur. Vətəndaşları maraqlandıran məsələlərə daha geniş aydınlıq gətirmək üçün BŞTİ-nin rəsmi “Facebook” səhifəsində 22 fevral-2 mart 2018-ci il tarixlərində I sinfə qəbulla bağlı suallara cavab veriləcəkdir. Mətbuat konfransında 2018-2019-cu tədris ilində elektron sistem vasitəsilə uşaqların I sinfə qəbulu barədə videoçarx nümayiş olunub. Sonda media nümayəndələrinin çoxsaylı sualları cavablandırılıb.   I sinfə elektron sistem vasitəsilə şagird qəbulu haqqında məlumatlar: http://edu.gov.az/az/page/522/14670  

21/02/2018 14:29

Bakı Şəhəri üzrə Təhsil İdarəsində (BŞTİ) I sinfə şagird qəbulunun elektron sistem vasitəsilə həyata keçirilməsinə dair təlim keçirilib. Təlimdə Gəncə Şəhər Təhsil İdarəsi, Sumqayıt Şəhər Təhsil Şöbəsi və Abşeron Rayon Təhsil Şöbəsinin əməkdaşları və həmin regionlarda fəaliyyət göstərəcək Alternativ Qeydiyyat Mərkəzlərinə təhkim olunmuş məsul şəxslər iştirak ediblər. Təlim zamanı BŞTİ-nin İnformasiya təminatı sektorunun nümayəndələri tərəfindən I sinfə şagird qəbulunun mektebeqebul.edu.az elektron sistem vasitəsilə həyata keçirilməsi qaydaları ətraflı şəkildə izah edilib. Eyni zamanda, qeydiyyatdan keçə bilməyən valideynlərin müraciətlərinin cavablandırılması və uşaqların yaş kateqoriyası nəzərə alınmaqla, vətəndaşların yönləndirilməsi məsələləri barədə geniş məlumatlar verilib. Həmçinin, təlim iştirakçılarına onlayn qeydiyyatdan keçirilə bilməyən sənədlər vasitəsilə elektron qeydiyyatın aparılması prosesi də aydın şəkildə göstərilib. Sonda təlim iştirakçılarını maraqlandıran məsələlər ətrafında müzakirələr aparılıb, suallar cavablandırılıb.

20/02/2018 11:14