Sertifikatlaşdırma imtahanlarının gedişi ilə yaxından tanış olmaq məqsədilə Elm və Təhsil Nazirliyinin əməkdaşları, millət vəkilləri və tanınmış ictimaiyyət nümayəndələrinin iştirakı ilə iyunun 24-də imtahanların keçirildiyi Azərbaycan Dövlət Texniki Universitetinin idman kompleksinə mediatur təşkil edilib.    Mediaturda iştirak edən elm və təhsil nazirinin müavini Həsən Həsənli qeyd edib ki, 24 iyun sertifikatlaşdırma imtahanlarının son günüdür. Bu gün ilk dəfə olaraq Azərbaycan dili və ədəbiyyat müəllimləri üçün imtahanlar keçirilir. İmtahanlara 8 500-dən çox müəllim cəlb olunub. Nazir müavini qeyd edib ki, müəllimlərin özünüinkişafı  tədrisin keyfiyyətini artırır və şagird nəticələrinin yaxşılaşmasına səbəb olur.  Eyni zamanda, sertifikatlaşma yaxşı müəllim olmanın təsdiqidir.   Daha sonra qonaqlar proseslə bağlı fikir mübadiləsi aparıblar.    Qeyd edək ki, sertifikatlaşdırma imtahanları 20-24 iyun tarixlərində ölkənin 13 müxtəlif şəhəri üzrə 23 mərkəzdə təşkil olunub. 

24/06/2023 12:30

"ABŞ-nin Corc Vaşinqton Universiteti (CVU)  ilə Azərbaycan Dövlət Pedaqoji Universiteti (ADPU) arasındakı ikili diplom proqramı onlarla gəncimizə ən yaxşı təhsil imkanlarından faydalanmaq fürsəti verir. Bu proqram üzrə ümumilikdə 130-a qədər gəncimizin təhsil siyasəti və idarəçiliyi sahəsində beynəlxalq səviyyəli mütəxəssislər kimi yetişdirilməsi gözlənilir".   Bu sözləri elm və təhsil naziri Emin Əmrullayev iyunun 23-də keçirilən ADPU-CVU ikili diplom magistr proqramının ikinci məzun buraxılışı tədbirindəki çıxışı zamanı deyib.    Emin Əmrullayev təhsil idarəçiliyi sahəsində beynəlxalq təcrübənin ölkəmizə gətirilməsi və yüksək səviyyəli gənc mütəxəssislərin hazırlanmasının dövlət siyasətinin prioritet istiqamətlərindən olduğunu vurğulayaraq proqramın icrasını müsbət qiymətləndirib. Nazir bildirib ki, son bir neçə ildə Azərbaycan universitetləri ilə xarici universitetlər arasında ikili diplom proqramlarının icrası nəticəsində yüzlərlə potensiallı gəncə ölkəni tərk etmədən dövlət hesabına nüfuzlu universitetlərdə təhsil almaq imkanı yaradılıb.   Tədbirdə “BP Azərbaycan” şirkətinin vitse-prezidenti Bəxtiyar Aslanbəyli, CVU-nun Təhsil və İnsan İnkişafı Məktəbinin professoru Kolin Qrin, habelə diplomatik korpus, özəl sektor nümayəndələri, ali və orta ixtisas təhsili müəssisələrinin rəhbərləri, ADPU və Corc Vaşinqton Universitetinin nümayəndələri və proqram məzunları iştirak ediblər.    ADPU-nun rektoru Cəfər Cəfərov çıxışında qeyd edib ki, 3 ildir icra olunan proqramdan ötən il məzun olan ilk 22 nəfər indi təhsil və iqtisadiyyatın müxtəlif sahələri, özəl və dövlət sektoru, eləcə də ictimai sektorda uğurla fəaliyyət göstərir. Bu gün isə proqramı uğurla başa vuran növbəti 19 şəxsin məzun buraxılışı qeyd edilir.    Sonra CVU-nun Təhsil və İnsan İnkişafı Məktəbinin professoru Kolin Qrin məzunları təbrik edib, dekan Maykl Foyerin isə videotəbriki nümayiş etdirilib.    Sonda məzunlara fəxri diplomlar təqdim olunub.

24/06/2023 12:00

İyulun 6-da şagird sayı 500-dən çox olan ümumi təhsil müəssisələrinə direktorların işə qəbulu üzrə müsabiqənin test imtahanı mərhələsi keçiriləcək. 1 889 namizədin dəvət edildiyi test imtahanları ölkə üzrə 8 şəhər olmaqla 9 mərkəzdə təşkil olunacaq. İmtahanların keçiriləcəyi vaxt və məkan barədə məlumat namizədlərin şəxsi səhifələrinə göndərilib.     “Dövlət ümumi təhsil müəssisələrinə direktor vəzifəsinə işə qəbul qaydaları”na əsasən, müsabiqə yazılı imtahan və müsahibə mərhələsindən ibarət olacaq. Yazılı imtahan mərhələsi test imtahanı və yazı işindən ibarətdir. Test imtahanında namizədlərə pedaqogika, metodika ilə bağlı 20 sual, tənqidi oxu bacarığı, təhsil və idarəetmə üzrə qanunvericilik, liderlik, menecment, riyazi məntiq ilə bağlı hər birinə aid 10 sual olmaqla ümumilikdə 60 test tapşırığı təqdim ediləcək. Təqdim olunan sualların yarısını düzgün cavablandırmış namizədlərə yazı işi üzrə esse mövzuları təqdim olunacaq.      Qeyd edək ki, https://miq.edu.az/direktorlar/ saytında direktorların işə qəbulu üzrə nümunə test tapşırıqları və esse mövzuları yerləşdirilib. 

24/06/2023 10:15

İyunun 24-ü sertifikatlaşdırma imtahanlarının son günüdür. Bu gün dövlət ümumi təhsil müəssisələrində çalışan Azərbaycan dili və ədəbiyyat müəllimləri üçün imtahanlar keçirilir.    Prosesə 8 500-dən çox Azərbaycan dili və ədəbiyyat müəllimi cəlb olunub.    Test imtahanları ölkə üzrə 13 müxtəlif şəhərdə təşkil edilmiş 23 mərkəzdə keçirilir.    Qeyd edək ki, sertifikatlaşdırma müəllimlərin davamlı inkişaf prosesidir. Sertifikatlaşdırmadan keçən müəllimlər tədris prosesində daha üstün səriştə və bacarıq sərgiləyirlər.

24/06/2023 09:48

İyunun 22-də ölkə Prezidenti cənab İlham Əliyev “Dövlət qulluqçularının təltif edilməsi haqqında” Sərəncam imzalayıb.     Dövlət qulluğunda səmərəli fəaliyyətlərinə görə təltif olunanlar arasında Elm və Təhsil Nazirliyinin 4 əməkdaşı da var.   Sərəncama əsasən, elm və təhsil nazirinin müşaviri Nicat Məmmədli, Hüquq şöbəsinin müdir müavini Aynur Atayeva, Məktəbdənkənar fəaliyyətin təşkili şöbəsinin İdman sektorunun müdiri Hilal Salmanov, Təhsilin iqtisadiyyatı və statistika şöbəsinin Statistika sektorunun baş məsləhətçisi Mirbaba Babayev "Dövlət qulluğunda fərqlənməyə görə” medalı ilə təltif olunublar.   Təltifə layiq görülən əməkdaşların hər birini təbrik edir, onlara uğurlar arzulayırıq.

23/06/2023 11:15

““İT – Akademiya”nın fəaliyyəti ölkənin informasiya texnologiyaları bazarının inkişafına töhfədir. İnnovasiya və yeni texnologiyaların geniş tətbiqi təhsil sisteminin təkmilləşdirilməsinə zəmin yaradır. Bu tipli layihələr ortayaşlı insanların əmək bazarında rəqabətədavamlı olması və öz peşəsini dəyişmək istiqamətində geniş imkanlar qazanması baxımından böyük rola malikdir”.     Bu sözləri elm və təhsil naziri Emin Əmrullayev iyunun 22-də “Alqoritmika” beynəlxalq proqramlaşdırma və riyaziyyat məktəbinin nəzdində  fəaliyyət göstərən “İT – Akademiya”da təhsil almış tələbələrin “İkinci dalğa” adlı məzun gününda çıxışı zamanı bildirib.     Tədbirdə iqtisadiyyat nazirinin birinci müavini Elnur Əliyev, “Alqoritmika”nın baş direktoru Andrey Lobanov, millət vəkilləri, ali təhsil müəssisələrinin rəhbərləri, layihə müddətində “İT – Akademiya” ilə əməkdaşlıq edən bir sıra dövlət qurumları və şirkətlərin nümayəndələri iştirak ediblər.     Tədbirdə iqtisadiyyat nazirinin birinci müavini Elnur Əliyev bildirib ki, rəqəmsal biliklərin artırılması iqtisadiyyatın daha sürətli inkişafına münbit şərait yaradır. Qlobal iqtisadiyyatda cərəyan edən trendləri izləyən Azərbaycan da cəmiyyətin yüksək rəqəmsal bacarıqlara sahib olmasını və innovativ iqtisadiyyatın formalaşdırılmasını hədəfləyir. “İT – Akademiya”nın müasir əmək bazarının tələblərinə cavab verən insan resurslarının formalaşdırılmasına dəstək verdiyini bildirən nazirin birinci müavini bunun məzunların karyerasına, eləcə də ölkədə rəqəmsal iqtisadiyyatın inkişafına töhfə olacağını qeyd edib.    “Alqoritmika”nın baş direktoru Andrey Lobanov öz növbəsində müasir inkişaf tələbləri fonunda İT sahəsinin əhəmiyyəti barədə fikirlərini bildirib, rəhbəri olduğu qurum tərəfindən tətbiq olunan tədris metodları barədə məlumat verib.      Daha sonra Elm və Təhsil,  İqtisadiyyat nazirliklərinin birgə dəstəyi ilə yaradılan “İT – Akademiya”nın fəaliyyəti və tədris prosesi barədə təqdimat nümayiş olunub.     Sonda “İT – Akademiya”da tədris müddətində uğurlu nəticə göstərən 11 məzun sertifikatla təltif olunub.

22/06/2023 18:04

İyunun 22-də müəllimlərin sertifikatlaşdırma imtahanlarının gedişatını izləmək üçün Elm və Təhsil Nazirliyinin əməkdaşları və Təhsil İnstitutunun rəhbərliyi bölgələrə səfər ediblər.     Elm və Təhsil Nazirliyinin İnsan resursları şöbəsinin müdiri Eşqi Bağırov Qarabağ Regional Təhsil İdarəsinin müdiri Gündüz Əbdülovla birgə Bərdə şəhəri N.Nərimanov adına 3 nömrəli tam orta məktəbdə təşkil edilmiş imtahan prosesini izləyib.     Eşqi Bağırov bildirib ki, davamlı öyrənmə mühiti müəllim-şagird-ailə üçbucağının əsas missiyasıdır. Burada müəllim amili peşəkar, motivasiya edən, üfüq açan və daha yeni öyrənmə vasitələri ilə şagirdlərini gələcəyə hazırlayan şəxs kimi xarakterizə olunur. Müəllimlərin bilik və bacarıqlarının sertifikatlaşdırma vasitəsilə ölçülməsi öyrənmə prosesində məhz bu hədəflərə çatmağı ifadə edir.     Qeyd edək ki, Qarabağ Regional Təhsil İdarəsinin tabeliyində olan təhsil müəssisələri üzrə imtahanlar Ağcabədi şəhəri 11 və Bərdə şəhəri 3 nömrəli tam orta məktəblərdə yaradılmış mərkəzlərdə keçirilir.    * * * Təhsil İnstitutunun direktoru Rüfət Əzizov Lənkəran – Astara Regional Təhsil İdarəsinin müdiri Elxan Nəcəfovla birlikdə Lənkəran şəhəri A.Məhərrəmov adına 7 nömrəli tam orta məktəbdə keçirilən sertifikatlaşdırma imtahanlarını izləyib.    İmtahan prosesini izləyən Rüfət Əzizov qeyd edib ki, sertifikatlaşdırma müəllimin öz üzərində davamlı işləməsi, nəticəsini yaxşılaşdırması üçün stimul yaradır. Onlar tədris sahəsində mövcud olan yeni müsbət təcrübələri mənimsəyir, peşə ilə bağlı bilik və bacarıqlarını artırmaq imkanlarından faydalanırlar.      Qeyd edək ki, sertifikatlaşdırma imtahanları Lənkəran – Astara Regional Təhsil İdarəsi üzrə 1 mərkəzdə təşkil olunub. Lənkəran şəhərində keçirilən imtahanlara Astara, Lənkəran, Lerik və Yardımlı rayonlarının müəllimləri cəlb olunublar.    * * * Elm və Təhsil Nazirliyinin İnformasiya və vətəndaşlara xidmət şöbəsinin müdir müavini Səbuhi Rzayev Gəncə şəhərinə səfəri çərçivəsində İcra Hakimiyyətinin başçısı Niyazi Bayramov, Gəncə-Daşkəsən Regional Təhsil İdarəsinin müdiri Anar Qədiməliyevlə birgə sertifikatlaşdırma imtahanlarının təşkili prosesi ilə yaxından tanış olub.     Səbuhi Rzayevin sözlərinə görə, təcrübə və müşahidələr göstərir ki, şagirdlərin məktəbə qəbulu prosesində valideynlər seçim zamanı qiymətləndirmə nəticəsi yüksək olan müəllimlərə üstünlük verirlər.      Qeyd edək ki, Gəncədə sertifikatlaşdırma imtahanlarının keçirildiyi mərkəzdə valideynləri ilə gələn uşaqların asudə vaxtının səmərəli təşkili məqsədilə onlar üçün əyləncə sahəsi müəyyənləşdirilib. Həmin sahədə pedaqoqlar tərəfindən müxtəlif oyun və maarifləndirici fəaliyyətlər həyata keçirilir.     * * * Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov, Şamaxı Rayon İcra Hakimiyyətinin başçısı Tahir Məmmədov, Dağlıq Şirvan Regional Təhsil İdarəsinin müdiri Rövşən Əliyev, Azərbaycan – Fransız Universitetinin icraçı direktoru Vazeh Əskərov və digər qonaqlar Şamaxı şəhəri 2 və 6 nömrəli tam orta məktəblərdə keçirilən sertifikatlaşdırma imtahanlarını izləyiblər.      Bildirilib ki, sertifikatlaşdırma imtahanları Dağlıq Şirvan Regional Təhsil İdarəsi üzrə 3 mərkəzdə təşkil olunub. Şamaxı şəhərində keçirilən imtahanlara Dağlıq Şirvan, Mərkəzi Aran və Şəki – Zaqatala regional təhsil idarələrinə aid müəssisələrdə çalışan 1 805 müəllim cəlb olunub.     İmtahan prosesini izləyən Cəsarət Valehov qeyd edib ki, sertifikatlaşdırma nəticəsində müəllimlərin peşəkarlıq səviyyəsi yoxlanılarkən  onların təlim ehtiyacları müəyyən edilir. Bununla yanaşı, müəllim peşəkarlığının başlanğıc  pilləsi müəyyən  edilməklə  sertifikatlaşdırma nəticələri əsasında müəllimlərin peşə standartlarının səviyyələri təsbit olunur.     Qeyd edək ki, sertifikatlaşdırma imtahanları 20-24 iyun tarixlərini əhatə edir.

22/06/2023 17:30

“UNEC-in ənənəvi olaraq hər il keçirdiyi konfrans təhsilin keyfiyyətinə, eləcə də beynəlxalq reytinqlərə müsbət təsir göstərir. Universitetlərin reytinqlərinə təsir edən əsas amil elmi araşdırmalardır”. Bu sözləri elm və təhsil naziri Emin Əmrullayev iyunun 22-də İqtisadiyyat və İdarəetmə Sahəsində Tədqiqatçıların V Beynəlxalq Elmi Konfransın açılış mərasimində çıxışı zamanı deyib.   “Heydər Əliyev İli” çərçivəsində Azərbaycan Dövlət İqtisad Universiteti (UNEC), Heydər Əliyev Mərkəzi və “Regional İnkişaf” İctimai Birliyinin birgə təşkilatçılığı ilə keçirilən konfrans “Bir əsrin iqtisadi nəticələri” mövzusuna həsr olunub.    Konfransın açılışında iqtisadiyyat nazirinin birinci müavini Elnur Əliyev, UNEC-in rektoru Ədalət Muradov, TÜRKSOY-un baş katibi Sultan Raev, ölkəmizin və xarici dövlətlərin elm, təhsil, iqtisadiyyat sahələri üzrə rəhbər şəxsləri, alim və tədqiqatçıları iştirak ediblər.    Tədbir iştirakçıları əvvəlcə ümummilli lider Heydər Əliyevin anadan olmasının 100 illik yubileyi münasibətilə yerli və xarici tədqiqatçıların birgə hazırladıqları “Bir əsrin iqtisadi portreti” adlı kitab sərgisi ilə tanış olublar. Konfrans çərçivəsində Azərbaycanın milli-mədəni irsini əks etdirən sənət əsərlərinin nümayiş etdirildiyi “Əsrin 100 çaları” adlı rəsm sərgisinin açılışı olub. Eyni zamanda, şəhid övladlarının əl işlərindən ibarət rəsm əsərləri sərgilənib.    Açılış nitqi ilə çıxış edən Ədalət Muradov bildirib ki, “İnternational Conferences”, “World Conferences” kimi platformaların daimi üzvü olan və bu il beşincisi keçirilən beynəlxalq konfrans özünəməxsus nailiyyətləri ilə elmi ənənəyə çevrilib. Rektor konfransda Böyük Britaniya, İsveçrə, Avstriya, Macarıstan, Türkiyə, İsrail, Ukrayna, Rumıniya, Özbəkistan, Qırğızıstan və Qazaxıstan kimi ölkələrin nüfuzlu 13 universitetinin tərəfdaş qismində iştirak etdiyini deyib.   İqtisadiyyat nazirinin birinci müavini Elnur Əliyev konfrans iştirakçılarını salamlayaraq ulu öndər Heydər Əliyevin ölkə iqtisadiyyatının inkişafındakı əvəzsiz xidmətlərindən söz açıb.    TÜRKSOY-un baş katibi Sultan Raev də öz növbəsində Heydər Əliyevin türk dünyasının birliyi istiqamətində gördüyü işlərdən danışaraq konfransın işinə uğurlar arzulayıb.    Sonra Fransanın Azərbaycandakı ilk fövqəladə və səlahiyyətli səfiri olmuş Jan Pere və ABŞ-nin “Klivlend” klinikasının həkimi Şapur Ənsarinin ulu öndər Heydər Əliyevlə bağlı xatirələrini bölüşdükləri videoçıxışlar nümayiş etdirilib.   Çıxışlardan sonra rəsm əsərləri nümayiş olunan şəhid övladlarına fəxri fərmanlar təqdim edilib.    Qeyd edək ki, iyunun 25-dək davam edəcək konfrans öz işini onlayn formatda müzakirələrlə yekunlaşdıracaq.

22/06/2023 14:00

"Pandemiya dövrü qarşımıza yeni çağırışlar qoydu. Virtual təhsil platformasının yaradılması, təhsil müəssisələrinin bu prosesə operativ qoşulması sistemimizin çevik reaksiyasından xəbər verdi. Pandemiyadan öncə 33 uşağa bir kompüter düşürdüsə, indi bu rəqəm 17-dir. Bu isə onu göstərir ki, təhsil sistemimiz ümumilikdə bu çətinlikdən üzüağ çıxmağı bacardı".    Bu sözləri elm və təhsil nazirinin müavini Həsən Həsənli iyunun 22-də keçirilən “VI ADA 2023” beynəlxalq təhsil konfransının açılış mərasimindəki çıxışı zamanı deyib.    Konfrans ADA Universiteti, Elm və Təhsil Nazirliyi və ABŞ-nin “Anthology” Təhsil və Tədqiqat Mərkəzinin əməkdaşlığı ilə “Maarifçiliyə yenidən baxış” şüarı altında keçirilir.    Maarifçilik və rəqəmsal inqilab təcrübəsini yenidən nəzərdən keçirməyi, həmçinin təhsil ictimaiyyətini müzakirələrə təşviq etməklə qarşıya çıxan problemlərin həllini hədəfləyən konfransda öyrənmə, liderlik və təhsil müəssisələri, qiymətləndirmə, dəyərləndirmə daxil olmaqla müxtəlif mövzularda tədqiqatlar qəbul edilib.    Tədbir zamanı “Anthology” Təhsil və Tədqiqat Mərkəzinin əməkdaşları tərəfindən ADA Universitetinə “Akademik mükəmməllik mərkəzi” mükafatı təqdim edilib.    Konfrans panel müzakirələri ilə davam etdirilib.

22/06/2023 12:35

Bakı şəhəri və bölgələrdə yerləşən bir neçə lisey və gimnaziyanın V-VII siniflərinə mərkəzləşdirilmiş qaydada keçirilmiş qəbul imtahanlarının nəticələri elan edilib.     Şagirdlər sy.edu.az portalı üzərindən yaradılmış "Şəxsi kabinet"lərinə daxil olmaqla imtahan nəticələrini öyrənə bilərlər.   Növbəti mərhələdə iştirak hüququ qazanmış şagirdlər 4 iyul saat 16:00-dək lisey və gimnaziyalar arasından seçim etməlidirlər. Seçimdən sonra şagirdlər imtahan balı və qeyd etdikləri ardıcıllıq əsasında mərkəzi sistem tərəfindən müvafiq lisey və ya gimnaziyaya yerləşdiriləcəklər. Qeyd olunmuş müddət bitdikdən sonra seçim etmək və ya seçimlərdə hər hansı dəyişiklik etmək mümkün deyil.    Qeyd edək ki, qəbul imtahanlarının nəticələri ilə bağlı müraciətlər 25 iyun saat 12:00 tarixinədək office@arti.edu.az elektron ünvanı vasitəsilə qəbul edilir. 

22/06/2023 11:40