“Bir Könüllü” Tələbələrin Əməkdaşlığı İctimai Birliyinin təşkilatçılığı ilə təşkil edilən “StudentFest 2023” tələbə düşərgəsi sona çatıb. Belə ki, təhsilverənlərin sertifikatlaşdırılması prosesi və müəllimlərin işə qəbulu müsabiqəsində dəstək göstərmiş, həmçinin təhsilin idarəedilməsi və pedaqoji profilli ixtisaslarda təhsil alan tələbələr üçün təşkil olunan düşərgənin ilk 2 istiqaməti uğurla tamamlanıb.   “StudentFest 2023”ün açılış mərasimində elm və təhsil nazirinin müşaviri, Təhsilin İnkişafı Fondunun İdarə Heyətinin sədri Elnur Nəsibov, İnsan Resursları Mərkəzinin direktoru Nurlan İsmayılbəyli və “Bir Könüllü” Tələbələrin Əməkdaşlığı İctimai Birliyinin sədri Leyla Zeynalova iştirak ediblər.    Tələbə düşərgələri natiqlik, idarəçilik və kommunikasiya bacarıqlarını formalaşdıran görüşlər, ixtisasyönümlü təlim proqramları, həmçinin asudə vaxtın səmərəli dəyərləndirilməsi məqsədilə keçirilən yarış və intellektual oyunlarla zəngin olub.     Qeyd edək ki, “StudentFest 2023” tələbə düşərgəsinin növbəti 2 istiqaməti avqust və sentyabr aylarında jurnalistika, incəsənət, təbiət elmləri, mühəndislik, dövlət və ictimai münasibətlər ixtisaslarında təhsil alan tələbələr üçün təşkil olunacaq.   

15/08/2023 16:30

Azərbaycan Respublikası ilə Slovakiya Respublikası arasındakı əməkdaşlığa əsasən, Hökumətlərarası Təqaüd Proqramları (HTP) çərçivəsində Slovakiyada təhsil alacaq təqaüdçü müəyyənləşib. Belə ki, 2023–2024-cü tədris ili üzrə 1 nəfər Azərbaycan vətəndaşı sözügedən ölkədə təqaüdlü əsaslarla təhsil almaq hüququ qazanıb. Həmin şəxs “Matej Bel University”də slovak dilinə dair hazırlıq keçdikdən sonra magistratura səviyyəsində kompüter elmləri ixtisası üzrə təhsil alacaq.    Qeyd edək ki, sözügedən təqaüd proqramına dair elan aprelin 28-də dərc olunub.

15/08/2023 16:00

“Azərbaycan üçün öyrət” proqramı çərçivəsində keçirilən “Təhsil avtobusu – gələcəyə doğru” layihəsinə Zəngilan rayonundan başlanılıb. Yay məktəbində 47 şagird iştirak edib.  Layihə çərçivəsində yaradıcı düşünmə, ünsiyyət və təqdimat bacarıqları, kodlaşdırma, robototexnika, ilkin sahibkarlıq anlayışları, STEAM metodologiyası üzrə təlimlər, intellektual yarış və oyunlar təşkil olunub. Qeyd edək ki, layihə çərçivəsində Zəngilan – Laçın – Neftçala – Göyçay – Qazax – Tərtər – Qax – Bakı marşrutu üzrə səfər ediləcək. Layihəyə 300-dən çox şagird cəlb olunub. Layihənin məqsədi şagirdlərə yeni bacarıq və vərdişlər qazandırmaq, onlarda həyata fərqli baxış, dünyagörüşünün formalaşmasına təsir etmək və Heydər Əliyev irsini təbliğ etməkdir.  

15/08/2023 15:00

2023–2024-cü tədris ili üçün peşə təhsili müəssisələrinə ixtisas fənn müəllimləri və  istehsalat təlimi ustalarının işə qəbulu prosesi davam edir.   Peşə təhsili müəssisələrində çalışmaq istəyən şəxslər avqustun 21-dək portal.edu.az vasitəsilə qeydiyyatdan keçməlidirlər. Müsabiqə çərçivəsində ümumilikdə müxtəlif peşə təhsili müəssisələri üzrə 142 ixtisas fənn müəllimi və 429 istehsalat təlimi ustası vakansiyası elan olunub. Müsabiqə elektron әrizәlәrin qәbulu və vakant yerlərin seçilməsi, təqdim edilən mәlumatların uyğunluğunun müvafiq komissiya tәrәfindәn yoxlanılması, test imtahanı mərhələlərindən ibarətdir. Ərizələri təsdiq edilən namizədlər 24 avqust tarixində ixtisas, tədris metodikası və məntiqə aid suallardan ibarət test imtahanında iştirak edəcəklər. Namizədlərin vakant yerlərə yerləşdirilməsi elektron ərizələrində qeyd etdikləri seçim ardıcıllığı gözlənilməklə aparılacaq.    Peşə təhsili müəssisələrinə işə qəbul üzrə müsabiqəyə aşağıda qeyd olunan tələblərə uyğun namizədlər müraciət edə bilərlər:   İxtisas fənn müəllimləri – orta ixtisas və ya ali təhsil müəssisələrini müvafiq ixtisaslar üzrə bitirmiş və dövlət nümunəli diplom almış, xarici ölkədə aldığı ali təhsil haqqında sənədi tanınmış Azərbaycan Respublikasının vətəndaşları və ya ölkəmizdə daimi yaşamaq üçün icazə verilmiş şəxslər;   İstehsalat təlimi ustaları – orta ixtisas və ya ali təhsil müəssisələrini müvafiq ixtisaslar üzrə bitirmiş və dövlət nümunəli diplom almış, xarici ölkədə aldığı ali təhsil haqqında sənədi tanınmış, həmçinin ümumi orta təhsilli və müvafiq sahə üzrə 3 ildən az olmayan əmək stajına malik Azərbaycan Respublikasının vətəndaşları və ya ölkəmizdə daimi yaşamaq üçün icazə verilmiş şəxslər.   Vakansiya siyahısı Müsabiqə proqramı

15/08/2023 10:00

14 – 22 avqust tarixlərində “Təhsil avtobusu – gələcəyə doğru” yay məktəbi keçiriləcək.   Layihənin məqsədi şagirdlərə yeni bacarıq və vərdişlər qazandırmaq, onlarda həyata fərqli baxış, dünyagörüşünün formalaşmasına təsir etmək və Heydər Əliyev irsini təbliğ etməkdir.   Təhsil avtobusu Bakı şəhərindən yola düşərək Zəngilan (Ağalı kəndi) – Laçın – Neftçala – Göyçay – Qazax – Tərtər (Talış kəndi) – Qax – Bakı marşrutu üzrə hərəkət edəcək.   Yay məktəbi adıçəkilən bölgələrdəki ümumtəhsil məktəblərinin akademik göstəriciləri orta və yüksək olan VI-IX sinif şagirdlərini əhatə edəcək. Layihə çərçivəsində şagirdlər kodlaşdırma, robototexnika, yaradıcı düşünmə bacarıqları, ilkin sahibkarlıq anlayışları, ünsiyyət və təqdimat bacarıqları, STEAM metodologiyası üzrə təlimlərdə, həmçinin intellektual oyunlarda iştirak edəcəklər. İştirakçılara sertifikat və hədiyyələr təqdim olunacaq.   Qeyd edək ki, 2016-cı ildən hər il müxtəlif konsepsiya ilə yola çıxan “Təhsil avtobusu” layihəsinə respublikanın 29 bölgəsi üzrə 900-dən artıq şagird və tələbə cəlb edilib. Layihə Elm və Təhsil Nazirliyi, Vətəndaş Cəmiyyətində Debat İctimai Birliyinin təşkilatçılığı və Regional İnkişaf İctimai Birliyinin dəstəyi ilə “Azərbaycan üçün öyrət” proqramı çərçivəsində həyata keçirilir.

14/08/2023 11:08

Avqustun 11-də Biznes Mühiti və Beynəlxalq Reytinqlər üzrə Komissiyada Elm və Təhsil Nazirliyinin rəhbərlik etdiyi “İnsan kapitalı” İşçi Qrupunun növbəti iclası keçirilib. Videokonfrans formatında keçirilən iclasda işçi qrupun 2023-cü il üzrə təsdiqlənmiş Fəaliyyət Planının birinci yarımilinin ilkin nəticələri əks olunub.   İclasda işçi qrupunun 2023-cü ilin birinci yarımili ərzindəki ümumi fəaliyyəti, həmçinin ölkəmizdə cari ilin ilk altı ayı ərzində elm və təhsil sahəsində qəbul edilmiş və insan kapitalının inkişafına xüsusi xidmət edən bir sıra yeni hüquqi aktlar, onların əhatə dairəsi barədə məlumat verilib.   Bununla yanaşı, “İnsan kapitalı” İşçi Qrupunun sonuncu iclasında qəbul edilən, dövlət tərəfindən təhsilə digər mənbələrdən də çəkilən xərclərə dair məlumatların beynəlxalq təşkilatlara təqdim edilməsindən də danışılıb.   Daha sonra Təhsil İnstitutunun İnsan Resursları Mərkəzinin direktoru Nurlan İsmayılbəyli təhsilverənlərin sertifikatlaşdırılması prosesinin əhəmiyyəti və əldə edilmiş ilkin nəticələrin təhlili ilə bağlı təqdimatla çıxış edib.   Yekunda isə mövzu ilə bağlı müzakirələr aparılıb.

12/08/2023 12:51

Avqustun 11-dən peşə təhsili müəssisələrinə işə qəbula start verilir. 2023–2024-cü tədris ili üçün ixtisas fənn müəllimləri və  istehsalat təlimi ustalarının işә qәbulu mərkəzləşdirilmiş qaydada müsabiqә yolu ilə həyata keçiriləcək.     Peşə təhsili müəssisələrində çalışmaq istəyən şəxslər 11–21 avqust tarixlərində portal.edu.az vasitəsilə qeydiyyatdan keçməlidirlər. Müsabiqə çərçivəsində ümumilikdə müxtəlif peşə təhsili müəssisələri üzrə 142 ixtisas fənn müəllimi və 429 istehsalat təlimi ustası vakansiyası elan olunub.   Müsabiqə elektron әrizәlәrin qәbulu və vakant yerlərin seçilməsi, təqdim edilən mәlumatların uyğunluğunun müvafiq komissiya tәrәfindәn yoxlanılması, test imtahanı mərhələlərindən ibarətdir. Ərizələri təsdiq edilən namizədlər 24 avqust tarixində ixtisas, tədris metodikası və məntiqə aid suallardan ibarət test imtahanında iştirak edəcəklər. Namizədlərin vakant yerlərə yerləşdirilməsi elektron ərizələrində qeyd etdikləri seçim ardıcıllığı gözlənilməklə aparılacaq.   Peşə təhsili müəssisələrinə işə qəbul üzrə müsabiqəyə aşağıda qeyd olunan tələblərə uyğun namizədlər müraciət edə bilərlər:   İxtisas fənn müəllimləri – orta ixtisas və ya ali təhsil müəssisələrini müvafiq ixtisaslar üzrə bitirmiş və dövlət nümunəli diplom almış, xarici ölkədə aldığı ali təhsil haqqında sənədi tanınmış Azərbaycan Respublikasının vətəndaşları və ya ölkəmizdə daimi yaşamaq üçün icazə verilmiş şəxslər;   İstehsalat təlimi ustaları – orta ixtisas və ya ali təhsil müəssisələrini müvafiq ixtisaslar üzrə bitirmiş və dövlət nümunəli diplom almış, xarici ölkədə aldığı ali təhsil haqqında sənədi tanınmış, həmçinin ümumi orta təhsilli və müvafiq sahə üzrə 3 ildən az olmayan əmək stajına malik Azərbaycan Respublikasının vətəndaşları və ya ölkəmizdə daimi yaşamaq üçün icazə verilmiş şəxslər.   Vakansiya siyahısı Müsabiqə proqramı

11/08/2023 13:00

“İcmaəsaslı məktəbəqədər təhsil” layihəsi çərçivəsində yaradılan “ilk5il” platformasının (https://www.ilk5il.az) məqsədi valideynləri uşaqların 5 yaşınadək dövrünə dair müxtəlif mövzularda maarifləndirməkdir.   Yarandığı gündən Azərbaycan dilində maarifləndirici resurslara əlçatanlığı artırmağı qarşısına məqsəd qoyan “ilk5il” həmçinin valideyn olmağa hazırlaşanlara dair müxtəlif resurslar təqdim edir.   Veb-saytda valideynlərin şəxsi inkişafı, uşaqların sağlamlığı, təlim-tərbiyəsi, inkişaf və psixologiyası ilə bağlı məqalələr, nağıllar (həmçinin səsli), tapmacalar, videodərs və oyunlar yer alır.   Qeyd edək ki, “ilk5il” platformasının “Instagram” səhifəsi (https://www.instagram.com/ilk5il/) və yeni yaradılmış “Telegram” kanalında (https://t.me/ilk5il) da izləyicilər üçün qısa və interaktiv paylaşımlar edilir.

11/08/2023 10:05

14 avqust saat 15:00-da ümumi orta təhsil bazasından orta ixtisas təhsili müəssisələrinə qəbul olunanların elektron sənəd qəbuluna start veriləcək. Müraciətçilər  portal.edu.az üzərindən qeydiyyatdan keçərək “Ali və orta ixtisas təhsil müəssisələrinə təhsilalan qeydiyyatı” xidmətini seçməklə müraciət edə bilərlər. Açılan səhifədə müvafiq qəbul xətti üzrə şəxsi və qəbul məlumatları təsdiq edilir. Həmçinin müraciət zamanı sosial baxımdan həssas əhali qrupuna aid edilən ailələrin üzvü olan şəxslərə təhsil haqqından azad olunmaq və ya təhsil haqqı güzəşti əldə etmək üçün məlumatların təqdim edilməsi hissəsi də mövcuddur. Elektron sistem üzrə qeydiyyat  23 avqust saat 18:00-da yekunlaşacaq. Qeyd edək ki, qeydiyyat üçün müraciət etməyən şəxslər qəbul olunanların siyahısından xaric ediləcəklər.

10/08/2023 17:00

Müəllimlərin işə qəbulu üzrə müsahibələr davam edir.   Avqustun 10-da informatika, riyaziyyat (rus bölməsi), Azərbaycan dili və ədəbiyyat, rus dili, texnologiya, fransız dili (rus bölməsi) və musiqi fənləri üzrə müsahibələr təşkil olunub. Müsahibələrin ikinci gününə 753 namizəd dəvət edilib.   Qeyd edək ki, müsahibələr avqustun 18-dək davam edəcək.

10/08/2023 12:00