“eTwinning” üzrə 312 layihə Milli Keyfiyyət Nişanına layiq görülüb
“eTwinning” proqramı çərçivəsində 2022–2023-cü tədris ilində icra olunan layihələrin qiymətləndirilməsi başa çatıb və 312 beynəlxalq dərs modeli Milli Keyfiyyət Nişanına layiq görülüb. Bu günə qədər proqram çərçivəsində Azərbaycan müəllimləri 5 103 təhsil layihəsində iştirak ediblər. Milli Keyfiyyət Nişanı qazanmış layihələr Avropa Keyfiyyət Nişanı və Avropa Mükafatı uğrunda 45 ölkənin müəllimləri ilə birgə müsabiqəyə davam edəcəklər. Qaydalara əsasən, müəllimlər başa çatmış layihələri üzrə müraciət edərək milli keyfiyyət nişanları qazana bilərlər. Milli Keyfiyyət Nişanı ortaq dərs modellərində hər bir müəllimin platformada əks olunan fərdi işinin keyfiyyətinə verilən mükafatdır. Milli Keyfiyyət Nişanına müraciət edən layihələrin qiymətləndirilməsi mövzuların ümumi təhsilin fənn kurikulumuna uyğunlaşdırılması, həmkar ölkə müəllim və şagirdləri arasında əməkdaşlığın olması, beynəlxalq qruplarda şagird araşdırmasının yer alması, elektron tədris resurslarından istifadədə pedaqoji innovativliyin tətbiqi meyarları əsasında aparılır. Qeyd edək ki, “eTwinning” layihəsi Avropa İttifaqının Fasiləsiz Təhsil Proqramının tərkib hissəsi olub, Elm və Təhsil Nazirliyi nəzdində Təhsil Sisteminin İnformasiyalaşdırılması İdarəsi tərəfindən həyata keçirilir. Layihənin məqsədi yerli müəllim və şagirdlərlə avropalı həmkarları arasında ünsiyyəti artırmaq, əməkdaşlıq, həmçinin təhsilin inkişafı yönündə müxtəlif layihələr icra etmək üçün şərait yaratmaqdır.
11/10/2023 10:07
“Stipendium Hungaricum in Azerbaijan” layihəsi çərçivəsində növbəti görüş Qubada keçirilib
Azərbaycan Dövlət Pedaqoji Universitetinin (ADPU) Quba filialında “Stipendium Hungaricum in Azerbaijan” layihəsi çərçivəsində görüş keçirilib. Görüşdə ADPU-nun Quba filialının direktoru Yusif Alıyev tədbir iştirakçılarını salamlayaraq iki ölkə arasında əlaqələrin inkişaf etdirilməsi istiqamətində layihənin əhəmiyyətini vurğulayıb. Daha sonra Macarıstanın Azərbaycandakı səfirliyinin təhsil və mədəniyyət üzrə nümayəndəsi Monika Felföldi çıxış edərək təqaüd proqramı barədə məlumat verib. Bildirilib ki, oktyabrın 20-dək davam edəcək layihə Macarıstanın “Stipendium Hungaricum” təqaüd proqramının 10-cu ildönümünə həsr olunub. Layihə Macarıstanda təhsil almış uğurlu məzunların ölkəmizin müxtəlif bölgələrində fəaliyyət göstərən universitetlərin tələbələri ilə görüşünü təşkil etmək, təcrübə və karyera imkanlarını regionlardakı universitetlərdən olan tələbələrlə bölüşmək, həmçinin Hökumətlərarası Təqaüd Proqramları (HTP) çərçivəsində Macarıstanda təhsil barədə məlumatlandırma işini aparmaq məqsədi daşıyır. Qeyd edək ki, layihə çərçivəsində növbəti görüşlərin Naxçıvan, Qazax, Gəncə və Mingəçevirdə keçirilməsi planlaşdırılıb. HTP çərçivəsində Macarıstanda təhsil barədə ətraflı məlumatı htp.edu.az səhifəsindən əldə etmək mümkündür.
10/10/2023 16:13
Elm və Təhsil Nazirliyi ilə QHT-lərə Dövlət Dəstəyi Agentliyi arasında görüş keçirilib
Oktyabrın 9-da Elm və Təhsil Nazirliyində Qeyri-hökumət Təşkilatlarına (QHT) Dövlət Dəstəyi Agentliyinin heyəti ilə görüş keçirilib. Elm və Təhsil Nazirliyinin Aparat rəhbəri Mətin Kərimli iki qurum arasında olan səmərəli əməkdaşlığı xüsusilə qeyd edib və bu əməkdaşlığı genişləndirməyin vacibliyindən danışıb. O, həmçinin QHT-lərin nazirliyin ictimaiyyətlə əlaqələr fəaliyyətində mühüm rol oynadığını, bu sahədə müxtəlif tərəfdaşlıq mexanizmlərinin mövcud olduğunu bildirib. Mətin Kərimli eyni zamanda agentlik tərəfindən keçirilən qrant müsabiqələrində elm və təhsil sahəsində müəyyən edilmiş strateji hədəflərin və islahat istiqamətlərinin əsas götürülməsinin əhəmiyyətini vurğulayıb. QHT-lərə Dövlət Dəstəyi Agentliyinin icraçı direktoru Aygün Əliyeva agentlik tərəfindən keçirilən qrant müsabiqələrinin elm və təhsil sahəsi üzrə layihə təkliflərinin dəyərləndirilməsi prosesində nazirliklə əməkdaşlıq, təhsil müəssisələrində tədbirlərin təşkilində ehtiyacların birgə müəyyən edilməsi, həmçinin layihələrin icrası zamanı keyfiyyət, davamlılıq və nəticəyönümlü fəaliyyət məsələlərinə toxunub. Görüşdə çıxış edən Təhsilin İnkişafı Fondunun rəhbəri Elnur Nəsibov, Elm və Təhsil Nazirliyi yanında İctimai Şuranın sədri Günel Səfərova və digər iştirakçılar qurumlar arasında əməkdaşlığın yeni istiqamətlərindən danışıb, eyni zamanda QHT-lərin elm və təhsil sahəsində fəaliyyətinin Təhsil TV, “Azərbaycan müəllimi” qəzeti tərəfindən işıqlandırılması məsələlərinə toxunublar. Sonda Qeyri-hökumət Təşkilatlarına (QHT) Dövlət Dəstəyi Agentliyi tərəfindən Elm və Təhsil Nazirliyinə xatirə hədiyyəsi təqdim edilib.
10/10/2023 12:42
Təhsil işçiləri üçün təlimlər keçirilir
Elm və Təhsil Nazirliyi ilə ASAN İnnovativ İnkişaf Mərkəzi tərəfindən vətəndaş məmnuniyyətinin artırılması məqsədilə təlimlər keçirilir. Təlim proqramına məktəb direktorları, direktor müavinləri, məktəbəqədər təhsil müəssisələrinin müdirləri, regional təhsil idarələri və onların yerli sektorlarının əməkdaşları cəlb olunublar. Təlimin əsas məqsədlərindən biri vətəndaşlarla çalışan təhsil işçilərinin bilik və bacarıqlarının təkmilləşdirilməsi, bilavasitə vətəndaş məmnuniyyətinin artırılmasıdır. Təlim proqramı vətəndaş məmnuniyyətində “ASAN xidmət” modeli, emosiyaların idarə edilməsi, effektiv ünsiyyət bacarıqları kimi 3 əsas mövzunu əhatə edir. Təlimlərdə 700-dən çox təhsil işçisinin iştirakı nəzərdə tutulub.
10/10/2023 11:17
Gənc müəllimlərlə adaptasiya proqramına qeydiyyat üçün son gün
Oktyabrın 10-da işə yeni qəbul olunmuş gənc müəllimlərlə adaptasiya proqramında iştirak üçün qeydiyyat prosesi başa çatır. Proqramda iştirak üçün linkə daxil olaraq qeydiyyatdan keçmək mümkündür: https://forms.gle/KyvzGw3VaxNXCiQK6 Adaptasiya proqramının məqsədi işə yeni başlayan müəllimlərin iş mühiti və tədris prosesinə rahat uyğunlaşdırılmasına nail olmaqdır. Proqramın müddəti 2 ay nəzərdə tutulub və 2 mərhələdən ibarət olacaq. Birinci mərhələdə “MS Teams” platforması vasitəsilə 9 təlimin keçirilməsi nəzərdə tutulub. Yerli təhsili idarəetmə orqanlarının nümayəndələri və təlimçilər tərəfindən keçiləcək təlimlərə “Öyrədici mühitin yaradılması”, “Məktəbdaxili qiymətləndirmə”, “Məktəbdaxili sənədləşmə işi”, “Müəllimin pedaqoji qabiliyyətləri”, “İnsanlar necə öyrənirlər?”, “Dərs prosesinin təkmilləşdirilməsi”, “Şagirdlərin tanınması və şəxsiyyətin müəyyən olunması” kimi mövzular daxildir. İkinci mərhələdə agma.az paltformasında 10-12 kursun 1 ay ərzində onlayn olaraq tamamlanması planlaşdırılır. Qeyd edək ki, proqram Elm və Təhsil Nazirliyi, Azərbaycan Gənc Müəllimlər Assosiasiyasının (AGMA) təşkilatçılığı ilə həyata keçirilir.
10/10/2023 10:06
Bakıda Tibb Təhsili üzrə VIII Beynəlxalq Konfransın açılış mərasimi keçirilib
Oktyabrın 9-da Bakıda Tibb Təhsili üzrə VIII Beynəlxalq Konfransın açılış mərasimi keçirilib. Azərbaycanda ilk dəfə təşkil edilən konfrans Səhiyyə Nazirliyi, Azərbaycan Tibb Universiteti və Pakistan İslam Respublikasının Riphah Beynəlxalq Universitetinin təşkilatçılığı ilə keçirilir. Açılış mərasimində çıxış edən səhiyyə naziri Teymur Musayev ölkəmizdə tibb təhsilinin dünya standartlarına uyğunlaşdırılması, yüksəkixtisaslı həkim kadrlarının hazırlanması və dünyanın nüfuzlu ali tibb məktəbləri ilə əlaqələrin genişləndirilməsi məqsədilə görülən işlərdən danışıb. Tədbirdə tibb təhsilinin gələcək istiqamətləri ilə bağlı aktual müzakirələrin aparılacağını qeyd edən səhiyyə naziri həmçinin konfransın işinə uğurlar arzulayıb. Konfransda çıxış edən elm və təhsil naziri Emin Əmrullayev tibb təhsilinin ölkənin strateji məsələlərinin həlli və əhalinin sağlamlığının qorunmasında mühüm əhəmiyyətindən danışıb. Nazir bildirib ki, ölkədə bütün zamanlarda ən yaxşı nəticə göstərən şəxslər gələcəkdə ali təhsil almaq üçün məhz tibb sahəsini seçirlər ki, bu da yüksəkixtisaslı həkimlərin formalaşması ilə nəticələnir. Azərbaycan Tibb Universitetinin rektoru Gəray Gəraybəyli də öz növbəsində tədbirin innovativ ideyalar, qabaqcıl təcrübələr və tibb təhsili sahəsində ən son yeniliklərin mübadiləsi üçün platforma rolunu oynayacağına əminliyini ifadə edib. Dünya Tibb Təhsili Federasiyasının prezidenti Rikardo Leon-Borkes konfransın tibb təhsili sahəsində dünyaşöhrətli mütəxəssislər arasında qarşılıqlı əməkdaşlıq üçün dayanıqlı platforma təmin etmək məqsədilə təşkilindən danışıb. Daha sonra çıxış edən digər qonaqlar konfransın əhəmiyyətindən danışıb, təcrübə mübadiləsinin aparılması baxımından önəmli olduğunu bildiriblər. Açılış mərasimindən sonra konfrans işini müxtəlif mövzular üzrə simpoziumlarla davam etdirib. Qeyd edək ki, konfrans oktyabrın 10-dək davam edəcək.
09/10/2023 18:00
Xaricdə doktorantura təhsilinə dair sənəd qəbulu sabah başa çatır
10 oktyabr saat 23:59-da “2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində xaricdə doktorantura təhsili ilə bağlı sənəd qəbulu yekunlaşacaq. Proqrama müraciət üçün tələb olunan sənədlərin siyahısı, elana dair ətraflı məlumat və qeydiyyat linki müvafiq keçidlərdən əldə oluna bilər. Əlavə sual yarandığı zaman “Mütəmadi verilən suallar” bölməsi və ya dpinfo@edu.gov.az elektron poçt ünvanına müraciət edə bilərsiniz.
09/10/2023 11:33
Tərbiyəçi-müəllim olmaq istəyənlər üçün sənəd qəbulu davam edir
Məktəbəqədər təhsil müəssisələrinə tərbiyəçi-müəllimlərin işə qəbulu üzrə müsabiqənin elektron sənəd qəbulu mərhələsi davam edir. Sənəd qəbulu mərhələsi 12 oktyabrda başa çatacaq. Müsabiqədə iştirak etmək istəyən namizədlər 12 oktyabr saat 11:00-dək www.miq.edu.az linkinə daxil olaraq qeydiyyatdan keçə bilərlər. Qeyd edək ki, müsabiqədə orta ixtisas və ali təhsil müəssisələrini məktəbəqədər təhsil üzrə bitirmiş şəxslər iştirak edə bilərlər.
09/10/2023 10:13
Mirzə Uluqbəy adına 1 nömrəli tam orta məktəbdə ilk idman festivalı keçirilib
Oktyabrın 6-da Elm və Təhsil Nazirliyinin təşkilatçılığı ilə nazirliyin Məktəbdənkənar fəaliyyətin təşkili şöbəsinin əməkdaşları, məşqçi-müəllimlər, fiziki tərbiyə müəllimləri və tanınmış idmançılardan ibarət heyət Füzuli şəhəri Mirzə Uluqbəy adına 1 nömrəli tam orta məktəbə səfər edib. Məktəbin pedaqoji kollektivi və şagirdləri ilə keçirilən görüşdə ərazilərimizin düşmən əsarətindən azad edilməsi, həmçinin əhalinin qayıdışı, burada təhsilin bərpa olunmasının tarixi hadisə olduğu qeyd edilib, gənc nəslin fiziki, mənəvi cəhətdən inkişafı, onların sağlamlığının təminatı, vətənin müdafiəsinə hazır olmalarında idman və bədən tərbiyəsinin əhəmiyyətindən danışılıb. Tədbirdə çıxış edən təhsil işçiləri və idman sahəsində yüksək nəticə qazanan idmançılar məktəblilərə uğur hekayələrindən danışıb, onları maraqlandıran sualları cavablandırıblar. Daha sonra Mirzə Uluqbəy adına 1 nömrəli tam orta məktəbin şagirdlərinin iştirakı ilə basketbol, futbol, badminton idman növləri üzrə yarışlar keçirilib. Sonda isə qaliblərə mükafatlar təqdim olunub. Səfər çərçivəsində həmçinin məktəbdə təhsil alan şagirdlərə idman ləvazimatları, geyimlər təqdim edilib, eləcə də təhsil müəssisəsinə xatirə hədiyyələri verilib. Qeyd edək ki, festivalın keçirilməsində məqsəd təhsilalanlar arasında sağlam həyat tərzinin təbliği, idmana marağın artırılması və vətənpərvərlik ruhunun yüksəldilməsi olub.
07/10/2023 15:13
Elm və təhsil naziri Tacikistan səfiri ilə görüşüb
Oktyabrın 6-da elm və təhsil naziri Emin Əmrullayev Tacikistan Respublikasının ölkəmizdə yeni təyin olunmuş fövqəladə və səlahiyyətli səfiri İlhom Abdurahmon ilə görüşüb. Görüşdə Azərbaycan və Tacikistan arasında elm və təhsil sahələrində əlaqələrin cari vəziyyəti, həmçinin gələcək əməkdaşlıq perspektivləri müzakirə edilib.
06/10/2023 17:43
Filter
Elanlar
-
Qarabağ Universitetində vakansiya – elm və innovasiya məsələləri üzrə prorektor
02.07.2024 - 16:39 -
Qarabağ Universitetində vakansiya – tədris məsələləri üzrə prorektor
02.07.2024 - 16:38 -
Qarabağ Universitetində vakansiyalar – müəllim
21.06.2024 - 10:43 -
Qarabağ Universitetində vakansiyalar - müəllim
11.06.2024 - 14:02 -
Qarabağ Universitetində vakansiyalar – fakültə dekanı
03.06.2024 - 13:06
Müstəqillik Günü Azərbaycan xalqının tarixində ən şanlı və parlaq səhifələrdən biridir. ?????? #ElmVəTəhsilNazirliyi #28may #MüstəqillikGünü #MüstəqilAzərbaycan
ƏtraflıAzyaşlı uşaqlara iqlim dəyişmələri və dayanıqlılıqla bağlı biliklərin aşılanmasını nəzərdə tutan “Yaşıl bağça” layihəsinə start verilib.
ƏtraflıMayın 27-də elm və təhsil naziri Emin Əmrullayev İordaniya Haşimilər Krallığının Azərbaycan Respublikasındakı fövqəladə və səlahiyyətli səfiri Ömər Bərəkət əl-Naharla görüşüb. #ElmVəTəhsilNazirliyi #EduAz Ətraflı: https://bit.ly/4dUiEDH
Ətraflı