Rusiya Federasiyası Tatarıstan Respublikasının təhsil və elm naziri İlsur Xadiullinin rəhbərlik etdiyi nümayəndə heyəti ölkəmizdə səfərdədir.    Səfər çərçivəsində qonaqlar Fəxri xiyabana gələrək ümummilli lider Heydər Əliyevin xatirəsini yad edib, məzarı önünə əklil və gül dəstələri qoyublar. Görkəmli oftalmoloq-alim, akademik Zərifə xanım Əliyevanın da məzarı ziyarət olunub, Şəhidlər xiyabanında Azərbaycanın müstəqilliyi və ərazi bütövlüyü uğrunda mübarizədə şəhid olanların xatirəsi anılıb.    Daha sonra elm və təhsil naziri Emin Əmrullayev Tatarıstan Respublikası təhsil və elm naziri İlsur Xadiullin ilə görüşüb. Görüş zamanı Emin Əmrullayev ölkəmizdə təhsil sahəsinin inkişafı istiqamətində görülən işlər haqqında qonaqlara məlumat verib. Tərəflər əlaqələrin cari vəziyyət və perspektivlərini müzakirə ediblər, xüsusilə peşə təhsili və müəllimlərin ixtisasartımına dəstək istiqamətləri üzrə əməkdaşlıq üçün geniş imkanların mövcudluğunu vurğulayıblar.     Səfər çərçivəsində qonaqlar STEAM İnnovasiya Mərkəzini ziyarət ediblər. Nümayəndə heyətinə mərkəzdə yaradılan şərait barədə məlumat verilib. Bildirilib ki, mərkəzdə aviasiya məkanı, klassik və uşaqlar üçün Nyuton, oyun, konstruksiya, “Heureka Classics” otaqları, robotların hazırlanması laboratoriyası, “3 D hologram”, VR zonaları mövcuddur.     Nümayəndə heyəti həmçinin Bakı Dövlət Universitetini (BDU) ziyarət edib və rektor Elçin Babayevlə görüşüb. Görüş zamanı BDU-nun Tatarıstan Respublikasının ali təhsil müəssisələri ilə əməkdaşlıq əlaqələri müzakirə olunub. Nazir İlsur Xadiullin Kazan Federal Universitetində təhsil almış və hazırda BDU-da çalışan professor-müəllim heyəti ilə də görüşüb.    Noyabrın 21-də qonaqlar Bakı Avropa liseyini ziyarət edib və müəssisədə yaradılan şərait, habelə tədris prosesi ilə tanış olublar.     Noyabrın 22-də isə nümayəndə heyəti ilə Peşə Təhsili üzrə Dövlət Agentliyində görüş keçirilib. Görüşdə peşə təhsili sahəsində təcrübə və müəllim mübadiləsi, “Qardaşlaşmış məktəblər” layihəsinin icrası ətrafında fikir mübadiləsi aparılıb. Qonaqlar Sənaye və İnnovasiyalar üzrə Bakı Dövlət Peşə Təhsil Mərkəzini də ziyarət ediblər.

22/11/2023 16:24

Avropa Şurasının təşəbbüsü ilə ənənəvi olaraq hər il Qlobal Təhsil Həftəsi çərçivəsində müxtəlif ölkələrdə daha yaxşı bir dünya yaratmaq və təhsilin əhəmiyyəti barədə məlumatlılığın artırılması yönündə bir sıra tədbirlər həyata keçirilir. Bu məqsədlə ölkəmizdə də Elm və Təhsil Nazirliyinin təşkilatçılığı ilə Qlobal Təhsil Həftəsi 2023 çərçivəsində “Qlobal sülh və anlaşmanın təşviqində təhsilin rolu” adlı vebinar keçirilib.     Görüşdə Uels Universitetinin “Global Humanity for Peace Institute”nun direktoru Şerto Gill, İqtisadiyyat Nazirliyinin şöbə müdiri, Dayanıqlı İnkişaf üzrə Milli Əlaqələndirmə Şurasının katibi Hüseyn Hüseynov iştirak ediblər.   Beynəlxalq əməkdaşlıq şöbəsinin sektor müdiri Müjdat Həsənovun açılış nitqindən sonra professor Şerto Gill mədəniyyətlərarası anlaşma, təhsilin qloballaşması, sülh mövzusunun təhsil sisteminə inteqrasiyasından bəhs edib.    Daha sonra Hüseyn Hüseynov dünyada və cəmiyyətdə sülhün təmin edilməsi yönündə atılan addımlar, Dayanıqlı İnkişaf Məqsədləri çərçivəsində “5 P” – insanlar, planet, rifah, sülh və tərəfdaşlıq məqsədləri, postmüharibə dövründəki cəmiyyətlərdə sülhün təşviqində təhsilin əhəmiyyətindən bəhs edib.   Görüşdə həmçinin Birləşmiş Millətlər Təşkilatının Qaçqınlar üzrə Ali Komissarlığının (BMT QAK) təqaüdü, İslam Əməkdaşlıq Təşkilatı və Qoşulmama Hərəkatına üzv ölkələrin vətəndaşları üçün ayrılan təhsil qrantı proqramları vasitəsilə Azərbaycanda təhsil alan əcnəbi tələbələr, dövlət proqramları və Hökumətlərarası Təqaüd Proqramları çərçivəsində xaricdə təhsil alan azərbaycanlı gənclər də iştirak ediblər.   Vebinarın sonunda isə müxtəlif ölkələrdə hazırda təhsil alan tələbələr mövzu ilə bağlı suallarını ünvanlayıb, eləcə də xaricdə təhsil təcrübələrini bölüşüblər.  

22/11/2023 15:00

Macarıstanda 2024–2025-ci tədris ili üçün Hökumətlərarası Təqaüd Proqramları (HTP) çərçivəsində təhsillə bağlı sənəd qəbulu başlayıb.   Təqaüd proqramı Elm və Təhsil Nazirliyi ilə Macarıstanın Xarici İşlər və Ticarət Nazirliyi arasında 6 yanvar 2021-ci il tarixində imzalanmış 2021–2023-cü illər üçün “Stipendium Hungaricum” proqramı çərçivəsində əməkdaşlıq haqqında Anlaşma Memorandumuna əsasən həyata keçirilir. Proqram Azərbaycan vətəndaşlarına müəyyən olunmuş ixtisaslar üzrə Macarıstanda bakalavriat, magistratura və doktorantura səviyyələrində təqaüd hesabına təhsil almaq imkanı yaradır. Təqaüd proqramına sənəd qəbulu hər iki tərəfin elektron ərizə sistemində 15 yanvar 2024-cü il saat 23:59-a kimi aparılacaq.     Tələbələrin təqaüd proqramına qəbulu ilə bağlı Macarıstan tərəfinin (Tempus Public Foundation) yekun qərarının 2024-cü ilin iyun – iyul ayları ərzində təqdim olunması gözlənilir.   Təqaüd proqramı çərçivəsində təhsilə dair əlavə məlumatIarla elan vasitəsilə tanış ola bilərsiniz.

22/11/2023 14:30

“Sabahın alimləri” XIII respublika müsabiqəsinə qeydiyyat davam edir. İştirak etmək istəyən şagirdlər 15 dekabradək https://sabahinalimleri.edu.az/ portalında qeydiyyatdan keçməlidirlər.    Müsabiqə ABŞ-nin “Society for Science” təşkilatı tərəfindən təşkil olunan Beynəlxalq Elm və Mühəndislik Sərgisi (ISEF) çərçivəsində keçiriləcək.    Müsabiqənin məqsədi ölkəmizdə fəaliyyət göstərən ümumi təhsil müəssisələrinin IX-XI siniflərində təhsil alan şagirdləri elmi axtarışlara sövq etmək, həmçinin 8 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarəolunması, mühəndislik, kompüter elmləri) üzrə elmi-tədqiqata marağı olan istedadlı şagirdləri aşkara çıxarmaqdır.   Müsabiqə ilə bağlı ətraflı məlumatı qeyd olunan linkdən əldə edə bilərsiniz: https://bit.ly/3MrX9hu

21/11/2023 11:22

2023–2024-cü tədris ilinin payız semestri üzrə təhsil tələbə krediti (TTK) üçün müraciətlərin qəbulu prosesi davam edir.  Təhsil krediti almaq istəyən tələbələr  Təhsil Tələbə Krediti Fondunun 146 – 5 Çağrı Mərkəzinə zəng etməklə, eləcə də fondun www.e-ttkf.edu.az portalı, 051 206 78 48 “WhatsApp” nömrəsi və sosial şəbəkələrdəki səhifələri üzərindən müraciətlərini ünvanlaya bilərlər. Qeyd edək ki, bu günədək ümumilikdə 25 696 tələbənin müraciəti rəsmiləşdirilib. Kredit ayrılmış 9 301 nəfər sosial, 16 395 nəfər isə standart TTK-dan yararlanıb. Təhsil tələbə krediti verilən zaman girov və ya zaminlik tələb olunmur. Təhsil tələbə krediti uzunmüddətlidir və təhsil müddətində, güzəşt və möhlət dövründə tələbədən kreditin qaytarılması tələb edilməməklə yanaşı, faizlər də hesablanmır.   

20/11/2023 14:13

Noyabrın 17-də Təhsildə Keyfiyyət Təminatı Agentliyinin (TKTA) təşkilatçılığı ilə “Xarici dövlətlərin ali təhsilə aid kvalifikasiyaların tanınması: prosedurlar və diqqət yetirilməli məqamlar” adlı forum təşkil edilib. Forumun əsas məqsədi xarici ölkələrin ali təhsil müəssisələrindən əldə edilmiş diplomların, həmçinin, qeyri-formal və informal təhsil yolu ilə əldə edilmiş bilik və bacarıqların tanınması və qiymətləndirilməsi sahəsində qabaqcıl beynəlxalq təcrübənin öyrənilməsi, xüsusilə bu sahədə baş verən rəqəmsallaşmanın və tətbiq olunan yeniliklərin müzakirəsini təşkil etməkdir. Tədbirdə elm və təhsil nazirinin müavini Həsən Həsənli, yerli ali təhsil müəssisələrinin rəhbərləri, sahə üzrə beynəlxalq təşkilatların rəhbər heyəti, ekspertlər, digər aidiyyəti qurumların nümayəndələri iştirak ediblər.  Agentliyin İdarə Heyətinin sədrinin müavini, sədr vəzifəsini müvəqqəti icra edən Kamran Rəsulov açılış nitqi ilə çıxış edərək müvafiq sahədə bu günə kimi görülmüş işlər barədə məlumatı forum iştirakçılarının diqqətinə çatdırıb. Daha sonra tədbirdə çıxış edən elm və təhsil nazirinin müavini Həsən Həsənli son dövrlərdə təhsil sahəsində aparılan islahatlardan danışıb, istər xarici ali təhsil, istərsə də qeyri-formal və informal təhsil sahəsində mövcud çətinliklərə toxunub, müasir dövrün tələbinə uyğun yeni çağırışlar və onların həlli istiqamətində diqqət yetirilməli məqamları vurğulayıb. Açılış mərasimi Türkiyə Respublikasının  Ali Təhsil Şurasının İdarə Heyətinin üzvü Hüseyin Karaman, Türkiyə Respublikasının Peşə Kvalifikasiyaları Agentliyinin sədri Mustafa Necmi İlhan və Beynəlxalq Kvalifikasiyaları Qiymətləndirmə Mütəxəssisləri Assosiasiyasının prezidenti Marina Malginanın çıxışı ilə davam edib. Forum beynəlxalq ekspertlərin spikerliyi ilə “Xarici kvalikasiyaların qiymətləndirilməsində rəqəmsallaşma və virtual əməkdaşlıq” və “Qeyri-formal və informal təhsilin tanınmasında çağırışlar və imkanlar” adlı panel müzakirələr ilə davam edib.  

17/11/2023 17:54

Noyabrın 17-də ölkəmizdə ilk dəfə təşkil olunan ali təhsil müəssisələrinin tələbələri arasında futzal idman növü üzrə Azərbaycan Tələbə Liqasının açılış mərasimi keçirilib.   Tədbir Dövlət Himninin səsləndirilməsi ilə başlayıb. Daha sonra şəhidlərimizin xatirəsi birdəqiqəlik sükutla yad edilib.   Sonra Elm və Təhsil Nazirliyinin 2 nömrəli Uşaq-gənclər İnkişaf Mərkəzinin dərnək üzvlərindən ibarət rəqs qrupunun çıxışı olub.   Rəsmi hissədən sonra liqanın A qrupunda mübarizə aparacaq Bakı Dövlət Universiteti və Azərbaycan Dövlət Neft və Sənaye Universitetinin komandalarının qarşılaşması olub, oyun 2:2 hesabı ilə başa çatıb.   Qeyd edək ki, Azərbaycan Tələbə Liqası Elm və Təhsil Nazirliyi, Azərbaycan Tələbə Futbol Federasiyası İctimai Birliyinin təşkilatçılığı, Azərbaycan Həmkarlar İttifaqları Konfederasiyası, Azərbaycan Futbol Federasiyaları Assosiasiyasının dəstəyi ilə keçirilir. 12 universitet komandasının mübarizə apardığı yarışa 2024-cü ilin may ayında yekun vurulacaq. Yarışlarda I, II, III yerləri tutan komandalar diplom, kubok, pul mükafatı ilə, liqada fərqlənən 3 tələbə-futbolçu isə “Ən yaxşı qapıçı”, “Ən məhsuldar oyunçu” və “Ən gənc oyunçu” nominasiyaları üzrə xüsusi mükafatla təltif olunacaq.   Liqanın keçirilməsində məqsəd ali təhsil müəssisələrinin tələbələri arasında futzal idman növünün təbliği, perspektivli idmançıların aşkar edilməsi, bu idman növünə marağın artırılması və tələbələrdən ibarət yığma komandanın formalaşdırılmasıdır.

17/11/2023 17:30

Noyabrın 17-də Təhsil İnstitutu (ARTİ) və Bakı Dövlət Universitetinin (BDU) təşkilatçılığı ilə ümummilli lider Heydər Əliyevin 100 illiyinə həsr edilmiş Doktorantların və Gənc Tədqiqatçıların XXVI Respublika Elmi Konfransının (NASCO XXVI) açılış mərasimi keçirilib.    Açılış mərasimində əvvəlcə Dövlət Himni səsləndirilib, ümummilli lider Heydər Əliyevin və torpaqlarımızın azadlığı uğrunda həlak olan şəhidlərin əziz xatirəsi birdəqiqəlik sükutla yad edilib.   Sonra açılış nitqi ilə çıxış edən BDU-nun rektoru Elçin Babayev tədbir iştirakçılarını salamlayaraq onlara uğurlar arzu edib. Rektor universitetin ölkəmizin əhəmiyyətli elm müəssisələrindən biri kimi təhsil və elmi-tədqiqat sahəsində böyük nailiyyətlər qazandığını diqqətə çatdırıb.   Açılış mərasimində iştirak edən elm və təhsil naziri Emin Əmrullayev konfransın doktorant və gənc tədqiqatçılar üçün xüsusi əhəmiyyəti olduğunu vurğulayıb. Eyni zamanda nazir sözügedən konfransın artıq 26 ildir keçirildiyini və onun təşkilinin vacib tərəflərini qeyd edib.    Emin Əmrullayev çıxışında həmçinin ali təhsil müəssisələri və elmi-tədqiqat institutlarının sıx əməkdaşlığı sayəsində gənc alimlərin inkişafına şərait yaradılmasının üstünlüyündən danışıb. Elmin maliyyələşməsinin bu sahənin inkişafı üçün vacib olduğunu vurğulayan elm və təhsil naziri 300-ə qədər gəncin xarici ölkələrdə doktorantura təhsili almaq üçün göndərildiyini bildirib. Elm və təhsil naziri çıxışının sonunda konfransın işinə uğurlar arzulayıb.    Azərbaycan Milli Elmlər Akademiyasının prezidenti İsa Həbibbəyli çıxışında konfransın gənclər üçün vacibliyini vurğulayıb. İsa Həbibbəyli elmi prosesə təkan vermək üçün elmin müxtəlif sahələrində fənlərin inteqrasiyasının böyük əhəmiyyət kəsb etdiyini bildirib.     ARTİ-nin direktor səlahiyyətlərini icra edən Elnur Əliyev çıxışında tədbirlə bağlı hesabatı diqqətə çatdırıb. Bildirilib ki, konfransa 24-ü yerli, 7-si xarici ali təhsil, 23-ü elmi-tədqiqat müəssisələrindən olmaqla ümumilikdə 279 elmi məqalə təqdim olunub və onlardan 216-sı qəbul edilib.    Çıxışlardan sonra bədii proqram nümayiş olunub.   Daha sonra elmi konfrans panellər və bölmə iclasları ilə davam etdirilib.    Konfrans noyabrın 18-dək öz işini davam etdirəcək.

17/11/2023 15:42

Noyabrın 16-da ölkə üzrə 17 imtahan mərkəzində məktəbəqədər təhsil müəssisələrinə tərbiyəçi-müəllimlərin işə qəbulu üzrə müsabiqənin test imtahanı mərhələsi keçirilib.   Qeyd edək ki, müsabiqənin müsahibə mərhələsi və namizədlərin vakant yerlərə yerləşdirilməsi yerli təhsili idarəetmə orqanları tərəfindən aparılacaq.

17/11/2023 11:06

Noyabrın 16-da elm və təhsil naziri Emin Əmrullayev BMT-nin Uşaq Fondunun (UNICEF) Azərbaycanda missiyası bitməkdə olan nümayəndəsi Aleks Haykens ilə görüşüb.   Görüş zamanı Elm və Təhsil Nazirliyi ilə UNICEF arasında inklüziv təhsilin əhatə dairəsinin genişləndirilməsi, erkən uşaqlıq dövründə inkişaf, təhsil sistemində uşaq müdafiəsi və təhlükəsizliyi, yeniyetmələrin rəqəmsal bacarıqlarının artırılması və bir sıra digər sahələr üzrə əməkdaşlıqdan məmnunluq ifadə edilib.   Emin Əmrullayev fəaliyyəti dövrü ərzində Elm və Təhsil Nazirliyi ilə UNICEF arasında əməkdaşlığın möhkəmləndirilməsindəki xidmətlərinə görə Aleks Haykensə minnətdarlığını bildirib və ona gələcək fəaliyyətində uğurlar arzulayıb.     

16/11/2023 17:57