İyulun 8-də Elm və Təhsil Nazirliyində “Peşə təhsili üzrə ixtisasların Təsnifatı”nın yenilənməsi istiqamətində yaradılmış İşçi qrupun ikinci iclası keçirilib.   Elm və təhsil nazirinin müavini, İşçi qrupun sədri Kənan Kərimzadənin rəhbərliyi ilə keçirilən iclasda Elm və Təhsil Nazirliyi, Peşə Təhsili üzrə Dövlət Agentliyi, Təhsil İnstitutu, İqtisadiyyat Nazirliyi, Əmək və Əhalinin Sosial Müdafiəsi Nazirliyi və Dövlət Turizm Agentliyinin nümayəndələri iştirak ediblər.   İclası giriş sözü ilə açan Kənan Kərimzadə bildirib ki, peşə təhsili üzrə ixtisasların təsnifatının yenilənməsi əmək bazarının dəyişən tələblərinə cavab verən, çevik və müasir peşə təhsili sisteminin formalaşdırılması baxımından mühüm əhəmiyyət daşıyır. O, ilk iclas zamanı aparılmış müzakirələrin və aidiyyəti qurumlar tərəfindən təqdim edilmiş təkliflərin layihənin təkmilləşdirilməsinə mühüm töhfə verdiyini vurğulayıb.   Daha sonra Elm, ali və peşə təhsili şöbəsinin sektor müdiri Səbinə Babayeva təqdimatla çıxış edərək birinci iclasda səsləndirilən mülahizələr, eləcə də aidiyyəti dövlət qurumlarından daxil olmuş rəy və təkliflər əsasında layihədə aparılmış dəyişikliklər barədə ətraflı məlumat verib. Təqdimat zamanı layihənin yenilənmiş strukturu, ixtisas istiqamətlərinin əmək bazarının mövcud və perspektiv tələblərinə uyğunlaşdırılması, yeni peşələrin təsnifata daxil edilməsi, həmçinin beynəlxalq təcrübə ilə uyğunluğun təmin edilməsi istiqamətində görülən işlər iştirakçıların diqqətinə çatdırılıb.   İclas çərçivəsində işçi qrupun üzvləri tərəfindən layihə üzrə geniş müzakirələr aparılıb, peşə təhsili üzrə ixtisasların daha səmərəli qruplaşdırılması, terminoloji vahidliyin təmin edilməsi və yeni yaranan peşə istiqamətlərinin təsnifatda əks etdirilməsi ilə bağlı fikir və təkliflər səsləndirilib.   Sonda layihənin yekunlaşdırılması istiqamətində növbəti mərhələlər, qarşıda duran vəzifələr və fəaliyyət planı müzakirə olunub. İşçi qrupun üzvləri layihənin əmək bazarının inkişaf meyillərinə və beynəlxalq yanaşmalara uyğun şəkildə tamamlanmasının vacibliyini vurğulayaraq müzakirələrin davam etdirilməsi barədə razılığa gəliblər.

08/07/2026 15:19

İyulun 6-da Türkiyə-Azərbaycan Universitetinin Himayəçilər Şurasının 7-ci iclası keçirilib.    İclasda ölkəmizdə səfərdə olan Türkiyə Ali Təhsil Şurasının (YÖK) sədri Erol Özvarın rəhbərlik etdiyi nümayəndə heyəti, o cümlədən Türkiyə-Azərbaycan Universitetinin fəaliyyətində iştirak edən Hacettepe Universiteti, İstanbul Texniki Universiteti (İTÜ) və Orta Doğu Texniki Universitetinin (ODTÜ) rektorları iştirak ediblər.    İclas çərçivəsində Türkiyə–Azərbaycan Universitetinin illik hesabatı, eləcə də inkişaf perspektivləri müzakirə edilib.

06/07/2026 22:05

Fövqəladə Hallar Nazirliyinin təşkilatçılığı, Elm və Təhsil, Gənclər və İdman nazirliklərinin, Qəbələ Rayon İcra Hakimiyyətinin dəstəyi ilə keçirilən “Gənc xilasedici” XII beynəlxalq yarışın və “Gənc xilasedici və yanğınsöndürən” XIII ümumrespublika birinciliyinin qaliblərinin iyulun 4-də Qəbələ şəhərində mükafatlandırılması mərasimi keçirilib.   Mərasimdə fövqəladə hallar naziri Kəmaləddin Heydərov, gənclər və idman naziri Fərid Qayıbov, elm və təhsil nazirinin müavini Firudin Qurbanov, Qəbələ Rayon İcra Hakimiyyətinin başçısı Səbuhi Abdullayev, Vətən müharibəsi şəhidlərinin övladları və ailə üzvləri, ictimaiyyət nümayəndələri iştirak ediblər.   Builki yarışlarda Azərbaycanla yanaşı, Qazaxıstan, Özbəkistan, Belarus və Rusiyadan olan komandalar iştirakçı, Tacikistan isə müşahidəçi qismində iştirak edib.   Yarışlar yeniyetmə və gənclərin fövqəladə hallara hazırlıq səviyyəsinin yüksəldilməsi, məktəblilərə sağlam həyat tərzinin, fərdi və ictimai təhlükəsizliyə məsuliyyətli yanaşma hissinin və milli-vətənpərvərlik ruhunun aşılanması, xilasedici peşəsinə marağın artırılması, müxtəlif ölkələrin gənc xilasediciləri arasında dostluq və əməkdaşlıq əlaqələrinin formalaşdırılması məqsədilə təşkil edilib.   Dövlət Himninin səsləndirilməsi ilə başlanan rəsmi hissədə əvvəlcə yarışlar videoçarx nümayiş olunub.   Sonra məktəblilərin təqdimatında milli vətənpərvərlik və ölkələr arasında dostluğu tərənnüm edən bədii hissə izlənilib, qaliblərə kubok, diplom, fəxri fərman və qiymətli hədiyyələr, digər iştirakçılara isə fəxri fərman və xatirə hədiyyələri təqdim olunub.   Qeyd edək ki, komandalar yarışlarda “Maneələr zolağı”, “Kombinə edilmiş yanğın estafeti”, “Axtarış-xilasetmə işi”, “Komandaların təqdimatı” və “Divar qəzeti” mərhələlərində güclərini sınayıblar.   Gərgin mübarizə şəraitində keçən beynəlxalq yarışda birinci yeri Azərbaycan, ikinci yeri Özbəkistan, üçüncü yeri isə Belarus komandası tutub. Ümumrespublika birinciliyində isə birinci yerə İsmayıllı şəhər N.Behdiyev adına 6 nömrəli tam orta məktəbinin, ikinci yerə Naxçıvan Muxtar Respublikası Babək rayon Nehrəm qəsəbə 3 nömrəli tam orta məktəbinin, üçüncü yerə isə Qusar rayon Yuxarı Zeyxur kənd tam orta ümumtəhsil məktəbinin komandası layiq görülüb.

04/07/2026 18:00

İyulun 3-ü Azərbaycan Memarlıq və İnşaat Universitetinin (AzMİU) “Məzun günü” tədbiri keçirilib.    Tədbir Dövlət Himninin səsləndirilməsi ilə başlayıb. Daha sonra ulu öndər Heydər Əliyev və şəhidlərin əziz xatirəsi bir dəqiqəlik sükutla yad olunub.   Mərasimin açılışında çıxış edən AzMİU-nun rektoru Gülçöhrə Məmmədova məzunları təbrik edərək bildirib ki, 2025/2026-cı tədris ilində AzMİU-da ümumilikdə 3038 tələbə məzun adı qazanıb. Onlardan 2987 nəfəri adi, 51 nəfəri isə fərqlənmə diplomu alıb. Məzunlardan 35 nəfəri əcnəbi vətəndaşdır. Bakalavriat səviyyəsində təhsilini başa vuran tələbələrdən 5 nəfər dünyanın nüfuzlu universitetləri ilə ikili diplom proqramı üzrə məzun olur. Onun sözlərinə görə, builki məzunlar arasında 61 yaşlı məzunun da olması AzMİU-da təhsilin hər yaş üçün əlçatan olduğunu və universitetin ömürboyu təhsil prinsiplərini uğurla həyata keçirdiyini göstərir.    Gülçöhrə Məmmədova bildirib ki, Azərbaycanın sürətli sosial-iqtisadi inkişafı yeni dövrün çağırışlarına cavab verən peşəkar mühəndis və memar kadrlarının hazırlanmasını strateji vəzifəyə çevirib. AzMİU da bu missiyanı uğurla yerinə yetirmək üçün müasir təhsil texnologiyalarını, innovativ yanaşmaları tətbiq edir, əmək bazarının tələblərinə uyğun kadr hazırlığını davamlı şəkildə təkmilləşdirir.   Tədbirdə iştirak edən elm və təhsil nazirinin müavini İdris İsayev çıxışında Azərbaycan Memarlıq və İnşaat Universitetinin ölkənin mühəndis və memarlıq təhsilində xüsusi yer tutduğunu bildirib. O qeyd edib ki, müasir dövrdə əmək bazarının tələblərinə cavab verən peşəkar kadrların hazırlanması dövlətin təhsil siyasətinin prioritetlərindəndir.    Nazir müavini AzMİU-da həyata keçirilən təhsil islahatlarını, beynəlxalq əməkdaşlıqları, innovativ yanaşmaları və universitet-sənaye tərəfdaşlığını yüksək qiymətləndirərək vurğulayıb ki, bu istiqamətdə görülən işlər məzunların peşəkar bacarıqlarının inkişafına və onların əmək bazarında rəqabət qabiliyyətinin artırılmasına mühüm töhfə verir.  İdris İsayev məzunları təbrik edərək onlara fəaliyyətlərində uğurlar arzulayıb, əldə etdikləri bilik və bacarıqları ölkənin inkişafı naminə səmərəli şəkildə tətbiq edəcəklərinə əminliyini bildirib.   Milli Məclisin Elm və təhsil komitəsinin sədri Anar İsgəndərov  müasir dövrün çağırışlarına uyğun bilik və bacarıqlara malik gənc mütəxəssislərin hazırlanmasının xüsusi əhəmiyyət daşıdığını vurğulayaraq məzunlara peşə fəaliyyətlərində daim yeniliklərə açıq olmağı, biliklərini davamlı inkişaf etdirməyi və Vətənə layiqincə xidmət etməyi arzulayıb.   Çıxışlarda AzMİU-nun ölkənin tikinti, memarlıq və mühəndislik sahələri üçün yüksəkixtisaslı mütəxəssislər hazırlayan aparıcı ali təhsil müəssisələrindən olduğu vurğulanıb.     Rəsmi hissədən sonra tədbir bədii-musiqili proqramla davam edib.

04/07/2026 11:45

İyulun 3-də Azərbaycan Dövlət İqtisad Universitetinin (UNEC) Zaqatala filialının yaradılmasının 10 illik yubileyi münasibətilə təşkil olunan “Rəqəmsallaşma dövründə regional universitet modeli” mövzusunda beynəlxalq elmi-praktiki konfransın rəsmi açılış mərasimi keçirilib.   Tədbir iştirakçıları əvvəlcə ulu öndər Heydər Əliyevin Zaqatala şəhərində ucaldılmış abidəsini ziyarət edərək önünə gül dəstələri düzüblər. Daha sonra qonaqlar konfrans çərçivəsində təşkil olunmuş sərgi ilə tanış olublar. Tədbir çərçivəsində UNEC Zaqatala filialının 10 illik fəaliyyətinə həsr edilmiş “The Driving Force of Regional Development: UNEC Zaqatala Branch” kitabının təqdimatı keçirilib.   Rəsmi açılış mərasimi Dövlət Himninin səsləndirilməsi ilə başlayıb, ulu öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.   Daha sonra UNEC Zaqatala filialının yaradılmasının 10 illiyinə həsr olunmuş, filialın fəaliyyət tarixini, inkişaf mərhələlərini, əldə olunan nailiyyətləri və həyata keçirilən layihələri əks etdirən videoçarx nümayiş etdirilib.   Konfransı giriş nitqi ilə açan Azərbaycan Dövlət İqtisad Universitetinin rektoru Ədalət Muradov çıxışında regional ali təhsil müəssisələrinin inkişafından, rəqəmsallaşmanın ali təhsil sistemində yaratdığı imkanlardan və UNEC Zaqatala filialının 10 il ərzində əldə etdiyi uğurlardan bəhs edib.   Elm və təhsil nazirinin müavini Firudin Qurbanov çıxış edərək UNEC Zaqatala filialının regionda ali təhsilin inkişafına verdiyi töhfələri yüksək qiymətləndirib, filial kollektivini 10 illik yubiley münasibətilə təbrik edib.    Nazir müavini bildirib ki, müasir dövrdə universitetlər yalnız bilik verən təhsil müəssisələri deyil, həm də innovasiya, texnoloji inkişaf və insan kapitalının formalaşmasının əsas mərkəzləridir. Onun sözlərinə görə, regional universitetlər bölgələrin sosial-iqtisadi inkişafında daha fəal rol oynamalı, əmək bazarının tələblərinə uyğun mütəxəssis hazırlığını təmin etməli və müasir çağırışlara çevik cavab verən ali təhsil modeli formalaşdırmalıdır.   Nazir müavini qeyd edib ki, ali təhsil müəssisələrinin beynəlxalq rəqabət qabiliyyətinin artırılması üçün güclü nəzəri hazırlıq bacarıq əsaslı təhsillə uzlaşdırılmalı, təhsil proqramları mütəmadi yenilənərək əmək bazarının tələblərinə uyğunlaşdırılmalıdır. O vurğulayıb ki, rəqəmsallaşma, süni intellekt və yaşıl iqtisadiyyat kimi prioritet istiqamətlər ali təhsil sistemində daha geniş yer tutmalıdır.   Açılış mərasimində çıxış edən digər rəsmi qonaqlar, ali təhsil müəssisələrinin rəhbərləri və elm ictimaiyyətinin nümayəndələri UNEC Zaqatala filialının regionda ali təhsilin inkişafına verdiyi töhfələri yüksək qiymətləndirərək filialın 10 illik yubileyi münasibətilə təbriklərini çatdırıblar.   UNEC Zaqatala filialının direktoru Raqif Qasımov çıxışında filialın ötən 10 il ərzində keçdiyi inkişaf yolundan, əldə olunan akademik nailiyyətlərdən, maddi-texniki bazanın gücləndirilməsi, beynəlxalq əlaqələrin genişləndirilməsi və elmi fəaliyyət istiqamətində görülən işlərdən bəhs edib. O, qarşıdakı dövrdə filialın inkişafının əsas prioritetləri barədə məlumat verib.   Qeyd edək ki, beynəlxalq elmi-praktiki konfransa ümumilikdə 310 məqalə müəllifi tərəfindən müraciət daxil olub. Elmi ekspertiza və seçim prosesinin nəticələrinə əsasən 288 məqalə təqdimat üçün qəbul edilib.    Konfrans çərçivəsində “Regional universitetlərin regionların sosial-iqtisadi inkişafına təsiri” mövzusunda dəyirmi masa keçirilib.   Beynəlxalq elmi-praktiki konfrans öz işini 4 iyul tarixində panel iclasları və beynəlxalq vökşoplarla davam etdirəcək.

03/07/2026 18:00

İyulun 3-də elm və təhsil nazirinin müavini Həsən Həsənli İstanbul Atlas Universitetinin rektoru Ersoy Kocabıçak ilə görüşüb.   Görüş çərçivəsində tərəflər arasında cari əməkdaşlıq və gələcəkdə icrası nəzərdə tutulan təşəbbüslər ətrafında müzakirə aparılıb.

03/07/2026 17:30

Elm və Təhsil Nazirliyində Kənd Təsərrüfatı Nazirliyi yanında İctimai Şura üzvləri ilə aqrar sektor və təhsil sahəsi arasında əməkdaşlığın genişləndirilməsi məsələlərinə həsr olunmuş görüş keçirilib.   Görüşdə İctimai Şuranın üzvləri ilə yanaşı, Elm və Təhsil Nazirliyinin Elm, ali və peşə təhsili şöbəsinin əməkdaşları iştirak ediblər.   Görüş çərçivəsində İctimai Şuranın sədri Mürvət Həsənli aqrar sahədə əmək bazarının tələblərinə uyğun kadr hazırlığının təşkili, işəgötürənlərlə əməkdaşlığın genişləndirilməsi, eləcə də ali təhsil müəssisələrində aparılan elmi-tədqiqat işlərinin sektorun aktual problemlərinin həllinə yönəldilməsi ilə bağlı təkliflərini səsləndirib. Bununla yanaşı, İctimai Şuranın digər üzvləri tərəfindən aqrar sahədə prioritet ixtisaslar üzrə kadr hazırlığının genişləndirilməsinin, tələbələrin praktiki bacarıqlarının inkişafı məqsədilə təcrübə bazalarının artırılmasının və tədris məzmununun əmək bazarının ehtiyaclarına uyğun şəkildə yenilənməsinin vacibliyi vurğulanıb.   Elm, ali və peşə təhsili şöbəsinin müdiri Turxan Süleyman kənd təsərrüfatı sahəsində ixtisaslı kadr hazırlığının gücləndirilməsi istiqamətində həyata keçirilən yeniliklər barədə məlumat verib. O, həmçinin peşə, orta ixtisas və ali təhsil pillələri üzrə aqrar ixtisaslara tələbə qəbulu göstəriciləri və bu istiqamətdə görülən işlər barədə iştirakçıları məlumatlandırıb.   Tərəflər aqrar sektorun dayanıqlı inkişafı üçün rəqabətqabiliyyətli və peşəkar insan kapitalının hazırlanmasının prioritet əhəmiyyət daşıdığını vurğulayıblar.    Görüşün sonunda aqrar sahənin ehtiyaclarına uyğun kadr hazırlığının gücləndirilməsi, təhsil və istehsalat arasında əməkdaşlığın genişləndirilməsi, eləcə də birgə təşəbbüslərin həyata keçirilməsi istiqamətində qarşılıqlı fəaliyyətin davam etdirilməsi barədə razılıq əldə olunub.

03/07/2026 09:52

7 iyul saat 11:00-dan etibarən regional təhsil idarələri və Naxçıvan Muxtar Respublikasının tabeliyində olan məktəbəqədər təhsil müəssisələrinə, 9 iyul 2026-cı il saat 11:00-dan etibarən isə Bakı şəhəri üzrə məktəbəqədər təhsil müəssisələrinə qəbul üçün elektron növbələrin yaradılmasına başlanılacaq.   2021 və 2022-ci il təvəllüdlü uşaqlar üçün növbələr saat 11:00-da, 2023, 2024 və 2025-ci il təvəllüdlü uşaqlar üçün isə saat 15:00-da aktiv olacaq.   Nəzərinizə çatdırırıq ki, bu il ilk dəfə olaraq qəbul prosesi “myGov” platforması üzərindən həyata keçiriləcək. Belə ki, valideynlər (və ya qanuni nümayəndələr) qeyd olunan tarixlərdə “myGov” kabinetinə daxil olaraq “Xidmətlər” bölməsindən Elm və Təhsil Nazirliyinin “Məktəbəqədər təhsil müəssisələrinə qəbul” xidmətini seçməklə elektron müraciət prosesini həyata keçirə bilərlər.   Qeyd edək ki, qəbul sistemi vasitəsilə bir uşaq üçün maksimum 3 məktəbəqədər təhsil müəssisəsi seçilə bilər. Yaradılmış növbə boş yer olduğu təqdirdə minimum 5 gündən sonra sorğuya çevriləcək. Sorğu yaradıldıqdan sonra valideyn (və ya qanuni nümayəndə) 7 gün ərzində tələb olunan sənədləri müvafiq məktəbəqədər təhsil müəssisəsinə təqdim etməlidir. Əks təqdirdə sorğu silinəcək və növbəli şəkildə başqa uşağın qəbulu aparılacaq.   Ötən tədris ilində yaradılmış növbə və sorğular arxivləşdirilərək valideyn kabinetinə əlavə edilib. Həmin növbə və sorğular 2026–2027-ci tədris ili üzrə qəbul prosesində etibarlı hesab olunmur.

02/07/2026 14:50

İyulun 1-də Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva Yevlax şəhərinə səfəri çərçivəsində Səməd Vurğun adına 5 nömrəli tam orta ümumtəhsil məktəbinin yeni binasının açılışında iştirak edib.   AZƏRTAC xəbər verir ki, elm və təhsil naziri Emin Əmrullayev Leyla Əliyevaya məktəbin tarixi, burada yaradılmış şərait və tədris imkanları barədə məlumat verib. Bildirilib ki, 2024-cü ilin yanvarında köhnə inzibati bina sökülüb və yerində yeni məktəb binasının tikintisinə başlanılıb. Yeni məktəb binası 528 şagird yerlikdir. Burada müasir standartlara uyğun zəruri tədris şəraiti yaradılıb.   Leyla Əliyeva məktəbin kitabxanası, informatika, biologiya və kimya kabinetləri, texnologiya, məktəb hazırlıq qrupu otaqları, yeməkxana və idman zalında yaradılmış şəraitlə yaxından tanış olub.   Yeni məktəb binasında yaradılmış müasir tədris infrastrukturu şagirdlərin keyfiyyətli təhsil almasına, onların bilik və bacarıqlarının inkişafına, həmçinin müəllimlərin fəaliyyətinin daha səmərəli təşkilinə imkan verəcək.   Məktəbin kollektivi ilə görüşən Leyla Əliyeva onlara uğurlar arzulayıb və xatirə şəkilləri çəkdirib.

02/07/2026 10:51

İyulun 1-də “BilBacar” müsabiqəsinin qaliblərinin mükafatlandırılması mərasimi keçirilib.    Tədbirdə çıxış edən elm və təhsil nazirinin müavini Firudin Qurbanov “BilBacar” müsabiqəsinin əhəmiyyətindən söz açaraq bu cür müsabiqələrin kiçik yaşdan uşaqların oxuyub-anlama qabiliyyətini inkişaf etdirdiyini, texnoloji yeniliklərdən istifadə bacarıqlarını təkmilləşdirdiyini bildirib.    İntellektual yarışlarda iştirak edən məktəblilərimizin sayının hər il daha da artdığını vurğulayan nazir müavini bildirib ki, bu da yeni nəslin müasir çağırışlara ciddi hazırlaşdığını göstərir.      Firudin Qurbanov deyib ki, biliklər nəyin necə qurulduğunu anlamağa imkan verir, lakin yalnız bacarıqlar bunu reallığa çevirməyə, dəyişən şəraitə uyğunlaşmağa və həyat, eləcə də karyera üçün dəyərli bir məhsul yaratmağa kömək edir. Qeyd edib ki, müasir dünyada bacarıqlar fasiləsiz təhsil  və sürətli adaptasiya vasitəsilə formalaşır. İnformasiyanın köhnəlməsi səbəbindən dar akademik biliklər deyil, çevik bacarıqlar, rəqəmsal savadlılıq və müstəqil şəkildə həll yolları tapmaq qabiliyyəti ön plana çıxır.   Daha sonra Təhsil İnstitutunun Təhsildə Məzmun və Qiymətləndirmə Mərkəzinin direktoru İbrahim Baxışlı “BilBacar” müsabiqəsinin nəticələri ilə bağlı təqdimatla çıxış edib. O bildirib ki, bu il 3-cü və 4-cü sinifləri əhatə edən müsabiqəyə 2 316 ümumi təhsil müəssisəsini təmsil edən 186 521 şagird qoşulub, 404 uşaq finalçı seçilib. İki sinif üzrə 36 nəfər qalib elan olunub. Qaliblərdən 20-si oğlan, 16-sı qızdır. Ümumilikdə ölkə üzrə 3-cü və 4-cü sinif şagirdlərinin 67%-i müsabiqədə iştirak edib.    Daha sonra çıxış edən Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva qalibləri təbrik edərək vurğulayıb ki, bir uşaq üçün əsas məsələ müsabiqədə medal qazanmaq deyil, özünü inkişaf etdirərək hər dəfə bir addım irəli aparmaqdır. Aynur Sofiyeva hər uğurun böyük bir məsuliyyət yaratdığını da qaliblərin diqqətinə çatdırıb.    Tədbirdə regional təhsil idarələrinin “Bilbacar” müsabiqəsində aktiv fəaliyyətinə görə seçilmiş əməkdaşları, həmçinin “Yüksək nəticə” və “Fəal iştirakçılıq” nominasiyaları üzrə müəyyən olunmuş məktəblər də təltif ediliblər.    Qeyd edək ki, 2025-ci ilin noyabr ayında start verilən “BilBacar” müsabiqəsinin builki əsas məqsədi ibtidai sinif şagirdlərində oxu savadlılığını artırmaq, mətnin məzmununu anlama, təhlil və nəticə çıxarma bacarıqlarını inkişaf etdirmək, oxu fəaliyyətlərini təşviq etmək, eyni zamanda şagirdlərə kompüter əsaslı qiymətləndirmə mühitində təcrübə qazandırmaq olub.

01/07/2026 19:00