Yanvarın 16-da Elm və Təhsil Nazirliyində Azərbaycan Dövlət Mədəniyyət və İncəsənət Universitetinin (ADMİU) bir qrup əməkdaşına dövlət təltifləri təqdim edilib.    Təqdimat mərasimində çıxış edən elm və təhsil naziri Emin Əmrullayev ali təhsil müəssisəsinin kollektivini salamlayaraq dövlət təltiflərinin verilməsini onlara göstərilən böyük etimad kimi dəyərləndirib.    Elm və təhsil sahəsində gələcəyə baxışdan danışan Emin Əmrullayev bildirib ki, bu gün mədəniyyət və incəsənət üzrə Azərbaycan təhsilinin nailiyyətləri qürur duyula biləcək qədər böyükdür. Bu da sözügedən sahələr üzrə çalışan sənətkar, alim və müəllimlərin əməyinin nəticəsidir.    Sonda elm və təhsil naziri müəssisənin professor-müəllimlərini yüksək dövlət mükafatlarına layiq görülmələri münasibətilə təbrik edib və onlara gələcək fəaliyyətlərində uğurlar arzulayıb.   Daha sonra universitet əməkdaşlarına dövlət təltifləri təqdim olunub.   Sonda çıxış edən rektor Ceyran Mahmudova, həmçinin universitet əməkdaşları onlara göstərilən yüksək diqqət və qayğıya görə minnətdarlıqlarını bildiriblər.      Qeyd edək ki, Azərbaycan Respublikası Prezidenti İlham Əliyevin sərəncamı əsasında ADMİU-nun 100 illiyi münasibətilə müəssisənin 7 əməkdaşı Azərbaycan Respublikası Prezidentinin fəxri diplomu, 3 əməkdaşı 3-cü dərəcəli “Əmək” ordeni, 15 nəfər isə “Tərəqqi” medalı ilə təltif edilib.   Sərəncam əsasında həmçinin Azərbaycanda təhsilin inkişafında xüsusi xidmət və peşəkarlığına görə universitetin rektoru Ceyran Mahmudovaya “Əməkdar incəsənət xadimi”, universitetin 9 müəlliminə “Əməkdar müəllim” fəxri adı verilib. Universitetin 4 əməkdaşına isə ölkədə təhsilin inkişafında uzunmüddətli və səmərəli fəaliyyətlərinə görə Azərbaycan Respublikası Prezidentinin fərdi təqaüdü verilib. Təltif olunanlar

16/01/2024 16:30

Dünyanın nüfuzlu reytinq təşkilatlarından biri “Times Higher Education” (THE) tərəfindən dərc olunan “THE Impact 2024”də iştirak edən Azərbaycan universitetlərinin sayı 2 dəfədən çox artıb. Ötən il ölkəmizdən 8 universitetin iştirak etdiyi qiymətləndirmədə bu göstərici cari ildə 18-ə yüksəlib.     Ali təhsil müəssisələrinin Birləşmiş Millətlər Təşkilatının Dayanıqlı İnkişaf Məqsədlərinə töhfəsinin ölçüldüyü “THE Impact” reytinqində qiymətləndirmə 4 əsas istiqamət üzrə aparılır: tədqiqat, idarəetmə, maarifləndirmə və tədris. Qiymətləndirmədə təhlil olunan meyarlardan biri də universitetlərin davamlı inkişaf, o cümlədən iqlim dəyişikliyi ilə mübarizə sahələrində fəaliyyətidir.   Qeyd edək ki, cari ilin iyun ayında Tailandın paytaxtı Banqkok şəhərində keçiriləcək Davamlı İnkişaf Konqresində “THE Impact 2024” reytinqinin nəticələri elan ediləcək.

12/01/2024 17:28

2020–2023-cü illər ərzində “Scopus”da indekslənən jurnallarda dərc olunan elmi işlərin təhlilinə əsasən, Elm və Təhsil Nazirliyinə tabe 5 universitetin göstəricilərini təqdim edirik:     Nəticələrə əsasən, Bakı Dövlət Universiteti son 4 ildə 2627 məqalə sayı ilə ən yüksək nailiyyət göstərib. Universitet qeyd olunan illər ərzində elmi məqalələrin sayına görə həm də Cənubi Qafqaz regionunda lider mövqe tutub.   Azərbaycan Dövlət Neft və Sənaye Universiteti (ADNSU), Azərbaycan Dövlət İqtisad Universiteti (ADİU) və Azərbaycan Texniki Universiteti (AzTU) dərc olunan məqalələrin sayında hər il ardıcıl artım nümayiş etdirib.   BDU, ADNSU və ADİU həm də ölkə üzrə ilk üçlükdə yer alıb.    Qeyd olunan ali təhsil müəssisələrinin elmi nəşrlərinin sayı 2023-cü ildə əhəmiyyətli dərəcədə artıb. Bu illərdə həmin universitetlərdən 5157 tədqiqat işi bazaya daxil edilib.

12/01/2024 17:00

Hazırda Elm və Təhsil Nazirliyi tərəfindən bütün təhsil pillələri üzrə kağız daşıyıcıda verilən bir çox arayışlar elektron şəkildə təqdim olunur.   İstifadəçilər https://portal.edu.az/ portalının “Elektron arayışlar” xidməti vasitəsilə aşağıdakı arayış növlərini əldə edə bilirlər: ali təhsil pilləsində təhsil almaq barədə arayış (hazırda təhsil alanlar); orta ixtisas təhsili pilləsində təhsil almaq barədə arayış (hazırda təhsil alanlar); peşə təhsili pilləsində təhsil almaq barədə arayış (hazırda təhsil alanlar); Dövlət Proqramı əsasında xaricdə təhsil almaq barədə arayış (hazırda təhsil alanlar); Dövlət Proqramı əsasında xaricdə təhsil müəssisəsindən məzun olmaq barədə arayış; müəllimlərin işə qəbulu və diaqnostik qiymətləndirilməsi üzrə imtahan nəticələrinə dair arayış.   Sözügedən elektron arayışların alınması proseduru çox sadədir. Belə ki, https://portal.edu.az/ portalında qeydiyyatdan keçən istifadəçilər “Şəxsi kabinet”in elektron xidmətlər pəncərəsindən “Arayış əldə etmək üçün müraciət” bölməsini seçərək müvafiq arayış növü üzrə müraciət göndərirlər. Elektron arayışlar portalda avtomatik formalaşdırılır. Vətəndaşlar arayışı elektron formada və ya çap edərək aidiyyəti qurumlara təqdim edə bilirlər.   Eyni zamanda Elm və Təhsil Nazirliyinin rəsmi saytında (https://edu.gov.az/az/yoxla) elektron arayışın identifikasiya nömrəsi və müraciətçinin doğum tarixini yazmaqla sənədin həqiqiliyini yoxlamaq, yükləmək və çap etmək mümkündür.   Bununla yanaşı, ümumi və tam orta təhsil haqqında attestat, diplom və dövlət proqramları vasitəsilə xaricdə təhsil barədə məlumatlar qeyd olunan arayışları "myGov" portalından əldə etmək mümkündür.

11/01/2024 17:00

10 yanvar saat 17:00-dan 2023–2024-cü tədris ilinin I yarımili üzrə şagirdlərin yerdəyişməsi prosesi müvəqqəti dayandırılır.   Tam orta təhsil səviyyəsi üzrə buraxılış imtahanlarına az müddət qaldığını nəzərə alaraq, XI sinif üzrə yerdəyişmə prosesi tədris ilinin sonunadək aktiv edilməyəcək.   Məktəbəhazırlıq qrupları və I-X siniflər üzrə elektron yerdəyişmə prosesinin yenidən başlanılacağı tarix barədə ictimaiyyətə əlavə məlumat veriləcək.  

10/01/2024 12:30

Elm və Təhsil Nazirliyi yanında İctimai Şuraya seçkilər davam edir.     İctimai Şuraya üzvlüyə namizədlərin və seçkidə iştirak edəcək seçicilərin qeydiyyatı üçün sənədlərin qəbulu shura@edu.gov.az poçt ünvanına göndərilməklə aparılır. Sənədlərin qəbul müddəti 31 yanvar 2024-cü il tarixində başa çatacaq.   Ətraflı məlumatla elan vasitəsilə tanış ola bilərsiniz. 

09/01/2024 14:28

“SABAH qrupları” layihəsinin bakalavriat və magistratura səviyyələrində 2023–2024-cü tədris ilinin yaz semestri üçün professor-müəllim heyəti və mütəxəssislərin saathesabı qaydada işə qəbulu həyata keçirilir.     Müsabiqədə iştirak üçün son müraciət tarixi 14 yanvar saat 23:59 müəyyən edilib.   Müsabiqə barədə ətraflı məlumatı https://sabah.edu.az/az linki üzərindən "Tədbirlər və elanlar" bölməsinə daxil olaraq əldə edə bilərsiniz.

08/01/2024 14:49

TALIS 2024-ün (Öyrətmə və Öyrənmə üzrə Beynəlxalq Sorğu) əsas mərhələsinin təşkilinə başlanılıb. Sorğunun 2024-cü ilin fevral ayında keçirilməsi nəzərdə tutulub.  Ötən il sınaq mərhələsi həyata keçirilmiş sorğunun əsas mərhələsində ölkə üzrə 222 ümumi təhsil müəssisəsindən 4 000-ə yaxın müəllim və müəssisə direktorlarının iştirakı planlaşdırılıb. Beynəlxalq sorğu 55-ə yaxın ölkədə keçirilməklə müəllim və məktəb direktorlarının peşəkar inkişafı, eləcə də onların təhsilə dair yanaşmalarını anlamaq, iş, tədris təcrübələrinin qiymətləndirilməsi kimi məsələləri tədqiq etmək məqsədilə təşkil olunur. TALIS İqtisadi İnkişaf və Əməkdaşlıq Təşkilatı ilə Təhsil Nailiyyətlərinin Qiymətləndirilməsi üzrə Beynəlxalq Assosiasiya tərəfindən 5 ildən bir keçirilir. Qeyd edək ki, ölkəmiz TALIS sorğusunda ilk dəfə iştirak edir. 

08/01/2024 14:07

IELS 2025-in (Beynəlxalq Erkən Öyrənmə və Uşaq Nailiyyəti Tədqiqatı) sınaq mərhələsinin təşkilinə başlanılıb. Sınağın 2024-cü ilin fevral – mart aylarında keçirilməsi nəzərdə tutulub.    Tədqiqatın sınaq mərhələsində Bakı və Sumqayıt şəhərləri üzrə 40 təhsil müəssisəsindən 600-ə yaxın təhsilalanın iştirakı planlaşdırılıb.   Ölkə üzrə 5 yaşlı uşaqların bilik və bacarıqlarını ölçməyə, həmçinin digər ölkələrdəki eyniyaşlı uşaqların səriştələri ilə müqayisə aparmağa imkan yaradan IELS İqtisadi İnkişaf və Əməkdaşlıq Təşkilatı tərəfindən keçirilir.   Qeyd edək ki, ölkəmiz IELS tədqiqatında ilk dəfə iştirak edir.   

07/01/2024 16:08

Elm və təhsil naziri Emin Əmrullayev 26 yanvar tarixində Göyçay rayonunda vətəndaşları qəbul edəcək. Qəbulda Göyçay, Mingəçevir, Yevlax, Ağdaş, Ucar, Kürdəmir və Zərdab sakinləri iştirak edə bilərlər.   Adları çəkilən şəhər və rayonların sakinləri 17 yanvar (saat 18:00-dək) tarixinədək Elm və Təhsil Nazirliyinin Çağrı Mərkəzinin 146 – 2 və 146 – 6 nömrəli telefonlarına (yalnız iş günləri və saatları ərzində) zəng etməklə qəbula yazıla bilərlər. Bununla yanaşı, nazirliyin rəsmi saytının https://edu.gov.az/az/contact_us bölməsinə elektron formada və ya +994 51 206 78 48 nömrəsinə “WhatsApp” vasitəsilə müraciət göndərmək mümkündür.

07/01/2024 11:46