Dövlət ümumi təhsil müəssisələrində çalışan müəllimlərin iş yerinin qarşılıqlı dəyişdirilməsi prosesinə start verilir. Prosesdə iştirak etmək istəyən şəxslər miq.edu.az/qy/ saytına daxil olaraq qeydiyyatdan keçə bilərlər.   Qeyd edək ki, əsas iş yeri üzrə müddətsiz müqavilə əsasında müəllim olaraq çalışan və minimum 5 saat dərs yükünə malik şəxslər qarşılıqlı yerdəyişmə prosesində iştirak edə bilərlər.    Müsabiqədə iştirak üçün namizədlərin müəllimlərin işə qəbulu və ya diaqnostik qiymətləndirmə imtahanı nəticəsinin minimum 30 bal olması vacibdir.   Qeydiyyatla bağlı təlimat videosunu linkə daxil olmaqla izləmək mümkündür: https://youtu.be/UzutAmMm7T0     Əlavə suallarla bağlı müvafiq linkə keçid etməklə cavab ala bilərsiniz: https://shorturl.at/aqsN6

20/09/2023 14:43

Elm və Təhsil Nazirliyinin Akkreditasiya Şurasının 2023-cü il üzrə ikinci iclası keçirilib.   İclasda Təhsildə Keyfiyyət Təminatı Agentliyinin İdarə Heyətinin sədri Ülkər Səttarova 5 ali təhsil müəssisəsində (Azərbaycan Memarlıq və İnşaat Universiteti, Xəzər Universiteti, Lənkəran Dövlət Universiteti, Bakı Dövlət Universitetinin Qazax filialı və Azərbaycan Dövlət İqtisad Universitetinin Zaqatala filialı) həyata keçirilmiş institusional akkreditasiya qiymətləndirmələri əsasında müvafiq komissiyalar tərəfindən hazırlanmış hesabat və təhlilləri təqdim edib.   İclasda keçirilmiş səsvermənin nəticələrinə uyğun olaraq, Azərbaycan Memarlıq və İnşaat Universiteti, Xəzər Universiteti və Lənkəran Dövlət Universitetinin institusional akkreditasiya nəticələri “əsasən uyğundur” hesab edilib və müəssisələrin növbəti 5 il müddətinə akkreditasiya olunması haqqında qərar verilib. Bakı Dövlət Universitetinin Qazax filialı və Azərbaycan Dövlət İqtisad Universitetinin Zaqatala filialının institusional akkreditasiya nəticələri isə “uyğun deyildir” hesab edilərək qüvvədə olan akkreditasiya şəhadətnaməsinin müddətinin növbəti 2 ilədək uzadılması və sözügedən təhsil müəssisələrinin 1 ildən sonra təkrar akkreditasiya edilməsi qərara alınıb.    Bundan başqa, institusional akkreditasiyası 2023-cü ildə nəzərdə tutulmuş Azərbaycan Dövlət Neft və Sənaye Universitetinin mövcud akkreditasiya şəhadətnaməsinin etibarlılıq müddətinin 1 ilədək uzadılması ilə bağlı müraciəti müzakirə edilərək şurada səsverməyə qoyulub və qiymətləndirmənin 2024-cü ilin fevral ayına təyin edilməsi barədə qərar qəbul edilib.   İclasda Bakı Dövlət Universitetinin magistratura səviyyəsində tədris olunan 6 ixtisasın (yüksək molekullu birləşmələr kimyası, neft kimyası, üzvi kimya, qeyri-üzvi kimya, analitik kimya, fiziki kimya) Qazaxıstanın Təhsildə Keyfiyyət Təminatı üzrə Müstəqil Agentliyi tərəfindən aparılmış beynəlxalq proqram akkreditasiya qiymətləndirməsi nəticələrinin dövlət akkreditasiyası tərəfindən nəzərə alınmasına dair müraciəti səsverməyə qoyulub və təsdiq olunub.   Qeyd edək ki, cari ildə ümumilikdə 10 ali təhsil müəssisəsinin akkreditasiya qiymətləndirməsi yekunlaşdırılıb. İlin sonunadək daha 3 ali təhsil müəssisəsinin (ADA Universiteti, Bakı Mühəndislik Universiteti və Azərbaycan Tibb Universiteti) institusional akkreditasiya qiymətləndirməsi planlaşdırılır.  

20/09/2023 12:03

“2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində  xaricdə doktorantura təhsili üçün sənəd qəbulunun müddəti uzadılıb. Sənəd qəbulu 30 sentyabr saat 23:59-da başa çatacaq.   Proqrama müraciət üçün tələb olunan sənədlərin siyahısı,  elana dair ətraflı məlumat və qeydiyyat linki müvafiq keçidlərdən əldə oluna bilər.   Əlavə sual yarandığı zaman “Mütəmadi verilən suallar” bölməsi və ya dpinfo@edu.gov.az elektron poçt ünvanına müraciət edə bilərsiniz.

20/09/2023 09:25

11-14 sentyabr tarixlərində “Zuğulba” Tədris İdman Bazasında Elm və Təhsil Nazirliyinin dəstəyi, “Bir Könüllü” Tələbələrin Əməkdaşlığı İctimai Birliyinin “Elm və innovasiya” proqramının təşkilatçılığı ilə tələbələrin elm düşərgəsi keçirilib.    Düşərgəyə ali təhsil müəssisələrinin bakalavriat səviyyəsinin biologiya, kimya, fizika və əlaqəli ixtisaslar üzrə II-III kurslarında təhsil alan ümumilikdə 50 iştirakçı cəlb olunub. Tələbələr təlim sessiyalarında iştirak, eləcə də maarifləndirici qrup işlərində çalışmaq imkanı əldə ediblər.    Elm düşərgəsinə spiker qismində qoşulan qonaqlar təcrübələrini, müasir innovasiyalar, elm sahəsində baş verən yenilikləri tələbələrlə bölüşüblər, həmçinin müxtəlif komanda işləri apararaq iştirakçılarla birlikdə praktik tapşırıqlar həll ediblər. Bununla yanaşı, tələbələri maraqlandıran sualları cavablandırıblar və gələcək karyera imkanları barədə faydalı müzakirələr aparıblar.     Qeyd edək ki, düşərgənin keçirilməsində məqsəd tələbələr arasında elmi inkişafı dəstəkləmək, tədqiqatçılarla əlaqələrin qurulmasına dəstək olmaq, həmçinin müasir dövrdə elm sahəsindəki problemlər və həll yollarını izah etməkdir.   

19/09/2023 16:26

Yevlax rayonunun Xanabad kəndində Heydər Əliyev Fondu tərəfindən inşa edilən 360 şagird yerlik məktəb istifadəyə verilib.   4 korpusdan ibarət üçmərtəbəli məktəb binasında 19 sinif otağı, fizika, kimya, biologiya kabinetləri, fənn laboratoriyaları, informatika, çağırışaqədərki hazırlıq, tibb, əmək təlimi otaqları, kitabxana, yeməkxana, akt zalı və açıq idman meydançası mövcuddur. Zəruri mebel, avadanlıqlar, əyani vəsaitlərlə təchiz edilən təhsil müəssisəsində müasir istilik və işıqlandırma sistemi də quraşdırılıb. *** Heydər Əliyev Fondu tərəfindən əsaslı təmir olunan Lənkəran şəhəri 1 nömrəli tam orta məktəb istifadəyə verilib.   Məktəb 840 şagird yerlikdir. Təhsil müəssisəsində idman zalı, 3 laboratoriya, 150 yerlik akt zalı və informatika otaqları mövcuddur. Məktəb zəruri mebel və avadanlıqlarla, fənn kabinetləri, laboratoriyalar isə əyani vəsaitlərlə təchiz edilib. Məktəbin təhlükəsizlik sisteminə xüsusi diqqət yetirilib, çoxsaylı kameralar quraşdırılıb.   *** Salyan rayonunun Şorsulu kəndində Heydər Əliyev Fondu tərəfindən inşa edilən yeni məktəb binası istifadəyə verilib.   Məktəb 300 şagird yerlikdir. İkimərtəbəli məktəb üç korpusdan ibarətdir. Təhsil müəssisəsində 13 sinif otağı, fizika, kimya, biologiya laboratoriyaları, informatika, çağırışaqədərki hazırlıq, əmək təlimi otaqları, kitabxana, yeməkxana, akt və idman zalları, açıq idman meydançası mövcuddur. Məktəb zəruri mebel, avadanlıqlar və əyani vəsaitlərlə tam təchiz edilib. Məktəbin ərazisində abadlıq və yaşıllaşdırma işləri görülüb.    *** Cəlilabad rayonunun Sərhədabad kəndində Heydər Əliyev Fondu tərəfindən yeni inşa edilən məktəb binası istifadəyə verilib.   360 şagird yerlik 3 mərtəbəli yeni təhsil ocağı 4 korpusdan ibarətdir. Təhsil müəssisəsi zəruri mebel, avadanlıqlarla, fənn kabinetləri və laboratoriyalar isə əyani vəsaitlərlə təchiz edilib. Bununla yanaşı, məktəbin təhlükəsizlik məsələlərinə xüsusi diqqət yetirilib, həyətyanı ərazisi abadlaşdırılıb, dekorativ kol və ağaclar əkilib, müasir işıqlandırma sistemləri quraşdırılıb.   *** Heydər Əliyev Fondu tərəfindən inşa olunan Sabirabad rayonu Narlıq kənd Ə.Səmədov adına tam orta məktəb istifadəyə verilib.   İkimərtəbəli yeni məktəb binası 300 şagird yerlikdir və 4 korpusdan ibarətdir. Yeni tədris ilini tam təmirli məktəbdə başlayan şagird və müəllimlərə keyfiyyətli tədris prosesi üçün lazımi şərait yaradılıb. Məktəb zəruri mebel, avadanlıqlarla, fənn kabinetləri və laboratoriyalar isə əyani vəsaitlərlə təchiz edilib. Məktəbdə müasir standartlara cavab verən fizika, kimya, biologiya laboratoriyaları, informatika, çağırışaqədərki hazırlıq, əmək təlimi otaqları, kitabxana, yeməkxana, akt və idman zalları, açıq idman meydançası yaradılıb. Məktəbin həyətyanı ərazisində abadlıq və yaşıllaşdırma işləri də görülüb.    *** Saatlı rayonu Qaracalar kəndində Heydər Əliyev Fondu tərəfindən inşa edilən məktəb binası istifadəyə verilib.   Məktəb 360 şagird yerlikdir. Üç mərtəbə və 2 korpusdan ibarət bu təhsil ocağı zəruri mebel, avadanlıqlarla təmin edilib, fənn kabinetləri və laboratoriyalar əyani vəsaitlərlə təchiz olunub, həmçinin təhlükəsizlik məsələlərinə xüsusi diqqət yetirilib.   *** Tərtər rayonunun Azadqaraqoyunlu kəndində Heydər Əliyev Fondu tərəfindən yeni inşa olunmuş məktəb binası istifadəyə verilib.   Məktəb binası 320 şagird yerlikdir. Təhsil ocağı zəruri mebel və avadanlıqlar, əyani vəsaitlərlə təchiz olunub.    ***   Qax şəhərindəki V.Əliyev adına 3 nömrəli tam orta məktəb üçün Heydər Əliyev Fondu tərəfindən yeni inşa olunmuş tədris binası istifadəyə verilib.   Üç mərtəbə və üç korpusdan ibarət məktəb binası 320 şagird yerlikdir. Məktəbdə yaradılan 14 sinif otağı, fizika, kimya, biologiya laboratoriyaları, informatika, çağırışaqədərki hazırlıq, əmək təlimi otaqları, kitabxana, yeməkxana, akt və idman zalları zəruri mebel, avadanlıqlar, əyani vəsaitlərlə təchiz edilib. Təhsil müəssisəsində açıq idman meydançası qurulub və məktəbin həyətyanı ərazisində abadlıq, yaşıllaşdırma işləri görülüb.    ***   Ağstafa rayonu H.Əzizov adına Vurğun qəsəbə tam orta məktəbinin Heydər Əliyev Fondu tərəfindən yeni inşa olunmuş binası istifadəyə verilib.     Bir korpusdan ibarət olan məktəb binası 420 şagird yerlikdir. Məktəbdə 19 sinif otağı, 4 fənn kabineti, kitabxana, 120 nəfərlik akt zalı, idman zalı və 125 nəfərlik yeməkxana mövcuddur.   ***   Tərtər şəhəri 5 nömrəli tam orta məktəb üçün Heydər Əliyev Fondu tərəfindən inşa edilən 360 şagird yerlik yeni bina istifadəyə verilib.   Məktəb binasında akt, idman zalları, bütün lazımi avadanlıqlarla təchiz olunmuş fənn kabinetləri, laboratoriyalar, oğlan və qızlar üçün texnologiya kabinetləri, kitabxana, 60 yerlik mətbəx mövcuddur. Bu il məktəbdə 394 nəfər şagirdin təlim-tərbiyəsi ilə 37 müəllim məşğul olacaq.

19/09/2023 12:10

2023–2024-cü tədris ili üzrə Rusiya Federasiyasının Moskva Dövlət Beynəlxalq Əlaqələr Universitetində (MGIMO University) təhsil üçün keçirilmiş müsabiqə nəticəsində 5 nəfər Azərbaycan Respublikası vətəndaşı burada təhsil almaq imkanı qazanıb.   Seçim turları Dövlət İmtahan Mərkəzi və “MGIMO University” tərəfindən aparılıb. Tələbələrin 2-si bakalavriat, 3-ü isə magistratura səviyyəsində iqtisadiyyat və hüquqşünaslıq ixtisaslarına qəbul edilib.   Təqaüd proqramının tələblərinə uyğun olaraq, tələbələrin təhsil haqqı, yataqxana xərcləri Rusiya tərəfindən, aylıq təqaüd, yol xərcləri isə Elm və Təhsil Nazirliyi tərəfindən qarşılanacaq.   Qeyd edək ki, müvafiq təqaüd proqramı barədə cari ilin 7 aprel tarixində elan  verilib.

18/09/2023 17:15

Tam orta təhsil bazasından orta ixtisas təhsili müəssisələrinə əsas yerləşmə, bakalavriat və rezidentura səviyyələrinin boş qalan yerlərinə isə əlavə yerləşmə üzrə qeydiyyat prosesi davam edir.   Qəbul olunmuş şəxslər https://portal.edu.az/ sistemi üzərindən “Ali və orta ixtisas təhsili müəssisələrinə təhsilalan qeydiyyatı” xidmətini seçməklə müraciət edə bilərlər. Açılan səhifədə şəxsi və qəbul məlumatlarının təsdiqi, həmçinin tələb olunan sənədlərin əlavə edilməsi mümkündür.   Qeydiyyat prosesi tam orta təhsil bazasından orta ixtisas təhsili müəssisələrinə əsas yerləşmə üzrə 25 sentyabr saat 18:00-da, bakalavriat səviyyəsinin boş qalan yerlərinə əlavə yerləşmə üzrə 20 sentyabr saat 18:00-da, rezidentura səviyyəsinin boş qalan yerlərinə əlavə yerləşmə üzrə isə 18 sentyabr saat 18:00-da başa çatacaq.   Qeyd edək ki, müvafiq xidmətdən istifadə etməklə qeydiyyatdan keçməyən və təhsil müəssisəsindən təsdiq almayan şəxslər qəbul olunanların siyahısından xaric ediləcəklər.

18/09/2023 11:00

5-14 sentyabr tarixlərində Rumıniyanın Mamaya şəhərində şahmat üzrə yeniyetmə oğlan və qızlar arasında Avropa çempionatı keçirilib.   47 ölkə, 928 şahmatçının iştirak etdiyi turnirdə 8, 10, 12, 14, 16 və 18 yaş kateqoriyalarında Azərbaycanı 44 şahmatçı təmsil edib. Onlardan 39 nəfəri Elm və Təhsil Nazirliyinin tabeliyində fəaliyyət göstərən uşaq-gənclər idman-şahmat məktəblərinin idmançıları olub.    Yarışın nəticəsinə görə, “Təhsil” Respublika İdman Mərkəzi 4 nömrəli ixtisaslaşdırılmış olimpiya ehtiyatları uşaq-gənclər idman-şahmat məktəbinin idmançıları Məhəmməd Kazımzadə 7,5 xal, Əhməd Xaqan 7,5 xal, Gəncə şəhəri 2 nömrəli uşaq-gənclər idman-şahmat məktəbinin idmançısı Mehriban Əhmədli 7,5 xal, Sumqayıt şəhəri 2 nömrəli uşaq-gənclər idman-şahmat məktəbinin idmançısı Rüstəm Rüstəmov 9 oyundan 8 xal toplayaraq çempionatın qızıl medalını qazanıblar.   4 nömrəli ixtisaslaşdırılmış olimpiya ehtiyatları uşaq-gənclər idman-şahmat məktəbinin idmançısı Ayan Allahverdiyeva 7 xal toplayaraq gümüş, Gəncə şəhəri 2 nömrəli uşaq-gənclər idman-şahmat məktəbinin idmançısı Səadət Bəşirli 7 xal toplayaraq bürünc medal qazanıblar.   Azərbaycan şahmatçıları Avropa çempionatında 4 qızıl, 2 gümüş və 1 bürünc olmaqla ümumilikdə 7 medal əldə ediblər.

16/09/2023 14:52

Elm və təhsil naziri Emin Əmrullayev AzTV-nin "Əsas məsələ" proqramında qonaq olub.   Proqramda elm və təhsil naziri ilə yeni tədris ilinə hazırlıq prosesi, müəllimlərin sertifikatlaşdırılması, məktəb infrastrukturunun yenilənməsi, işğaldan azad edilmiş ərazilərdə görülən işlər, ali təhsil, peşə təhsilinin inkişafı və digər mövzular ətrafında söhbət aparılıb.  

16/09/2023 10:05

"Vaxtilə işğaldan azad edilmiş ərazilərdə ilk dərs gününün qeyd edilməsi bir arzu idi. Bu gün isə həmin arzu artıq gerçəkləşib".     Bu sözləri elm və təhsil naziri Emin Əmrullayev Füzuli şəhəri Mirzə Uluqbəy adına 1 nömrəli tam orta məktəbdə sentyabrın 15-də Bilik Günü münasibətilə keçirilən tədbirdə deyib.    Nazir qeyd edib ki, bu ərazilərdə tikilmiş məktəblərin müəllim və şagird heyəti bütün bunların nə cür ərsəyə gəldiyini yaxşı dərk etsə, işinə, təhsilinə daha da məsuliyyətlə yanaşacaq.    Sonda tədbir iştirakçılarını təbrik edən elm və təhsil naziri yeni tədris ilində müəllim və şagirdlərə uğurlar arzulayıb.    Tədbirdə Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov, nazirlik əməkdaşları, Qarabağ Regional Təhsil İdarəsinin müdiri Gündüz Əbdülov,  müəllim və şagirdlər, ictimaiyyət nümayəndələri, KİV təmsilçiləri də iştirak ediblər.   Tədbirə qatılan Azərbaycan Respublikası Prezidentinin xüsusi nümayəndəsi Emin Hüseynov işğaldan azad edilmiş ərazilərdə qüdrətli Azərbaycanın görkəmli şəxsiyyətlərinin yetişməsi üçün hər cür şərait yaradıldığını diqqətə çatdırıb.    Füzuli şəhəri Mirzə Uluqbəy adına 1 nömrəli tam orta məktəbin direktoru Həcər Mahmudova işğaldan azad edilmiş ərazilərdə belə bir tədbirin təşkilinin qürurverici olduğunu dilə gətirib, şagird və müəllimləri yeni tədris ili münasibətilə təbrik edib.    Daha sonra çıxış edən Əməkdar müəllim Asif Cahangirov, Azərbaycanın Milli Qəhrəmanı, şəhid general-mayor Polad Həşimovun həyat yoldaşı Ofelya Həşimova, şəhid mayor Elnur Quliyevin anası Marusa Quliyeva, şəhid Fəqan Zalovun atası Amil Zalov öz növbələrində şagirdləri təbrik edib, onlara uğurlar arzulayıblar.   Tədbir şagirdlərin ifasında bədii proqramla yekunlaşdırılıb.

15/09/2023 18:00