İyunun 11-də Azərbaycan Gənc Müəllimlər Assosiasiyasının təşkilatçılığı ilə Gənc Müəllimlərin II Forumu keçirilib.   Forum gənc müəllimlərin bilik və bacarıqlarının artırılması məqsədilə təşkil edilib.   Forumda təhsil naziri Emin Əmrullayev, gənclər və idman nazirinin müavini İndira Hacıyeva, Azərbaycan Dövlət Pedaqoji Universitetinin rektoru Cəfər Cəfərov, Gənclər Fondunun icraçı direktoru Fərid Cəfərov, QHT-lərə Dövlət Dəstəyi Agentliyinin İcraçı direktoru Aygün Əliyeva və müxtəlif bölgələrdən yaşı 35-ə qədər olan 300-ə yaxın müəllim iştirak edib.   Əvvəlcə Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilib.   Daha sonra Azərbaycan Gənc Müəllimlər Assosiasiyasının fəaliyyətindən bəhs edən videoçarx nümayiş olunub.   Forumda salamlama nitqi ilə çıxış edən Azərbaycan Gənc Müəllimlər Assosiasiyası İdarə Heyətinin sədri Rüfət Əsədzadə bildirib ki, rəhbərlik etdiyi Assosiasiyanın əsas məqsədi istedadlı gənc müəllimlərin aşkara çıxarılması, bilik və bacarıqlarının inkişaf etdirilməsi və onların şəbəkələşməsi, eləcə də elmi-praktiki konfransların təşkilidir.   Forumda iştirak edən təhsil naziri Emin Əmrullayev müəllim peşəsinin məsuliyyətindən və təhsil işçilərinin üzərinə düşən vəzifələrdən söz açıb. Pandemiya dövründə müəllimlərin fədakarlıq göstərdiklərini vurğulayan nazir ölkəmizdə müəllimlərə göstərilən diqqət və qayğıdan danışıb. Emin Əmrullayev cəmiyyətimizdə müəllimlərə yüksək səviyyədə dəstək göstərilməsinin vacibliyini vurğulayıb.   Təhsil naziri müəllimlərin peşəkarlıq səviyyəsinin yüksəldilməsi istiqamətində görülən işləri vurğulayıb, ölkəmizdə təhsil sahəsində həyata keçirilən mühüm təşəbbüslərdən də bəhs edib.   Emin Əmrullayev çıxışının sonunda Forum iştirakçılarına uğurlar arzulayıb.   Çıxış edən digər qonaqlar Forumun əhəmiyyətinə toxunub və iştirakçılara uğurlar arzulayıblar.    Tədbirin bədii hissəsində Azərbaycan Dövlət Mədəniyyət İncəsənət Universitetinin nəzdində fəaliyyət göstərən Cadenza Orkestrinin ifasında müxtəlif çıxışlar nümayiş edilib.    Forumda müəllimlərin inkişafına dəstək olmaq və onları maarifləndirmək üçün “Doqquz dildə danışmağı necə öyrəndim?”, “Təhsildə keyfiyyət mədəniyyəti nədir və ona necə nail olmalı”, “Ən yaxşı məktəb yaradıcı şagirdlərlə innovativ və savadlı müəllimlərin vəhdətidir”, “Təhsil sistemində sosial və emosional bacarıqların inkişafı” mövzularında məruzələr dinlənilib.   Forum gənc müəllimlərin çıxışları və tədris təcrübəsi ilə fərqlənən müəllimlərin təltif olunması ilə yekunlaşıb.

11/06/2022 14:35

13 iyun saat 11:00-dan etibarən 2022-2023-cü tədris ili üzrə tədris digər dillərdə aparılan siniflər üçün məktəb və müəllim seçiminə başlanılacaq. Belə ki, dövlət ümumi təhsil müəssisələrinin tədris digər dillərdə aparılan birinci siniflərinə qəbulla bağlı müsahibədən uğurla keçən uşaqlar üçün valideynləri tərəfindən qeyd edilən tarixdən məktəb və müəllim seçiminə dair sorğular yerləşdirilə bilər.   Həmin tarixdən rus bölməsi üzrə I siniflərinə qəbul müsabiqə yolu ilə aparılan ümumi təhsil müəssisələrinə qəbulla bağlı prioritetlər üzrə məktəb seçimi və prioritetlər üzrə üstünlüyə malik olmayanlar üçün müsabiqəyə yazılma (Bakı Avropa liseyi,  Respublika İncəsənət gimnaziyası, Bülbül adına orta ixtisas musiqi məktəbi də daxil olmaqla) prosesinə də başlanılacaq.   20 iyun saat 18:00-da isə rus bölməsi üzrə I siniflərinə qəbul müsabiqə yolu ilə aparılan ümumi təhsil müəssisələrinə müsabiqəyə yazılma prosesi bitir. 21-30 iyun tarixlərində də müsabiqələrin keçirilməsi planlaşdırılır. 5 iyul saat 11:00-dan etibarən isə I siniflərinə qəbul müsabiqə yolu ilə aparılan ümumi təhsil müəssisələrinin prioritetlər üzrə seçim etmiş və müsabiqədən uğurla keçən uşaqlar üçün müəllim seçiminin aparılması prosesinə başlanılacaq.

11/06/2022 12:46

İyunun 10-da Dövlət İmtahan Mərkəzi (DİM) tərəfindən 2021-2022-ci tədris ili üçün tələbə qəbulunun nəticələrinin elmi-statistik təhlilini əks etdirən “Abituriyent” jurnalının 12-ci nömrəsinin təqdimat mərasimi keçirilib.   Tədbir iştirakçıları əvvəlcə DİM-də yaradılmış və ölkəmizin milli qiymətləndirmə sisteminin tarixini əks etdirən muzeylə tanış olublar. Daha sonra “Abituriyent” jurnalının nəşrlərinə dair sərgiyə baxış keçirilib.   Əvvəlcə Dövlət Himni səsləndirilib. Daha sonra şəhidlərimizin xatirəsi bir dəqiqəlik sükutla yad edilib.   Tədbiri giriş sözü ilə açan Dövlət İmtahan Mərkəzinin Direktorlar Şurasının sədri Məleykə Abbaszadə bildirib ki, aparılan elmi-statistik təhlillər ölkə təhsilindəki müsbət təmayülləri üzə çıxarır, eyni zamanda təhsildəki problem və çatışmazlıqları da göstərir, onların aradan qaldırılması ilə bağlı müvafiq təklif və tövsiyələr irəli sürür.   Daha sonra Sədr əsas buraxılış imtahanı fənləri üzrə bəzi statistik göstəriciləri diqqətə çatdırıb, DİM və dövlət orqanları arasında inteqrasiya əsasında fəaliyyət məsələlərinə toxunub, Mərkəzin yeni elektron xidmətləri haqqında məlumat verib.   Tədbirdə çıxış edən təhsil naziri Emin Əmrullayev cəmiyyətin tərəqqisində təhsilin vacib rolundan və bu sahənin inkişafı istiqamətində görülən işlərdən, həyata keçirilən tədbirlərdən danışıb. Təhsil naziri ötən 10 il ərzində təhsilin bütün səviyyə və pillələri üzrə əlçatanlığın artdığını, 60 faizdən çox gəncin dövlət sifarişli yerlərdə təhsil hüququ əldə etdiyini qeyd edib.   Son illər bölgələrdə istedadlı gənclər üçün yaradılan liseylərin fəaliyyəti, beynəlxalq qiymətləndirmə çərçivəsi və Azərbaycanın iştirak səviyyəsi kimi mövzularda fikirlərini diqqətə çatdıran Emin Əmrullayev  deyib ki, “Abituriyent” 12 jurnalı təhsil sahəsində müzakirə aparmaq üçün əvəzsiz mənbədir.   Azərbaycan Dövlət Neft və Sənaye Universitetinin rektoru Mustafa Babanlı çıxışında aparılan elmi-statistik təhlillərin əhəmiyyəti, ali təhsil müəssisələrinə qəbul prosesi və təhsilin müasir problemlərindən bəhs edib. Tədbirin rəsmi hissəsindən sonra qonaqlar Mərkəzin Bacarıqların, vərdişlərin qiymətləndirilməsi və markerlərin hazırlanması sektorunun müdiri Aydın Qasımov, Elektron imtahanların təşkili sektorunun müdiri Tural Dünyamalıyev və Psixoloji qiymətləndirmə və diaqnostika şöbəsinin müdiri Pərviz Kazımov tərəfindən edilən təqdimatlar vasitəsilə yazı işlərinin elektron yoxlanılması, onlayn apellyasiyaların təşkili və DİM tərəfindən təklif olunan psixoloji xidmətlər barədə məlumatlar əldə ediblər.   Sonda mövzu ətrafında müzakirələr aparılıb.   Jurnalın elektron versiyasını DİM-in saytında Fəaliyyət/Təqiqat (https://dim.gov.az/activities/research/statistika/) bölməsindən əldə edə bilərsiniz.  

10/06/2022 16:33

4 - 8 iyul tarixlərində bakalavriat (III və IV kurs) və magistratura səviyyəsində təhsil alan tələbələr, yeni məzun olmuş şəxslər və gənc peşəkarlar üçün “Uğurlu layihələrin yazılması və icrası” mövzusunda qısamüddətli təlim kursu təşkil ediləcək. Təlim “BİR” Könüllü Tələbələrin Əməkdaşlığı İctimai Birliyi və “Sustainera Consulting Services” şirkətinin birgə təşkilatçılığı ilə həyata keçiriləcək.   Təlim kursunun əsas məqsədi iştirakçıların peşəkar bilik və bacarıqlarının təkmilləşdirilməsi, layihələrin hazırlanması və idarə olunması, donorlarla əlaqələrin qurulması, fandreyzinq imkanlarının artırılması və müvafiq istiqamətlərdə praktiki addımların atılmasına dair geniş məlumat təqdim etməkdən ibarətdir.   Proqramda iştirak üçün bakalavriat (III və IV kurs) və magistratura səviyyəsində təhsil alan tələbələr, yeni məzun olmuş şəxslər və gənc peşəkarlar, sosial ictimai və təhsilyönümlü layihələrin həyata keçirilməsinə təcrübəsi və marağı olan fəal gənclər, ingilis dili, araşdırma, təhlil, akademik yazı və öyrənmə bacarıqları olan və qeyd edilən tarixlərdə təlimlərdə iştirak imkanı olan gənclər, yay tətilini daha səmərəli keçirərək, bilik və bacarıqlarını artırmaqla yeni iş imkanlarına açıq olan gənclər müraciət edə bilərlər.   Təlim proqramında iştirak etmək arzusunda olan şəxslər 26 iyun tarixinədək müvafiq link (https://forms.gle/C1Zdocxxx67aRds4A)  üzərindən qeydiyyatdan keçə bilərlər.   Proqram çərçivəsində peşəkar təlimçilər tərəfindən aşağıdakı mövzular üzrə seminarlar təşkil olunacaq: Tədqiqat metodları və təhlil; Layihə təkliflərinin hazırlanması: layihənin hədəf aldığı problem və onun əsaslandırılması (problem tree) necə tərtib edilir? Məntiqi Çərçivə Matriksi (LogFrame) hazırlanması; Layihənin “həyat dövrü” və layihə menecmentinin əsasları; Layihə təklifinin inkişafı: kommunikasiya və layihə barədə məlumatlandırma (visibility) strategiyaları; Monitorinq və qiymətləndirmə, hesabatların hazırlanması; Humanitar, sosial və təhsil istiqamətli layihələr üçün mövcud maliyyə imkanları, resurslar və alətlər; Yerli və beynəlxalq fandreyzinq (maliyyələşmə) imkanlarının artırılması. Proqram çərçivəsində təşkil ediləcək “layihə inkubatoru” simulyasiya məşğələsi zamanı iştirakçılar real layihə təklifi hazırlayaraq qrant müsabiqələrinə müraciət prosesinin bütün mərhələləri üzrə təcrübə əldə edəcəklər. Təlim proqramını uğurla bitirən iştirakçılar layihə idarəetməsi qısamüddətli təcrübə proqramına cəlb olunacaq, daha sonra müvafiq iş imkanları əldə edəcəklər.   Qeyd edək ki, təlim proqramı tamamilə ödənişsiz əsaslarla təşkil olunur.

10/06/2022 15:40

İyunun 23-ü saat 19:30-da “Yeni çağırışlar” müzakirə proqramının növbəti buraxılışı yayımlanacaq. Proqramın budəfəki qonağı Harvard Universitetinin tarixində ən çox tələbəsi olan müəllim, yazıçı, beynəlxalq bestseller müəllifi, Xoşbəxtlik Araşdırmaları Akademiyasının həmtəsisçisi və baş direktoru Tal Ben Shahar olacaq.    Xoşbəxtlik və liderlik üzrə dünyada tanınan yazıçı və müəllim ilə xoşbəxt məktəblər və liderliyin psixologiyası barədə danışılacaq.   Tal Ben Shahar həmçinin Xoşbəxt Məktəb proqramlarının yaradıcısıdır. Harvard Universitetində keçdiyi pozitiv psixologiya və liderliyin psixologiyası dərsləri ilə Harvard tarixindəki ən çox tələbəsi olan müəllim kimi tanınır. 30-dan çox dilə tərcümə olunan “Xoşbəxtlik araşdırmaları: giriş”, “Daha xoşbəxt”, “İstədiyiniz həyatı seçin”, “Xoşbəxtliyə aparan qısa yollar”, “Liderliyin sevinci” və digər kitabların müəllifidir.    Qeyd edək ki, Təhsil Nazirliyinin dəstəyi və “T-Network" platformasının təşkilatçılığı davam edən proqram nazirliyin rəsmi “Facebook” səhifəsi üzərindən Azərbaycan dilinə tərcümə ilə canlı yayımlanacaq.

10/06/2022 15:10

2021-2022-ci tədris ilində respublikanın ümumtəhsil məktəblərinin IX siniflərini 133 422 nəfər, XI siniflərini 91 188 nəfər şagird bitirəcək. IX sinfi bitirənlərdən 61 400 nəfəri qız, 72 022 nəfəri oğlan, XI sinfi bitirənlərdən 42 005 nəfəri qız, 49 183 nəfəri oğlandır.   2021-2022-ci tədris ilində respublika üzrə ümumtəhsil məktəbində fəaliyyət göstərən 5896 məktəbəhazırlıq qrupunu 100 529 nəfər uşaq başa vurub.

10/06/2022 14:35

İyunun 16-dan 2 həftə müddətinə ümumi təhsil müəssisələrində ödənişsiz və könüllü əsaslarla “Yay məktəbi” təşkil ediləcək. 30 iyun tarixinədək davam edəcək “Yay məktəbi” ərzində dərslərin sayı və qrafiki şagirdlərin yaş xüsusiyyətləri nəzərə alınmaqla müəyyən ediləcək.   “Yay məktəbi”nin təşkilində məqsəd pandemiya ilə əlaqədar son tədris illərində təlim prosesində yaranmış fasilələrin nəticələrinin aradan qaldırılması,  təhsilalanlara zəruri bilik və bacarıqların verilməsidir.   “Yay məktəbi” ərzində ekskursiyalar, muzey dərsləri, açıq havada məşğələlər və digər öyrədici fəaliyyətlər nəzərdə tutulur. Məşğələlərdə təhsilalanlara müvafiq fənlər üzrə zəruri bilik və bacarıqlar veriləcək, bölmələr üzrə ümumiləşdirmələr aparılacaq, kompleks mövzular üzrə tapşırıqlar işləniləcək.   “Yay məktəbi”ndə iştirak etmək istəyən təhsilalanların valideynləri (və ya digər qanuni nümayəndəsi) iyunun 13-dən etibarən övladlarının təhsil aldıqları müəssisələrə və ya aidiyyəti üzrə regional təhsil idarələrinə müraciət edə bilərlər.   Ümumi təhsil müəssisələrində yay məktəbinin təşkili barədə sual-cavab   Yay məktəblərinin təşkili ilə bağlı Təlimat

10/06/2022 11:40

10 iyun saat 11:00-da 2022-2023-cü tədris ili üçün müəllimlərin işə qəbulu üzrə elektron sənəd qəbulu başa çatacaq.  Müsabiqədə iştirak etmək istəyən namizədlər qeyd edilən tarixədək www.miq.edu.az linkinə daxil olaraq qeydiyyatdan keçə bilərlər. Müsabiqədə orta ixtisas və ali təhsil müəssisələrini pedaqoji ixtisaslar üzrə bitirmiş, dövlət nümunəli təhsil sənədi almış və ya xarici ölkədə aldığı ali təhsil haqqında sənədi tanınmış Azərbaycan Respublikasının vətəndaşları və ya Azərbaycan Respublikasında daimi yaşamaq üçün icazə verilmiş şəxslər iştirak edə bilərlər. Həmçinin müsabiqədə iştirak etmək istəyən şəxs hazırda dövlət ümumi təhsil müəssisəsində müddətsiz müqavilə əsasında müəllim olaraq fəaliyyət göstərirsə, müddətsiz əsaslarla təyin olunduğu müəssisədə 3 ildən artıq fəaliyyət göstərdiyi halda müəllimlərin işə qəbulu üzrə müsabiqədə iştirak edə bilər. Müsabiqə iştirakçılarına uğurlar arzulayırıq!  

10/06/2022 10:19

İyunun 9-da təhsilverənlərin sertifikatlaşdırılması prosesinə dair media nümayəndələri ilə məlumatverici görüş keçirilib.   Görüşdə Təhsil İnstitutunun İnsan Resursları Mərkəzinin direktoru Nurlan İsmayılbəyli təhsilverənlərin sertifikatlaşdırılması prosesinin keçirilməsi barədə danışıb. Nurlan İsmayılbəyli bildirib ki, prosesin test imtahanı mərhələsinə avqust ayının sonlarında başlanılacaq. İlkin olaraq 10 mindən çox müəllimin prosesə cəlbi nəzərdə tutulub.    Daha sonra media nümayəndələrinin suallarını cavablandıran Təhsil İnstitutunun direktoru Rüfət Əzizov sertifikatlaşdırma prosesinin məzmunu barədə məlumat verib.    Görüşdə iştirak edən ibtidai sinif müəllimləri də proseslə bağlı fikirlərini bölüşüblər.    Görüş qarşılıqlı fikir mübadiləsi şəkilində davam etdirilib.

09/06/2022 19:15

 İyunun 9-da təhsil naziri Emin Əmrullayev ölkəmizdəki missiyasını başa vurmaqda olan Çex Respublikasının fövqəladə və səlahiyyətli səfiri Milan Ekert ilə görüşüb.   Görüş zamanı Azərbaycan Respublikası Təhsil Nazirliyi ilə Çex Respublikası arasında təhsil sahəsində olan əməkdaşlığın cari vəziyyəti və əməkdaşlıq perspektivləri müzakirə edilib.    Həmçinin, Çex Respublikası ilə təhsil sahəsində əməkdaşlıq çərçivəsində həyata keçirilmiş “İnkişafa yardım” layihəsi zamanı Şamaxı rayonunda yerləşən Qaravəlli, Meysəri, Muğanlı, Qızmeydan, Əngəxaran kənd məktəblərinə “Merkur konstruktor dəstləri”nin təqdim olunması, habelə “Enerji səmərəliliyinin təmin olunması” layihəsi zamanı Şamaxı rayonu A.Rəcəbov adına Qaravəlli kənd tam orta məktəbində təmir işlərinin aparılması yüksək qiymətləndirilib.

09/06/2022 17:35