Dekabrın 26-da Gənclər və İdman Nazirliyi 2023-cü ilin idman yekunlarına həsr olunmuş qala mərasimi keçirib.   Tədbirdə dövlət rəsmiləri,  idman təşkilatlarının, federasiyaların, media qurumlarının rəhbərləri, idmançılar, məşqçilər və idman ictimaiyyətinin nümayəndələri iştirak ediblər.   Tədbirdə çıxış edən gənclər və idman naziri Fərid Qayıbov 2023-cü ilin Azərbaycan idmanı üçün uğurlu keçdiyini qeyd edib.  Nazir Olimpiya ili olan 2024-ün idman sahəsi üçün daha da uğurlu olacağına ümidvar olduğunu bildirib.   Sonra üç mərhələli sorğu əsasında müəyyənləşmiş müxtəlif nominasiyalar üzrə ilin qaliblərinin mükafatlandırılma mərasimi olub.   Qala gecəsi konsert proqramı ilə davam edib.

27/12/2023 17:16

"Kod saatı" qlobal hərəkatı çərçivəsində keçirilən “Rəqəmsal gələcəyə addım” müsabiqəsi çərçivəsində “Kodlaşdırma üzrə açıq qapı” günləri təşkil olunub.    Müsabiqə çərçivəsində ADA Universiteti ilə əməkdaşlıq çərçivəsində informatika təmayüllü 10-11-ci sinif şagirdləri üçün infosessiya, həmçinin Quba şəhəri Alekseyevka kənd orta məktəbi və Şəmkir şəhəri M.Füzuli adına tam orta məktəb-liseydə “Kodlaşdırma üzrə açıq qapı” günləri keçirilib.    400-dən çox şagird üçün İT mütəxəssisləri və bu istiqamətdə uğurları olan gənclərin iştirakı ilə tədbir təşkil edilib. Tədbirdə şagirdlər mütəxəssislərin təqdimatlarını dinlədikdən sonra onları maraqlandıran sualları ünvanlayıblar.   Tədbir müddətində həmçinin müxtəlif interaktiv oyun və viktorinalar təşkil edilib.   Qeyd edək ki, "Kod saatı" hərəkatının məqsədi İT sahəsi üzrə məktəblilər  arasında  təşviqat aparmaq və onları məlumatlandırmaqdır.  

27/12/2023 15:00

Dekabrın 26-da STEAM İnnovasiya Mərkəzində Elm və Təhsil Nazirliyinin keçirdiyi “Təhsildə könüllü fəaliyyətin təşkili” qrant müsabiqəsində qalib gəlmiş qeyri-hökumət təşkilatlarının (QHT) rəhbərləri ilə görüş olub.    Görüşdə Elm və Təhsil Nazirliyinin Aparat rəhbəri Mətin Kərimli və nazirliyin müvafiq struktur bölmə rəhbərləri iştirak ediblər.   Görüş zamanı qrant müsabiqəsi çərçivəsində həyata keçiriləcək layihələrdə şəffaflıq, hesabatlılıq və davamlılıq məsələlərinə toxunulub, qeyri-hökumət təşkilatları ilə qrant layihələri çərçivəsində əməkdaşlıq, onların təhsil islahatlarının həyata keçirilməsinə daha yaxından cəlbinin ictimai iştirakçılıq baxımından əhəmiyyəti vurğulanıb.   Görüşdə eyni zamanda müsabiqənin nəticələri ilə bağlı təqdimat nümayiş olunub, layihələrin icrası, effektiv kommunikasiyası, inkişaf perspektivləri və əməkdaşlıq barədə müzakirələr aparılıb. Qeyd olunub ki, qrant qazanmış layihələr müxtəlif təhsil pillələri üzrə Elm və Təhsil Nazirliyinin əsas strateji hədəflərinə xidmət edir.   Sonra görüş iştirakçıları STEAM İnnovasiya Mərkəzində yaradılan şəraitlə tanış olublar. Qonaqlar mərkəzdə astrofizika və robotların hazırlanması laboratoriyaları, aviasiya məkanı, klassik Nyuton, oyun, konstruksiya, “Heureka Classics” otaqları, “3D hologram”, VR zonalarını ziyarət ediblər.   Qeyd edək ki, “Təhsildə könüllü fəaliyyətin təşkili” qrant müsabiqəsinə ümumilikdə 112 layihə təqdim olunub. Texniki ekspertizadan keçirilən layihələrdən 104-ü məzmun qiymətləndirilməsi mərhələsinə buraxılıb. Bu mərhələdə layihələr 100 ballıq şkala ilə 9 meyar əsasında qiymətləndirilib və ən yüksək bal toplayan 17 layihə qrant əldə edib.    Qalib gəlmiş QHT-lərin 12-si (70 faiz) ilk dəfədir ki, Elm və Təhsil Nazirliyinin təşkil etdiyi qrant müsabiqələrində uğur qazanıb.

27/12/2023 13:44

Dekabrın 26-da elm və təhsil naziri Emin Əmrullayev Küveyt Dövlətinin ölkəmizdəki fövqəladə və səlahiyyətli səfiri Abdullah Mohamed Abdullah Almauidi ilə görüşüb.   Görüş zamanı iki ölkə arasında elm və təhsil sahəsində əməkdaşlığın cari vəziyyəti, inkişaf perspektivləri müzakirə edilib.

26/12/2023 17:49

Dekabrın 26-da Azərbaycanda Beynəlxalq Təhsil İmkanları Forumunun açılış mərasimi keçirilib.   Forumda elm və təhsil nazirinin müavini Həsən Həsənli, Elm və Ali Təhsil üzrə Dövlət Agentliyinin direktoru Ülkər Səttarova, Xarici İşlər Nazirliyinin (XİN) Beynəlxalq İnkişafa Yardım Agentliyinin rəisi Elməddin Mehdiyev, Dövlət Miqrasiya Xidmətinin (DMX) Miqrasiya proseslərini tənzimləmə baş idarəsinin rəis müavini Tamilla Hacıyeva, ali təhsil müəssisələrinin rektorları, təhsil işçiləri, beynəlxalq ekspertlər və əcnəbi tələbələr iştirak ediblər.   Açılış nitqi ilə çıxış edən Elm və Ali Təhsil üzrə Dövlət Agentliyinin direktoru Ülkər Səttarova forumun ənənəvi görüşlərdən fərqli olaraq təhlilə söykənən müzakirələr formatında aparılmasının daha keyfiyyətli təhsilin təşkili işində önəmini vurğulayıb.   Forumda çıxış edən elm və təhsil nazirinin müavini Həsən Həsənli təhsilin beynəlmiləlləşməsi və ali təhsilə əlçatanlığın artırılması istiqamətində görülən işlərdən danışıb.   Daha sonra çıxış edən XİN-in Beynəlxalq İnkişafa Yardım Agentliyinin rəisi Elməddin Mehdiyev və DMX-nin Miqrasiya proseslərini tənzimləmə baş idarəsinin rəis müavini Tamilla Hacıyeva təhsil qrantı proqramlarının icrasının Azərbaycanın beynəlxalq təhsil imkanlarının tanıdılması, ikitərəfli əməkdaşlığın genişləndirilməsi, eləcə də müxtəlif ölkələrdən olan tələbələr üçün təhsilin əlçatanlığına dair töhfələrindən danışıblar.   Əcnəbi tələbələrin təhsilinə dair yekun hesabatla çıxış edən Elm və Ali Təhsil üzrə Dövlət Agentliyinin Beynəlxalq əməkdaşlıq şöbəsinin müdiri Müjdat Həsənov, Elm və Təhsil Nazirliyinin əməkdaşı Günay Cəfərzadə ölkəmizdə təhsil alan əcnəbilərin statistikası, ali təhsil müəssisələrimizin beynəlxalq reytinqlərdə yer alması və mübadilə proqramlarında iştirakı ilə bağlı məlumatlar paylaşıblar.   Forum işini panel müzakirələri ilə davam etdirib.   Qeyd edək ki, forumun keçirilməsində məqsəd hər ilin sonu yerli ali təhsil müəssisələri ilə keçirilən ənənəvi görüşün daha produktiv modelinə keçid, 2023–2024-cü tədris ili üzrə əcnəbilərin Azərbaycanda təhsilinə dair hesabatın təqdimatı, universitetlərin beynəlmiləlləşmə sahəsində inkişafının müzakirəsi, eləcə də 2023-cü il üçün Fəaliyyət Planı üzrə əcnəbilərlə iş sahəsində fərqlənən universitetləri rəğbətləndirməkdir.

26/12/2023 16:43

Dekabrın 26-da elm və təhsil nazirinin müavini, nazirliyin Apellyasiya Şurasının sədri Firudin Qurbanovun rəhbərliyi ilə şuranın növbəti iclası keçirilib. İclasda Quba-Xaçmaz Regional Təhsil İdarəsinin Tədrisin keyfiyyəti sektorunun məsləhətçisi vəzifəsinə namizədlər Züleyxa Zəkili, Ruhəngiz Abdullazadə və Çimnaz Əmişovanın müsahibə nəticələri ilə əlaqədar şikayətlərinə  baxılıb. İclasda müsahibə komissiyaları üzvlərinin təqdim etdiyi məlumat və videogörüntülər əsasında şikayətlər araşdırılıb, iki şikayətin təmin edilməməsi, bir şikayət üzrə icraata xitam verilməsi barədə qərarlar qəbul olunub. 

26/12/2023 16:30

Dekabrın 25-də Elm və Təhsil Nazirliyinin Aparat rəhbəri Mətin Kərimli Cəlilabad rayonunda olub. Əvvəlcə ulu öndər Heydər Əliyevin Alar kənd 1 nömrəli tam orta məktəbin qarşısında ucaldılan büstü ziyarət edilib, önünə gül dəstələri düzülüb. Səfər çərçivəsində Mətin Kərimli Cəlilabad Rayon İcra Hakimiyyətinin başçısı Rafiq Cəlilovla görüşərək fikir mübadiləsi aparıb. Sonra Aparat rəhbəri Heydər Əliyev adına Alar kənd 1 nömrəli və Cəlilabad şəhəri Rəşad Abdullayev adına 2 nömrəli tam orta məktəblərdə, ardınca 2 və 10 nömrəli körpələr evi-uşaq bağçalarında tədris prosesini izləyib, yaradılmış şəraitlə tanış olub. Mətin Kərimli həmçinin adıçəkilən müəssisələrin kollektivi ilə görüşüb, onlarla söhbət apararaq təkliflərini dinləyib. Daha sonra Mətin Kərimli Cəlilabad rayonu təhsil sektorunun inzibati binasına baxış keçirib və əməkdaşların iş şəraiti ilə tanış olub. Mətin Kərimli səfər çərçivəsində təhsil müəssisələrinin rəhbərləri ilə də görüşüb. Heydər Əliyev Mərkəzində keçirilən görüşdə Aparat rəhbəri son illərdə təhsil sahəsində həyata keçirilən islahatlar, müəllimlərin bilik və bacarıqlarının artırılması, eləcə də effektiv kommunikasiyanın əhəmiyyətindən danışıb. Görüş zamanı məktəb direktorları fikir və təkliflərini bölüşüblər. Səfər çərçivəsində Mətin Kərimli həmçinin vətəndaşları qəbul edib, müraciətlərin operativ araşdırılması, qaldırılan məsələlərin qanunvericiliyə uyğun həlli ilə bağlı tapşırıqlar verib.

25/12/2023 18:25

IELS 2025-in sınaq mərhələsi   2024-cü ilin fevral – mart aylarında IELS-in (Beynəlxalq Erkən Öyrənmə və Uşaq Nailiyyəti Tədqiqatı / International Early Learning and Child WellBeing Study) sınaq mərhələsi təşkil olunacaq. IELS-ə məktəbəqədəryaşlı uşaqlar cəlb edilirlər.   IELS ölkə üzrə 5 yaşlı uşaqların bilik və bacarıqlarını ölçməyə, həmçinin digər ölkələrdəki eyniyaşlı uşaqların səriştələri ilə müqayisə aparmağa imkan yaradır.   Tədqiqata Bakı və Sumqayıt şəhərləri üzrə 5 yaşlı qrupları olan məktəbəqədər təhsil müəssisələri, eləcə də məktəbəhazırlıq qrupları olan ümumi təhsil müəssisələrinin cəlbi planlaşdırılıb.     TALIS 2024-ün əsas mərhələsi   2024-cü ilin fevral ayı ərzində TALIS 2024-ün (Öyrətmə və Öyrənmə üzrə Beynəlxalq Sorğu / Teaching and Learning International Survey) əsas mərhələsi təşkil olunacaq.   Sorğu müəllim və məktəb rəhbərlərinin təhsilə dair yanaşmalarını anlamaq məqsədilə 5 ildən bir keçirilir.    TALIS müəllimlərin tədris təcrübələri, idarəetmə bacarığı, peşəkar inkişafı, məktəb mühiti, iş məmnuniyyəti və s. mövzular üzrə beynəlxalq müqayisələr aparmağa imkan verir.   PISA 2025-in sınaq mərhələsi   2024-cü ilin may – iyun aylarında PISA 2025-in sınaq mərhələsi təşkil olunacaq.   PISA ümumi təhsil müəssisələri üzrə 15 yaşlı şagirdlərin oxu, riyaziyyat, təbiət elmləri və yaradıcı düşünmə üzrə bilik, bacarıqlarını qiymətləndirmək, eyni zamanda onları real həyatda tətbiq etmək qabiliyyətlərini müəyyənləşdirmək məqsədilə İqtisadi Əməkdaşlıq və İnkişaf Təşkilatı (İƏİT) tərəfindən 3 ildən bir təşkil edilən beynəlxalq qiymətləndirmə tədqiqatıdır.   “Məktəblər üçün PISA” tədqiqatı   Tədqiqat 15 yaşlı şagirdlərin oxu, riyaziyyat, təbiət elmləri və yaradıcı düşünmə üzrə bilik və bacarıqlarını qiymətləndirmək, həmçinin onları real həyatda tətbiq etmək qabiliyyətini müəyyənləşdirmək məqsədilə təşkil olunur.   PISA-dan fərqli olaraq, bu tədqiqatda ümumi təhsil müəssisələri fərdi qaydada qiymətləndirilir. Belə ki, əgər PISA ölkə üzrə təhsil səviyyəsini digər ölkələrlə müqayisə etməyə, təhsil siyasəti ilə bağlı qərarlar verməyə imkan verirsə, “Məktəblər üçün PISA” tədqiqatı ölkə üzrə müvafiq ümumi təhsil müəssisələrində təhsilin keyfiyyətini digər ölkələrin təhsil müəssisələri ilə müqayisə aparmağa, həmçinin müəssisənin özünün təhsilverənlərin nəticələri barədə məlumat əldə etməsinə, bununla bağlı tədbirlər görməsinə imkan yaradır.   Qeyd edək ki, sözügedən tədqiqatların ölkəmizdə həyata keçirilməsi Təhsil İnstitutu tərəfindən təşkil olunacaq.

25/12/2023 14:51

Dekabrın 23-də “Heydər Əliyev İli” çərçivəsində ADA Universitetində “Heydər Əliyevin uğurlu xarici siyasəti və Azərbaycanın yeni neft strategiyası” mövzusunda konfrans keçirilib.    Konfransda Azərbaycan Respublikası Prezidentinin köməkçisi və Prezident Administrasiyasının xarici siyasət məsələləri şöbəsinin müdiri Hikmət Hacıyev, elm və təhsil naziri Emin Əmrullayev, Azərbaycan Respublikası Dövlət Neft Şirkətinin (SOCAR) prezidenti Rövşən Nəcəf, həmçinin bir sıra ali təhsil müəssisələrinin rektorları, müəllim və tələbələr iştirak ediblər.    Tədbirdən əvvəl ulu öndər Heydər Əliyevin 100 illik yubileyinə həsr olunmuş sərgi ilə tanışlıq olub.   Dövlət Himninin səsləndirilməsi ilə başlayan konfransda şəhidlərimizin əziz xatirəsi birdəqiqəlik sükutla yad edilib.   Daha sonra ulu öndərə, gənclərə həsr olunmuş, həmçinin “Heydər Əliyev İli” çərçivəsində SOCAR-ın təşkilatçılığı ilə ali təhsil müəssisələrində keçirilən mühazirə və turlara dair videoçarxlar nümayiş etdirilib.   Konfransın moderatoru, ADA Universitetinin prorektoru Fariz İsmayılzadə “Heydər Əliyev İli” çərçivəsində universitet tərəfindən təşkil olunan beynəlxalq konfrans, forum və seminarlar barədə məlumat verib.    Konfransda çıxış edən Azərbaycan Respublikası Prezidentinin köməkçisi və Prezident Administrasiyasının xarici siyasət məsələləri şöbəsinin müdiri Hikmət Hacıyev müasir Azərbaycan dövlətçiliyinin təməlinin qoyulması və möhkəmləndirilməsinin bilavasitə ulu öndər Heydər Əliyevin adı ilə bağlı olduğunu bildirib. Hikmət Hacıyev ölkə başçısı cənab İlham Əliyevin müdrik rəhbərliyi ilə müasir Azərbaycan dövlətinin ulu öndərin siyasi kursu əsasında hərtərəfli inkişaf edərək qüdrətli və qalib ölkəyə çevrildiyini vurğulayıb. Prezidentin köməkçisi xalqımızın milli maraqları, beynəlxalq hüquq normaları, praqmatik, realist prinsiplərə əsaslanan xarici siyasət xəttinin ölkəmizin əməkdaşlıq əlaqələrinin qurulması və regionun lider dövlətinə çevrilməsindəki rolunu diqqətə çatdırıb.    Elm və təhsil naziri Emin Əmrullayev çıxışında ulu öndərin müəllifi olduğu strateji inkişaf konsepsiyası və onun əsas istiqamətlərindən biri olan insan kapitalının gücləndirilməsi, eləcə də yüksəkixtisaslı kadr potensialının formalaşdırılması sahəsində görülən əsaslı işlərdən danışıb. Nazir ölkəmizdə elm və təhsilin inkişafı, onun maddi-texniki bazasının möhkəmləndirilməsi, müasir tədris sisteminin tətbiqi, qabaqcıl texnologiyalara əsaslanan innovativ infrastrukturun yaradılması istiqamətlərində genişmiqyaslı islahat və dövlət proqramlarının həyata keçirildiyini vurğulayıb.   SOCAR-ın prezidenti Rövşən Nəcəf çıxışında ulu öndərin müdriklik, uzaqgörənlik və dəqiqliklə müəyyənləşdirdiyi yeni enerji strategiyasının ölkəmizin hərtərəfli inkişafının əsaslarını qoyduğunu söyləyib. Rövşən Nəcəf həmçinin bu strategiyanın uğurlu icrasının beynəlxalq enerji şirkətlərinin Azərbaycanın neft, qaz yataqlarının işlənilməsinə cəlbi, xam neft və qazın daşınma yollarının şaxələndirilməsi, gəlirlərin səmərəli idarə olunması, rəqabətli insan kapitalının gücləndirilməsi və Azərbaycanın yeni inkişaf mərhələsinə qədəm qoymasını şərtləndirdiyini qeyd edib.   Tədbirin sonunda xatirə fotosu çəkdirilib.   Qeyd edək ki, “Heydər Əliyev İli” çərçivəsində SOCAR-ın Tədbirlər Planına uyğun olaraq silsilə tədbirlər, o cümlədən universitetlərdə mühazirələr, məktəblilərin SOCAR-ın müəssisələrinə turları, şəhid və qazi övladları üçün düşərgələr təşkil olunub, həmçinin müxtəlif elmi-praktiki seminarlar, bilik və idman yarışları keçirilib.

25/12/2023 11:00

Nazirlər Kabinetinin “İş və istirahət günlərinin yerlərinin dəyişdirilməsi haqqında” müvafiq qərarına əsasən, beşgünlük iş həftəsi ilə fəaliyyət göstərən ümumi və məktəbəqədər təhsil müəssisələrində cari həftə son iş günü 30 dekabr, bayramdan sonra ilk iş günü isə 7 yanvar tarixidir.   Altıgünlük iş həftəsi ilə fəaliyyət göstərən müəssisələrdə cari həftə son iş günü 30 dekabr, bayramdan sonra ilk iş günü 4 yanvar tarixləri müəyyən olunub.  

25/12/2023 10:00