Azərbaycan Respublikası Təhsil, Rabitə və İnformasiya Texnologiyaları nazirlikləri, Microsoft Azərbaycan şirkətinin birgə təşkilatçılığı, HP, Ultra və Bestcomp Groupun dəstəyi ilə gerçəkləşən tədbirdə «Xalq kompüteri» layihəsinin əsas mərhələsinin başlanması haqda razılaşma sənədi imzalanıb. Forumda ali məktəblərin rektorları, Təhsil, Rabitə və İnformasiya Texnologiyaları nazirliklərinin müvafiq şöbələrinin, müxtəlif şirkət və təşkilatların rəhbərləri, beynəlxalq qurumların nümayəndələri, müəllimlər və KİV təmsilçiləri iştirak ediblər. Rabitə və İnformasiya Texnologiyaları Nazirliyi İnformasiya cəmiyyətinin inkişafı şöbəsinin müdiri Rüfət Gülməmmədov «Xalq kompüteri» layihəsi ilə bağlı fikirlərini diqqətə çatdırıb. HP-Azərbaycan şirkətinin nümayəndəsi Rüfət Hacıəlibəyov, Bestcomp Group şirkətinin direktoru Rauf Həsənov və Ultra şirkətinin direktoru Tahir Mirkişili layihə çərçivəsində görülən işlər və həyata keçirilən tədbirlər barədə söz açıblar. Microsoft Azərbaycan şirkəti tərəfindən «Microsoft şirkəti yaxın gələcəkdə bizi necə görür» adlı videoçarx nümayiş etdirilib. Qonaqları salamlayan təhsil naziri Misir Mərdanov təxminən bir il bundan əvvəl başlanmış layihənin nəticələri barədə məlumat verib, ötən dövr ərzində 8 minə yaxın orta məktəb müəlliminin bu layihədə iştirak etdiyini vurğulayıb. Bu işdə əməyi olanların hamısına təşəkkürünü bildirən təhsil naziri həyatımızı kompütersiz təsəvvür etməyin mümkün olmadığını vurğulayıb. On il əvvəl Azərbaycanda hər 1046 şagirdə 1 kompüter düşdüyü halda, bu gün orta hesabla hər 20 şagirdə 1 kompüter düşdüyünü nəzərə çatdıran Misir Mərdanov bütün bu uğurların Azərbaycan Respublikasının Prezidenti İlham Əliyevin dəstəyi və qayğısı sayəsində mümkün olduğunu bildirib. Təhsil Nazirliyi ilə Rabitə və İnformasiya Texnologiyaları Nazirliyi arasında mövcud olan səmərəli əməkdaşlığa diqqət çəkən nazir artıq orta məktəb müəllimləri ilə yanaşı, ali məktəb müəllimləri və tələbələrin də bu layihədən yararlana biləcəklərini qeyd edib. Azərbaycan müəllimlərinin müasir texnologiyalara tədricən daha geniş yer verdiyini konkret faktlarla əsaslandıran təhsil naziri məktəblərdə elektron tədris resurslarından istifadə edilməsinin üstün cəhətlərinə toxunub, gənclərin və uşaqların bu sahəyə daha çox maraq göstərməsini müsbət hal kimi səciyyələndirib. Müvafiq sahədə monitorinq aparan beynəlxalq təşkilatların reytinq cədvəlinə əsasən Azərbaycanın təhsil sistemində İKT-nin tətbiqinin Şərqi Avropa səviyyəsini keçdiyini bildirən rabitə və informasiya texnologiyaları naziri Əli Abbasov bu inkişafın son illər daha geniş vüsət aldığını vurğulayıb. Azərbaycanın təhsil sistemində yüksək texnologiyaların tətbiqinin təhsilin keyfiyyətinə göstərdiyi müsbət təsirdən söz açan Əli Abbasov ölkəmizdə İKT-nin prioritet sahə kimi qəbul olunması, müvafiq dövlət proqramlarının uğurla həyata keçirilməsi istiqamətində aparılan işlər barədə də fikirlərini bildirib.

08/07/2015 16:52

Qeyd edək ki, bu müsabiqə Azərbaycan Respublikası Təhsil Nazirliyinin, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Azərbaycan Mətbuat Şurasının birgə təşkilatçılığı ilə keçirilib. Tədbir iştirakçılarını salamlayan təhsil naziri Misir Mərdanov Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu və Azərbaycan Mətbuat Şurası ilə birgə əməkdaşlıqdan söz açıb, ilk dəfə keçirilən bu müsabiqəyə 45 yazının təqdim olunduğunu diqqətə çatdırıb. Nazir bildirib ki, əsas məqsədi Azərbaycan təhsilində gedən proseslərin geniş ictimaiyyətə daha yaxından çatdırılmasında peşəkar jurnalist yaradıcılığını stimullaşdırmaq, təhsil sahəsindən yazan ixtisaslaşmış jurnalistlər qrupunun formalaşmasına dəstək göstərmək, kütləvi informasiya vasitələrinin təhsil orqanları ilə səmərəli əməkdaşlıq prinsiplərini təbliğ etmək, təhsil mövzusunun mediada geniş şəkildə işıqlandırılmasına şərait yaratmaqdan ibarət olan müsabiqəyə sənəd qəbulu iyunun 10-dan iyulun 1-dək davam edib. Təhsillə bağlı 15 mövzu üzrə keçirilmiş müsabiqəyə təqdim olunmuş yazıların təcrübəli ekspertlər tərəfindən qiymətləndirildiyini söyləyən Misir Mərdanov 1 nəfərin I yerə, 2 nəfərin II yerə, 3 nəfərin III yerə, 10 nəfərin isə həvəsləndirici yerə layiq görüldüyünü qeyd edib. Müsabiqənin qalibi olan 16 jurnalistin Azərbaycan Respublikası Təhsil Nazirliyinin, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun, Azərbaycan Mətbuat Şurasının xüsusi diplomuna layiq görüldüyünü və onlar üçün pul mükafatının nəzərdə tutulduğunu vurğulayan nazir bu müsabiqənin uğurla başa çatdırılmasında köməyi keçən hər kəsə təşəkkürünü bildirib. Azərbaycan Milli Mətbuatının 135 illiyi münasibətilə Təhsil Nazirliyinin təşəbbüsü ilə keçirilən müsabiqəyə qatılmış jurnalistlərin tutduqları yerlərdən asılı olmayaraq, hər birinin qalib olduğunu nəzərə çatdıran Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli və Azərbaycan Mətbuat Şurasının sədri Əflatun Amaşov belə tədbirlərin gələcəkdə də keçiriləcəyinə ümidvar olduqlarını bildirib, media nümayəndələrini təbrik ediblər. Sonra müsabiqədə qalib gəlmiş jurnalistlərə diplomlar və pul mükafatları təqdim edilib, onlara yeni-yeni yaradıcılıq uğurları arzu olunub.

08/07/2015 16:52

İyulun 7-də “Təhsil” Nəşriyyat-Poliqrafiya müəssisəsinin “Kitab evi”nin açılış mərasimi keçirilib. Açılış mərasimində təhsil naziri Misir Mərdanov, mədəniyyət və turizm naziri Əbülfəs Qarayev, millət vəkilləri Bəxtiyar Əliyev, Nizami Cəfərov, Azərbaycan Jurnalistlər Birliyinin sədri Elçin Şıxlı, “525-ci qəzet”in baş redaktoru Rəşad Məcid, şair Çingiz Əlioğlu və digər tanınmış ziyalılar iştirak ediblər. Öncə təhsil naziri Misir Mərdanov, mədəniyyət və turizm naziri Əbülfəs Qarayev “Kitab evi”nin rəmzi açılışını bildirən qırmızı lenti kəsib, açılış münasibətilə hamını təbrik ediblər. “Təhsil” Nəşriyyat-Poliqrafiya müəssisəsinin baş direktoru Bəhruz Axundov mərasim iştirakçılarına rəhbərlik etdiyi müəssisə və “Kitab evi” haqqında məlumat verib. B.Axundov daha sonra bildirib ki, çoxsaylı peşəkar kollektivə, ən müasir poliqrafiya texnologiyasına malik olan “Təhsil” Nəşriyyat-Poliqrafiya müəssisəsi yeni standartlara və müasir kitab ticarəti normalarına cavab verən öz kitab yayım mərkəzini – “Kitab evi”ni təsis edib. “Kitab evi”ndə 1000-dən artıq adda müxtəlif nəşr nümunələrinin toplandığını söyləyən baş direktor burada, həmçinin, lazımi kitabı asanlıqla seçməkdə alıcıya kömək edəcək elektron kartoteka mərkəzinin fəaliyyət göstərdiyini bildirib. Qeyd edib ki, alıcı kataloq vasitəsilə istənilən kitab barədə məlumat ala bilər. O da bildirilib ki, istənilən şəxs “Kitab evi”ndə ölkəmizdə, eləcə də xaricdə nəşr olunmuş hüquq, uşaq ədəbiyyatı, bədii publisistik, elmi-kütləvi, ictimai-siyasi ədəbiyyat, dərslik və dərs vəsaiti, lüğət və ensiklopediyalar, həmçinin, dəftərxana və məktəb ləvazimatlarını əldə etmək imkanına malik olacaqdır. Sonra təhsil naziri Misir Mərdanov və digər qonaqlar yeni açılmış “Kitab evi” ilə yaxından tanış olublar.

08/07/2015 16:52

Yay məktəbində Təhsil Nazirliyinin Strateji təhlil, planlaşdırma və kadrların idarəolunması şöbəsinin aparıcı məsləhətçiləri Vüqar Əbdülrəhimov, Natiq Əliyev, Müasir Təhsil və Tədrisə Yardım Mərkəzinin təhsil siyasəti üzrə proqram direktoru Elmina Kazımzadə, həmin mərkəzin ali təhsil üzrə proqram meneceri Raziyə İsayeva, Kurikulum Mərkəzinin böyük elmi işçisi Fəridə Hüseynova və Bakı şəhərindəki 193 nömrəli orta məktəbin ingilis dili müəllimi Təranə Böyükzadə iştirak edib. Məktəbin təşkilində əsas məqsəd təhsildə liderlik təcrübəsini öyrənmək, məktəb direktorlarının idarəetmə sahəsində peşəkarlıq səviyyəsini yüksəltmək, idarəetmənin təkmilləşdirilməsi istiqamətində müvafiq bilikləri əldə etmək, çevik və müasir idarəetmə bacarıqlarına yiyələnmək olub. Yay məktəbində ölkəmizi təmsil edən nümayəndələrdən Elmina Kazımzadə, ABŞ-dakı Cənubi Konnektikut Dövlət Universitetinin professorları Ketrin Maqno, Listra Riçardson və ABŞ-dakı Viskonsin Universitetinin professoru Maykl Applın “Liderlər yeniliklərin təbliğatçısı kimi”, “Yeni əsr üçün yeni yanaşmalar”, “Tədqiqat liderliyin mühüm istiqaməti kimi” mövzuları üzrə məruzə və təqdimatları dinlənilib. Qeyd olunan mövzular ətrafında fikir mübadiləsi aparılıb, eyni zamanda, ayrı-ayrı qruplarda praktiki işlər həyata keçirilib. Sonda ölkəmizi təmsil edən iştirakçılara Təhsil Siyasəti üzrə Şəbəkələr Mərkəzi tərəfindən sertifikatlar təqdim edilib.

08/07/2015 16:52

Müraciətlərin 3911-i telefonla, 289-u elektron poçt vasitəsilə qəbul edilib­. Bütün müraciətlər qeydə alınıb, araşdırılıb və cavab­lan­dı­rıl­ıb. Bu iş Təhsil Nazirliyinin müvafiq strukturları tərəfindən həyata keçirilib. İyun ayında “Qaynar xətt” xidmətinə daxil olan müraciətlərin böyük əksəriyyəti sorğu xarakterlidir. Sorğuların 4000-ə qədəri ümumtəhsil məktəblərinin IX və XI si­nif­lərində mərkəzləşdirilmiş və eksternat qaydada keçirilən imtahanlar, onların nəticələrinin öyrənilməsi, apelyasiya şikayətlərinin qəbulu və onun yekunu barədə məlumatın əldə edilməsi, imtahanların keçirildiyi zaman şagirdlərin üzləşdikləri problemlər, eyni zamanda, ümumi orta və tam orta təhsil haqqında sənədlərin (şəhadətnamə və attestatların) verilməsi ilə əlaqədardır.        Digər sorğularda müəllimlərin işə qə­bulu, istedadlı uşaqlar arasında keçirilmiş olimpiadanın nəticələri və Beynəlxalq olimpiada qaliblərinə verilən güzəştlər, xaricdə təhsil, xarici ölkə təhsil müəs­si­sə­lə­rindən verilmiş təhsil sə­nəd­lərinin tanınması, xaricdə təhsil alan azərbaycanlı tələbələrin ölkəmizin təhsil müəssisələrinə kö­çürülməsi qaydaları ilə bağlı olub. Eyni zamanda şa­gird­lərin məktəbli geyimi ilə təmin olunması, müəllimlərin əmək haqqının he­sab­lan­ması qay­da­ları və digər  mə­sə­lə­lər­ə dair sorğularla da müraciət olunub. Şikayət xarakterli müraciətlərdə məktəbəqədər, ümumtəhsil, texniki-peşə, orta-ixtisas və ali təhsil müəs­si­sə­­lə­­rin­dəki problemlərdən bəhs olunur. Bu müraciətlər əsasında araşdırmalar apa­rıl­ıb, prob­lem­lərin aradan qaldırılması istiqamətində müvafiq tədbirlər həyata keçirilib. Ümumtəhsil məktəbləri və məktəbəqədər təhsil müəssisələri ilə bağlı mü­ra­­ciətlərin böyük əksəriyyəti Bakı, Gəncə, Sumqayıt şəhərlərindən, Abşeron, Şabran, Tərtər, Qazax, Quba, Lənkəran və digər rayonlardan olub. Müraciətlərdə ümumtəhsil məktəblərində şagirdlərin illik qiymətlərinin çıxarılması, təhsil sənədlərinin doldurulması, onların məzunlara verilməsi sahəsindəki ça­tış­mazlıqlar, məktəb rəhbərlərinin yol verdikləri nöqsanlar və başqa mə­sələlər öz əksini tapıb.  Bakıdakı 2, 3, 5, 11, 12, 18 saylı peşə liseylərindən  və Saatlı Peşə liseyindən daxil olan müraciətlərdə bu təhsil müəssisələrində aidiyyəti olmayan kitab satışının təşkili, şagird qəbulu qaydalarının pozulması, təhsil sənədlərinin və təqaüdlərin gecikdirilməsi kimi məsələlərdən bəhs olunur. Məlumat üçün qeyd edək ki, təhsil nazirinin “Ali və orta ixtisas təhsili müəssisələrində 2009-2010-cu tədris ilinin yay imtahan sessiyasının təşkili və keçirilməsi haqqında” 21.05.2010-cu il tarixli, 632 saylı əmrinin icrası ilə bağlı “Qaynar xətt” xidmətinə ali və orta ixtisas təhsili müəssisələrindən daxil olan müraciətlərin operativ şəkildə araşdırılması təmin edilib. Bu da öz növbəsində ali və orta ixtisas təhsili müəssisələrində yay imtahan sessiyasında tələbələrin biliyinin qiymətləndirilməsində şəffaflığı və obyektivliyi təmin etməyə, yarana biləcək neqativ halları aradan qaldırmağa və digər müvafiq tədbirlərin həyata keçirilməsinə kömək edib. 2009-2010-cu dərs ilinin yay imtahan sessiyası dövründə “Qaynar xətt” xidmətinə ali və orta ixtisas təhsili müəssisələrindən 41 müraciət daxil olub, onlardan 23-ü dövlət, 11-i özəl ali təhsil, 7-si orta ixtisas təhsil müəssisələrindən qəbul edilib.  Ali təhsil müəssisələrindən daxil olan müraciətlər semestr imtahanlarının test üsulu ilə keçirilməsi, Boloniya prosesinin tətbiqi, pedaqoji və istehsalat təcrübələrinin təşkili, magistratura təhsili, tələbələrin imtahanlara buraxılması, təhsil haqqının ödənilməsi qaydaları və s. ilə bağlı olub.  Azərbaycan Dövlət Pedaqoji Universiteti, Gəncə Dövlət Universiteti, Bakı Dövlət Universiteti, Lənkəran Dövlət Universiteti, Azərbaycan Dövlət Neft Akademiyası, Sumqayıt Dövlət Universiteti və digər ali təhsil müəssisələrindən daxil olan müraciətlərdə tələbələr daha çox aldıqları qiymətlərdən narazılıqlarını bildirərək, qiymətlərinin yüksəldilməsinə apelyasiya qaydasında köməklik göstərilməsini xahiş ediblər. Təhsil Nazirliyinin müvafiq şöbələrinin əməkdaşları müraciət daxil olmuş ali təhsil müəssisələrinin nümayəndələri ilə birgə araşdırmalar aparıb və buna əsasən  tələbələrin biliyinin imtahanda göstərdikləri nəticələrə uyğun obyektiv qiymətləndirilməsi təmin olunub. Özəl ali təhsil müəssisələrindən daxil olan 11 müraciətdən 8-i Azərbaycan Beynəlxalq Universiteti ilə bağlıdır. Bu müraciətlərdə tələbələrin imtahanlara buraxılmaması, imtahanın keçirilməsi qaydalarının pozulması və məzunlara diplomların verilməməsi ilə bağlı məsələlər  öz əksini tapıb. Eyni zamanda Odlar Yurdu Universiteti, Bakı Avrasiya Universiteti, Bakı Biznes Universitetindən də imtahan sessiyası dövründə şikayət xarakterli müraciətlər daxil olub. Bununla əlaqədar bütün müraciətlər yerində araşdırılıb və müəlliflərə cavab verilib. Azərbaycan Maliyyə-İqtisad Kolleci, Bakı Rabitə və Nəqliyyat Kolleci, Gəncə Humanitar Kolleci və Odlar Yurdu Universiteti nəzdində Orta İxtisas Kolleci, Azərbaycan Dəniz Balıq Sənayesi Texnikumu və Bakı Sənaye Pedaqoji Texnikumundan müraciətlər daxil olub. Həmin müraciətlərdə tələbələrin təqaüdlərinin vaxtında ödənilməməsi, imtahanda verilmiş qiymətlərdən narazılıq, təhsil sənədlərinin gecikdirilməsi barədə şikayətlər əks olunub. “Qaynar xətt” xidmətinə daxil olmuş müraciətlərə əsasən aparılmış araşdırmalarla bağlı müvafiq tədbirlərin həyata keçirilməsi üçün Təhsil Nazirliyinin struktur bölmələrinə məlumat verilib. Eyni zamanda adı çəkilən təhsil müəssisələrinə gələcək fəaliyyətlərində yol verilmiş nöqsanların aradan qaldırılması tövsiyə olunub.

08/07/2015 16:52

“Təhsil haqqında” Qanunun 14.18-ci bəndinə uyğun olaraq ölkədə fəaliyyət göstərən ali və orta ixtisas təhsili müəssisələri Prezidentin 23 fevral 2010-cu il tarixli, 225 nömrəli Fərmanı ilə təsdiq olunmuş Əsasnaməyə görə «Tələbə-məzun» dövlət elektron məlumat sisteminə qoşulmalıdırlar. Bununla əlagədar ali və orta ixtisas təhsili müəssisələri tələbə və magistrlər, akademik müvəffəqiyyət, ixtisas dəyişmələri, başqa təhsil müəssisəsindən köçürmələr, (o cümlədən xarici ölkələrdən), tələbələr sırasından xaric edilmələr, bərpalar və Əsasnamədə göstərilən digər məlumatları həmin sistemə daxil etməlidirlər. Eyni zamanda nəzərinizə çatdırırıq ki, Azərbaycan Respublikasının İnzibati Xətalar Məcəlləsinin 348-4-cü maddəsinə əsasən ali və orta ixtisas təhsili müəssisələri «Tələbə-məzun» dövlət elektron məlumat sisteminə qoşulmadıqları və ya məlumatları həmin sistemə vaxtında, tam və ya düzgün daxil etmədikləri halda cərimə (vəzifəli şəxslər iki yüz manatdan üç yüz manatadək miqdarında, hüquqi şəxslər iki min beş yüz manatdan üç min manatadək miqdarda) ediləcəklər. Ali (orta ixtisas) təhsil müəssisələrində təhsil alan tələbələrin köçürmələrinin mövcud qanunvericiliyin tələblərinə uyğun həyata keçirilməsinə nəzarəti daha da gücləndirmək və məlumatların elektron məlumat sisteminə vaxtında mərkəzləşdirilmiş şəkildə daxil olunmasını təmin etmək məqsədilə bildiririk ki, qeyri-dövlət və Təhsil Nazirliyinin tabeliyində olan dövlət ali (orta ixtisas) təhsil müəssisələrinə başqa müəssisələrdən və ya müəssisə daxilində bir ixtisasdan digərinə tələbələrin köçürülmələri və xarici ölkə təhsil müəssisələrindən xaric olunanların bərpası Təhsil Nazirliyinin, başqa nazirlik, komitə, idarə və təşkilatların tabeliyində olan ali (orta ixtisas) təhsili müəssisələrində isə həmin qurumların razılığı əsasında həyata keçiriləcəkdir. Qeyd olunanları nəzərə alıb, mövcud qanunvericilikdə müəyyən olunmuş müddətdə köçürmələr başa çatdıqdan sonra elektron məlumat sisteminə daxil etmək üçün rəhbərlik etdiyiniz təhsil müəssisəsində köçürülmələr barədə məlumatı əlavə edilmiş formaya uyğun bir həftə müddətində Təhsil Nazirliyinə təqdim etmək Sizə tapşırılır.             Hörmətlə, Nazir Misir Mərdanov №46-03-4808/17 10.08.2010   Köçürülən və bərpa olunan (o cümlədən xarici ölkə təhsil müəssisəsindən) tələbələr haqqında MƏLUMAT № Tələbənin soyadı və adı Əvvəl təhsil aldığı təhsil müəssisəsinin adı Əvvəl təhsil aldığı ixtisasın adı Köçürüldüyü və ya bərpa olduğu ixtisas Köçürülmə əmrinin tarixi və nömrəsi Təhsil müəssisəsinin tabe olduğu qurumun razılıq məktubu (tarixi və nömrəsi)                                                                                                                                            

08/07/2015 16:52

Şagird təkrar buraxılış imtahanında üzürsüz səbəbdən iştirak etmədikdə və ya yenə də qeyri-kafi qiymət aldıqda, növbəti dərs ilindən başlayaraq ekstern qaydasında bütün fənlərdən buraxılış imtahanı verir. Ekstern qaydasında buraxılış imtahanı vermək istəyənlər hər il aprelin 1-dən 20-dək müvafiq rayon (şəhər) təhsil şöbəsinə (idarəsinə) ərizə ilə müraciət edir və mərkəzləşdirilmiş qaydada buraxılış imtahanları keçirilməyən fənlər üzrə ilkin mərhələ imtahanlarını verirlər. Həmin şagirdlərin imtahana buraxılması barədə qərar qəbul edildikdən sonra müvafiq sənədlər (ilkin mərhələ imtahanlarının qiymətləri əlavə edilməklə) rayon (şəhər) təhsil şöbəsinin (idarəsinin) müşaiyətedici məktubu ilə mayın 25-dək Təhsil Nazirliyinə təqdim edilir. Əvvəlki dərs ilində buraxılış imtahanı keçirilməyən bir və ya bir neçə fəndən qeyri-kafi qiymət aldığı üçün tam orta təhsil səviyyəsi üzrə buraxılış imtahanına buraxılmayan şagirdlər də hər il aprelin 1-dən 20-dək bitirdikləri məktəblərə ərizə ilə müraciət edir və rayon (şəhər) təhsil şöbəsi (idarəsi) tərəfindən müəyyən olunmuş məktəbdə qeyri-kafi qiymət aldıqları fəndən (fənlərdən) mərkəzləşdirilmiş qaydada ilkin mərhələ imtahanları verirlər. Onların imtahana buraxılması barədə qərar qəbul edildikdən sonra müvafiq sənədlər ilkin mərhələ imtahanlarının qiymətləri əlavə edilməklə rayon (şəhər) təhsil şöbəsinin (idarəsinin) müşaiyətedici məktubu ilə mayın 25-dək Təhsil Nazirliyinə təqdim edilir. Əvvəlki dərs ilində biliyi qiymətləndirilmədiyi üçün orta təhsil səviyyəsi üzrə buraxılış imtahanına buraxılmayan, habelə müxtəlif səbəblərdən ümumi və ya tam orta təhsil səviyyəsini vaxtında başa vura bilməyən və buraxılış imtahanı verərək müvafiq təhsil sənədi almaq istəyən şəxslər də ekstern yolu ilə imtahanlara buraxılırlar. Ekstern qaydasında buraxılış imtahanı vermək istəyənlər hər il aprelin 1-dən 20-dək müvafiq rayon (şəhər) təhsil şöbəsinə (idarəsinə) ərizə ilə müraciət edir və mərkəzləşdirilmiş qaydada buraxılış imtahanları verilməyən fənlər üzrə ilkin mərhələ imtahanlarını verirlər. Onların imtahana buraxılması barədə qərar qəbul edildikdən sonra müvafiq sənədlər ilkin mərhələ imtahanlarının qiymətləri əlavə edilməklə rayon (şəhər) təhsil şöbəsinin (idarəsinin) müşaiyətedici məktubu ilə mayın 25-dək Təhsil Nazirliyinə təqdim edilir.

08/07/2015 16:52

Azərbaycanla İraq arasında yüksək səviyyəli ikitərəfli əlaqələrin mövcud olduğunu bildirən Misir Mərdanov təhsil sahəsində də qarşılıqlı  əməkdaşlığın inkişafının əhəmiyyətindən bəhs edib. Hələ keçmiş İttifaq zamanında müvafiq əlaqələrin olduğunu xatırladan nazir bu istiqamətdə münasibətlərin inkişafı üçün geniş imkanların olduğunu vurğulayıb. İraqın Azərbaycanla qarşılıqlı münasibətləri daha da yaxınlaşdırmaqda maraqlı olduğunu söyləyən səfir ölkəsinin xarici siyasətdə əsas götürdüyü sabit kursun dəyişmədiyini diqqətə çatdırıb. Heydər Şiyə Qubeyşi əl-Barrak yaxın zamanlarda İraqla Azərbaycan arasında elm, təhsil və bir sıra digər sahələrdə əlaqələrin inkişafına xidmət edən sazişin imzalanmasının nəzərdə tutulduğunu qeyd edib. Görüşdə iki ölkə arasında tələbə mübadiləsinin aparılması perspektivləri müzakirə edilib və iraqlı tələbələrin respublikamızın ali məktəblərində təhsili ilə bağlı bir sıra məsələlər ətrafında fikir mübadiləsi aparılıb.

08/07/2015 16:52

Tədbir iştirakçılarını və qonaqları salamlayan təhsil naziri Misir Mərdanov xaricdə təhsilin hər zaman prioritet məsələ olduğunu, hələ 1918-ci ilə qədər və Azərbaycan Xalq Cümhuriyyəti dövründə azərbaycanlıların dünyanın bir sıra ali məktəblərində təhsil aldıqlarını nəzərə çatdırıb. Nazir qeyd edib ki, ötən əsrin 70-80-ci illərində azərbaycanlı gənclərin SSRİ-nin müxtəlif şəhərlərinə oxumağa göndərilməsi daha intensiv xarakter alıb, hər il 1000-1500 tələbə ümummilli lider Heydər Əliyevin xeyir-duası ilə yola salınıb. Ulu öndərin ölkəmizin müstəqillik illərində də xaricdə ali təhsil alan gənclərə xüsusi diqqət göstərilməsini və onların dövlət qayğısı ilə əhatə olunmasını təmin etdiyini bildirən Misir Mərdanov hazırda ümumilikdə 10000-dən çox azərbaycanlının dünyanın ən nüfuzlu universitetlərində oxuduğunu vurğulayıb. Ölkə Prezidenti cənab İlham Əliyevin 2007-ci il 16 aprel tarixli 2090 nömrəli Sərəncamı ilə təsdiq edilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın 2007-ci ildən etibarən Təhsil Nazirliyi tərəfindən uğurla həyata keçirildiyini söyləyən nazir bildirib ki, Dövlət Proqramının əsas məqsədi rəqabət qabiliyyətli iqtisadi sistemin formalaşdırılması və davamlı inkişafın təmin edilməsi baxımından ölkəmizin müasir tələblərə cavab verən kadrlara ehtiyacının ödənilməsi, istedadlı gənclərin dünyanın aparıcı ölkələrində təhsil almaq imkanlarının genişləndirilməsindən ibarətdir. Dövlət Proqramının şərtlərinə əsasən həmin tələbələrin bütün xərclərinin dövlət tərəfindən ödənildiyini nəzərə çatdıran təhsil naziri proqramın icrasına başlandığı vaxtdan 512 nəfər gəncin təhsil almaq üçün müxtəlif xarici ölkələrə göndərildiyi barədə məlumat verib. Misir Mərdanov 2007-ci ildə 66, 2008-ci ildə 137, 2009-cu ildə 309 nəfərin Dövlət Proqramından bəhrələndiyini, 2010-cu ildə isə təxminən 200 nəfər tələbənin Dövlət Proqramı çərçivəsində xaricdə təhsil almaq üçün göndərilməsinin nəzərdə tutulduğunu bildirib. Nazir Dövlət Proqramı çərçivəsində təhsil alan tələbələrdən 32 nəfərin artıq məzun olduğunu, onların müxtəlif dövlət və özəl qurumlarda işlə təmin edildiyini söyləyib. Təhsil naziri hazırda Dövlət Proqramı çərçivəsində dünyanın 22 ölkəsinin yüksək reytinqə malik olan 154 ali məktəbində təhsilin müxtəlif pillələrində təhsil alan gənclərin doktorantura səviyyəsi üzrə sosial elmlər, mühəndislik, tibb və informasiya telekommunikasiya texnologiyaları, magistratura səviyyəsi üzrə iqtisadiyyat və idarəetmə, sosial elmlər, hüquqşünaslıq, informasiya telekommunikasiya texnologiyaları, mühəndislik, tibb və digər ixtisaslara üstünlük verdiklərini xüsusi olaraq qeyd edib. Dövlət Proqramı çərçivəsində dünyanın nüfuzlu ali məktəblərinə qəbul olunmuş tələbələri təbrik edən Azərbaycan Respublikası Prezident Administrasiyasının xarici əlaqələr şöbəsinin müdiri Novruz Məmmədov, Azərbaycan Respublikası xarici işlər nazirinin müavini, Azərbaycan Diplomatik Akademiyasının rektoru Hafiz Paşayev, Azərbaycan Respublikası Diasporla İş üzrə Dövlət Komitəsinin sədri Nazim İbrahimov, Milli Məclisin Beynəlxalq Əlaqələr Komitəsinin sədri, Azərbaycan Dillər Universitetinin rektoru, millət vəkili Səməd Seyidov gənclərə göstərilən etimadın özünü doğruldacağına, onların Azərbaycanın gələcək inkişafına layiqli töhfələr verəcəklərinə inandıqlarını bildiriblər. Təhsil naziri respublikamızın kadrlara olan tələbatı nəzərə alınaraq növbəti tədris ilindən etibarən tələbələr xarici ölkələrə göndərilərkən informasiya texnologiyaları, mühəndislik, neft sənayesi, tibb, riyaziyyat, fizika, biologiya və kimya ixtisaslarına üstünlük veriləcəyini bildirib. Azərbaycanlı gənclərin yaxşı təhsil almaqla bərabər, oxuduqları ölkələrdə fəal olmalarının üstün cəhətlərinə toxunan nazir dünyada Azərbaycan həqiqətlərinin yayılmasında onların da üzərinə məsuliyyət düşdüyünü qeyd edib. Sonda çıxış edən tələbələr göstərilən dövlət qayğısına görə minnətdarlıqlarını bildirib, onları maraqlandıran bir sıra məsələlərlə bağlı təkliflərini səsləndiriblər.

08/07/2015 16:52

Qonaqları səmimi salamlayan təhsil naziri Misir Mərdanov belə bir görüşdən məmnunluq duyduğunu ifadə edib. Azərbaycan ilə Almaniya arasında müxtəlif istiqamətlərdə mövcud olan əməkdaşlığın son illər daha da inkişaf etdiyini bildirən nazir təhsil sahəsi üzrə səmərəli əlaqələrin qurulmasında Azərbaycanın Ştutqart şəhərindəki fəxri konsulu Otto Hauzerin gördüyü işlərin böyük önəm daşıdığını nəzərə çatdırıb. Ölkələrimiz arasındakı səmərəli təhsil əlaqələrinin inkişafı üçün geniş imkanların olduğunu vurğulayan Misir Mərdanov ötən il oktyabrın 25-dən 29-dək Azərbaycan nümayəndə heyətinin Almaniyaya səfəri çərçivəsində müzakirə olunan məsələlərin diqqət mərkəzində saxlanıldığını, Ştutqart Dual Ali Məktəbində, Baden-Vürttenberq Torpağı Elm və Təhsil Nazirliyində və İxtisasartırma Təhsili Akademiyasındakı görüşlərdə irəli sürülmüş təkliflərlə bağlı müəyyən işlərin görüldüyünü bildirib. Respublikamızın ümumtəhsil məktəblərində Alman dilinin tədrisi, bu istiqamətdə həyata keçirilməli olan zəruri tədbirlərdən bəhs edən nazir “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində xaricə göndərilən tələbələrin sayına görə Almaniyanın ilk üçlükdə qərarlaşdığını söyləyib. Azərbaycanın Almaniyanın Ştutqart şəhərindəki fəxri konsulu Otto Hauzer səmimi qəbula görə təşəkkürünü bildirib və Almaniyanın bütün sahələrdə, eləcə də təhsil sektorunda Azərbaycanla münasibətlərin inkişafında maraqlı olduğunu nəzərə çatdırıb. Müasir tələblər baxımından ən çox ehtiyac duyulan ixtisaslar üzrə kadrların hazırlanması işini təkmilləşdirmək üçün Azərbaycanda nümunəvi texniki peşə təhsili müəssisəsinin təşkilinə yardımçı olmaq təşəbbüsü ilə çıxış edən Otto Hauzer bunun ölkəmizə sərmayə qoymaq istəyən Alman iş adamlarının axınının güclənməsinə əlavə təkan verəcəyini qeyd edib. Almaniyada təhsil alan azərbaycanlı tələbələrlə görüşlərinə toxunan fəxri konsul onlara yaxşı təhsil almaqda hər cür kömək etməyə hazır olduqları, həmin gənclərin gələcəkdə ölkələrimiz arasındakı əməkdaşlığın daha da dərinləşməsinə layiqli töhfələr verə biləcəyi haqda fikirlərini açıqlayıb. Qonaq Alman mütəxəssislərin Azərbaycan Dövlət Neft Akademiyası ilə əlaqələr yaratmaqda və birgə əməkdaşlıqda maraqlı olduqlarını da qeyd edib. Almaniyada peşə təhsili sisteminin yüksək səviyyədə inkişaf etdiyini və ölkənin sosial-iqtisadi tərəqqisində bu amilin mühüm rol oynadığını nəzərə çatdıran Misir Mərdanov Azərbaycanda nümunəvi texniki peşə təhsili müəssisəsinin yaradılması təşəbbüsünü dəstəklədiyini bildirib. Nazir qeyd edib ki, irəli sürülən təşəbbüs gerçəkləşərsə, bu, Azərbaycan-Almaniya təhsil əlaqələrinin inkişafı yolunda ən əlamətdar hadisələrdən biri olacaqdır. Azərbaycan Dövlət Neft Akademiyasının hələ ötən əsrin 80-ci illərindən Almaniya ali təhsil müəssisələri ilə əlaqələrinin olduğunu söyləyən nazir qarşılıqlı əməkdaşlığın inkişafı üçün geniş imkanların mövcudluğunu vurğulayıb. Daha sonra bir sıra digər məsələlər ətrafında fikir mübadiləsi aparılıb, Azərbaycanda nümunəvi texniki peşə təhsili müəssisəsinin yaradılması üçün birgə işçi qrupunun təşkil edilməsi, ümumtəhsil məktəblərində Alman dilinin tədrisi səviyyəsinin yüksəldilməsi üçün müvafiq tədbirlərin görülməsi, ixtisasartırma təhsili ilə bağlı əməkdaşlığın davam etdirilməsi qərara alınıb.

08/07/2015 16:52