Fransanın Müluz şəhərindəki Yuxarı Elzas Universitetində Nizami Gəncəvi adına ədəbiyyat və mədəniyyət kafedrasının açılışı olub. Mərasimdə Yuxarı Elzas Universitetinin rektoru Kristin Zieqler-Qanqloff Müluzun Azərbaycanın şəhərləri ilə olan dostluq münasibətlərindən, o cümlədən rəhbərlik etdiyi ali məktəbin Gəncədəki universitetlərlə mövcud əlaqələrindən danışıb. Yuxarı Elzas Universitetinin ədəbiyyat və humanitar elmlər fakültəsinin dekanı Qreta Komur isə dahi Azərbaycan şairi və mütəfəkkiri Nizami Gəncəvinin adını daşıyan ədəbiyyat və mədəniyyət kafedrasının onun rəhbərlik etdiyi fakültədə açılması ilə qürur duyduğunu deyib. Qreta Komur Nizami Gəncəvinin əsərlərinin Şərq və Avropa mədəniyyətinə təsirini, eləcə də Avropa və Azərbaycan mədəniyyəti arasında qarşılıqlı təsirləri tədqiq etməyin kafedranın əsas məqsədi olduğunu bildirib. O, hər iki ölkə arasında ədəbiyyat sahəsində olan əlaqələrə də toxunub. Tədbirdə çıxış edən Fransa Senatının üzvü, Müluz Elzas aqlomerasiyasının prezidenti Jan-Mari Bokel Azərbaycanın dostu olduğunu vurğulayaraq tarixi ərazilərimizin qonşu ölkə tərəfindən işğalının qəbuledilməz olduğunu bildirib. Azərbaycan Respublikasının təhsil naziri Mikayıl Cabbarov dünya ədəbiyyatına, mədəniyyətinə, təhsilinə və elminə əvəzsiz töhfələr vermiş Nizami Gəncəvinin adını daşıyan kafedranın açılış mərasimində iştirak etməkdən məmnunluğunu bildirib. O, bu layihənin reallaşmasına verdiyi dəstəyə görə Azərbaycanın birinci xanımı, Heydər Əliyev Fondunun prezidenti, Azərbaycan-Fransa parlamentlərarası dostluq qrupunun sədri Mehriban Əliyevaya, Yuxarı Elzas Universitetinin rektoru Kristin Zieqler –Qanqloffa, Müluz şəhərinin rəhbərliyinə, ölkəmizin Fransadakı səfiri Elçin Əmirbəyova minnətdarlığını ifadə edib. Azərbaycan-Fransa münasibətlərinin dərin tarixi köklərinə toxunan nazir bu gün xalqlarımız arasında tarix boyu formalaşmış dostluq münasibətlərinin hər iki ölkənin rəhbərləri səviyyəsində dəstəklənməsi və daha da inkişaf etdirilməsi istiqamətində səylərin göstərildiyini vurğulayıb. Nazir XXI əsrdə ölkələr və millətlər arasında qarşılıqlı anlayışa və hörmətə əsaslanan münasibətlərin qurulmasında təhsilin müstəsna rol oynadığını qeyd edib. O, Azərbaycan Respublikasının Prezidenti İlham Əliyevin ölkəmizdə təhsil sahəsinin inkişafına xüsusi əhəmiyyət verdiyini diqqətə çatdırıb. Hər bir ölkənin, hər bir xalqın gələcəyinin, inkişafının və uğurlarının məhz insan amilindən, onun savadlı, bilikli gənclərindən asılı olduğunu bildirib. Nazir dövlətimizin başçısının irəli sürdüyü “qara qızılı insan kapitalına çevirmək” prinsipinin və bu çərçivədə Azərbaycanın savadlı və bacarıqlı gənclərinin xarici ölkələrin aparıcı universitetlərində təhsili üçün dövlət təqaüdlərinin ayrılması təşəbbüsünün ölkəmizdə təhsilə verilən əhəmiyyəti əks etdirdiyini vurğulayıb. Təhsilin inkişafı sahəsində xüsusi əhəmiyyət verilən məqamlardan birinin də xarici ölkələrlə müsbət təcrübələrin paylaşılması və qarşılıqlı faydalılıq əsasında birgə təşəbbüslərin həyata keçirilməsi olduğunu deyən nazir Azərbaycanın Fransa ilə bu istiqamətdə tərəfdaşlığının nümunəvi xarakter daşıdığını diqqətə çatdırıb. Bakıda Fransız Liseyinin artıq fəaliyyət göstərdiyini qeyd edən M. Cabbarov bildirib ki, hər iki ölkənin dövlət başçılarının təşəbbüsü ilə Fransız-Azərbaycan Universiteti layihəsi üzərində hazırlıq işləri aparılır və növbəti tədris ilindən etibarən bu layihənin də uğurla fəaliyyətə başlayacağına ümid edir. Nazir M.Cabbarov yeni açılan kafedranın fransız gənclərinə və tədqiqatçılarına Azərbaycanı daha yaxından tanımağa, ədəbiyyatımızı, tariximizi və mədəni irsimizi araşdırmağa imkan yaradacağına əmin olduğunu bildirib.   Şəhla Ağalarova AZƏRTAC-ın xüsusi müxbiri Müluz

03/11/2015 05:26

Təhsil naziri Mikayıl Cabbarov “Sabahın alimləri” V Respublika müsabiqəsinin keçirilməsi barədə əmr imzalayıb. Əmrə əsasən, 2016-cı ilin 11-13 fevral tarixlərində keçiriləcək bu müsabiqədə ölkəmizdə fəaliyyət göstərən ümumi təhsil məktəblərinin IX-XI siniflərində təhsil alan şagirdlər öz elmi layihələri ilə iştirak edə bilərlər. “Sabahın alimləri” Respublika müsabiqəsi hər il ABŞ-da təşkil edilən İntel İSEF–İntel Beynəlxalq Elm və Mühəndislik Sərgisi çərçivəsində keçirilir. Respublika müsabiqəsində ciddi elmi nəticə əldə etmiş şagirdlər Münsiflər Heyəti tərəfindən seçilərək İntel İSEF-də iştirak etmək hüququ qazanırlar.   ELAN   “Sabahın alimləri” V Respublika müsabiqəsinin keçirilməsi haqqında Azərbaycan Respublikası təhsil nazirinin əmri

02/11/2015 13:17

2015-ci ilin oktyabr ayında Təhsil Nazirliyinin Telefon Məlumat Mərkəzinə (“Qaynar xətt” xidməti, telefon: 146) daxil olan zənglər və Vətəndaşların Qəbulu Mərkəzində vətəndaşlara göstərilən xidmətlərlə bağlı statistika açıqlanıb. Statistikaya əsasən, Telefon Məlumat Mərkəzinə 13360 zəng (2013-cü ilin müvafiq dövrü ilə müqayisədə 13,6 dəfə çox, 2014-cü ilin müvafiq dövrü ilə müqayisədə 2,4 dəfə çox) daxil olub. Vətəndaşların Qəbulu Mərkəzində isə 5651 vətəndaşa xidmət göstərilib. Telefon Məlumat Mərkəzinə və Vətəndaşların Qəbulu Mərkəzinə daxil olmuş müraciətlərin (əsasən sorğu xarakterli olub) əksəriyyəti dərhal cavablandırılıb və operativ həll olunub. 660 vətəndaş sorğularına uyğun olaraq, elektron qaydada Təhsil Nazirliyinin müvafiq məsul şəxslərinin qəbuluna yazılıb. Vətəndaşların Qəbulu Mərkəzində 1762 sənəd (1171 məktub, 535 ərizə, 56 digər sənəd) qəbul olunub və qeydiyyata alınıb. Daxil olan müraciətlərdə daha çox ali təhsil sənədlərinin (diplomların) tanınması (nostrifikasiya), ümumi təhsil müəssisələrində şagirdlərin yerdəyişməsi, müəllimlərin işə qəbulu və yerdəyişməsi, tələbələrin yerli ali təhsil müəssisələrinə köçürülməsi və bərpası ilə bağlı məsələlər əksini tapıb. Qeyd edək ki, Telefon Məlumat Mərkəzinə ötən ay ərzində ən çox həftənin cümə axşamı (2980 zəng) və çərşənbə axşamı (2661 zəng) günləri, əsasən, saat 10:00-dan 12:30-dək və 14:00-dan 17:00-dək müraciət olunub. Vətəndaşların Qəbulu Mərkəzinə isə ən çox həftənin cümə (1261 müraciət) və bazar ertəsi (1216 müraciət) günləri, əsasən, saat 10:00-dan 12:00-dək və 14:00-dan 16:00-dək müraciət edilib.

02/11/2015 08:55

Səfərin ilk günü Mikayıl Cabbarov Rusiya Federasiyası təhsil və elm naziri Dmitri Livanovla görüşüb. Görüşdə Elm və Təhsil sahəsinə Nəzarət üzrə Federal Xidmətin direktor müavini Aleksandr Biserov və Azərbaycan Dövlət İqtisad Universitetinin rektoru Ədalət Muradov da iştirak ediblər. Görüş zamanı iki ölkə arasında təhsil sahəsində əməkdaşlıq məsələləri, qarşılıqlı təcrübə mübadiləsi, həmçinin Azərbaycan Dövlət İqtisad Universitetinin Dərbənd filialının lisenziyalaşdırılması prosesinin sürətləndirilməsi istiqamətində görülən işlər barədə müzakirələr aparılıb. Oktyabrın 30-da təhsil naziri həmçinin, Moskva şəhərində K.Kərimov adına Azərbaycan etnomədəni komponentli 1583 saylı gimnaziyaya baş çəkib, müəllim və şagirdlərlə görüşüb, tədris prosesi ilə yaxından tanış olub. Təhsil naziri məktəbdə Azərbaycan dilində tədrisin təşkili prosesinə dəstəyin verilməsi imkanlarının araşdırılacağını bildirib. Oktyabrın 31-də Moskvada Rusiyanın Azərbaycanlı Gənclər Birliyinin (RAGB) “Gənclərin layiqli gələcəyi naminə” VI Forumu keçirilib. Forumun açılış mərasimində Heydər Əliyev Fondunun vitse-prezidenti, RAGB-in sədri Leyla Əliyeva çıxış edib. Forum çərçivəsində çıxış edən təhsil naziri Mikayıl Cabbarov təhsil sahəsində əməkdaşlığın Azərbaycan-Rusiya münasibətlərində xüsusi əhəmiyyət kəsb etməsi, tələbə və qarşılıqlı təcrübə mübadiləsinin təhsil əlaqələrinin inkişafında rolu, Rusiya Federasiyasının 2 ali təhsil müəssisəsinin Azərbaycanda uğurla fəaliyyət göstərməsi, rus dilinin Azərbaycanın təhsil müəssisələrində tədrisi kimi məsələləri nəzərə çatdırıb. Həmin gün təhsil naziri Mikayıl Cabbarov Moskva şəhərində 28 oktyabr-1 noyabr 2015-ci il tarixlərində keçirilən “Açıq İnnovasiyalar-2015” Forumunu ziyarət edərək təhsil sahəsində fəaliyyət göstərən müxtəlif müəssisələrin təmsilçiləri ilə fikir mübadiləsi aparıb.

02/11/2015 08:11

Oktyabrın 30-da Təhsil Nazirliyinin təşəbbüsü ilə Azərbaycan Dövlət Neft və Sənaye Universitetində “Media və təhsil dialoqu: peşəkarlığın inkişafı” mövzusunda növbəti təlim konfransı keçirilib. Təhsil Nazirliyinin və Azərbaycan Dövlət Neft və Sənaye Universitetinin (ADNSU) birgə təşkilatçılığı ilə keçirilən təlim konfransında Təhsil Nazirliyinin əməkdaşları, media qurumlarının və ali təhsil müəssisələrinin mətbuat xidmətlərinin rəhbərləri, təhsillə bağlı QHT nümayəndələri və təhsil ekspertləri iştirak ediblər. Öncə konfrans iştirakçıları ADNSU-nun tarix muzeyi ve laboratoriyası ilə tanış olublar. “Media və təhsil dialoqu: peşəkarlığın inkişafı” mövzusunda növbəti təlim konfransının rəhbərlik etdiyi ali məktəbdə keçirilməsindən məmnunluğunu ifadə edən ADNSU-nun rektoru Mustafa Babanlı tədbir iştirakçılarını salamlayıb və ölkəmizdə həyata keçirilən genişmiqyaslı təhsil islahatlarının ictimaiyyətə dolğun şəkildə çatdırılmasında medianın rolunun əhəmiyyətini vurğulayıb. “Təhsil” TV və "APA-Holdinq"in informasiya dəstəyi ilə təşkil olunmuş konfransda media və təhsil dialoqunun daha da yaxşılaşdırılması, səmərəli qarşılıqlı əməkdaşlıq baxımından peşəkarlığın inkişafı ilə bağlı müzakirələr aparılıb, müvafiq təklif və tövsiyələr səsləndirilib. Çıxışlarda təhsil qurumları ilə media arasında əlaqələrin daha da inkişafı, yeni əməkdaşlıq mühitinin yaradılması və bu işin davamlı, sistemli aparılmasının əhəmiyyəti vurğulanıb. Təlim konfransında Bakı Dövlət Universitetinin Televiziya və radio jurnalistikası kafedrasının müdiri Aynur Kərimovanın “Daxili kommunikasiya və sosial şəbəkələr”, BDU-nun doktorantı Turac Əliyevanın “Daxili PR - təşkilat daxili yazışmaların aparılması”, “ADA” Universitetinin rektorluq aparatının rəhbəri, mətbuat xidmətinin rəhbəri əvəzi Şəfəq Mehrəliyevanın “Ali təhsil müəssisələrində ictimaiyyətlə əlaqələr işi: problemlər və yeni çağırışlar“ və Təhsil Nazirliyinin QHT və KİV-lə iş sektorunun müdiri Cəsarət Valehovun “Ali təhsil müəssisələrinin mətbuat xidmətlərinin fəaliyyətinin monitorinqi” mövzularında təqdimatları dinlənilib və təlimlər keçirilib. Sonra təhsil eksperti Şahlar Əsgərov və Etibar Əliyev, “525-ci qəzet”in baş redaktoru Rəşad Məcid, “İki sahil” qəzetinin baş redaktoru Vüqar Rəhimzadə və başqaları çıxış edərək təhsil-media əlaqələri sahəsində belə konfransların keçirilməsinin mühüm əhəmiyyətini qeyd ediblər. Qeyd edək ki, bu təlim konfransı Təhsil Nazirliyinin “Media və təhsil dialoqu” çərçivəsində keçirdiyi sayca IV konfransdır.

30/10/2015 13:20

29-31 oktyabr 2015-ci il tarixlərini əhatə edən diaqnostik qiymətləndirilməyə əvvəllər sınaq imtahanlarında iştirak etməyən və iştirak edib aşağı bal toplayan, eləcə də Təhsil Nazirliyinin mərkəzləşdirilmiş qaydada keçirdiyi müsabiqələrin nəticəsi olaraq, ümumi təhsil müəssisələrinə iş yerini dəyişən və yeni işə qəbul olunan müəllimlər qatılır. Ümumilikdə, qiymətləndirilmədə 2403 nəfər müəllimin iştirak etməsi nəzərdə tutulub. İştirakçıların 2003 nəfəri Azərbaycan, 400 nəfəri rus bölməsində tədris aparan müəllimlərdir. Kompüter vasitəsilə təşkil olunan imtahanlar zamanı müəllimlərə ixtisasları üzrə 40, təlim strategiyaları və kurikulum üzrə 20 test sualı təqdim olunur. Xatırladaq ki, hər iki blok (ixtisas, metodika) üzrə sualların ən azı 10 faizinə cavab vermiş müəllimlər diaqnostik qiymətləndirilmədən keçmiş hesab olunacaqlar. İmtahan iştirakçılarından ibtidai sinif (860 nəfər), riyaziyyat (194 nəfər), Azərbaycan dili (181 nəfər), tarix (124 nəfər) müəllimləri sayca üstünlük təşkil edir. Fənlər üzrə imtahan qrafiki aşağıdakı kimidir: 29.10.2015 - coğrafiya, biologiya, fiziki tərbiyə, fransız dili, GÇHR, kimya, musiqi, rus dili, ingilis dili, təsviri incəsənət, alman dili, fizika, texnologiya; 30.10.2015 - riyaziyyat, tarix, Azərbaycan dili və ədəbiyyat, ingilis dili, ibtidai sinif; 31.10.2015 - ibtidai sinif.

29/10/2015 13:55

Oktyabrın 29-da Bakı şəhəri Tahir Həsənov adına 23 nömrəli tam orta məktəbdə dövlət təltiflərinə layiq görülmüş təhsil işçilərinə mükafatların təqdim olunması mərasimi keçirilib. Mərasimdən öncə təhsil naziri Mikayıl Cabbarov, rəhbər təhsil işçiləri və Azərbaycan Respublikasının Prezidenti cənab İlham Əliyevin sərəncamları ilə təltif olunmuş müəllimlər Fəxri xiyabana gələrək ümummilli lider Heydər Əliyevin və akademik Zərifə xanım Əliyevanın xatirəsini ehtiramla yad edib, məzarları önünə gül dəstələri qoyublar. Mərasimdə çıxış edən təhsil naziri Mikayıl Cabbarov bu il də Azərbaycan Respublikasının Prezidenti cənab İlham Əliyevin sərəncamları ilə bir qrup təhsil işçisinin peşə bayramı ərəfəsində təltif edildiyini nəzərə çatdırıb. Nazir Azərbaycan təhsilinin inkişafındakı xidmətlərinə görə fəxri ad və medallara layiq görülmüş təhsil işçiləri adından ölkə başçısına minnətdarlığını bildirib. Dövlət başçısının müəllim əməyini yüksək dəyərləndirdiyini, təhsil işçilərinə hər zaman ehtiramla yanaşdığını söyləyən Mikayıl Cabbarov təhsil sahəsində əldə olunan uğurlardan söz açıb. Nazir “Bilik günü”ndə Bakıdakı 148 nömrəli tam orta məktəbin müəllim və şagirdləri qarşısında ölkə Prezidentinin proqram xarakterli çıxışında gənc nəslin tərbiyəsi, onların milli-mənəvi ruhda böyüməsi ilə bağlı verdiyi tapşırıq və tövsiyələrin təhsil işçilərinin qarşısında duran əsas vəzifələrdən biri olduğunu vurğulayıb. Nazir deyib ki, aparılan təhlillər müəllim işləmək istəyənlərin sayının ilbəil artdığını göstərir: “Əgər iki il əvvəl müəllimlərin işə qəbulu üzrə müsabiqəyə müraciət edənlərin sayı 17 min nəfər idisə, cari ildə onların sayı 41 faiz artaraq, 24 min nəfər olub. Qeyd etmək lazımdır ki, İKT-nin geniş tətbiqini nəzərdə tutan şəffaf, obyektiv və çevik işə qəbul mexanizminin tətbiqi müəllim peşəsinə marağın artmasına bilavasitə təsir edir. Müsabiqənin nəticələrinə əsasən, 3068 müəllim işə qəbul olunub, vakansiyaların tutulma səviyyəsi 38 faiz artıb”. Kənd məktəblərinə işə qəbul olunmuş 1729 nəfər gənc mütəxəssisə Nazirlər Kabinetinin qərarına əsasən həvəsləndirmə tədbirlərinin tətbiq edildiyini söyləyən təhsil naziri bu il kənd məktəblərini seçənlərin ötən dərs ilinə nisbətən 25 faiz artmasının təsadüfi olmadığını bildirib. Nazir qeyd edib ki, cari ilin sonunadək ölkənin 3 şəhər və 9 rayonunda daha 30 min müəllimin bilik və bacarıqlarının diaqnostik qiymətləndirilməsi həyata keçiriləcək və 2016-cı ilin yanvarından onların əməkhaqqısı artırılacaqdır. Beləliklə, bir il müddətində ölkə üzrə müəllimlərin 40 faizinin əməkhaqqısında əhəmiyyətli artım təmin olunacaqdır. Müəllim nüfuzunun artırılması məqsədilə həyata keçirilən məqsədyönlü tədbirlərə toxunan Mikayıl Cabbarov bu baxımdan müəllimlərin peşəkarlıq səviyyəsinin yüksəldilməsinin əhəmiyyətini nəzərə çatdırıb: “Müəllim peşəsinə marağı artırmaq üçün 2014-cü ildən başlayaraq 500-dən yuxarı bal toplayan tələbələr üçün xüsusi layihənin həyata keçirilməsinə başlanılıb. Artıq 600 nəfərə Təhsil Nazirliyinin xüsusi təqaüdü verilir. Cari ildə müəllimlik ixtisaslarını seçən abituriyentlərin orta balı artıb, 500 və daha yuxarı bal toplayan abituriyentlərin sayı ötən ilə nisbətən 37 faiz çox olub”. Təhsilin keyfiyyətinin yüksəldilməsi haqqında fikirlərini bildirən nazir şagirdlərə seçdikləri ixtisas istiqamətləri üzrə daha yaxşı hazırlaşmaq imkanı yaratmaq məqsədilə ölkənin pilot olaraq seçilmiş 58 məktəbində 10-cu siniflərdə 4 istiqamət üzrə 176 təmayül sinfinin açıldığını söyləyib: “İstedadlı şagirdlərin aşkar olunmasında və onların potensialının inkişaf etdirilməsində fənn olimpiadaları və bilik yarışları müstəsna rol oynayır. Bu il rekord sayda - 22 mindən çox şagird respublika fənn olimpiadalarına qatılıb. Ümumi təhsildə əldə olunmuş uğurlar ali məktəblərə qəbul planında müəyyənləşdirilmiş minimal keçid balını son illərdə ilk dəfə olaraq aşağı salmamaq barədə qərar qəbul olunmasını da mümkün edib”. Çıxışının sonunda təltif olunan təhsil işçilərini təbrik edən təhsil naziri onlara gələcək fəaliyyətlərində yeni-yeni uğurlar arzulayıb. Sonra təltif olunan təhsil işçilərinə mükafatlar təqdim olunub, xatirə şəkli çəkdirilib.   Fotoları aşağıdakı linkdən yükləyə bilrəsiniz www.edu.gov.az/upload/gallery/tehsil_ishcilerinin_teltifi-29.10.2015.rar

29/10/2015 11:07

Mərkəzi icra hakimiyyəti orqanları rəhbərlərinin 2015-ci ilin oktyabr ayında şəhər və rayonlarda vətəndaşların qəbulu cədvəlinə uyğun olaraq, keçirilən qəbulda vətəndaşlar əsasən, müəllimlərin işə qəbulu və ya iş yerinin bir məktəbdən, həmçinin, bir rayondan digərinə dəyişdirilməsi, işə bərpa olunma, təhsil sənədlərinin tanınması, ali və orta ixtisas məktəbləri tələbələrinin bir təhsil müəssisəsindən digərinə köçürülməsi, tədris müəssisələrinin maddi-texniki bazasının yaxşılaşdırılması, təhsil haqqı və bir sıra digər məsələlərlə əlaqədar müraciət ediblər. Qəbulda 54 vətəndaşın müraciəti dinlənilib və əksər məsələlər yerindəcə həllini tapıb. Bir sıra müraciətlərlə bağlı nazirliyin müvafiq qurumlarına tapşırıqlar verilib. Bəzi vətəndaşların nazirliyin səlahiyyətlərinə aid olmayan və ya şəxsi xarakter daşıyan müraciətləri isə müvafiq qurumlara çatdırılmaq üçün qeydə alınıb və nəzarətə götürülüb.

28/10/2015 14:21

Oktyabrın 28-də şagirdlərin elektron dərsliklərdən istifadə bacarıqları ilə tanış olmaq məqsədilə mediatur keçirilib. Mediatur çərçivəsində Bakı şəhəri 220 nömrəli tam orta məktəbdə olan media təmsilçiləri III və VIII sinif şagirdlərinin elektron dərsliklərdən istifadəsi prosesini izləyiblər. Mətbuat nümayəndələrinə məlumat verilib ki, Azərbaycan və rus bölmələri üzrə  www.e-derslik.edu.az portalında yerləşdirilən elektron kitabların sayı 66-dan 95-ə çatdırılıb.  Ən son olaraq IV, VI, VII və VIII sinif dərslikləri əlavə olunub. Yaxın aylarda VIII sinif üzrə bütün fənn dərsliklərinin hazırlanıb portalda yerləşdirilməsi nəzərdə tutulub. Hazırda I-IV və VI-VIII siniflər üçün Azərbaycan və rus bölmələri üzrə 95 ədəd dərslik tam olaraq elektron variantda portala yerləşdirilib. V və IX-XI sinif dərsliklərinin elektron versiyaları isə 2015-2016-cı tədris ilinin sonunadək hazırlanacaq. Ötən bir ildə elektron dərsliklər portalından 400 minə yaxın istifadəçi yararlanıb. Portala gündəlik 1500-2000 nəfər istifadəçi daxil olur. Portalda qeydiyyatdan keçmiş istifadəçilərin sayı isə 33000 nəfərdən çoxdur. Bu göstəricilər hər gün artır. www.e-derslik.edu.az portalın hazırlanmasında məqsəd təhsilalanları təhsil prosesində fəallaşdırmaq, onların İKT-dən səmərəli istifadə etməsinə, dərslikləri elektron formatda oxumasına imkan yaratmaqdır. Bu sistem şagirdlərin dərsliklərdən istifadəsində mobilliyi artırır. Portala daxil olan istifadəçilərin onlayn və oflayn formada dərslikləri elektron versiyada oxumaq, dərsliyin istənilən səhifəsində müvafiq lazımi elektron qeydlər aparmaq, axtarışlar etmək imkanı var.

28/10/2015 08:56

Oktyabrın 26-27-də Bakıda Azərbaycan-Fransız Universitetinin yaradılması üzrə işçi qrupunun ilk görüşü olub. Təhsil Nazirliyindən AZƏRTAC-a bildiriblər ki, görüşdə Azərbaycan tərəfindən Təhsil Nazirliyi, İqtisadiyyat və Sənaye Nazirliyi, Azərbaycan Respublikası Dövlət Neft Şirkəti, Dövlət Neft Fondunun əməkdaşları və layihə üçün tərəfdaş universitet qismində seçilmiş Azərbaycan Dövlət Neft və Sənaye Universitetinin rəhbərliyinin daxil olduğu nümayəndə heyəti, Fransa tərəfindən isə Strasburq Universitetinin prezidenti Alen Beretzin rəhbərlik etdiyi nümayəndə heyəti iştirak ediblər. Qonaqları salamlayan təhsil naziri Mikayıl Cabbarov Azərbaycan Respublikası və Fransa Respublikası prezidentlərinin təşəbbüsü ilə ötən ilin mayında Fransa Prezidentinin ölkəmizə səfəri zamanı Azərbaycanın Təhsil Nazirliyi və Fransanın Milli Təhsil, Ali Təhsil və Tədqiqat Nazirliyi arasında universitetlərarası əməkdaşlıq sahəsində niyyət protokolunun imzalandığını bildirib. Nazir qeyd edib ki, bu, iki ölkə arasında humanitar sahədəki əlaqələrin inkişafı baxımından yeni səhifələr açır. Görüşdə Azərbaycan Dövlət Neft və Sənaye Universiteti ilə Strasburq Universitetinin təsisçiliyi əsasında Azərbaycan-Fransız Universitetinin yaradılması, hər iki ölkənin ali məktəbləri arasında əməkdaşlığın inkişafı və qarşılıqlı maraq doğuran digər məsələlər ətrafında fikir mübadiləsi aparılıb. İşçi qrupu Azərbaycan-Fransız Universiteti layihəsinin reallaşdırılması istiqamətində növbəti mərhələdə atılacaq addımları da müzakirə edib.   AZƏRTAC

27/10/2015 17:24