31 may və 1 iyun tarixlərində Özbəkistanda iki mərhələdən ibarət Əl-Xarəzmi Beynəlxalq Riyaziyyat Olimpiadası təşkil edilib. Müsabiqədə Azərbaycan, Qazaxıstan, Qırğızıstan, Tacikistan və Özbəkistandan 30-a yaxın şagird iştirak edib.     4 məktəbli ilə yarışda təmsil olunan komandamızın bütün üzvləri qaliblər sırasında yer alıblar. Belə ki, Türkiyə Dəyanət vəqfi Bakı türk liseyinin 8-ci sinif şagirdi Zəhra İbişova gümüş, Kimya, biologiya təmayüllü respublika liseyinin 8-ci sinif şagirdi Rəfiqə Qəmbərova bürünc, Sumqayıt şəhəri Təbiət elmləri təmayüllü gimnaziyanın 8-ci sinif şagirdi Davud Tarverdili bürünc, Fizika, riyaziyyat və informatika təmayüllü liseyin 8-ci sinif şagirdi Fərhad Hüseynov isə bürünc medal qazanıb. 

05/06/2023 12:00

1-2 iyun tarixlərində Qazaxıstanın paytaxtı Astana şəhərində keçirilən Mərkəzi və Şərqi Avropa Ölkələrinin Keyfiyyət Təminatı Agentlikləri Şəbəkəsinin (CEENQA) Baş Assambleyasında Azərbaycanı təmsil edən Ülkər Səttarova təşkilatın İdarə Heyətinə üzv seçilib. Təhsildə Keyfiyyət Təminatı Agentliyinin (TKTA) İdarə Heyətinin sədri olan Ülkər Səttarovanın namizədliyini səsvermə hüququna malik 25 nəfərdən 19-u dəstəkləyib.     Ülkər Səttarova çıxışında ona göstərilən etimada görə minnətdarlığını bildirib, son illər ölkəmizdə elm, ali təhsil sahəsində həyata keçirilən islahatlar və TKTA tərəfindən icra edilən layihələr barədə iştirakçıları məlumatlandırıb.     CEENQA Baş Assambleyasında Azərbaycanla yanaşı, Almaniya, Estoniya, Ermənistan, Latviya, Litva, Polşa, Çexiya, Slovakiya, Macarıstan, Rumıniya, Moldova, Sloveniya, Bosniya və Herseqovina, Serbiya, Bolqarıstan, Türkiyə, Ukrayna, Gürcüstan və Qırğızıstanın keyfiyyət təminatı agentliklərinin rəhbərləri, eləcə də Avropa Ali Təhsil Məkanında Keyfiyyət Təminatı üzrə Assosiasiya (ENQA), Ali Təhsil üzrə Avropa Keyfiyyət Təminatı Reyestri (EQAR) və Ali Təhsildə Keyfiyyət Təminatı Agentliklərinin Beynəlxalq Şəbəkəsinin (INQAAHE) nümayəndələri iştirak ediblər.     Tədbirdə növbəti CEENQA Baş Assambleyasının Bakıda keçirilməsinə dair qərar dəstəklənib.     Qeyd edək ki, 26 ölkədən 41 agentliyin qoşulduğu təşkilat Avropa ali təhsil məkanında keyfiyyət təminatı üzrə standart və təlimatlara uyğun daxili və xarici keyfiyyət təminatı sisteminin təkmilləşdirilməsinə töhfə verməklə yanaşı, üzv təşkilatlar arasında təcrübə mübadiləsi və müştərək layihələrin həyata keçirilməsini təşviq edir.     TKTA 2021-ci ilin oktyabr ayından CEENQA-nın tamhüquqlu üzvüdür. 

05/06/2023 11:00

İyunun 3-də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ASAN İnnovativ İnkişaf Mərkəzinin (AİİM) təşkilatçılığı ilə İnsan Resursları və İdarəetmə Forumu keçirilir. Forum ümummilli lider Heydər Əliyevin 100 illik yubileyi və peşəkar idarəçilik yoluna həsr olunub.     Forumun məqsədi ən son inkişaf və yeniliklərə diqqət yetirmək, innovativ, işgüzar və səmərəli təcrübələri paylaşmaq, eləcə də peşəkar mühitdə ümumi mövzuları müzakirə etməkdir.   Forumda əvvəlcə Dövlət Himni səsləndirilib. Sonra ümummilli lider Heydər Əliyevin xatirəsi bir dəqiqəlik sükutla yad edilib və videoçarx nümayiş etdirilib.   AİİM-in təqdimatından sonra tədbirin açılış sessiyasında elm və təhsil naziri Emin Əmrullayev, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Dövlət İmtahan Mərkəzinin Direktorlar Şurasının sədri Məleykə Abbaszadə, həmçinin əmək və əhalinin sosial müdafiəsi nazirinin müavini Anar Əliyev çıxış ediblər.    Forumda elm və təhsil naziri Emin Əmrullayev Azərbaycanda istedadlar və onların müəyyən edilməsindən danışıb. Nazir bildirib ki, insanı dəyişdirən onun mühitidir. Dünyada bəlli bir sayda istedadlı insanlar doğulur, həmin şəxsləri tapmaq və vaxtında inkişafına nail olmaq lazımdır.    Uşaq üçün ən yaxşı inkişaf dövrünün 3 yaşına qədərki müddət olduğunu xatırladan nazir çıxışında qeyd edib: “Hər bir uşağın normal uşaqlığı təmin olunmalıdır. Ailə, ev, məktəb, ətraf bu işdə mühüm rol oynayır. Fundament çox vacibdir. Bu müddətdə bizim görmədiyimiz proses – ciddi beyin inkişafı gedir və bu, uşağın ətraf mühiti ilə bağlıdır. Həmin dövrdə olan uşağı inkişaf etdirmək üçün ciddi maliyyəyə ehtiyac yoxdur. Burada valideynlərin üzərinə böyük məsuliyyət düşür. Hər bir valideyn uşağı ilə oynasa, ona həftədə 5 saat kitab oxusa, bu, gələcəkdə on milyonlarla pul xərclənəcək layihələrdən daha effektiv olar. Bundan sonra isə təhsil və cəmiyyət-ailə-mühit bloku gəlir. Biri daha çox bacarıqlar, digəri isə dəyərlərlə bağlıdır”.    Forum digər çıxışlarla davam etdirilib.    Qeyd edək ki, forum çərçivəsində AİİM ilə “Pozitum” Konsultasiya, Təlim və Kouçinq Mərkəzi arasında birgə təlimlərin keçirilməsinə dair əməkdaşlıq memorandumu imzalanacaq.   Forumda 10 xarici və 6 yerli ekspertin iştirakı ilə panel müzakirələr təşkil olunacaq. Müzakirələrdə idarəetmənin ən son trendləri və müasir dövrün tələblərindən danışılacaq, innovativ yanaşma və qlobal səriştələrə çağırışlar ediləcək.    Ümumilikdə forumda 300-dən çox dövlət və özəl müəssisələrdə çalışan işgüzar şəxslər, insan resursları üzrə peşəkarlar, mütəxəssis və idarəçilərdən ibarət 500-ə yaxın şəxs iştirak edir.

03/06/2023 16:51

İyunun 3-də Lütfi Zadə adına məntiq olimpiadası və məktəblilərarası fənn müsabiqələrinin final mərhələsi keçirilib. Final mərhələsi Bakı, Gəncə, Şəki, Sumqayıt, Şirvan və Naxçıvan şəhərlərində, ümumilikdə 5 mərkəzdə təşkil edilib.    Şagirdlər iyunun 7-dən etibarən https://portal.edu.az/ üzərindən “Müsabiqə və olimpiadalar” bölməsindən nəticələrini əldə edə bilərlər.    Qeyd edək ki, Lütfi Zadə olimpiadasında ən yüksək nəticə göstərən 60, fənn müsabiqələrində isə 42 nəfər qalib hesab olunur.

03/06/2023 12:21

İyunun 1-dən Elm və Təhsil Nazirliyinin informasiya sistemlərinə giriş buludəsaslı yeni nəsil rəqəmsal imza – SİMA ilə həyata keçirilməyə başlanılıb.   Sözügedən imza ilə Təhsil Mərkəzləşdirilmiş İnformasiya Sisteminin “Ali və orta ixtisas təhsili” altsisteminə giriş prosesi sadələşdiriləcək. Belə ki, ölkəmizdə fəaliyyət göstərən ali, orta ixtisas təhsili müəssisələri, həmçinin tabeliyində ali və orta ixtisas təhsili müəssisəsi və elmi təşkilatlar olan qurumların məsul şəxsləri www.atis.edu.az portalına daxil olduqları zaman şəxsiyyətin eyniləşdirilməsi SİMA vasitəsilə mümkün olacaq. Bununla da biometrik həllərə əsaslanan yeni nəsil rəqəmsal imza ilə sistemə daha etibarlı giriş təmin ediləcək. 

02/06/2023 16:17

“Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı” çərçivəsində 2023-2024-cü tədris ili üzrə sənəd qəbulunun müddəti 14 iyul 2023-cü il tarixinədək uzadılıb.   Bununla da cari müraciətlər sırasında qəbul sənədi və digər məsələlər üzrə çatışmazlıqları olan namizədlərə sözügedən halları aradan qaldıraraq müraciətlərini tamamlamaları üçün imkan yaradılır.   Müvafiq elan mətni ilə keçiddən tanış ola bilərsiniz.   Qeyd edək ki, tədris ilinin başlamasına az vaxt qaldığı üçün müraciətlərin qısa müddətdə edilməsi tövsiyə olunur.

02/06/2023 14:27

İyunun 1-də Şuşada “Heydər Əliyev – türk dünyası birliyinin böyük carçısı” adlı beynəlxalq uşaq rəqs festivalı keçirilib. Türkdilli dövlətlərin uşaq rəqs qrupları arasında keçirilən festival Elm və Təhsil Nazirliyinin təşkilatçılığı ilə baş tutub.   Festivalda Azərbaycan Respublikası Prezidenti Administrasiyasının Humanitar siyasət, diaspora, multikulturalizm və dini məsələlər şöbəsinin müdiri Fərəh Əliyeva, Baş nazirin müavini Əli Əhmədov, elm və təhsil naziri Emin Əmrullayev, mədəniyyət naziri Adil Kərimli, Milli Məclisin Elm və təhsil komitəsinin sədri Bəxtiyar Əliyev, gənclər və idman nazirinin müavini İndira Hacıyeva, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova və digər qonaqlar iştirak ediblər.   Festivalda Türkiyə, Qazaxıstan, Qırğızıstan, Özbəkistan və Azərbaycandan olan 150-yə yaxın məktəblinin ifasında müxtəlif rəqs nömrələri nümayiş etdirilib.   Qeyd edək ki, beynəlxalq rəqs festivalının təşkilində məqsəd uşaq və gəncləri dünyaşöhrətli siyasətçi Heydər Əliyevin türk dünyası ilə bağlı gördüyü işlər haqqında məlumatlandırmaq, türkdilli dövlətlərin gənc nəslinə ölkəmizi tanıtmaq, uşaqları bir-birlərinin milli adət-ənənələri ilə tanış etmək, onlara öz ölkələrinin tarix və mədəniyyətini layiqincə təmsil etmək üçün şərait yaratmaq, eləcə də Şuşa şəhərinin füsunkar gözəlliyini iştirakçılara tanıtmaqdan ibarətdir.   Digər fotolar  

01/06/2023 14:15

İyunun 10-da Elm və Təhsil Nazirliyi tərəfindən ölkə üzrə bütün dövlət ümumi təhsil müəssisələrinin 4-cü siniflərində monitorinq təşkil olunacaq. Monitorinq tədris dili və riyaziyyat fənləri üzrə aparılacaq.     Şagird nailiyyətlərinin yaxşılaşdırılması, IV sinfin sonunda şagirdlərdə müvafiq standartlar üzrə bilik və bacarıqların hansı səviyyədə formalaşdığının müəyyən edilməsi və ibtidai təhsil səviyyəsində keyfiyyətin artırılması istiqamətində tədbirlərin görülməsi monitorinqin əsas məqsədlərindəndir.     Monitorinqdə şagirdlərə təqdim olunacaq tapşırıqlar tədris dili fənnindən oxu və dil qaydaları məzmun xətlərini, riyaziyyat fənnindən isə ədədlər və əməllər, cəbr və funksiyalar, həndəsə, ölçmə, statistika və ehtimal məzmun xətlərini əhatə edəcək. Təhsilalanlara tədris dili fənni üzrə 30 qapalı sual, riyaziyyat fənni üzrə isə 27 qapalı və 3 açıq sual təqdim olunacaq. Monitorinqin müddəti 120 dəqiqədir.     Qeyd edək ki, monitorinqin nəticəsi şagirdlərin summativ qiymətləndirmə ballarına, eləcə də onların sinifdən sinfə keçmələrinə təsir göstərmir.     Ümumi təhsil müəssisələrində IV siniflər üzrə bütün təhsilalanların monitorinqdə iştirakı icbaridir. Yalnız üzrlü səbəblər (xəstəlik (tibbi arayış təqdim edildikdə), fövqəladə hadisə) olduğu təqdirdə təhsilalanlar monitorinqdə iştirak etməyə bilərlər.    IV siniflərdə monitorinq keçirilməsi ilə bağlı suallar və onların cavabları   

01/06/2023 12:00

Müəllimlərin iş yerinin dəyişdirilməsi müsabiqəsinin vakansiya seçimi mərhələsində uğur qazanan iştirakçıların şəxsi kabinetinə sənədlərin yoxlanılacağı məkan, tarix və saat barədə məlumatlar göndərilib. Sənəd yoxlanışına gələrkən aşağıda qeyd olunan sənədləri təqdim etmək lazımdır:   şəxsiyyəti təsdiq edən sənədin əsli; ali və ya orta ixtisas təhsili haqqında sənəd və ona əlavənin əsli; əmək kitabçasının əsli. Qeyd edək ki, sənəd yoxlanışı 7-8-9 iyun tarixlərində İnsan Resursları Mərkəzində (Ünvan: Bakı şəhəri, Binəqədi rayonu, Mir Cəlal küçəsi 71) təşkil olunacaq.   Namizədlər şəxsi səhifəsində qeyd olunan tarixdə sənəd yoxlanışında iştirak etmədiyi halda bu, tutduğu vakant yerdən imtina kimi qeydə alınacaq.  

01/06/2023 10:02

Mayın 31-də Şuşada Elm və Təhsil Nazirliyinin və İctimai TV-nin birgə hazırladığı "Şuşa maarifi" adlı sənədli filmin təqdimatı keçirilib.    Təqdimat mərasimində Azərbaycan Respublikası Prezidenti Administrasiyasının Humanitar siyasət, diaspora, multikulturalizm və dini məsələlər şöbəsinin müdiri Fərəh Əliyeva, elm və təhsil nazirinin müavini Firudin Qurbanov, gənclər və idman nazirinin müavini İndira Hacıyeva,  Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova və digər qonaqlar iştirak ediblər.    Mərasimdə çıxış edən filmin ssenari müəlliflərindən biri, Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov Ali Baş Komandanın rəhbərliyi altında müzəffər ordumuzun 44 günlük Vətən müharibəsində qazandığı qələbə sayəsində bu gün məhz Şuşada film təqdimatının gerçəkləşməsindən məmnunluğunu ifadə edib. Filmin çəkiliş prosesi ilə bağlı təəssüratlarını bölüşən, Azərbaycanın dünyəvi təhsil tarixinin məhz Şuşadan başladığını bir daha vurğulayan Cəsarət Valehov Şuşanın yetişdirdiyi görkəmli şəxsləri təhsilimizin öndərləri olaraq qiymətləndirib.    Bildirilib ki, 49 dəqiqəlik film Şuşanın maarif tarixindən bəhs edir. Filmin ssenari müəlliflərindən digəri Ramil Ələkbərov, rejissoru isə Elçin Qasımovdur. Azərbaycanın ilk dünyəvi məktəbi – Şuşada açılan qəza məktəbindən başlanan tarixdən söz açılan filmdə bu qədim şəhərin xalqımız üçün tarixi və mədəni əhəmiyyəti, həmçinin maarifçilik sahəsində önəmli rolu xüsusilə qeyd olunur.   Filmdə Şuşanın Azərbaycanın təhsil və elm sahəsinə tanınmış alimlər, görkəmli ziyalılar bəxş etdiyi diqqətə çatdırılır, eləcə də maarif tarixini yaradan şəxsiyyətlər barədə danışılır.    Sonra isə film nümayiş etdirilib. “Şuşa maarifi” filmi izləyicilər tərəfindən maraqla qarşılanıb.    Qeyd edək ki, sözügedən film "Şuşa İli” çərçivəsində hazırlanıb.

31/05/2023 21:00