1 nömrəli Uşaq-Gənclər İnkişaf Mərkəzinin Təsviri Sənət Qalereyasında “Açıq qapı” günü keçirilib. “Açıq qapı” gününün keçirilməsində əsas məqsəd uşaq və gənclərin asudə vaxtlarının səmərəli təşkili, estetik zövqünün formalaşdırılması, onların istedadının aşkara çıxarılması, təsviri və tətbiqi imkanlarının daha da inkişaf etdirilməsindən ibarət olub. İştirakçılara 8 saat ərzində qalereyanın dərnək rəhbərləri tərəfindən 28 ustad dərs təqdim edilib. Dərslərdə 330 nəfərə yaxın 3-16 yaşlı uşaq və gənclər iştirak ediblər. Qalereyanın sərgi zallarında dərnək üzvlərinin “Novruz” və “Yaz” mövzularında 300-ə yaxın rəsm və əl işləri nümayiş olunub, həmin mövzuları əhatə edən dekorasiya hazırlanıb. Ustad dərslər arasında ebru, yun sap və plastilinlə iş, rəsm, rəngkarlıq, aplikasiya, konstruksiya, dekorativ fəaliyyət və digər məşğələ növləri təqdim edilib. Mərkəzin dərnək üzvləri rəhbərlik tərəfindən təşəkkürnamə ilə təltif edilib. 

29/03/2018 15:34

Respublikanın ümumi təhsil müəssisələrində müddətli əmək müqaviləsi əsasında işləyən müəllimlərlə müddətsiz əmək müqaviləsinin bağlanılması məqsədilə Təhsil İşçilərinin Peşəkar İnkişafı İnstitutunun nəzdində fəaliyyət göstərən İnsan Resursları Mərkəzi tərəfindən müsahibələrin keçirilməsi nəzərdə tutulur. Müsahibədə iştirak etmək istəyən namizədlər 29 mart - 4 aprel 2018-ci il  tarixlərində http://www.miq.edu.az/muqavile/ saytında qeydiyyatdan keçməlidirlər. Sözügedən müsahibələrdə 2016-2017-ci və 2017-2018-ci tədris illəri üçün  keçirilmiş müəllimlərin işə qəbulu müsabiqəsində iştirak edərək zəruri keçid balını toplayan,  tutulmayan və ya yeni yaranan vakant yerlərdə mövcud qaydalar çərçivəsində müddətli əmək müqaviləsi ilə işə qəbul edilmiş müəllimlər iştirak edə bilər. Qeyd edək ki, həvəsləndirmə tədbirləri tətbiq olunmayan müəssisələrə fizika, fiziki tərbiyə və təsviri incəsənət fənləri üzrə keçid balı 42, musiqi fənni üzrə 30, həvəsləndirmə tədbirləri tətbiq olunan müəssisələrə fizika, fiziki tərbiyə və təsviri incəsənət fənləri  üzrə keçid balı  36, musiqi fənni üzrə isə 24 bal müəyyənləşdirilib. Digər fənlər üzrə keçid balları müvafiq olaraq 48 və 36 bal müəyyən edilib. Müsahibələrin keçirilmə yeri və tarixi barədə məlumat elektron sənəd qəbulu başa çatdıqdan sonra hər bir namizədin şəxsi səhifəsinə göndəriləcək. Müsahibə proqramı və materialları barədə məlumatlar http://www.miq.edu.az/muqavile/ saytında yerləşdirilib.

29/03/2018 09:35

Təhsil Nazirliyi, Quba Rayon İcra Hakimiyyəti, Quba Rayon Təhsil Şöbəsinin dəstəyi və rayonun Uşaq-Gənclər İnkişaf Mərkəzinin birgə təşkilatçılığı ilə “Soyqırımı - 100” adlı tədbir keçirilib. Tədbirdə Bakı və Quba məktəbliləri ilə yanaşı “Türkdilli Dövlətlərin Əməkdaşlıq Şurasının orta məktəb şagirdlərinin ikinci mübadilə proqramı”na Türkiyə, Qazaxıstan və Qırğızıstandan qatılan əlli nəfər məktəbli də iştirak edib. Tədbir iştirakçıları soyqırımı qurbanlarının xatirəsinə ucaldılmış Quba Soyqırımı Memorial Kompleksini ziyarət edib, Quba rayon Gənclər Mərkəzində rayonun Uşaq-Gənclər İnkişaf Mərkəzinin dərnək üzvlərinin təşkil etdiyi əl işlərindən və rəsm əsərlərindən ibarət sərgi ilə tanış olublar. Tədbir rəsmi hissə ilə davam edib. Təhsil Nazirliyinin Məktəbdənkənar fəaliyyətin təşkili şöbəsinin sektor müdiri Ayla Həsənova çıxış edərək türk xalqlarının ortaq dəyərlərinin böyüyən nəslə çatdırılmasının, Azərbaycan xalqının sağalmaz yaralarından olan belə bir günün məktəblilər tərəfindən anılmasının, eyni zamanda qardaş türk xalqlarının ölkəmizdə səfərdə olan yeniyetmələrindən ibarət heyətin soyqırımı ilə bağlı həqiqətləri görməsinin əhəmiyyətini vurğulayıb. Sonra çıxış edənlər şagirdlərdə vətənpərvərlik ruhunun aşılanmasının və xalqımıza qarşı həyata keçirilən bu faciə barədə gələcək nəsillərdə milli yaddaş formalaşdırılmasının vacibliyini qeyd ediblər. Tədbir Quba rayon Uşaq-Gənclər İnkişaf Mərkəzinin dərnək üzvləri tərəfindən təşkil edilmiş çıxışlar və mart soyqırımına həsr olunmuş sənədli filmin nümayişi ilə yekunlaşıb.  

28/03/2018 15:45

Təhsil Nazirliyinin təşəbbüsü və Heydər Əliyev Fondunun dəstəyi ilə Azərbaycan Dövlət Neft və Sənaye Universitetinin (ADNSU) balansında olan ərazidə tələbələr üçün yataqxana kompleksinin tikintisi davam edir. Ən müasir standartlara uyğun inşa olunan yataqxanada yalnız ADNSU-nun tələbələri deyil, Bakıda yerləşən digər ali məktəblərdə təhsil alan və yataqxanaya ehtiyacı olan tələbələr müvafiq kvotaya əsasən yerləşmək imkanı qazanacaqlar. Yataqxana binası 800 nəfərə yaxın tələbə, həmçinin müəllim üçün nəzərdə tutulub.  0,8 hektar ərazini əhatə edən yataqxana binasının ümumi sahəsi 21 min kvadrat metrdən çoxdur. Binada kitabxana, oxu zalı, istirahət otaqları, camaşırxana, yeməkxana, fitnes zalı da fəaliyyət göstərəcək. Yataqxananın növbəti tədris ilində istifadəyə verilməsi nəzərdə tutulub.

28/03/2018 12:58

Təhsil Nazirliyi Respublika Uşaq-Gənclər İnkişaf Mərkəzinin təşəbbüsü ilə respublikada ilk dəfə olaraq “Qavaldaş” zərb çalğı alətlərinin müxtəlif növlərində ifa - uşaq və gənclərin Respublika festival-müsabiqəsi keçirilir. Festival-müsabiqənin keçirilməsində əsas məqsəd uşaq və gənclərin milli-mənəvi ruhda inkişafı, onların istedadlarının üzə çıxarılması, zərb çalğı alətlərinin müxtəlif növlərinin təbliği, Azərbaycanın milli ritm sənətinin layiqincə təmsili, xalqımızın musiqi alətlərinin və mədəni irsinin qorunması, musiqi mədəniyyətinin inkişafının təmin edilməsi və bu sahədə gənc nəslin bilik və bacarıqlarının genişləndirilməsi və artırılmasından ibarətdir. Festival-müsabiqənin iştirakçıları yarımfinal mərhələsində münsiflər heyətinin qiymətləndirilməsindən keçib, daha sonra İçərişəhərdə Qoşa Qala qapısı meydanında təşkil olunmuş “Bahar Qalası” şənliyində çıxış ediblər. Bu mərhələdə Quba, Qəbələ, İsmayıllı, Şəki, Salyan, Masallı rayonlarını və Bakı şəhərini təmsil edən nağaraçalanlar qrupları cıxış ediblər. Üç yaş qrupunda 100 nəfərədək uşaq və gənclər solo və  kollektiv ifaları ilə tamaşaçılara milli zərb alətlərinin əsrarəngiz ritmlərini ustalıqla nümayiş etdiriblər. Yarımfinal mərhələnin münsiflər heyətində tanınmış nağara müəllimləri - Azərbaycan Dövlət Mədəniyyət və İncəsənət Universitetindən Təhmasib Məmmədov,  Azərbaycan Dövlət Rəqs Ansamblından Ceyhun Babayev, Bakı Xoreoqrafiya Akademiyasından Azər Məlikov və Fikrət Əmirov adına 6 saylı İncəsənət məktəbindən Cəfər Həsənov təmsil olunub. “Qavaldaş” Respublika festival-müsabiqəsinin final mərhələsi iyunun 20-dən 25-dək  keçiriləcək.

28/03/2018 11:41

Martın 27-də Təhsil Nazirliyi yanında Peşə Təhsili üzrə Dövlət Agentliyində Azərbaycanda Peşə Təhsili və Təliminin İnkişafına Avropa İttifaqının (Aİ) dəstəyi layihəsi çərçivəsində hazırlanmış səriştə əsaslı kurikulumların təqdimatı keçirilib. Tədbirdə Təhsil Nazirliyi yanında Peşə Təhsili üzrə Dövlət Agentliyinin direktoru və əməkdaşları, həmçinin layihənin ekspertləri iştirak edib. Tədbirdə layihə çərçivəsində hazırlanmış təhsil proqramlarının (kurikulumların) strukturu iştirakçıların diqqətinə çatdırılıb, təhsilalanların qiymətləndirilməsi formaları müzakirə edilib, hazırlanmış kurikulumlara dair rəy və təkliflər dinlənilərək müvafiq düzəlişlər edilib. Peşə standartları əsasında tərtib edilmiş kurikulumlar sahə üzrə mütəxəssislər, beynəlxalq və yerli ekspertlər, peşə təhsili müəssisələrinin mühəndis-pedaqoji heyəti tərəfindən birgə hazırlanaraq işəgötürənlər tərəfindən təsdiq edilib. Növbəti mərhələdə kurikulum əsasında tədris materialları və kitabların hazırlanması nəzərdə tutulub. Bu kurikulumlardan növbəti tədris ilindən pilot olaraq istifadə edilməsi, eləcə də qeyd edilən kurikulum formatı əsasında digər təhsil proqramlarının hazırlanması və yenilənməsi planlaşdırılıb.

27/03/2018 17:41

Təhsil Nazirliyinin SABAH qrupları layihəsi çərçivəsində Azərbaycan Xalq Cümhuriyyətinin 100 illiyi münasibəti ilə riyaziyyat, müəllimlik və informasiya texnologiyaları üzrə bilik yarışının birinci mərhələsi keçirilib. 8 ali təhsil müəssisəsini əhatə edən bu yarışda ümumilikdə 500-dən çox SABAH tələbəsi iştirak edib. Yarışlar müvafiq olaraq Bakı Dövlət Universiteti, Azərbaycan Dövlət Pedaqoji Universiteti və Azərbaycan Texniki Universitetində keçirilib. Yarışmanın birinci mərhələsinin nəticələrinə əsasən, 100-dən artıq tələbə cari ilin aprel ayının sonunda keçiriləcək ikinci mərhələdə iştirak edəcək.

27/03/2018 12:09

Martın 23-də Azərbaycan Dövlət Pedaqoji Universitetində (ADPU) “Ailə insan mədəniyyətinin beşiyidir” mövzusunda Humanist Pedaqogika üzrə XVII Beynəlxalq Oxu öz işinə başlayıb. Humanist Pedaqogika üzrə XVII Beynəlxalq Oxu “Beynəlxalq Assosiasiya” İctimai Birliyinin Beynəlxalq Humanist Pedaqogika Mərkəzinin, ADPU-nun və Azərbaycan Respublikası Humanist Pedaqogika Mərkəzinin birgə təşkilatçılığı ilə keçirilir. Tədbirin yüksək səviyyədə keçirilməsi məqsədi ilə 22 nəfərdən ibarət Təşkilat Komitəsi yaradılıb. 3 gün davam edəcək oxuda respublikamızın və xarici ölkələrin humanist pedaqogika sahəsində çalışan tanınmış, nüfuzlu alim və mütəxəssisləri, gənc müəllimlər iştirak edir. Plenar iclaşın açılışında Azərbaycan Respublikasının Dövlət Himni səsləndirilib. ADPU-nun rektoru Cəfər Cəfərov tədbiri giriş sözü ilə açaraq bildirib ki, “Ailə insan mədəniyyətinin beşiyidir” mövzusunda keçirilən Humanist Pedaqogika üzrə XVII Beynəlxalq Oxuya müxtəlif xarici ölkələrdən 300 nəfərdən çox iştirakçı qatılıb. Belə bir tədbirin keçirilməsini universitetin həyatında əlamətdar hadisə adlandıran rektor beynəlxalq oxunun əhəmiyyətini vurğulayıb, verilən dəstəyə görə Beynəlxalq Humanist Pedaqogika Mərkəzinə və Təhsil Nazirliyinə təşəkkür edib. Plenar iclasda Beynəlxalq Humanist Pedaqogika Mərkəzinin fəxri prezidenti, Rusiya Təhsil Akademiyasının akademiki Şalva Amonaşvili “Ailə, uşaqlar, həyat” mövzusunda çıxış edib. Akademik Azərbaycanda belə bir beynəlxalq tədbirin keçirilməsindən məmnunluq duyduğunu bildirib, buna görə Təhsil Nazirliyinin və ADPU-nun rəhbərliyinə minnətdarlıq edib. Çıxışını ayrı-ayrı nümunələr əsasında quran akademik Şalva Amonaşvili bildirib ki, şagirdlərin tərbiyəsi pedaqoji ustalıq, həssaslıq, yüksək mədəni səviyyə tələb edir. Humanist pedaqogikaya görə, müəllim yalnız bilikləri öyrətməklə kifayətlənmir, o şagirdlərə ürəyinin işığını verir, onlar üçün fədakarlıqla çalışmağı özünün ali məqsədi, başlıca hədəfi bilir. Təhsil naziri vəzifələrini müvəqqəti icra edən, nazir müavini Ceyhun Bayramov çıxış edərək Beynəlxalq Humanist Pedaqogika Mərkəzinin Azərbaycanda müxtəlif elmi-praktik konfranslar, seminarlar, ustad dərsləri və digər tədbirlər keçirdiyini bildirib. Beynəlxalq oxunun təhsil sahəsi üçün vacib olduğunu qeyd edən Ceyhun Bayramov  həmçinin, ailənin müqəddəs, ailə tərbiyəsinin isə zəruri olduğunu vurğulayıb. Çıxışının sonunda beynəlxalq oxunun səmərəli keçəcəyinə əminliyini ifadə edən Ceyhun Bayramov iştirakçılara uğurlar arzulayıb. AMEA-nın vitse-prezidenti, akademik İsa Həbibbəyli, Tallin şəhərinin vitse-meri Vadim Belobrovçev, tarix elmləri doktoru, professor Fuad Məmmədov çıxış edərək beynəlxalq oxuların çox aktual mövzuya həsr edildiyini və bu mövzuya konseptual yanaşmanın vacib olduğunu bildirib. Qeyd edilib ki, ailə ümumi mənəvi birlik, qarşılıqlı hörmət və anlaşma əsasında formalaşmalıdır. Ailə dəyərləri müqəddəs tutulmalı, ailə institutu qorunub-saxlanılmalıdır. Daha sonra əməkdar elm xadimi, professor Rəfiqə Əzimova “Azərbaycan ailəsinin ənənələri”, kimya elmləri üzrə fəlsəfə doktoru Klara Mansurova “Xalqların bütövləşməsində ailənin rolu və əhəmiyyəti”, Humanist Pedaqogika Mərkəzinin rəhbəri Riza Xəlilov “Ailə kainatın kosmik simfoniyasında əsas həyati dəyərdir” mövzularında çıxış ediblər. Sonra beynəlxalq oxu öz işini ustad dərslərində və laborator məşqlərdə davam etdirib, ailənin genetik kodu, ailə institutunun cəmiyyətdəki rolu, ailənin uşağın tərbiyəsində və inkişafında əhəmiyyəti, uşaqlarda ailə dəyərlərinin tərbiyə edilməsi, müasir ailə və zamanın çağırışları, valideynliyin dərk edilməsi və digər vacib mövzularda təqdimatlar edilib, müzakirələr aparılıb. Tədbirin ilk günündə İmanuel Kant adına Baltik Federal Universitetinin tələbələrinin ifasında “Fənərçi”, E.İ.Mışkinin müəllifi və quruluşçu rejissoru olduğu “3-cü mərtəbə” tamaşaları nümayiş etdirilib. Beynəlxalq oxu martın 25-də yekunlaşacaq. Tədbirin sonunda mükafatlandırma mərasimi keçiriləcək, fəal iştirakçılara sertifikatlar təqdim ediləcək. Humanist Pedaqogika üzrə XVIII Beynəlxalq Oxunun mövzuları qəbul ediləcək, məkanı və vaxtı müəyyənləşdiriləcək. Tədbir çərçivəsində iştirakçılar Azərbaycanın tarixi və mədəni yerləri ilə tanış ediləcək.

24/03/2018 17:11

Təhsil Nazirliyi tərəfindən elan olunan təhsildə inkişaf və innovasiyalar üzrə ikinci qrant müsabiqəsinə layihə təkliflərinin qəbulu başa çatıb. Qeyd edək ki, fevralın 14-də dövlət ümumi təhsil müəssisələri və təşkilati-hüquqi formasından asılı olmayaraq bütün ümumi təhsil müəssisələrində çalışan pedaqoji işçilər üçün təhsildə inkişaf və innovasiyalar üzrə qrant müsabiqəsi elan edilib. Müsabiqə çərçivəsində ümumi təhsil müəssisələri kateqoriyası və fərdi kateqoriya üzrə ümumilikdə 900-ə yaxın layihə təklifi qəbul edilib. Layihə təklifləri ilkin olaraq texniki ekspertizadan keçiriləcək. Müsabiqə meyarlarına və kriteriyalarına uyğun gələn təkliflər Ekspert Qrupu tərəfindən qiymətləndiriləcək. Təşkilat Komitəsi Ekspert Qrupunun rəyi əsasında dəstəklənməsi məqsədəuyğun sayılan layihə rəhbərlərinin adlarını cari ilin aprel ayının sonunda Təhsil Nazirliyinin veb saytı vasitəsi ilə elan edəcək. Təhsildə inkişaf və innovasiyalar üzrə qrant müsabiqəsinin keçirilməsində başlıca məqsəd təhsil müəssisələrində və təhsilverənlərdə sağlam rəqabəti və innovativ fəaliyyəti stimullaşdırmaqdan ibarətdir. Müsabiqə müasir tələblər baxımından məktəbdaxili rəhbərlik və nəzarətin təkmilləşdirilməsi, pedaqoji işçilərin peşəkarlıq səviyyəsinin yüksəldilməsi, məktəb-icma (valideyn) münasibətlərinin təşəkkülü və inkişaf etdirilməsi, keyfiyyətin idarə olunmasında müasir qiymətləndirmə vasitələrinin tətbiq olunması, istedadlı uşaqlarla işin təşkili və ümumilikdə 9 mövzu üzrə keçirilib.

20/03/2018 21:38

Aprelin 7-də Respublika fənn olimpiadalarının respublika mərhələsinin yarımfinal turu keçiriləcək. Olimpiada Bakı şəhərində 4, Sumqayıt, Gəncə, Mingəçevir, Şirvan, Lənkəran şəhərləri, Şəki, İsmayıllı, Şəmkir, Ağdaş və Quba rayonlarının hər biri üzrə 1 mərkəzdə keçiriləcək. İnformatika fənni üzrə olimpiada isə Bakı Mühəndislik Universitetində təşkil olunacaq. Şagirdlər iştiraklarının təsdiqi üçün www.olimpiada.edu.az saytında qeydiyyatdan keçməli və buraxılış vərəqələrini əldə etməlidirlər. Qeydiyyat prosesi martın 29-dək davam edəcək. Qeydiyyatla bağlı hər hansı bir problem yaranarsa, yerli təhsili idarəetmə orqanlarına və ya info@olimpiada.edu.az elektron poçtuna müraciət edilməsi xahiş olunur.  Qeyd edək ki, fevralın 4-də ölkənin bütün şəhər və rayonlarında keçirilən Respublika fənn olimpiadalarının birinci–rayon (şəhər) mərhələsinin nəticələrinə əsasən, Azərbaycan dili və ədəbiyyat fənni üzrə 1419, coğrafiya fənni üzrə 1458, riyaziyyat fənni üzrə 1067, tarix fənni üzrə 617, fizika fənni üzrə 405, kimya fənni üzrə 377, biologiya fənni üzrə 430,  informatika fənni üzrə 121 şagird növbəti mərhələdə iştirak etmək hüququ qazanıb.  Respublika fənn olimpiadaları Azərbaycan dili və ədəbiyyat, riyaziyyat, fizika, kimya, biologiya, informatika, coğrafiya və  tarix olmaqla 8 fənn üzrə IX, X və XI sinif şagirdlərinin iştirakı ilə keçirilib. Bu mötəbər yarışda xüsusi istedadı və hazırlığı ilə seçilən 7-8-ci sinif şagirdləri IX sinif şagirdləri ilə bərabər öz bilik və bacarıqlarını nümayiş etdiriblər. Olimpiadaların təşkil edilməsində məqsəd istedadlı uşaqların aşkar edilməsi və  şagirdlərdə fənlərə marağın artırılmasından, onların  sağlam rəqabət mühitində öz bilik və bacarıqlarını nümayiş etdirmələrinə imkan yaradılmasından ibarətdir. Respublika fənn olimpiadaları Kapital Bankın baş sponsorluğu ilə həyata keçirilir.

19/03/2018 21:22