Mayın 11-də təhsil naziri Ceyhun Bayramov Kanadanın Azərbaycan Respublikasındakı fövqəladə və səlahiyyətli səfiri Kristofer Con Kuter ilə görüşüb. Görüşdə Azərbaycan və Kanada arasında təhsil sahəsində əlaqələrin cari vəziyyəti və inkişafı, o cümlədən Azərbaycan və Kanada ali təhsil müəssisələri arasında əməkdaşlıq perspektivləri müzakirə edilib.

11/05/2018 18:33

Silahlı Qüvvələrin Təlim və Tədris Mərkəzində respublika üzrə ümumtəhsil məktəblərinin VIII-X sinif şagirdləri arasında təşkil olunmuş “Şahin” hərbi-idman oyunlarının final yarışı keçirilib. Tədbir ümummilli lider Heydər Əliyevin əziz xatirəsinin bir dəqiqəlik sükutla yad edilməsi və Dövlət himninin səsləndirilməsi ilə başlayıb. Sonra ulu öndərin  ordu quruculuğu sahəsində fəaliyyətini əks etdirən film nümayiş etdirilib. Tədbirdə çıxış edən təhsil nazirinin müavini Firudin Qurbanov “Şahin” hərbi-idman oyunlarının yeniyetmə və gənclərin hərbi vətənpərvərlik tərbiyəsi işinin gücləndirilməsində və   məktəblilərin hərbi xidmətə hazırlıq səviyyəsinin yüksəldilməsində  əhəmiyyətini vurğulayıb. Sonra çıxış edən gənclər və idman nazirinin müavini İntiqam Babayev və digər rəsmilər “Şahin” hərbi-idman oyununun şagirdlərin hərbi xidmətə hazırlanmasında rolunu qeyd ediblər. Yarışlara “Sıra hazırlığı” mərhələsi ilə start verilib. Oyunun əsasnaməsinə uyğun olaraq yarış 8 mərhələ üzrə keçirilib və Cəmşid Naxçıvanski adına Hərbi Liseyin zabitlərindən ibarət yaradılmış Hakimlər Heyəti tərəfindən komandaların nəticələri qiymətləndirilib. Maraqlı mübarizə şəraitində keçən final yarışında Sumqayıt şəhər komandası I yerə, Yasamal rayon komandası II yerə, Quba rayon komandası isə III yerə layiq görülüb. Yarışda ayrı-ayrı mərhələlər üzrə fərqlənən komandalar və komanda üzvləri Fəxri fərman və qiymətli hədiyyələrlə mükafatlandırılıb.  Yarışlar  Təhsil Nazirliyi, Gənclər və İdman Nazirliyi, Müdafiə Nazirliyi, Fövqəladə Hallar Nazirliyi,  Mədəniyyət Nazirliyi,  Səfərbərlik və Hərbi Xidmətə Çağırış üzrə Dövlət Xidməti və Veteranlar Şurasının birgə qərarı ilə təşkil edilib.

11/05/2018 18:29

Təhsil Nazirliyinin SABAH qrupları 2018-2019-cu tədris ili üçün ümumilikdə 30 ixtisas üzrə tələbə seçimi müsabiqəsini açıq elan edir. Müsabiqədə Təhsil Nazirliyinin tabeliyində olan ali təhsil müəssisələrindən müəyyən edilmiş ixtisaslar üzrə I kursda əyani formada təhsil alan,  I tədris ilinin I semestrinin nəticələrinə görə akademik borcu olmayan və orta müvəffəqiyyət göstəricisi (ÜOMG) 61-dən aşağı olmayan Azərbaycan Respublikası vətəndaşları iştirak edə bilərlər. 2017-2018-ci tədris ilindən etibarən SABAH qruplarına tələbələrin seçimi www.student.sabah.edu.az portalı vasitəsilə tam elektron qaydada aparılır. Portal namizədlərin elektron ərizələrinin yoxlanması və nəticəsi haqqında bildiriş göndərilməsi, müsabiqənin bütün mərhələləri üzrə nəticələrin emal olunması və yekun qeydiyyatın onlayn aparılmasını təmin edir. Müsabiqənin 1-ci mərhələsində iştirak etmək üçün namizədlər 23 may 2018-ci il tarixinədək www.sabah.edu.az saytına daxil olmaqla elektron ərizəni doldurmalıdırlar. Elektron ərizələrin qəbulu başa çatdıqdan sonra ərizəsi təsdiqlənmiş namizədlər müsabiqənin II mərhələsinə - test imtahanına dəvət olunacaqlar. Qeyd edək ki, 2014-2015-ci tədris ilindən etibarən fəaliyyət göstərən SABAH qrupları ali təhsildə tədrisin keyfiyyətinin yüksəldilməsi, yeni və fərqli mühitin yaradılması, savadlı, bacarıqlı və hazırlıqlı tələbələrin yetişdirilməsi, əmək bazarının artan tələblərinə müvafiq olaraq kadr hazırlığının təmin edilməsi məqsədi ilə yaradılıb. SABAH qrupları tələbələrə əlavə təqaüd, bölgələrdə qeydiyyatda olan tələbələr üçün ödənişsiz yataqxana xidməti, xarici mübadilə proqramları, müasir təşkilat və müəssisələrdə tədris və istehsalat təcrübələri, əmək bazarında daha uğurlu namizədlərə çevrilmə kimi üstün imkanlar təklif edir. Hazırda SABAH qrupları 12 ali təhsil müəssisəsində fəaliyyət göstərməklə 45 ixtisas üzrə 2300-dən çox tələbəni,  650-dən  çox müəllim-professor heyətini əhatə edir. 2016-2017-ci tədris ili üzrə SABAH qruplarının ilk məzunlarının sayı 722 nəfərdir.

11/05/2018 16:20

Respublika fənn olimpiadalarının final mərhələsinin nəticələri bəlli olub. Olimpiadanın ümumi nəticələri barədə məlumatı www.olimpiada.edu.az saytından əldə etmək mümkündür. Olimpiadada 45 nəfər qızıl, 89 nəfər gümüş, 142 nəfər bürünc olmaqla ümumilikdə  276 nəfər qalib elan olunub. Olimpiada qaliblərinin mükafatlandırılma mərasimi mayın 15-də keçiriləcək. Qeyd edək ki, fevralın 4-də ölkənin bütün şəhər və rayonlarında Respublika fənn olimpiadalarının birinci–rayon (şəhər) mərhələsi keçirilib. Bilik yarışında 33 mindən çox şagird iştirak edib. Respublika fənn olimpiadaları Azərbaycan dili və ədəbiyyatı, riyaziyyat, fizika, kimya, biologiya, informatika, coğrafiya və  tarix olmaqla 8 fənn üzrə IX, X və XI sinif şagirdlərin iştirakı ilə keçirilib. Bu mötəbər yarışda xüsusi istedadı və hazırlığı ilə seçilən 7-8-ci sinif şagirdlərindən də IX siniflərlə bərabər öz bilik və bacarığını nümayiş etdirən şagirdlər olub Olimpiadaların təşkil edilməsində məqsəd istedadlı uşaqların aşkar edilməsi,  şagirdlərdə fənlərə olan marağın artırılması, onların  sağlam rəqabət mühitində öz bilik və bacarıqlarını nümayiş etdirmələrinə imkan yaradılmasından ibarətdir. Respublika fənn olimpiadası Kapital Bankın baş sponsorluğu ilə həyata keçirilir.   Respublika fənn olimpiadalarının final mərhələsinin nəticələri

11/05/2018 15:36

Mayın 11-də saat 14:00-da “Təhsil” televiziyasının “Həftənin sualı” verilişi Təhsil Nazirliyinin “Youtube” kanalı və “Facebook” sosial şəbəkəsindəki səhifəsi üzərindən canlı olaraq yayımlanacaq. Verilişin qonağı Təhsil İşçilərinin Peşəkar İnkişafı İnstitutunun nəzdində İnsan Resursları Mərkəzinin müdir əvəzi Murad Camalzadə olacaq. Verilişdə may ayında keçiriləcək diaqnostik qiymətləndirmə, müəllimlərin işə qəbulu və yerdəyişməsi üzrə yeniliklər və digər bu kimi suallara aydınlıq gətiriləcək. Göstərilən məsələlərlə əlaqədar sizi maraqlandıran sualları hefteninsuali@edu.gov.az elektron poçt ünvanına göndərə bilərsiniz. Mövzuya uyğun sualları canlı yayım zamanı şərhlər bölməsinə də yazmaq mümkündür.

11/05/2018 10:46

Təhsil Nazirliyinin Akkreditasiya və Nostrifikasiya İdarəsinin əməkdaşları Tallində səfərdə olublar. Səfər Avropa İttifaqının Şərq Tərəfdaşlığı Proqramının TAIEX aləti çərçivəsində Estoniyanın Ali və Peşə Təhsili üzrə Keyfiyyət Agentliyində (EKKA) peşə təhsilinin akkreditasiyası üzrə təcrübə mübadiləsi üçün təşkil edilib. Səfər zamanı Estoniyada peşə təhsilinin akkreditasiya standartları, qaydaları, təcrübəsi, akkreditasiya komissiyasının yaradılması və işinin təşkili barədə ətraflı məlumat əldə edilib. Akkreditasiya və Nostrifikasiya İdarəsinin əməkdaşları Estoniya Dənizçilik Məktəbinin pilot akkreditasiyasında da iştirak edib, habelə Estoniya İnşaat Məktəbində və İşəgötürənlər Konfederasiyasında görüşlər keçiriblər. Bu qurumlarda peşə məktəblərinin inkişaf strategiyası, tədrisdə istifadə olunan təlim metodları, tələbələrə praktiki bacarıqların öyrədilməsi, əmək bazarının nümayəndələri ilə əlaqələrin qurulması və strateji qərarların qəbuluna əmək bazarı nümayəndələrinin cəlb edilməsi məsələləri ilə bağlı müzakirələr aparılıb. Səfər müddətində peşə məktəblərinin tədris laboratoriyalarına da birgə baxış keçirilib, məktəb rəhbərlikləri və müəllimlər tərəfindən tələbələrə praktiki bacarıqların öyrədilməsi prosesinin maraqlı və məhsuldar təşkili üçün istifadə olunan stimullaşdırma metodları, habelə müxtəlif həvəsləndirici praktiki yarışların təşkili haqqında məlumat verilib. Səfər çərçivəsində EKKA mütəxəssisləri ilə birgə Azərbaycanda peşə məktəblərinin keyfiyyət təminatına dair yol xəritəsi müzakirə edilib.

11/05/2018 09:52

Özbəkistanın paytaxtı Daşkənd şəhərində “İstedad” adlı beynəlxalq müsabiqə keçirilib. Müsabiqəyə 14 ölkədən 543 ifaçı qatılıb. Azərbaycan Milli Konservatoriyasının tərkibində İncəsənət Gimnaziyasının X sinif şagirdi, qanun ifaçısı Sevda Cəbrayılova müsabiqədə uğurla çıxış edərək I yerə layiq görülüb. Sevda Cəbrayılova müsabiqədə H.Xanməmmədovun “Konsert”, A.Əlizadənin “Cəngi”, N.Əliverdibəyovin “Elegiya”, S.Ələsgərovun “Şoloxo” əsərlərini, “Bayatı-Şiraz” muğamını ifa edib.  Müsabiqədə gimnaziyanın xanəndə ixtisası üzrə təhsil alan VI sinif şagirdi Əli Xuduzadə də uğurla çıxış edib. Belə ki, Əli Xuduzadə  III yerə layiq görülərək laureat adını qazanıb.

10/05/2018 18:03

Mayın 10-da Təhsil Nazirliyində Yeni Azərbaycan Partiyası Nərimanov Rayon Təşkilatının Təhsil Nazirliyi ərazi üzrə ilk partiya təşkilatı və nazirliyin Həmkarlar İttifaqı Komitəsi tərəfindən ümummilli lider Heydər Əliyevin anadan olmasının 95-ci ildönümü münasibəti ilə tədbir keçirilib. Tədbir Heydər Əliyevin həyat və fəaliyyətinə həsr olunan sənədli filmin nümayiş etdirilməsi ilə başlayıb. Ulu öndərin xatirəsinin hər il böyük ehtiramla anıldığını diqqətə çatdıran təhsil nazirinin müavini Firudin Qurbanov ümummilli lider Heydər Əliyevin Azərbaycanda dövlət quruculuğu, müstəqilliyimizin bərpası və ölkəmizin dünya miqyasında tanınması baxımından misilsiz xidmətlərindən danışıb. Firudin Qurbanov ulu öndərin müəyyən etdiyi inkişaf strategiyasının, təhsil sahəsinə göstərdiyi yüksək diqqətin bu gün ölkə Prezidenti cənab İlham Əliyev tərəfindən uğurla davam etdirildiyini vurğulayıb. Tədbirdə daha sonra çıxış edən Yeni Azərbaycan  Partiyası Nərimanov Rayon Təşkilatının Təhsil Nazirliyi ərazi üzrə ilk partiya təşkilatının sədri Rauf Orucov, nazirliyin Həmkarlar İttifaqı Komitəsinin sədri Əsgər Quliyev ümummilli liderin Azərbaycan xalqı qarşısındakı xidmətlərindən, təhsil sahəsində islahatların həyata keçirilməsi ilə bağlı imzaladığı mühüm fərman və sərəncamlardan, habelə müəllimlərə və gənclərin təhsilinə  hər zaman diqqətlə yanaşdığından söz açıblar. Sonra Təhsil Nazirliyinin YAP-a yeni üzv qəbul edilmiş əməkdaşlarına partiya biletləri təqdim olunub, partiya sıralarına üzv qəbul olunmaq istəyən digər əməkdaşların müraciəti isə müsbət cavablandırılıb.

10/05/2018 17:11

Ümummilli lider Heydər Əliyevin anadan olmasının 95-ci ildönümünə həsr olunmuş “Şahmat” fənni tədris olunan pilot ümumtəhsil müəssisələrinin şagirdləri arasında şahmat festivalının final yarışlarına yekun vurulub. Bakı şəhəri 12 nömrəli tam orta məktəbdə keçirilən yarışlara 400-ə yaxın şagird qatılıb. Şəxsi xarakter daşıyan yarış İsveçrə sistemi üzrə keçirilib, komandaların tərkibi 7-10 yaşlı 3 oğlan və 3 qız olmaqla 6 nəfərdən ibarət olub. 2, 3 və 4-cü siniflər üzrə şəxsi yarışlarda 1-ci, 2-ci və 3-cü yerləri tutan məktəblilər diplom, medal və qiymətli hədiyyələrlə, fərqlənən şahmatçılar isə diplomla təltif olunub. Qeyd edək ki, festivalın I mərhələsi respublika üzrə “Şahmat” fənni tədris olunan beş yüzə yaxın pilot məktəbdən üç min nəfərdən çox şagirdin iştirakı ilə keçirilib, rayon (şəhər) üzrə qalib komandalar finalda iştirak etmək hüququ qazanıb.

10/05/2018 14:13

Təhsil Nazirliyi yanında Peşə Təhsili üzrə Dövlət Agentliyində Təhsil İnstitutunun və Koreya İnsan Resursları İnkişafı Xidmətinin nümayəndələri ilə növbəti görüş keçirilib. Görüşün əsas məqsədi Azərbaycan və Koreya hökumətləri arasındakı razılaşmaya uyğun olaraq, Sənaye və İnnovasiyalar üzrə Bakı Dövlət Peşə Təhsil Mərkəzinin bazasında Koreya təhsil standartları əsasında yaradılacaq Peşə Təhsil Mərkəzi layihəsi çərçivəsində tədris olunması nəzərdə tutulan 8 ixtisas (elektronika, elektrik, avtomatlaşdırma, avtomobil, tikinti, sənaye və quraşdırma, İKT, mexanika) üzrə hazırlanmış təhsil proqramlarının (kurikulumların) və tədris vəsaitlərinin təqdimatı və müzakirələrin aparılması olub. Koreyalı ekspertlər təhsil proqramları (kurikulumlar) və tədris vəsaitləri barədə geniş məlumat verərək, səriştə əsaslı kurikulumların 80 faiz təcrübəyə əsaslanmaqla tərtib edildiyini bildiriblər. Görüşdə, həmçinin layihə çərçivəsində təhsil proqramlarından istifadə edəcək ixtisaslı kadrların cəlb edilməsi, təlimləndirilməsi və hazırlığı məsələlərinə dair fikir mübadiləsi aparılıb. Təqdim olunan kurikulumlar və tədris modulları Peşə Təhsili Dövlət Agentliyinin nümayəndələri tərəfindən müsbət dəyərləndirilib, onların tətbiqinin peşə təhsilinin, eləcə də təhsilalanların bilik və bacarıqların inkişaf etdirilməsi istiqamətində xüsusi önəm kəsb edəcəyi vurğulanıb.

10/05/2018 13:51