Aprelin 9-da Təhsil Nazirliyi ilə Azərbaycan Milli Antidopinq Agentliyinin təşkilatçılığı ilə Təhsil Nazirliyi sistemində fəaliyyət göstərən idman məktəblərinin rəhbərləri, məşqçi-müəllimləri, həkimləri və idmançıları üçün seminar keçirilib.   Seminarda iştirak edən təhsil nazirinin müavini Firudin Qurbanov bildirib ki, hazırda  Təhsil Nazirliyi sistemində 76 idman məktəbi fəaliyyət göstərir ki, həmin məktəblərdən 3-ü Uşaq-Gənclər İdman Məktəbi, 13-ü İxtisaslaşdırılmış Olimpiya Ehtiyatları Uşaq-Gənclər İdman Məktəbi və 60-ı isə Uşaq-Gənclər İdman-Şahmat Məktəbidir. Bu məktəblər üzrə  29 idman növü inkişaf etdirilir. İdman məktəblərinin idmançıları ölkə və beynəlxalq miqyaslı yarışlarda 2014-cü ildə 1994, 2017-ci ildə isə 2346 medal qazanıb. Nazir müavini Təhsil Nazirliyi sistemində fəaliyyət göstərən həmin məktəblərin məşqçi-müəllimlər, həkimlər və idmançılar tərəfindən idmanda dopinq vasitələrindən və üsullarından istifadəyə qarşı mübarizə aparılmasında, eləcə də qadağa qoyulmuş yeni dərman, preparatlar və digər qaydalar haqqında məlumatlandırılmasında seminarın əhəmiyyətini xüsusi vurğulayıb. Azərbaycan Milli Antidopinq Agentliyinin direktoru Şəfəq Hüseynli agentlik haqqında məlumat verib, idmanda dopinq vasitələrindən və üsullarında istifadəyə qarşı mübarizədə aidiyyəti təşkilatlarla əməkdaşlıq əlaqələrindən bəhs edib. Sonra Azərbaycan Milli Antidopinq Agentliyinin əməkdaşları tərəfindən mövzu ilə bağlı təqdimatlar edilib, suallar cavablandırılıb.

09/04/2018 16:32

Almaniya Beynəlxalq Əməkdaşlıq Cəmiyyətinin (GİZ) təşkilatçılığı ilə “Cənubi Qafqazda Özəl Sektorun İnkişafı və Peşə Təhsili və Təlimi Proqramı” çərçivəsində “Məşğulluq mərkəzlərinin və ilk peşə-ixtisas təhsili müəssisələrinin mütəxəssisləri üçün peşəyönümü işinin aparılması üzrə bacarıqların təkmilləşdirilməsi” mövzusunda keçirilən təlimlər başa çatıb. Tədbirdə Təhsil Nazirliyi yanında Peşə Təhsili üzrə Dövlət Agentliyinin əməkdaşları, ilk peşə-ixtisas təhsili müəssisələrinin mühəndis-pedaqoji heyəti, həmçinin Əmək və Əhalinin Sosial Müdafiə Nazirliyinin yanında Dövlət Məşğulluq Xidmətinin nümayəndələri iştirak ediblər. Beynəlxalq ekspertlər tərəfindən keçirilən təlimin məqsədi məşğulluq mərkəzləri və ilk peşə-ixtisas təhsili müəssisələrinin nümayəndələri üçün peşəyönümü işinin aparılması üzrə bacarıqların təkmilləşdirilməsi, beynəlxalq təcrübənin öyrənilməsi və bu sahədə fəaliyyət göstərən yerli strukturların nümayəndələri arasında əməkdaşlığın gücləndirilməsi olub. Tədbirin sonunda təlimdə fərqlənən iştirakçılara sertifikatlar təqdim olunub.

09/04/2018 15:04

Aprelin 7-də Respublika fənn olimpiadalarının yarımfinal turu keçirilib. Olimpiada Bakı şəhərində 4, Sumqayıt, Gəncə, Mingəçevir, Şirvan, Lənkəran, Şəki şəhərləri, İsmayıllı, Şəmkir, Ağdaş və Quba rayonlarının hər biri üzrə 1 mərkəzdə keçirilib. Olimpiadaların Respublika mərhələsinin yarımfinal turunda IX, X və XI sinif şagirdləri Azərbaycan dili və ədəbiyyat, riyaziyyat, fizika, kimya, biologiya, tarix və coğrafiya fənləri üzrə biliklərini sınayıblar. İnformatika fənni üzrə olimpiada isə aprelin 8-də Bakı Mühəndislik Universitetində təşkil olunacaq. Bundan əlavə, bilik yarışında xüsusi istedadı və yüksək hazırlığı ilə seçilən VII, VIII sinif şagirdləri də IX siniflərlə bərabər öz bilik və bacarığını nümayiş etdirib. Fənn olimpiadalarının yarımfinal turunda yuxarı nəticə göstərən şagirdlər final mərhələsində iştirak etmək hüququ əldə edəcəklər. Fevralın 4-də ölkənin bütün şəhər və rayonlarında keçirilən Respublika fənn olimpiadalarının birinci–rayon (şəhər) mərhələsinin nəticələrinə əsasən, Azərbaycan dili və ədəbiyyat fənni üzrə 1419, coğrafiya fənni üzrə 1458, riyaziyyat fənni üzrə 1067, tarix fənni üzrə 617, fizika fənni üzrə 405, kimya fənni üzrə 377, biologiya fənni üzrə 430,  informatika fənni üzrə 121 şagird növbəti mərhələdə iştirak etmək hüququ qazanıb.  Olimpiadaların təşkil edilməsində məqsəd istedadlı uşaqların aşkar edilməsi,  şagirdlərdə fənlərə olan marağın artırılması, onların  sağlam rəqabət mühitində öz bilik və bacarıqlarını nümayiş etdirmələrinə imkan yaradılmasından ibarətdir. Qeyd edək ki, Respublika fənn olimpiadaları Kapital Bankın baş sponsorluğu ilə keçirilir.

07/04/2018 13:28

Tədris ilinin sonunda dövlət ümumi təhsil müəssisələrində çalışan müəllimlərin diaqnostik qiymətləndirməsinin keçirilməsi nəzərdə tutulub. Əvvəlki illərdə müxtəlif səbəblərdən qiymətləndirmədə iştirak edə bilməyən müəllimlərlə yanaşı, nəticələrini yüksəltmək niyyətində olan müəllimlər də diaqnostik qiymətləndirmədə iştirak edə biləcəklər. Qeyd edək ki, 2014-cü ildən etibarən ölkə üzrə ümumilikdə 140 000-dək müəllim diaqnostik qiymətləndirmədən keçib. Azərbaycan Respublikası Prezidentinin müvafiq sərəncamlarına əsasən,  diaqnostik qiymətləndirmədən keçən bütün müəllimlərin əməkhaqları artırılıb.

06/04/2018 17:57

Martın 12-dən start verilən  2018-2019-cu tədris ili üçün elektron sistem vasitəsilə Sumqayıt və Gəncə şəhərləri, Abşeron rayonunun ümumi təhsil müəssisələrinin I sinfinə şagird  qəbulu davam edir. Aprelin 6-na olan məlumata əsasən, elektron sistem (mektebeqebul.edu.az) vasitəsilə bu bölgələr üzrə I sinfə qəbul üçün 13 504 sorğu yerləşdirilib. Belə ki, Abşeron rayonu üzrə 5048, Gəncə şəhəri üzrə 3568, Sumqayıt şəhəri üzrə isə 4888 nəfərin sorğusu qeydə alınıb. Bu bölgələr üzrə I sinfə gedəcək şagirdlərin sayı 17 873 nəfər olacağı proqnozlaşdırılır. I sinfə şagird qəbulu valideynin (qanuni nümayəndənin) elektron ərizəsinin www.mektebeqebul.edu.az saytında qeydiyyatı yolu ilə həyata keçirilir. Məktəbəhazırlıq qrupunda təhsil alan uşaqlar üçün sistem tərəfindən təhsil aldığı məktəb və müəllim avtomatik seçilib. Belə ki, məktəbəhazırlıq qruplarındakı 8000-dən çox uşaq avtomatik I sinfə qəbul üzrə qeydə alınıb. Bu da həmin şəhər və rayonlar üzrə I sinfə gedəcək şagirdlərin 60 faizi deməkdir.  Sumqayıt və Gəncə şəhərləri, Abşeron rayonu üzrə ərizələrin onlayn qeydiyyatı 15 sentyabr 2018-ci il tarixinədək davam edəcək. Hər hansı səbəbdən özü elektron qeydiyyatdan keçə bilməyən şəxslər Gəncə şəhəri üzrə 5, Sumqayıt şəhəri üzrə 4, Abşeron rayonu üzrə 6 məktəbdə yaradılmış Alternativ Qeydiyyat Mərkəzlərinə müraciət edə bilərlər. Eyni zamanda Gəncə şəhəri üzrə 1, Sumqayıt şəhəri üzrə 1 və Abşeron rayonu üzrə 1 ümumi təhsil müəssisəsində Apelyasiya Komissiyaları təşkil olunacaq. Qeyd edək ki, fevralın 22-dən Təhsil Nazirliyinin birbaşa tabeliyindəki lisey və gimnaziyaların, eləcə də Bakı şəhərindəki dövlət ümumi təhsil müəssisələrinin I sinfinə şagird qəbuluna start verilib. 2018-2019-cu tədris ilində elektron sistem vasitəsilə uşaqların I sinfə qəbulu barədə ətraflı məlumatı videotəlimatdan almaq mümkündür (https://www.youtube.com/watch?v=KRMGV9hTHq8). I sinfə elektron sistem vasitəsilə şagird qəbulu haqqında məlumatlar: http://edu.gov.az/az/page/522  

06/04/2018 17:01

“Azərbaycanda Peşə Təhsili və Təliminin İnkişafına Avropa İttifaqının (Aİ) dəstəyi layihəsi çərçivəsində monitorinq və qiymətləndirmə mövzusu üzrə təlim keçirilib. Tədbirdə Təhsil Nazirliyi yanında Peşə Təhsili üzrə Dövlət Agentliyinin əməkdaşları, ilk peşə-ixtisas təhsili müəssisələrinin nümayəndələri, həmçinin layihənin ekspertləri iştirak edib. Təlimin məqsədi Azərbaycan Respublikası Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında peşə təhsili və təliminin inkişafına dair Strateji Yol Xəritəsi"nin Tədbirlər Planına uyğun olaraq ixtisaslaşma sahələri nəzərə alınmaqla hazırlanmış əsas fəaliyyət göstəricilərinin müəyyən edilməsi metodikası barədə birgə müzakirələrin aparılması və bununla bağlı peşə təhsili müəssisələrinin məlumatlandırılması olub. Təlimdə beynəlxalq ekspert Valid Madhun tərəfindən peşə təhsili və təlimi müəssisələrinin fəaliyyətinin keyfiyyətinə və təkmilləşdirilməsinə nəzarətin həyata keçirilməsi sahəsində monitorinq və qiymətləndirmənin əhəmiyyəti məsələlərindən söz açıb. Həmçinin monitorinq və qiymətləndirmənin formaları və ölçülməsi üsulları, nəticəyə əsaslanan fəaliyyətin qiymətləndirilməsi, əsas fəaliyyət göstəriciləri, onların müəyyən edilməsi metodikası,  planlaşdırma  barədə təlim iştirakçılarına məlumat verilib. Tədbirdə iştirakçıları maraqlandıran suallar cavablandırılıb.

06/04/2018 16:52

Təhsil Nazirliyinin tabeliyində olan 2 nömrəli Uşaq-Gənclər İnkişaf Mərkəzinin dərnək üzvləri Gürcüstan Respublikasının paytaxtı Tbilisi şəhərində keçirilən tanınmış rəqqas və baletmeyster Vaxtanq Çabukiani adına V beynəlxalq xoreoqrafiya festivalında iştirak edib. 10 ölkənin iştirak etdiyi festivala 7-11, 12-16 və 17-20  yaş qrupları üzrə rəqqaslar qatılıb. Festival iştirakçılarının çıxışlarının qiymətləndirməsi beynəlxalq səviyyəli münsiflər heyəti tərəfindən aparılıb. 2 nömrəli Uşaq-Gənclər İnkişaf Mərkəzi festivalda “Təbəssüm” və “Xarı bülbül” rəqs qrupları ilə təmsil olunub. Dərnək üzvləri “Folklor” nominasiyası üzrə “Şənlik” və “Bayram” rəqsləri ilə çıxış edərək “Qızıl kubok” qazanıb və festivalın laureatı adına layiq görülüblər. Festival çərçivəsində Gürcüstanın Xoreoqrafiya Assosiasiyasının vitse-prezidenti, Gürcüstan Dövlət İncəsənət Universitetinin kafedra müdiri, məşhur xoreoqraf Natalya Diqmelaşvili uşaqlara ustad dərsləri keçərək gürcü rəqsləri haqqında məlumat verib.

06/04/2018 14:17

Əməkhaqlarının artırılması ilə əlaqədar qanunvericilikdə edilən dəyişikliklərə əsasən, dövlət ümumi təhsil müəssisələrində çalışan müəllimlərin əməkhaqlarının hesablanması üçün onlayn kalkulyator xidmətində müvafiq düzəlişlər edilib. Müəllimlər Təhsil Nazirliyinin internet saytının “Aktual keçidlər” bölməsindən “Onlayn kalkulyator” http://edu.gov.az/az/calc keçidini seçməklə artımdan sonra əməkhaqlarını hesablama imkanı əldə edə bilərlər. Bunun üçün “Onlayn kalkulyator” keçidinə daxil olaraq müvafiq məlumatlar qeyd edilməli və “hesabla” düyməsi seçilməlidirlər. Bu zaman hesablanmış əməkhaqqı ekranda əks olunacaq. Müəllimlər ödənilən əlavələr, əməkhaqqından tutulmalar barədə məlumatları “Hesablama” düyməsindən aşağıda yerləşən cədvəl vasitəsi ilə əldə edə biləcəklər. Onlayn kalkulyator xidmətinin yenilənməsinin məqsədi müraciət və şikayətlərin sayının azaldılması, şəffaflığın artırılması və xidmət məmnunluğunun yüksəldilməsidir. Qeyd edək ki, bu xidmət 2016-cı ilin dekabr ayından müəllimlərin istifadəsinə verilib.

05/04/2018 17:52

Təhsil Nazirliyinin tabeliyində olan 3 nömrəli Uşaq-Gənclər İnkişaf Mərkəzinin bədii kollektivi Rusiya Federasiyasının Moskva şəhərində keçirilən “Açıq Avropa-Açıq Planet” (“Открытая Европа – Открытая Планета”) adlı 15-ci beynəlxalq uşaq və gənclərin yaradıcılıq festival-müsabiqəsində iştirak edib.   14 ölkədən 1500 iştirakçının qatıldığı müsabiqədə ölkəmizi təmsil edən “Azəri inciləri” rəqs qrupu müsabiqənin xoreoqrafiya bölməsində “Milli rəqs” nominasiyası üzrə “Odlar yurdu Azərbaycan” və Üzeyir Hacıbəylinin “Arşın mal alan” operettası əsasında qurulmuş rəqslə çıxış ediblər. “Estrada rəqsləri” nominasiyası üzrə isə “Bal rəqsləri” dərnəyi üzvlərinin ifasında Tofiq Quliyevin “Vals” və “Cayf” rəqsi nümayiş olunub.  “Kosmos” konsert zalında keçirilən qala-konsertdə müsabiqənin ən istedadlı kollektivləri çıxış ediblər. Münsiflər heyətinin qərarı ilə “Odlar yurdu Azərbaycan” və “Cayf” rəqsləri festivalın  laureatı olub. Rəqs qrupu kubok və diplom, dərnək üzvləri Qaflan Abbasov və Kşnyakina Anastasiya isə medal və diplomla təltif olunublar.

05/04/2018 12:00

Təhsil Nazirliyi Azərbaycanın bütün bölgələrində fəaliyyət göstərən,  peşəkarlığı ilə seçilən müəllimlərin media təqdimatını davam etdirir. “Bizim müəllim” layihəsinin növbəti təqdimatı Bərdə rayonunda fəaliyyət göstərən müəllimlərə həsr olunur.

05/04/2018 11:38