Təhsil Nazirliyi və "Azərkosmos" ASC-nin birgə təşkilatçılığı ilə keçirilən “CanSat Azərbaycan 2019” model peyk müsabiqəsinin qiymətləndirmə mərhələsi keçirilib. Qiymətləndirmə mərhələsinə müsabiqənin "İlkin hesabat sənədi"nin təqdim olunması və "Layihələndirmə" mərhələlərini uğurla bitirən 8 universitetdən 11 komanda vəsiqə qazanıb. Komandalar “Peyk modellərinin uçuş sonrası hesabatı”nın təqdim olunması mərhələsində yerli və beynəlxalq üzvlərdən ibarət münsiflər heyəti tərəfindən qiymətləndirilib. Qiymətləndirmənin yekun nəticələrinə əsasən, final mərhələsində hazırladıqları peyk modelini uğurla səmaya buraxan ADA Universitetinin “CanADA” komandası müsabiqənin qalibi olub. Bakı Ali Neft Məktəbinin “Can of Duty” komandası II, Bakı Mühəndislik Universitetini təmsil edən “Caucasus_Sat” komandası isə III yerdə qərarlaşıb. İkinci ildir təşkil edilən “CanSat Azərbaycan” müsabiqəsi gənclərin kosmik texnologiyalar sahəsinə marağının artırılmasına xidmət edir, eləcə də, müsabiqə qaliblərinə gələcəkdə ölkəmizi bu tipli beynəlxalq yarışlarda layiqincə təmsil etmək imkanı verir. Müsabiqədə iştirak üçün ölkənin 15 universitetindən 38 komanda qeydiyyatdan keçmişdi. Builki müsabiqədə Sumqayıt Dövlət Universiteti və Azərbaycan Texnologiya Universiteti də iştirak edib. Komandalar əsasən, mexanika və kompüter mühəndisliyi, aerodinamika, proseslərin avtomatlaşdırılması, riyaziyyat, fizika və digər texniki ixtisaslar üzrə təhsil alan tələbələrdən ibarət olub.

02/07/2019 12:49

Ümumtəhsil məktəblərinin VI-VII sinif şagirdləri arasında keçirilən V Respublika fənn müsabiqələrinin  final mərhələsinin nəticələri məlum olub. Belə ki, hər bir fənn üzrə ən yaxşı nəticə göstərən 5 şagird I, 10 şagird II, 15 şagird isə III yerə layiq görülüb. Müsabiqələrin mükafatlandırma mərasimi növbəti tədris ilinin əvvəlində keçiriləcək.  Müsabiqələr riyaziyyat və informatika fənləri üzrə VI, fizika, kimya və biologiya fənləri üzrə VII sinif şagirdləri arasında keçirilib.  Fənn müsabiqələrinin yekun nəticələrinə əsasən, yeni tədris ili üçün Beynəlxalq olimpiadalara hazırlıq mərkəzlərinə şagird seçimi ediləcək.  Həmçinin istedadlı şagirdlər üçün yaradılacaq xüsusi siniflərin kontingentinin formalaşdırılması da nəzərdə tutulur. Məktəblilərarası fənn müsabiqələri ilk dəfə 2014-cü ildə 972 şagirdin iştirakı ilə keçirilib.Fənn müsabiqələrinin keçirilməsinin əsas məqsədi istedadlı uşaqların aşkar olunması, şagirdlər arasında sağlam rəqabət mühitinin yaradılması, aşağı sinif şagirdlərinin müxtəlif fənlərə olan marağının artırılması, onlarla məqsədyönlü işlərin aparılması və olimpiadalara hazırlıq mərkəzlərinə namizəd şagirdlərin müəyyən edilməsindən ibarətdir.   Biologiya Fizika İnformatika Kimya Riyaziyyat

02/07/2019 10:58

İyulun 1-də Təhsil Nazirliyi, "British Council", Azərbaycan Dövlət Bədən Tərbiyəsi və İdman Akademiyası, “İnkişaf Naminə İdman” İctimai Birliyinin birgə həyata keçirdiyi TOPs proqramının 5-ci mövsümünün bağlanış mərasimi keçirilib.  Tədbirdə Təhsil nazirinin müavini Firudin Qurbanov, "British Council"ın Azərbaycan nümayəndiliyinin direktoru Samr Shah, YUNİSEF-in Azərbaycandakı nümayəndəliyinin rəhbərinin müavini Min Yuan və digər şəxslər iştirak ediblər.  Təhsil nazirinin müavini Firudin Qurbanov 240 000-dən artıq şagirdin yararlandığı TOPs proqramının əhəmiyyətindən söz açaraq əhatə dairəsinin genişləndirilməsinin vacibliyini qeyd edib. Nazir müavini bildirib ki, proqramda iştirak edən ümumtəhsil məktəblərinin fiziki tərbiyə və ibtidai sinif müəllimləri üçün təlimlər təşkil olunub. Firudin Qurbanov təlimlərin fiziki tərbiyə dərslərini tədris edən müəllimlərin peşə bacarıqlarının artırılması və tədrisin keyfiyyətinin yüksəldilməsi məqsədilə təşkil edildiyini diqqətə çatdırıb.  Nazir müavini qeyd edib ki, artıq fiziki tərbiyə dərslərində TOPs metodologiyasının tətbiqinin gətirdiyi inkişaf və yeniliklər müşahidə olunur və bu metodikanın tətbiqi ilə keçirilən fiziki tərbiyə dərslərində şagirdlər daha çox iştirak etməyə meyl göstərirlər.  "British Council"ın Azərbaycan nümayəndiliyinin direktoru Samr Shah TOPs layihəsinin ölkəmizdə böyük uğurla həyata keçirildiyini qeyd edərək Britaniya təcrübəsinin Azərbaycan məktəbliləri üçün də faydalı olduğunu bildirib. YUNİSEF-in Azərbaycandakı nümayəndəliyinin rəhbərinin müavini Min Yuan da öz növbəsində proqramın inklüziv tədrisi də əhatə etməsini müsbət hal kimi qiymətləndirib. Azərbaycan Dövlət Bədən Tərbiyəsi və İdman Akademiyasının prorektoru Təhminə Tağızadə də çıxış edərək iştirakçılara TOPs layihəsi çərçivəsində Akademiyanın Elmi-tədris laboratoriyasında aparılmış elmi-tədqiqat işinin nəticələri ilə bağlı məlumat verib.  Daha sonra çıxış edən Milli Olimpiya Komitəsinin üzvü, İnkişaf Naminə İdman İB-nin sədri Mehman Kərimov TOPs layihəsinin fiziki tərbiyə fənnini tədris edən müəllimlərin bilik və bacarıqlarının zənginləşdirilməsi, həmçinin şagirdlərin sağlamlığının möhkəmləndirilməsi məqsədi ilə həyata keçirildiyini bildirib.  Mərasimdə TOPs proqramının məqsəd və vəzifələri, proqram çərçivəsində görülən işlər, eləcə də bu layihənin nəticələri ilə bağlı videoçarx  nümayiş olunub. Sonda TOPs layihəsi çərçivəsində 2018-2019-cu tədris ilində keçirilmiş 3 nominasiya üzrə müsabiqənin qaliblərinə mükafat, həmçinin layihə üzrə təşkil olunan təlim kursunu müvəffəqiyyətlə bitirən müəllimlərə sertifikatlar təqdim edilib. 2018-2019-cu tədris ilində TOPs layihəsinə 100 ümumtəhsil məktəbi qoşularaq proqramda iştirak edən məktəblərin sayı 250-yə çatdırılıb. Bu məktəblər Bakı və Sumqayıt şəhərlərini, Abşeron, Qobustan, Şamaxı, İsmayıllı, Qəbələ, Qubadlı və Laçın rayonlarını əhatə edir.  Bu metodika fiziki tərbiyədə həm də inklüziv tədrisin həyata keçirilməsini təmin edən təlim metodlarını da özündə birləşdirir.

02/07/2019 10:33

İyulun 1-də Təhsil Nazirliyində “Heydər Əliyev siyasi məktəbini öyrənirik” Gənc Liderlər Proqramının iştirakçıları ilə görüş keçirilib. Görüşdə Təhsil naziri Ceyhun Bayramov, Bakı, Gəncə, Lənkəran, Şəmkir, Şəki, Şamaxı, Saatlı, Biləsuvar, Şirvan, Balakən, Sumqayıt, Quba, Tovuz və Mingəçeviri təmsil edən 50 gənc iştirak edib. Görüşdə Təhsil naziri Ceyhun Bayramov Azərbaycanda gənclərin inkişafına dəstək verilməsinin dövlət gənclər siyasətinin əsas istiqamətlərindən biri olduğunu qeyd edib. Təhsil naziri bildirib ki, gənclərin himayədarı olan ümummilli lider Heydər Əliyev ölkəmizdə hərtərəfli inkişaf etmiş gənc nəslin yetişməsini dövlətin və cəmiyyətin mühüm vəzifəsi hesab edirdi. Təhsil sahəsində əsası ümummilli lider tərəfindən qoyulmuş islahatların bu gün ölkə Prezidenti cənab İlham Əliyev tərəfindən uğurla davam etdirildiyini diqqətə çatdıran nazir təhsilin inkişafı istiqamətində görülmüş işlər və qarşıda duran hədəflər barədə ətraflı məlumat verib. Ceyhun Bayramov həmçinin ölkəmizdə istedadlı gənclər üçün yaradılan imkanlardan və onların təhsil uğurlarından danışıb. Görüşdə proqram iştirakçılarını maraqlandıran suallar cavablandırılıb. Sonda xatirə şəkili çəkilib. “Heydər Əliyev siyasi məktəbini öyrənirik” Gənc Liderlər proqramının əsas məqsədi ümummilli lider Heydər Əliyevin azərbaycançılıq məfkurəsinin gənclər arasında geniş təbliğ olunması, eyni zamanda gənclərdə müstəqil dövlətçilik ənənələrinə hörmət və sədaqət hisslərinin gücləndirilməsi, onlarda liderlik keyfiyyətlərinin inkişafına şəraitin yaradılmasıdır. 

01/07/2019 17:47

“Təhsil Menecerlərinin Peşəkar İnkişafı” layihəsinin ikinci mərhələsinin nəticələri açıqlanıb. Layihənin ikinci – qiymətləndirmə mərhələsində iştirak hüququ qazanmış 325 namizəd elektron formada 30 sualdan ibarət məntiqi tapşırıqları yerinə yetiriblər. İkinci turda 19 və ya yuxarı bal toplayan 118 namizəd müsahibə mərhələsinə vəsiqə qazanıb. Həmin namizədlərlə əlaqə saxlanılaraq növbəti mərhələnin keçirilmə tarixi barədə məlumat veriləcək. Təhsil Nazirliyinin və Təhsil İnstitutunun birgə elan etdiyi layihənin əsas məqsədi müasir idarəetmə bacarıqlarına yiyələnmiş, informasiya texnologiyalarına bələd olan, ölkəmizin təhsil və sosial inkişafına töhfə verə biləcək təhsil  işçilərini yetişdirmək və onların peşəkar inkişafına dəstək olmaqdır.

01/07/2019 17:16

“Qavaldaş” zərb çalğı alətlərinin müxtəlif növlərinin ifası üzrə uşaq və gənclərin II Respublika festival-müsabiqəsinin final mərhələsi keçirilib. Tədbirdə YUNESKO-nun baş direktoru Odre Azule, Dünya İrs Komitəsinin 43-cü sessiyası ilə əlaqədar yaradılmış Təşkilat Komitəsinin sədri, Mədəniyyət naziri Əbülfəs Qarayev, Təhsil Nazirliyi Respublika Uşaq-Gənclər İnkişaf Mərkəzinin direktoru Firuzə Sultan-zadə, Qobustan Milli Tarix-Bədii Qoruğunun direktoru Vüqar İsayev və digər qonaqlar iştirak ediblər. Üç yaş qrupu üzrə keçirilən müsabiqənin final mərhələsində Bakı şəhəri, Abşeron, İsmayıllı, Salyan və Masallı rayonları üzrə uşaq-gənclər inkişaf mərkəzləri və musiqi məktəblərinin nağaraçalanlar qrupları rəngarəng proqramla çıxış ediblər. İştirakçılar tanınmış nağara ustadlarından ibarət Münsiflər Heyəti tərəfindən qiymətləndirilib.   Müsabiqənin nəticələrinə əsasən, 4 nömrəli uşaq musiqi məktəbinin şagirdi Fateh Qənizadə solo nominasiya üzrə “Qran-pri” mükafatına layiq görülüb.  6 nömrəli uşaq musiqi məktəbinin şagirdi Etibar Ağayev I, Asəf Zeynallı adına musiqi kollecinin şagirdi Nəsib Nurməmmədov II, Respublika Uşaq-Gənclər İnkişaf Mərkəzinin dərnək üzvü Yusif Rüstəmov isə III yeri tutub. Kollektiv nominasiya üzrə 4 nömrəli uşaq musiqi məktəbi I, Azərbaycan Milli Konservatoriyasının nəzdində Musiqi Kolleci və Respublika Uşaq-Gənclər İnkişaf Mərkəzi II, 21 nömrəli uşaq musiqi məktəbi isə III yerlərə layiq görülüb. Qaliblər kubok və diplomlarla təltif olunublar. Festival-müsabiqə Təhsil Nazirliyi Respublika Uşaq-Gənclər İnkişaf Mərkəzinin təşkilatçılığı və Qobustan Milli Tarixi-Bədii Qoruğunun dəstəyi ilə keçirilib. Festival-müsabiqənin keçirilməsində məqsəd uşaq və gənclərin istedadlarının üzə çıxarılması, zərb çalğı alətlərinin müxtəlif növlərinin təbliği, Azərbaycanın milli ritm sənətinin layiqincə təmsili, musiqi alətləri və mədəni irsimizin qorunması, musiqi mədəniyyətinin inkişafının təmin edilməsindən ibarətdir.

01/07/2019 14:49

Təhsil Nazirliyinin Telefon Məlumat Mərkəzinə (“Qaynar xətt” xidməti, telefon: 146) daxil olan zənglər və Vətəndaşların Qəbulu Mərkəzində 2019-cu ilin iyun ayında vətəndaşlara göstərilən xidmətlərlə bağlı statistika açıqlanıb. Qeyd olunan müddət ərzində həmin mərkəzlərə ümumilikdə 17 323 müraciət daxil olub. Statistikaya əsasən, Telefon Məlumat Mərkəzində 14 905 zəng qəbul edilib. Vətəndaşların Qəbulu Mərkəzində isə bu dövrdə 2 418 vətəndaşa xidmət göstərilib. Telefon Məlumat və Vətəndaşların Qəbulu mərkəzlərinə daxil olmuş müraciətlərin (əsasən sorğu xarakterli olub) əksəriyyəti dərhal cavablandırılıb və operativ həll olunub. Vətəndaşların Qəbulu Mərkəzində 1162 (506 ərizə, 656 məktub) sənəd qəbul olunub və qeydiyyata alınıb. Daxil olan müraciətlər daha çox müəllimlərin işə qəbulu və yerdəyişməsi, ali təhsil sənədlərinin (diplomların) tanınması (nostrifikasiya) və digər məsələləri əhatə edib. 

01/07/2019 11:52

Təhsil Nazirliyində “İT sənayesinin tendensiyaları: təhsilə təsiri” mövzusunda tədbir keçirilib. Tədbirdə Təhsil nazirinin müavini Məhəbbət Vəliyeva, Təhsil Sisteminin İnformasiyalaşdırılması İdarəsinin rəisi Vüsal Xanlarov, Azərbaycan Dövlət Pedaqoji Universitetinin, bu universitetin nəzdində Azərbaycan Dövlət  Pedaqoji Kollecinin nümayəndələri və məktəb direktorları iştirak ediblər. Təhsil nazirinin müavini Məhəbbət Vəliyeva müasir təhsil sistemində informasiya-kommunikasiya texnologiyalarının tətbiqinin vacibliyi və bu texnologiyalardan istifadənin dünya standartları səviyyəsinə çatdırılmasının əhəmiyyətindən danışıb. Nazir müavini bildirib ki, tədbirin keçirilməsində məqsəd ölkəmizdə yaradılan müasir təhsil sistemini beynəlxalq təcrübədəki təhsil örnəkləri ilə müqayisəli şəkildə təhlil etmək və təhsilin modernləşdirilməsində vacib rol oynayan tərəflərlə fikir mübadiləsi aparmaqdır.              Təhsil Sisteminin İnformasiyalaşdırılması İdarəsinin rəisi Vüsal Xanlarov təqdimatla çıxış edərək İKT sənayesində baş verən və proqnozlaşdırılan 10 əsas texnoloji tendensiyalar barədə ətraflı məlumat verib. Qeyd olunub ki, proqnozlara əsasən 2022-2024-cü illərə qədər rəqəmsal iqtisadiyyata keçid, süni intellektin tətbiqi, böyük verilənlərin təhlili, əşyaların interneti və üçüncü platforma texnologiyalarına sərmayələr, blokçeyn texnologiyasının tətbiqinin genişlənməsi, bulud texnologiyalarının inkişafı və yeni nəsil proqramçılara ehtiyacın artması fonunda təhsilin məzmunu, təchizatı və idarəolunması transformasiyaya uğramalı, təhsil sisteminin modernləşdirilməsi üçün tədris fərdiləşməyə uyğun istiqamətləndirilməlidir.  Sonda mövzu ətrafında fikir mübadiləsi aparılıb, müxtəlif təhsil pillələri və ixtisasartırmada müasir texnologiyaların tətbiqi vəziyyəti və perspektivlər müzakirə edilib.

01/07/2019 10:53

Azərbaycan Dövlət Pedaqoji Universiteti və Corc Vaşinqton Universitetinin Təhsil və insan inkişafı məktəbi arasında birgə bəyannamə imzalanıb. “Təhsil” televiziyasının “Təməl” verilişində bəyannaməyə əsasən tərəflər üçün yaradılacaq imkanlar haqqında məlumat verilir. Verilişin qonaqları Corc Vaşinqton Universitetinin layihə direktoru Sevinc Məmmədova və Təhsil Nazirliyinin Beynəlxalq əməkdaşlıq şöbəsinin müdiri Nicat Məmmədlidir.  

01/07/2019 10:25

Maliyyə Bazarlarına Nəzarət Palatasının dəstəyi, Azərbaycan Sığortaçılar Assosiasiyasının və İcbari Sığorta Bürosunun təşkilatçılığı ilə iyunun 28-də Bakıda sayca IX “Azərbaycanda sığorta bazarı: trendlər və imkanlar” adlı Beynəlxalq Sığorta Forumu keçirilib. İyirmiyə yaxın xarici ölkədən 50-yə yaxın nümayəndənin qatıldığı Forumda ümumilikdə 150-dən çox şəxs iştirak edib. Maliyyə Bazarlarına Nəzarət Palatasının İdarə Heyətinin sədri vəzifəsini icra edən İbrahim Alışov sığorta sektorunda nəzərə çarpan inkişaf və perspektivlər, müşahidə olunan trendlər, tətbiq edilən yeni mexanizmlər, sığorta bazarının şəffaflaşdırılması və sektoral nəzarətin gücləndirilməsi, həmçinin sığorta bazarına inam və etimadın yüksəldilməsi ilə bağlı görülən işlər barəsində məlumat verib. İbrahim Alışov bildirib ki, sığorta sektorunun inkişaf etdirilməsi və sektora nəzarətin gücləndirilməsi daim dövlətin diqqət mərkəzindədir. Belə ki, Azərbaycan Respublikasının Nazirlər Kabinetinin 2019-cu il 21 may tarixli Sərəncamı ilə təsdiq edilmiş “Sığorta sektorunun inkişaf etdirilməsi üçün görülməli işlərlə bağlı Tədbirlər Planı”nın qəbul edilməsi bunun bariz nümunəsidir. “Hazırda sığorta sektorunun aktivləri maliyyə sektorunun aktivlərində 3,1 faiz paya malikdir. Maliyyə Bazarlarına Nəzarət Palatası yarandığı gündən sığortaçıların cəmi aktivləri 64 faiz artaraq 1,4 milyard manata çatıb. 2018-ci ilin sonunda sığorta bazarının qeyri-neft sektorunda payı 1,9 faiz, maliyyə sektorunda payı isə 2,9 faiz təşkil edib”, - deyə İbrahim  Alışov diqqətə çatdırıb. Son dövrlər sığorta bazarında böyük nailiyyətlər əldə olunduğunu deyən Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə qeyd edib ki, sığorta bazarı iqtisadi və sosial inkişafın bütün seqmentləri ilə əlaqədardır. Azərbaycanda son illər atılan addımlar öz müsbət nəticələrini verir. Bu cür forumların keçirilməsi dünya təcrübəsini öyrənmək üçün çox əhəmiyyətlidir. İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı qeyd edib ki, ötən il sığorta şirkətləri tərəfindən 728 milyon manatlıq sığorta haqları toplanıb ki, bu, hələ Azərbaycanın ÜDM-in 1 faizinə çatmır. 2020-ci ildən icbari tibbi sığortanın bütün ölkə üzrə tətbiq olunması nəticəsində ilk dəfə olaraq sığorta haqlarının həcmi ÜDM-in 1 faizini ötəcək və ilk dəfə ölkə tarixində sığorta haqları 1 milyard manatdan çox olacaq. Strateji Yol xəritələri çərçivəsində sığorta bazarı ilə bağlı xüsusi tapşırıqlar müəyyənləşdirilib. Bunlardan ən vacibi sığorta şirkətlərinin kapitallaşması, aktivlərin sağlamlaşdırılması, yeni sığorta məhsullarının, texnologiyalarının tətbiqi ilə bağlıdır. Təhsil nazirinin müavini İdris İsayev deyib ki, ümumtəhsil müəssisələrində sığorta ilə bağlı fənn tədris edilməsə də, “Həyat Bilgisi” dərsliyində sığortaya dair mövzular daxil edilib. 4-cü və 8-ci siniflərin “Həyat bilgisi” dərsliyində sığortaya dair məlumatlar yer alıb. Peşə məktəblərində sığorta sahəsi üzrə peşəkar kadrlar hazırlanır. Peşə təhsili pilləsində sığorta agenti ixtisası üzrə hər il təxminən 80 tələbə qəbul olunur. Orta ixtisas təhsili pilləsi üzrə isə hər il sığorta işinin təşkili ixtisası üzrə 200-ə yaxın qəbul planı həyata keçirilir. Ali təhsilin magistratura pilləsində 16 tələbə sığorta işinin təşkili üzrə, 30 tələbə isə sığorta idarəetməsi ixtisası üzrə təhsil alır. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi sədrinin müavini Ceyhun Salmanov təmsil etdiyi qurum haqqında məlumat verib. Bildirib ki, ölkəmiz dövlət xidmətləri sahəsində çox böyük inkişaf yolu keçib. 2012-ci ildə “ASAN xidmət”in yaradılması ölkəmizdə dövlət xidmətləri sahəsində yeni standartların və yeni brendin formalaşmasına gətirib çıxarıb. Ölkəmizdə sığorta işinin təşkili sahəsində mühüm işlər görülür. Kənd Təsərrüfatı Nazirliyi yanında Aqrar Kredit və İnkişaf Agentliyinin sədri Mirzə Əliyev bildirib ki, hazırda ölkə əhalisinin 47,2 faizi kənd yerlərində, məşğul əhalinin 36,1 faizi kənd təsərrüfatında işləyir. Kənd əhalisinin 80-90 faizi kənd təsərrüfatı ilə məşğuldur. Sığorta şirkətlərini kənd təsərrüfatı heyvanlarının sığortalanması üzrə xüsusi məhsullar hazırlamağa dəvət edirik. Eyni zamanda, istərdik ki, sığorta şirkətləri vətəndaşlar arasında təbliğat aparsınlar, sığorta savadlılığının artırılması istiqamətində maarifləndirici tədbirlər keçirsinlər. Forum çərçivəsində Azərbaycan Respublikasının Nazirlər Kabinetinin qeyd olunan Sərəncamı ilə təsdiq edilmiş “Sığorta sektorunun inkişaf etdirilməsi üçün görülməli işlərlə bağlı Tədbirlər Planı”nın icrası məqsədilə Maliyyə Bazarlarına Nəzarət Palatası, Azərbaycan Respublikası Təhsil Nazirliyi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, İcbari Sığorta Bürosu və Azərbaycan Sığortaçılar Assosiasiyası arasında əməkdaşlığa dair birgə memorandum imzalanıb. Anlaşma memorandumu bu qurumların iştirakı ilə ölkədə sığorta sahəsi üzrə maarifləndirmə, təbliğat-təşviqat işlərinin aparılması və aidiyyəti qurumların İcbari Sığorta Bürosunun elektron informasiya sistemi ilə inteqrasiyasına dəstəyin verilməsi üzrə birgə tədbirlərin həyata keçirilməsini nəzərdə tutur. Tədbirdə Maliyyə Bazarlarına Nəzarət Palatasının dəstəyi ilə İcbari Sığorta Bürosu tərəfindən formalaşdırılmış Hadisələrin İdarəedilməsi Sistemi və CLIP layihələri barəsində təqdimat baş tutub. Bildirilib ki, Hadisələrin İdarəedilməsi Sistemi sığorta tənzimlənməsi zamanı istehlakçıların işlərinin rahatlaşdırılmasına, səlahiyyətli dövlət orqanlarından alınan sənədlərin, xüsusilə Forma 4-ün elektronlaşdırılmasına, vətəndaş-məmur təmasının minumuma endirilməsinə, “Bonus-Malus” sisteminin effektivliyinin artırılmasına xidmət edəcək. Hadisələrin İdarəedilməsi Sistemi çərçivəsində yaradılan mobil tətbiq isə sığorta tənzimləmələrinin sürətli şəkildə həyata keçirilməsinə və həm sığortaçının, həm də dövlət orqanının dərhal məlumatlandırılmasına şərait yaradacaq. Əlavə olaraq, CLIP layihəsi çərçivəsində İcbari Sığorta Bürosunun elektron informasiya sisteminin Əmək və Əhalinin Sosial Müdafiəsi Nazirliyinin elektron informasiya sistemi ilə məlumat mübadiləsinin tamamlanması reallaşıb. Bu layihənin reallaşması ilə “istehsalatda bədbəxt hadisələr və peşə xəstəlikləri nəticəsində peşə-əmək qabiliyyətinin itirilməsi hallarından icbari sığorta” üzrə müqavilələrin elektron şəkildə bağlanması mümkün olacaq. Forum plenar sessiyalarla işini davam etdirib.   AZƏRTAC  

01/07/2019 10:20