İyunun 6-da 2022-2023-cü tədris ili üçün Bakı Mühəndislik Universiteti və Koreyanın nüfuzlu ali təhsil müəssisəsi olan İNHA Universiteti arasında bakalavriat səviyyəsi üzrə həyata keçirilən beynəlxalq ikili diplom proqramına (BMU-İNHA İDP) dair onlayn qeydiyyat prosesinə start verilir. Qeydiyyat prosesi üçün son tarix 10 avqust 2022-ci il saat 23:55 müəyyən edilib. Sənədlər göstərilən tarixədək onlayn anket formasında təqdim edilməlidir.   İngilis dilində 4 il müddətində həyata keçiriləcək bakalavriat proqramına informasiya texnologiyaları, inşaat mühəndisliyi, elektrik mühəndisliyi və elektronika mühəndisliyi ixtisasları üzrə hər biri 32 nəfər olmaqla 128 nəfərin qəbulu nəzərdə tutulur.   Beynəlxalq ikili diplom proqramına qəbul Dövlət İmtahan Mərkəzi (DİM) tərəfindən qəbul imtahanlarının (bakalavriat səviyyəsi üzrə) nəticələri və İNHA Universiteti tərəfindən keçirilən daxili müsabiqə əsasında aparılacaq. BMU-İNHA İDP-də Azərbaycan Respublikasının vətəndaşı olan və 2022-ci ildə DİM imtahanlarında iştirak etmiş və uğurla keçən 1-ci ixtisas qrupunun abituriyentləri və BMU-İNHA İDP-nin hər ixtisas üzrə müəyyən edilmiş müvafiq keçid balını toplamış namizədlər iştirak edə bilər.   Təhsilalanların təhsil haqqı, qeydiyyat xərci, tədris materialları və elektron informasiya resurslarına çıxış xərcləri, habelə Koreya Respublikasında 1 illik təhsil və 3 həftəlik yay məktəbində iştirak xərcləri də “2019-2023 Dövlət Proqramı” tərəfindən qarşılanır.    Proqramla bağlı ətraflı məlumatı elandan əldə edə bilərsiniz.

06/06/2022 12:30

Bu ildən etibarən məktəbəqədər təhsil müəssisələrinə qəbul elektron qaydada həyata keçiriləcək. Prosesə iyul ayında start veriləcək. Məktəbəqədər təhsil müəssisələrinə qəbulla bağlı yeni yaradılan elektron sistemdən istifadəyə dair təlimat yaxın vaxtlarda ictimaiyyətə təqdim olunacaq.    İyunun 1-dən qəbulun elektronlaşdırılması üzrə işlər çərçivəsində məktəbəqədər müəssisələrdə təhsil alan uşaqların məlumatlarının elektron sistemdə toplanılmasına artıq başlanılıb.    Qeyd edək ki, məktəbəqədər təhsil müəssisələrinə elektron sənəd qəbulu sistemində qeydiyyat üçün uşağın şəxsiyyət vəsiqəsi tələb olunacaq. Bu baxımdan valideynlərə qeydiyyat prosesi başlayanadək uşaqları üçün şəxsiyyət vəsiqəsi əldə etmələri tövsiyə edilir.   

06/06/2022 11:50

İyunun 1-dən yeni yaradılan 7 saylı “ASAN xidmət” mərkəzində də təhsil xidmətləri təqdim olunmağa başlanılıb. İlkin mərhələdə vətəndaşlar mərkəzdə 5 təhsil xidmətindən yararlana bilərlər. Növbəti mərhələlərdə xidmətlərin sayının artırılması nəzərdə tutulur. Sözügedən təhsil xidmətlərinin hər biri Təhsil Nazirliyi tərəfindən elektron qaydada da həyata keçirilir. Bununla yanaşı, elektron qeydiyyat prosesində hər hansı çətinlik çəkən və ya məlumatsız vətəndaşlar bundan sonra 5 və 7 saylı “ASAN xidmət” mərkəzlərinə də yaxınlaşaraq konsultativ dəstək ala bilərlər. Mərkəzlər vasitəsilə təhsil sahəsində vətəndaş müraciətləri üzrə məsləhətçi, şagirdlərin elektron yerdəyişməsi, ümumi təhsil müəssisələrinin birinci sinflərinə şagird qəbulu, cari təhsilalanlar üçün elektron təhsil arayışları, təhsil tələbə kreditinə elektron müraciət xidmətlərindən yararlanmaq mümkündür. Qeyd edək ki, Təhsil Nazirliyinin və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə əməkdaşlığı nəticəsində  prosesin tədricən paytaxt və regionlarda fəaliyyət göstərən digər mərkəzlərdə də həyata keçirilməsi planlaşdırılır. Xidmətlər haqqında daha ətraflı məlumatı aşağıdakı keçiddən əldə edə bilərsiniz: https://asan.gov.az/az/category/asan-xidmetler/funksional-yardimci-xidmetler/tehsil-nazirliyi-terefinden-goesterilen-xidmetler-1

06/06/2022 10:50

İyunun 3-də Təhsil Nazirliyi və İqtisadiyyat Nazirliyi yanında Antiinhisar və İstehlak bazarına Nəzarət Dövlət Xidmətinin birgə təşkilatçılığı ilə “Dövlət satınalmalarının təşkili: rəqabətlilik və səmərəliliyin təmin edilməsi” mövzusunda seminar-təlim keçirilib.   Təhsil Nazirliyinin əməkdaşları üçün keçirilən seminarda açılış nitqi ilə çıxış edən təhsil nazirinin müavini Firudin Qurbanov büdcədən ayrılan vəsaitin səmərəli istifadəsini təmin etmək üçün dövlət satınalmalarının optimal və düzgün təşkil olunmasının vacibliyini vurğulayıb.    Təşkilatçılara təşəkkür edən nazir müavini seminarın keçirilməsində əsas məqsədin qurumlara ayrılan vəsaitin səmərəli istifadəsinin satınalma ilə bağlı qaydalara uyğunluğunun öyrədilməsindən, mövcud qanunvericilikdəki dəyişikliklərin iştirakçıların diqqətinə çatdırılmasından ibarət olduğunu deyib. Firudin Qurbanov bildirib ki, satınalma zamanı ilk növbədə dövlət mənafeyi qorunmalı, vəsait səmərəli istifadə olunmalı, dövlətin gələcək inkişafını təmin edən üsullarla həyata keçirilməlidir.   Nazir müavini çıxışının sonunda iştirakçılara uğurlar arzulayıb.   İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli seminarda öyrəniləcək biliklərdən söz açaraq rəqabət mühitinin formalaşmasının iqtisadi baxımdan səmərəliliyin artmasındakı rolundan danışıb. Antiinhisar Xidmətinin əsas fəaliyyət istiqamətlərini sadalayan Məmməd Abbasbəyli bildirib ki, bu cür maarifləndirici seminarların mütəmadi təşkili nəzərdə tutulur. Məmməd Abbasbəyli qeyd edib ki, təlim proqramı ötən il ərzində dövlət satınalmaları sahəsi üzrə ləğv olunan  protokollar və daxil olan müraciətlərin təhlili əsasında prioritetlər müəyyən edilərək hazırlanıb.   Təlim "Dövlət satınalmalarının planlaşdırılması", "Satınalmaların təşkili", "Satınalma metodları", "İddiaçıların ixtisasına dair tələblər", "Tender təkliflərinin qiymətləndirilməsi və müqayisəsi", "Satınalmanın nəticələri", "Satınalma müqaviləsinin bağlanması və idarə olunması" və "Şikayətlərin verilməsi və mübahisəli məsələlərin həlli" mövzularını əhatə edib.   Təhsil Nazirliyinin 200-ə yaxın nümayəndəsinin iştirak etdiyi seminarda satınalan təşkilatlar arasında mübahisəli məsələlərin həlli ilə əlaqədar fikir mübadiləsi aparılıb, iştirakçıları maraqlandıran suallar cavablandırılıb.

03/06/2022 19:20

26 may-2 iyun 2022-ci il tarixlərində ümumtəhsil məktəblərinin V sinif şagirdləri arasında basketbol üzrə respublika birinciliyinin final yarışları keçirilib. Beynəlxalq Basketbol Federasiyasının qaydaları əsasında oğlan və qızlar arasında təşkil olunan yarışların final mərhələsində 12 oğlan, 12 qız komandası olmaqla 24 komanda mübarizə aparıb. Yarışın nəticəsinə əsasən, qız komandaları arasında final yarışında Şəki şəhər komandası I yeri, Bakı şəhəri Səbail rayonu II yeri, Nərimanov rayonu III yeri tutub. Oğlanların mübarizəsində Bakı şəhəri Nərimanov rayonu I yeri, Cəlilabad rayonu II yeri, Şəki şəhəri III yeri tutub. Qalib komandalar və onların məşqçiləri Azərbaycan Respublikası Təhsil Nazirliyi və Azərbaycan Basketbol Federasiyası tərəfindən diplom, medal və kubokla təltif olunub. Qeyd edək ki, ümumtəhsil məktəblərinin V sinif şagirdləri arasında təşkil olunan basketbol üzrə respublika birinciliyində ümumilikdə 70 rayon üzrə 891 məktəbdən 1416 (525 qız və 891 oğlan) komanda mübarizə aparıb, 8038 nəfər oğlan, 4687 nəfər qız olmaqla ümumilikdə 12725 nəfər şagird iştirak edib.  Yarışların keçirilməsində məqsəd məktəblilər arasında basketbol idman növünü təbliğ etmək, istedadlı məktəbliləri basketbol idman növünə cəlb etmək, uşaqlar arasında dostluq əlaqələrini gücləndirməkdən ibarət olub.

03/06/2022 18:30

İyunun 3-də Azərbaycan Respublikası Təhsil Nazirliyi ilə Türkiyə Respublikası Ali Təhsil Şurasının nümayəndə heyətlərinin görüşü keçirilib. Görüşdə təhsil nazirinin müavini Muxtar Məmmədov, Türkiyə Respublikası Ali Təhsil Şurasının rəhbərinin müavini Safa Kapıcıoğlu, Türkiyənin ölkəmizdəki fövqəladə və səlahiyyətli səfiri Cahit Bağcı, Azərbaycan Respublikası Təhsil Nazirliyi və Türkiyə Respublikası Ali Təhsil Şurasından olan nümayəndə heyəti və Azərbaycan və Türkiyə ali təhsil müəssisələrinin 60-a yaxın rektoru iştirak edib. Görüşdə Azərbaycan Dövlət İqtisad Universitetinin (UNEC) rektoru Ədalət Muradov salamlama nitqi ilə çıxış edib. Daha sonra təhsil nazirinin müavini Muxtar Məmmədov və Ali Təhsil Şurasının rəhbərinin müavini Safa Kapıcıoğlu Azərbaycan və Türkiyədə təhsil sahəsində son illər həyata keçirilən islahatlar və birgə fəaliyyətlər haqqında danışıblar. Görüşdə Azərbaycan Memarlıq və İnşaat Universitetinin rektoru Gülçöhrə Məmmədova, Azərbaycan Texniki Universitetinin rektoru Vilayət Vəliyev, Mingəçevir Dövlət Universitetinin rektoru Şahin Bayramov, Qazi Universitetinin rektoru  Musa Yıldız, Ege Universitetinin rektoru Necdet Budak və Sakarya Universitetinin rektoru Fatih Savasan qonaqlara universitetlərarası əməkdaşlıqlar haqqında məlumat veriblər. Həmçinin, hər iki ölkənin ali təhsilinin tarixi haqqında videoçarxlar da nümayiş olunub.

03/06/2022 18:00

İyunun 3-də Əmək və Əhalinin Sosial Müdafiəsi Nazirliyinin tableyindəki  DOST Agentliyinin "Könüllü DOST" proqramının 3 illiyinə həsr olunmuş "Sosial sahədə könüllülük" forumu öz işinə başlayıb.   Forum "Könüllü DOST" proqramının təşkilatçılığı, DOST İnklüziv İnkişaf və Yaradıcılıq Mərkəzinin, Azərbaycan Gənclər Fondunun və Azərbaycan Könüllü Təşkilatları İttifaqının tərəfdaşlığı ilə baş tutub.   DOST İnklüziv İnkişaf və Yaradıcılıq Mərkəzində təşkil olunan forum gənclərin sosial-iqtisadi, ictimai-siyasi və mədəni həyatda iştirakının, sosial sahədə könüllülük fəaliyyətinin və onun faydalarının, korporativ sosial məsuliyyətliliyin dayanıqlılığının təbliği məqsədini daşıyıb.   Tədbirdə əmək və əhalinin sosial müdafiəsi naziri Sahil Babayev, təhsil naziri Emin Əmrullayev, Dövlət Gömrük Komitəsinin sədri Səfər Mehdiyev, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Dövlət Miqrasiya Xidmətinin rəisi Vüsal Hüseynov, gənclər və idman nazirinin müavini Fərhad Hacıyev, Gənclər Fondunun icraçı direktoru Fərid Cəfərov, Azərbaycan Könüllü Təşkilatları İttifaqının sədri Yusif Vəliyev, DOST Agentliyinin İdarə Heyətinin sədri Fərid Məmmədov və digər qonaqlar iştirak ediblər.   Forum əlilliyi olan şəxslərin əl işlərindən ibarət sərginin nümayişi ilə başlayıb.   Əmək və əhalinin sosial müdafiəsi naziri Sahil Babayev "Könüllü DOST" proqramının iştirakçılarını proqramın 3 illiyi münasibətilə təbrik edib və ölkəmizdə könüllülük hərəkatının genişlənməsində "Könüllü DOST" proqramının önəmini diqqətə çatdırıb.   Çıxış edən digər qonaqlar "Könüllü DOST" proqramının iştirakçılarını təbrik edərək, könüllülüyün əhəmiyyətindən bəhs ediblər.   Daha sonra DOST Agentliyinin İdarə Heyətinin sədri Fərid Məmmədov "Könüllü DOST" proqramı ilə bağlı təqdimatla çıxış edib.    Tədbirdə yeni “İnklüziv DOST” altproqramının da təqdimatı olub.    Forum "Sosial sahədə könüllülük" və "Korporativ sosial məsuliyyətlilik" üzrə panel müzakirələri ilə davam edib.

03/06/2022 17:35

Təhsildə Keyfiyyət Təminatı Agentliyi may ayı üzrə diplomların tanınmasına dair statistikanı açıqlayıb. Belə ki, may ayı üzrə 229 müraciətçinin 185-i barədə müsbət qərar verilərək müvafiq şəhadətnamələr təqdim edilib, 44 nəfərin müraciəti isə mənfi qərarla yekunlaşıb. Tədris dili üzrə bilik səviyyəsinin qənaətbəxş olmaması səbəbi ilə 16, təhsil ölkəsində tələb olunan minimal müddətin ödənilməməsi, həm də tədris dilinin qənaətbəxş olmaması səbəbi ilə 13,  tədris yükünü mənimsəmək üçün təhsil  aldığı ölkənin ərazisində kifayət qədər olmaması səbəbi ilə 10, digər səbəblər üzrə 5 nəfərin  müraciəti mənfi qərarla yekunlaşıb. Ölkələr üzrə müraciətlərin sayına nəzər saldıqda Rusiyadan 74, Türkiyədən 55, Ukraynadan 54, Böyük Britaniya və Şimali İrlandiya Krallığından 11, Gürcüstandan 6, digər ölkələrdən isə 29 müraciətin olduğu müşahidə olunur. Ən çox müraciət olunan ixtisaslara gəlincə, hüquqşünaslıq üzrə 27, iqtisadiyyat üzrə 14, tibb üzrə 14, menecment üzrə 10, maliyyə üzrə 9 nəfər müraciətçi qeydə alınıb. Qeyd edək ki, sənədlərə ortalama baxılma müddəti 22 gün təşkil edib. Vətəndaşlar xarici ali təhsil ixtisaslarının tanınması üçün  www.tanınma.az  keçidinə daxil ola bilərlər.

03/06/2022 12:55

3 iyun saat 11:00-dan etibarən 2022-2023-cü tədris ili üçün keçiriləcək dövlət ümumi təhsil müəssisələrinə müəllimlərin işə qəbulu üzrə müsabiqənin elektron sənəd qəbulu mərhələsinə start verilir. Müsabiqədə iştirak etmək istəyən namizədlər qeyd olunan tarixdən etibarən 10 iyun saat 11:00-dək www.miq.edu.az linkinə daxil olaraq qeydiyyatdan keçə bilərlər. Müəllimlərin işə qəbulu müsabiqəsində orta ixtisas və ali təhsil müəssisələrini pedaqoji ixtisaslar üzrə bitirmiş, dövlət nümunəli təhsil sənədi almış və ya xarici ölkədə aldığı ali təhsil haqqında sənədi tanınmış Azərbaycan Respublikasının vətəndaşları və ya Azərbaycan Respublikasında daimi yaşamaq üçün icazə verilmiş şəxslər iştirak edə bilərlər. Həmçinin müsabiqədə iştirak etmək istəyən şəxs hazırda dövlət ümumi təhsil müəssisəsində müddətsiz müqavilə əsasında müəllim olaraq fəaliyyət göstərirsə, müddətsiz əsaslarla təyin olunduğu müəssisədə 3 ildən artıq fəaliyyət göstərdiyi halda müəllimlərin işə qəbulu üzrə müsabiqədə iştirak edə bilər. Qeyd edək ki, müəllimlərin işə qəbulu üzrə müsabiqə elektron ərizələrin yoxlanılması, test imtahanı, vakant yerlərin seçilməsi və müsahibə mərhələlərini əhatə edəcək. Daha ətraflı məlumat üçün müsabiqəyə dair sual-cavabla linkə daxil olaraq tanış ola bilərsiniz: Sual-cavab Müsabiqə iştirakçılarına uğurlar arzulayırıq!

03/06/2022 09:00

İyunun 2-də ADA Universitetində Milli Məclis, Türkiyə Böyük Millət Məclisi və Beynəlxalq Balkan Universitetinin birgə təşkilatçılığı ilə 7-ci Beynəlxalq Sosial Elmlər Konfransı öz fəaliyyətinə başlayıb. Konfransda elm və təhsil sahəsi üzrə bir çox rəsmilər, türk dövlətlərinin aparıcı universitetlərinin rektorları, nüfuzlu alimlər iştirak edirlər. Tədbir Azərbaycan və Türkiyənin Dövlət himnlərinin səsləndirilməsi ilə başlanıb. Açılış mərasimində giriş nitqi ilə çıxış edən ADA Universitetinin rektoru Hafiz Paşayev konfrans iştirakçılarını salamlayaraq tədbirin daha əvvəl İspaniya, Rumıniya, Türkiyə, Özbəkistan və Makedoniyada keçirildiyini nəzərə çatdırıb. Rektor konfransda iştirak etmək üçün 520-dən çox qonağın Bakıya gəldiyini və 1000-dən çox akademik məruzənin təqdim edildiyini bildirib. Daha sonra çıxış edən Milli Məclisin sədri Sahibə Qafarova 7-ci Beynəlxalq Sosial Elmlər Konfransının akademik sahədə birgə fəaliyyətin daha da gücləndirilməsindəki önəmindən bəhs edib. Sədr konfransın Qarabağa həsr olunması, Qarabağ həqiqətlərinin akademik dairələr tərəfindən vurğulanması və elmi ədəbiyyatda əks etdirilərək gələcək nəsillərə ötürülməsinin vacib olduğunu bildirib. Türkiyə Respublikası Böyük Millət Məclisinin sədri Mustafa Şentop konfransın əhəmiyyətini vurğulayaraq söyləyib ki, tədbir çərçivəsində təxminən 30 il davam edən işğal, verilən şəhidlər, ürək parçalayan Xocalı qətliamına alimlər tərəfindən diqqət çəkiləcək. Azərbaycanın haqq səsinin beynəlxalq aləmdə eşidilməsinin Türkiyə üçün vacibliyini vurğulayan sədr 20 fərqli ölkədən 100-dən çox professorun konfransda iştirak etdiyini və buradakı müzakirələrin nəticəsinin kitab şəklində çap olunacağını diqqətə çatdırıb. Təhsil naziri Emin Əmrullayev çıxışında Azərbaycan və Türkiyənin təhsil nazirlikləri arasında əməkdaşlığa diqqət çəkərək gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün nəzərdə tutulmuş Dövlət Proqramına toxunub və Proqram çərçivəsində Azərbaycan Respublikası vətəndaşlarının Türkiyə ali təhsil müəssisələrində təhsil alma imkanlarının yaranacağını bildirib. Sonda çıxış edən Beynəlxalq Balkan Universitetinin rektoru Mehmet Dursun Erdem Türkiyə universitetləri ilə Azərbaycan ali təhsil müəssisələri arasında əlaqələrin inkişafından və perspektivlərdən söhbət açıb. Qeyd edək ki, iki gün davam edəcək konfrans Bakıda panel müzakirələrlə davam edəcək, Şuşada keçiriləcək tədbirlə başa çatacaq.

02/06/2022 19:50