Sumqayıt şəhər 1 nömrəli Uşaq Gənclər İnkişaf Mərkəzinin ”Təsviri incəsənət dərnəyi” üzvlərinin “Şuşa ili”nə həsr olunmuş "Ruhumun rəngi " adlı hesabat sərgisi təşkil olunub.   Sərgi mədəniyyət və incəsənətimizin beşiyi olan Susa şəhərinin 270 illiyinə həsr olunub.   Əvvəlcə tədbir iştirakçıları tərəfindən şəhidlərimizin xatirəsi 1 dəqiqəlik sükutla yad edilib.   Daha sonra dərnək üzvlərinin rəsm işlərindən ibarət sərgiyə baxış keçirilib. Dərnək üzvlərinə ilboyu göstərdikləri nəticələrə uyğun Mərkəz tərəfindən diplom və hədiyyələr təqdim olunub.   Sərgidə Sumqayıt şəhər 1 nömrəli Uşaq Gənclər İnkişaf Mərkəzinin dərnək üzvləri vətənpərvərlik ruhunda mahnılar, şeirlər səsləndirib, rəngarəng rəqslər nümayiş etdirib.   Sonda tədbirdə iştirak edən qonaqlar uşaqlara təbriklərini çatdırıblar.

08/06/2022 15:00

2022-2023-cü tədris ili üçün müəllimlərin işə qəbulu üzrə elektron sənəd qəbulu davam edir. Müsabiqədə iştirak etmək istəyən namizədlər 10 iyun saat 11:00-dək www.miq.edu.az linkinə daxil olaraq qeydiyyatdan keçə bilərlər.   Müəllimlərin işə qəbulu müsabiqəsində orta ixtisas və ali təhsil müəssisələrini pedaqoji ixtisaslar üzrə bitirmiş, dövlət nümunəli təhsil sənədi almış və ya xarici ölkədə aldığı ali təhsil haqqında sənədi tanınmış Azərbaycan Respublikasının vətəndaşları və ya Azərbaycan Respublikasında daimi yaşamaq üçün icazə verilmiş şəxslər iştirak edə bilərlər. Həmçinin müsabiqədə iştirak etmək istəyən şəxs hazırda dövlət ümumi təhsil müəssisəsində müddətsiz müqavilə əsasında müəllim olaraq fəaliyyət göstərirsə, müddətsiz əsaslarla təyin olunduğu müəssisədə 3 ildən artıq fəaliyyət göstərdiyi halda müəllimlərin işə qəbulu üzrə müsabiqədə iştirak edə bilər. Daha ətraflı məlumat üçün müsabiqəyə dair sual-cavabla linkə daxil olaraq tanış ola bilərsiniz: Sual-cavab   Müsabiqə iştirakçılarına uğurlar arzulayırıq!

08/06/2022 12:05

İyunun 1-dən Regional Təhsil idarələrinin (RTİ) müdirləri tərəfindən vətəndaşların qəbulu prosesinə başlanılıb.   Vətəndaşlar Təhsil Nazirliyinin Çağrı Mərkəzinin 146-6 nömrəli telefonuna (yalnız iş günləri və saatları ərzində) zəng, elektron (https://edu.gov.az/az/contact_us) və rəsmi “Whatsapp” xidmətinə (0512067848) və birbaşa RTİ-yə telefon və ya e-mail vasitəsilə müraciət etməklə qəbula yazıla bilərlər.   Qeyd edək ki, Regional Təhsil idarələrində vətəndaşların qəbulu müntəzəm olaraq həyata keçiriləcək. Vətəndaşlar Regional Təhsil idarələrinə yaxınlaşmaqla müraciətlərini müvafiq struktur bölmə rəhbərlərinə çatdıra bilərlər.    RTİ müdirlərinin qəbul cədvəli ilə bu keçiddən tanış ola bilərsiniz: https://edu.gov.az/az/graphic/page   Regional Təhsil idarələrinin əlaqə vasitələri

08/06/2022 11:20

"Məktəblinin dostu" layihəsinin təşkilatçılığı ilə Gəncə-Daşkəsən Regional Təhsil İdarəsinin tabeliyində olan ümumi təhsil müəssisələrində təlimlər keçirilib.    Təlimlər Gəncə şəhəri 4 nömrəli xarici dil təmayüllü məktəb-lisey və 8 nömrəli tam orta məktəb, Goranboy rayonu 1 nömrəli tam orta məktəb, Samux rayon İnstitut qəsəbə tam orta məktəb, Göygöl rayon 1 nömrəli tam orta məktəb, Daşkəsən rayon 1 nömərli tam orta məktəblərində təşkil olunub.   Layihənin əməkdaşları tərəfindən aparılan təlimlər "Fövqəladə hallar zamanı davranış və təhlükəsizlik qaydaları", “İlk tibbi yardımın göstərilməsi", "Məktəbdə təhlükəsizlik tədbirləri" mövzularını əhatə edib. Təlimlərə 7 və 8-ci sinif şagirdləri cəlb olunub. Təlim zamanı şagirdlərə tibbi yardım çantasına daxil olan dərman preparatları, yanğınsöndürmə balonundan və əleyhqazdan istifadə qaydaları əyani vəsaitlər vasitəsilə izah edilib.    Bununla yanaşı, "Məktəblinin dostu" layihəsinin Psixoloji Mərkəzi və Psixologiya Elmi-Tədqiqat İnstitunun psixoloqları tərəfindən 9-cu sinif şagirdləri üçün "Bacarıqlar və şəxsiyyət, "Yeniyətmələr üçün şəxsi inkişaf", "Art terapiya üsulları ilə şagirdlərin emosional inkişafı",  "Düzgün peşə seçimi" mövzusunda təlimlər həyata keçirilib. Təlimçilər art terapiya üsulu vasitəsilə mənfi təsirlərlə mübarizə, özünütanıma və potensialın aşkara çıxarılması yolları barədə danışıblar və şagirdlərlə bu mövzuda tapşırıqlar əsasında müzakirələr aparıblar.    Qeyd edək ki, silsilə təlimlərin digər bölgələrdə də keçirilməsi nəzərdə tutulur. Təlimlərin məqsədi ümumi təhsil müəssisələrinin kollektivini və şagirdləri məktəb təhlükəsizliyi, fövqəladə hallar zamanı davranış qaydaları, zədələnmələr və qəza zamanı ilk tibbi yardımın göstərilməsi, psixoloji dəstəklə bağlı düzgün istiqamətləndirmə mövzularında maarifləndirməkdən ibarətdir.   

07/06/2022 16:00

Təhsil Nazirliyinin təşkilatçılığı və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin təşəbbüsü və dəstəyi ilə ali təhsil müəssisələrinin rəhbər şəxsləri ilə görüş keçirilib.    Görüşün əsas məqsədi “SCOPUS”, “Web of Science” və digər beynəlxalq nəşr və jurnallarda məqalələrin yazılması və çap olunması istiqamətində bilik və təcrübələrin artırılması olub.   Tədbiri giriş sözü ilə açan Azərbaycan Texniki Universitetinin rektoru Vilayət Vəliyev qonaqları salamlayaraq tədbirin əhəmiyyətini vurğulayıb.   Təhsil Nazirliyinin Elm, ali və orta ixtisas təhsili şöbəsinin sektor müdiri Yaşar Ömərov çıxış edərək son dövrlər elmin inkişafı istiqamətində Təhsil Nazirliyi tərəfindən görülən işlər barədə məlumat verib və ölkəmizin beynəlxalq reytinq göstəricilərinin yüksəldilməsi üçün sözügedən Yol Xəritəsinin əhəmiyyətini qeyd edib.   Daha sonra Biznes Mühiti və Beynəlxalq Reytinqlər üzrə Komissiyasının “Texnologiya və innovasiya” üzrə İşçi qrupunun “Elmi nəşrlərlə bağlı beynəlxalq reytinq göstəricilərinin (H indeksi) yaxşılaşdırılması üzrə” alt qrupunun rəhbəri, Elektron Hökumətin İnkişafı Mərkəzinin direktoru Fariz Cəfərov "Elmi nəşrlərlə bağlı beynəlxalq reytinq göstəricilərinin yaxşılaşdırılması üzrə 2022-ci il üzrə Yol Xəritəsi"nin icrası istiqamətində görülmüş işlər barədə məlumat verib.   Tədbirdə həmçinin Bakı Dövlət Universitetinin elm və innovasiyalar üzrə prorektoru Hüseyn Məmmədov “Bakı Dövlət Universiteti tərəfindən uğurlu elmi nəşrlər istiqamətində görülmüş işlər barədə”, Bakı Mühəndislik Universitetinin elm və innovasiya üzrə prorektoru Elçin Süleymanov “Elm və ali təhsil müəssisələrinin beynəlxalq elmmetrik bazalarda korporativ profillərinin, fərdi səhifələrinin yaradılması”, Azərbaycan Universitetinin elmi və innovasiya üzrə prorektoru Yusif Qasımov “Elmi nəşrlərin hazırlanması (o cümlədən elmi jurnalların beynəlxalq elmi məlumat bazalarına uyğun indeksləşdirilməsi) sahəsində mövcud tələblərin beynəlxalq təcrübəyə uyğun olaraq təkmilləşdirilməsi”, Azərbaycan Dövlət İqtisad Universitetinin şöbə müdiri Emin Qəribli “Elm və ali təhsil müəssisələrinin differensial əmək haqqı sisteminin beynəlxalq təcrübəsi və onun tətbiqi imkanları”, Elmin İnkişafı Fondunun əməkdaşı Bəhruz Nəcəfov “Qrant Layihələrinin Elektron İdarəolunması Sistemi” mövzularında təqdimatlarla çıxış ediblər.   Görüşün sonunda mövzular ətrafında fikir mübadiləsi aparılıb.   Qeyd edək ki, tədbir 16 mart 2022-ci il tarixində Nazirlər Kabineti tərəfindən təsdiq olunmuş “Elmi nəşrlərlə bağlı beynəlxalq reytinq göstəricilərinin yaxşılaşdırılması ilə əlaqədar  Yol Xəritəsi”nin icrası çərçivəsində baş tutub.   Yüzdən çox iştirakçının qatıldığı tədbirdə 40-dan çox ali təhsil müəssisəsinin prorektor, müvafiq struktur bölmə rəhbəri, alimlər və gənc tədqiqatçılar iştirak ediblər.  

07/06/2022 14:30

13 iyun saat 11:00-dan etibarən 2022-2023-cü tədris ili üzrə tədris digər dillərdə aparılan siniflər üçün məktəb və müəllim seçiminə başlanılacaq. Belə ki, dövlət ümumi təhsil müəssisələrinin tədris digər dillərdə aparılan birinci siniflərinə qəbulla bağlı müsahibədən uğurla keçən uşaqlar üçün valideynləri tərəfindən qeyd edilən tarixdən məktəb və müəllim seçiminə dair sorğular yerləşdirilə bilər.   Həmin tarixdən rus bölməsi üzrə I siniflərinə qəbul müsabiqə yolu ilə aparılan ümumi təhsil müəssisələrinə qəbulla bağlı prioritetlər üzrə məktəb seçimi və prioritetlər üzrə üstünlüyə malik olmayanlar üçün müsabiqəyə yazılma (Bakı Avropa liseyi,  Respublika İncəsənət gimnaziyası, Bülbül adına orta ixtisas musiqi məktəbi də daxil olmaqla) prosesinə də başlanılacaq.   20 iyun saat 18:00-da isə rus bölməsi üzrə I siniflərinə qəbul müsabiqə yolu ilə aparılan ümumi təhsil müəssisələrinə müsabiqəyə yazılma prosesi bitir. 21-30 iyun tarixlərində də müsabiqələrin keçirilməsi planlaşdırılır. 5 iyul saat 11:00-dan etibarən isə I siniflərinə qəbul müsabiqə yolu ilə aparılan ümumi təhsil müəssisələrinin prioritetlər üzrə seçim etmiş və müsabiqədən uğurla keçən uşaqlar üçün müəllim seçiminin aparılması prosesinə başlanılacaq.

07/06/2022 12:26

İyunun 7-si saat 19:00-da “Yeni çağırışlar”müzakirə proqramının növbəti buraxılışı yayımlanacaq. Proqramın budəfəki qonağı TIMSS və PIRLS Beynəlxalq Təhsil Mərkəzinin icraçı direktoru, təhsildə qiymətləndirmə üzrə dünya şöhrətli professor İna Mullis olacaq. Professor ilə təhsildə qiymətləndirmə barəsində danışılacaq.    TIMSS və PIRLS beynəlxalq tədqiqat proqramlarının dünya səviyyəsində inkişafına liderlik edən İna Mullis 1994-cü ildən Boston Kollecində Təhsil departamentinin Təhsil tədqiqatları, ölçmə və qiymətləndirmə üzrə professorudur. PIRLS-in yaradıcılarından biridir.   Bildirək ki, PIRLS - Oxu Bacarığının İnkişafı üzrə Beynəlxalq Tədqiqa­tdır və 4-cü sinif şagirdlərini əhatə edir. TIMSS - Riyaziyyat və Təbiət Elmləri üzrə Beynəlxalq Qiymətləndirmə Proqramıdır. Bu proqramda 4-cü və 8-ci sinif şagirdlərinin riyaziyyat və elm bilikləri qiymətləndirilir.   Azərbaycan TIMSS və PIRLS beynəlxalq tədqiqat proqramında 2011-ci ildən iştirak edir.    Qeyd edək ki, Təhsil Nazirliyinin dəstəyi və “T-Network" platformasının təşkilatçılığı ilə davam edən proqram nazirliyin rəsmi “Facebook” səhifəsi üzərindən Azərbaycan dilinə tərcümə ilə canlı yayımlanacaq.

07/06/2022 10:15

İyunun 6-da 1 nömrəli Bakı Tibb kollecinin 120 illik yubileyinə həsr olunmuş tədbir keçirilib.   Dövlət Himni səsləndirildikdən sonra ümummilli lider Heydər Əliyevin və Azərbaycanın ərazi bütövlüyü uğrunda canını qurban vermiş şəhidlərin əziz xatirəsi bir dəqiqəlik sükutla yad edilib.   Tədbiri giriş sözü ilə açan səhiyyə naziri Teymur Musayev çıxışında kollecin yaradılması tarixindən və inkişaf yolundan danışıb. Nazir tibbi kollecin fəaliyyətində bir sıra tanınmış həkim-müəllimlərin, həmçinin görkəmli oftalmoloq-alim Zərifə xanım Əliyevanın mühüm rol oynadığını qeyd edib.   Azərbaycan Respublikasının Birinci vitse-prezidenti Mehriban xanım Əliyevanın tibb təhsilinin inkişafına, səhiyyə və tibb işçilərinə göstərdiyi diqqət və qayğıdan danışan səhiyyə naziri çıxışının sonunda kollec heyətinə uğurlar arzulayıb.    Azərbaycanda təhsil sisteminin tarixindən bəhs edən təhsil naziri Emin Əmrullayev 120 il ərzində kifayət qədər sürətli və uğurlu yol qət edildiyini bildirib. O zamanlar azərbaycanlı həkimlərin sayının az olduğunu qeyd edən təhsil naziri hazırda Azərbaycan Tibb Universitetinin, tibb kolleclərinin peşəkar tibb işçiləri yetişdirdiyini, xaricdə olan ali təhsil müəssisələrində ölkəmizi uğurla təmsil edən həkimlərimizin, alimlərimizin olduğunu diqqətə çatdırıb.   Kolleclərin fəaliyyətindən bəhs edən nazir həmin təhsil müəssisələrində tibb bacılarının yetişdirildiyini, bunun isə qızların təhsilə cəlb olunmasında xüsusi rol oynadığını vurğulayıb.   1 nömrəli Bakı Tibb kollecinin direktoru Nailə Əliyeva tibb ocağının tarixi və müasir dövrdə fəaliyyəti haqqında iştirakçılara ətraflı məlumat verib.    Daha sonra kollecin tarixi və fəaliyyətindən bəhs edən sənədli film nümayiş etdirilib. Həmçinin görkəmli oftalmoloq-alim, akademik Zərifə Əliyevanın həyat və fəaliyyəti haqqında hazırlanmış videoçarx təqdim olunub.   Sonda 1 nömrəli Bakı Tibb kollecinin bir sıra əməkdaşları Səhiyyə Nazirliyinin fəxri fərmanları ilə təltif olunublar.

06/06/2022 16:52

Nazirlər Kabineti tərəfindən təsdiq edilmiş müvafiq seçim meyarları və prosedurlar nəzərə alınmaqla, 2022-2023-cü tədris ili üçün “2022-2026-cı illər üzrə Dövlət Proqramı” çərçivəsində xarici ali təhsil müəssisələrində təhsil alacaq gənclərin seçimi üçün sənəd qəbulu açıq elan edilir. Sənəd qəbulu üçün son tarix 26 iyun 2022-ci il saat 23:59 müəyyən edilib. Sənəd qəbuluna dair müvafiq elan mətni ilə keçiddən tanış ola bilərsiniz. Proqrama müraciət üçün əsas şərtlərdən biri müəyyən olunmuş universitetlərin (siyahı)  birindən müvafiq prioritet sahə üzrə qəbul sənədinin əldə edilməsidir. Namizədlərin seçimi iki mərhələdə aparılacaq. İlk mərhələdə namizəd tələb olunan sənədlərin skan edilmiş surətini elektron ərizə sistemində “Şəxsi kabinet” yaradaraq əlavə edib və elektron ərizəni təsdiq etməlidir. Müvafiq seçim qaydalarının tələblərinə uyğun olan namizədlərin müraciətləri dəyərləndiriləcək və müsbət qiymətləndirilən namizədlər aidiyyəti üzrə növbəti mərhələyə buraxılacaq. Müsahibə mərhələsi Təhsil Nazirliyi, Azərbaycan Respublikası Dövlət Neft Fondunun nümayəndələri və müvafiq sahə üzrə ekspertin iştirakı ilə həyata keçiriləcək. Müsahibənin nəticəsinə uyğun olaraq, namizədlər haqqında yekun qərar veriləcək. Qeyd edək ki, Dövlət Proqramının hədəf göstəricisi 2022–2026-cı illərdə hər il 400 nəfərədək olmaqla, ümumilikdə isə 2000 nəfərədək Azərbaycan Respublikası vətəndaşının xarici ölkələrin nüfuzlu ali təhsil müəssisələrində təhsilinin təmin edilməsidir. Dövlət Proqramı çərçivəsində xarici ali təhsil müəssisələrində təhsil yerlərinin ən azı 80 faizi ali təhsilin magistratura səviyyəsini əhatə edəcək.

06/06/2022 16:20

Təhsil Nazirliyinin Həmkarlar İttifaqının təşkilatçılığı ilə Nazirliyin əməkdaşları arasında 28 May – Müstəqillik Gününə həsr olunmuş futbol turniri keçirilib.  Təhsil Nazirliyinin aparatının və tabe qurumların əməkdaşlarının iştirakı ilə 10 komandanın mübarizə apardığı  yarışların nəticələrinə görə, Təhsil İnstitutunun  “ARTİ” komandası I yerə, Nazirliyin aparatının əməkdaşlarından ibarət “Daxili nəzarət” və “ALL STAR” komandaları müvafiq olaraq II və III yerlərə layiq görülüblər. Qaliblər Təhsil Nazirliyinin Həmkarlar İttifaqı tərəfindən mükafatlandırılıb.  Qeyd edək ki, futbol turnirinin keçirilməsində məqsəd əməkdaşlar arasında komanda ruhunu gücləndirmək, onların asudə vaxtını birlikdə səmərəli təşkil etmək və  sağlam həyat tərzinə istiqamətləndirməkdən ibarətdir.  

06/06/2022 15:00