Aprelin 19-da elm və təhsil naziri Emin Əmrullayev Samux rayonunda vətəndaş qəbulu keçirib. Qəbulda Samux, Gəncə, Naftalan, Göygöl, Daşkəsən, Goranboy və Kəlbəcər sakinləri iştirak ediblər.    Qəbuldan əvvəl ulu öndər Heydər Əliyevin abidəsi ziyarət edilib, önünə gül dəstələri düzülüb.      Qəbul zamanı vətəndaşlar müəllimlərin işə qəbulu, həmçinin digər məsələlərlə bağlı müraciətlər ediblər.      Elm və təhsil naziri qəbula yazılmış vətəndaşları dinləyib, müraciətlərin operativ şəkildə araşdırılması, qaldırılan məsələlərin qanunvericiliyə uyğun həlli istiqamətində nazirliyin aidiyyəti qurumlarının rəhbərlərinə tapşırıqlar verib.

19/04/2024 15:23

Mayın 1-dən 2024–2025-ci tədris ili üzrə ümumi təhsil müəssisələrinin birinci siniflərinə şagird qəbuluna start veriləcək. Qəbul prosesi www.mektebeqebul.edu.az portalı vasitəsilə aparılacaq.      Elektron portalda 1 may tarixindən uşaqların qeydiyyatı, 3 maydan isə Azərbaycan bölməsi üzrə sorğuların yerləşdirilməsi (məktəb və müəllim seçimi) həyata keçiriləcək.     Mayın 3-dən 17-dək dövlət ümumi təhsil müəssisələrinin tədris digər dillərdə aparılan birinci siniflərinə qəbulla bağlı təşkil olunan müsahibəyə yazılmaq üçün qeydiyyat aparılacaq. Müsahibə uşaqların həmin dil üzrə şifahi nitq bacarıqlarının yoxlanılması məqsədilə keçirilir.   Birinci sinfə sənəd qəbulu 13 sentyabr tarixinədək davam edəcək.

19/04/2024 14:56

Aprelin 18-də Elm və Təhsil Nazirliyinin "Məktəblinin dostu" layihəsinin fəaliyyəti ilə bağlı tədbir keçirilib.    Tədbirdə elm və təhsil naziri Emin Əmrullayev, millət vəkilləri, həmçinin media qurumlarının rəhbər heyəti və digər qonaqlar iştirak ediblər.   Giriş nitqi ilə çıxış edən elm və təhsil nazirinin müşaviri Rüstəm Ağayev layihə barədə məlumat verib. Bildirilib ki, "Məktəblinin dostu" layihəsi 2016-cı ildən fəaliyyət göstərir və əhatə dairəsi genişləndirilərək bu tədris ilindən Gəncə, Lənkəran, Masallı və Cəlilabad şəhərlərində ümumilikdə 12 məktəbdə tətbiq olunur. Beləliklə də, layihə Bakı, Sumqayıt, Abşeron da daxil olmaqla hazırda ölkə üzrə 238 məktəbi əhatə edir.    Rüstəm Ağayev həmçinin qeyd edib ki, məktəblinin dostlarının əsas vəzifələri müəllimlər, şagirdlər üçün təhlükəsiz mühit yaratmaq, ilk tibbi və psixoloji yardım göstərmək, mütəmadi olaraq şagird, valideyn, təlim-tərbiyə müəssisələrinin kollektivi və rəhbərliyi ilə maarifləndirmə, diaqnostik işlər aparmaqdır.   Elm və təhsil nazirinin müşaviri Azər Abizadə çıxışında “Məktəblinin dostu” layihəsinin fəaliyyəti ilə bağlı aparılmış elmi araşdırmanın nəticələrini təqdim edib. Nazir müşaviri diqqətə çatdırıb ki, araşdırma çərçivəsində layihənin tətbiq olunduğu məktəblərdə şagird və valideynlər arasında sorğu aparılıb. Sorğular məktəblinin dostları tərəfindən şagirdlərə tibbi, psixoloji yardımın göstərilməsi, onlarda zərərli vərdişlərin aradan qaldırılması və digər istiqamətləri əhatə edib.    Sonra sözügedən layihənin fəaliyyətini əks etdirən videoçarx nümayiş olunub.    Daha sonra çıxış edən elm və təhsil naziri Emin Əmrullayev layihənin uğurlu təşəbbüslərdən biri olduğunu vurğulayıb. Nazir bildirib ki, təhsil müəssisələrində təhlükəsiz mühitin daha da təkmilləşdirilməsində məktəblinin dostlarının dəstəkləyici rolu təqdirəlayiqdir.    Ölkənin bütün ümumi təhsil müəssisələrində bu layihənin tətbiqinin arzuedilən  olduğunu deyən Emin Əmrullayev diqqətə çatdırıb ki, layihə gənclərin məşğulluğuna da müsbət təsir göstərir. Emin Əmrullayev həmçinin vurğulayıb ki, xüsusilə pedaqoji ixtisasları bitirən məzunlar üçün bu layihədə işləmək onların məktəb mühitində yaxşı təcrübə toplamaları və təhsil sahəsində karyeralarını qurmalarına şərait yaradır.   Sonda tədbir iştirakçılarının layihə ilə bağlı rəyləri dinlənilib və müzakirələr aparılıb.

18/04/2024 17:01

Aprelin 18-də  “Sabahın alimləri” XIII Respublika Müsabiqəsinin final mərhələsinin ikinci günü davam edir.    Final mərhələsində riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri üzrə 113  elmi-tədqiqat layihəsi iştirak hüququ qazanıb.    Qaliblər sırasından seçilən məktəblilər ABŞ-də keçirilən sərgidə ölkəmizi təmsil edəcəklər.

18/04/2024 14:10

Aprelin 17-də “Sabahın alimləri” XIII Respublika Müsabiqəsinin final mərhələsinin açılış mərasimi keçirilib.   Tədbir Dövlət Himninin səsləndirilməsi ilə başlayıb.    Açılış mərasimində elm və təhsil naziri Emin Əmrullayev, gənclər və idman nazirinin müavini İndira Hacıyeva, millət vəkilləri, həmçinin media qurumlarının, özəl müəssisələrin rəhbər heyəti və digər qonaqlar iştirak ediblər.   Giriş nitqi ilə çıxış edən Təhsil İnstitutunun direktor müavini, layihə direktoru Fuad Qarayev müsabiqənin statistik göstəriciləri ilə bağlı hesabat təqdim edib. Fuad Qarayev 8 istiqamət üzrə qeydiyyatdan keçən, qəbul olunan və qiymətləndirilən layihələr barədə ətraflı məlumat verib.    Qeyd edilib ki, müsabiqə üzrə qeydiyyatdan keçən 652 layihədən 113-ü sərgidə iştirak hüququ qazanıb.   Elm və təhsil naziri Emin Əmrullayev çıxışında tədbir iştirakçılarını salamlayıb və müsabiqədə iştirak edən şagirdlərə uğurlar arzulayıb.    2012-ci ildən keçirilən müsabiqəyə ölkə miqyasında marağın ildən-ilə artmaqda olduğunu vurğulayan nazir müasir təfəkkürlü və yaradıcı düşüncəli gənclərin bilik və bacarıqlarının üzə çıxarılması, onların yüksək standartlara uyğun tədqiqatçı-mütəxəssis kimi formalaşmasında onun mühüm rolundan danışıb.   Gənclər və idman nazirinin müavini İndira Hacıyeva da öz növbəsində layihə finalçılarına müvəffəqiyyətlər arzulayıb. Nazir müavini bildirib ki, layihələrin keyfiyyətinin yaxşılaşdırılması istiqamətində böyük nailiyyətlər əldə edilir.   Daha sonra müsabiqə ilə bağlı videoçarx nümayiş etdirilib.    Tədbirin rəsmi hissəsindən sonra qonaqlar finalçıların əl işləri ilə tanış olublar.    Qeyd edək ki, müsabiqədə növbəti 2 gün ərzində şagirdlərin 8 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri) üzrə elmi-tədqiqat layihələri dəyərləndiriləcək. Bununla yanaşı, qaliblər sırasından seçilən məktəblilər ABŞ-də keçirilən sərgidə ölkəmizi təmsil edəcəklər.    Müsabiqənin keçirilməsində məqsəd elmi-tədqiqat və yaradıcılıq potensialı olan istedadlı şagirdləri aşkara çıxarmaq, onlarda tənqidi düşünmə, problem həlletmə, vaxtın idarə olunması, natiqlik və ünsiyyət kimi bacarıqları inkişaf etdirmək, ali təhsil müəssisələri və elmi təşkilatlarla ümumtəhsil məktəbləri arasında əlaqələri genişləndirmək, həmçinin şagirdlərin oxşar maraqları olan həmyaşıdları ilə şəbəkələşməsini təmin etməkdir.

17/04/2024 15:05

Aprelin 16-da elm və təhsil naziri Emin Əmrullayev UNICEF-in Azərbaycan Respublikasındakı nümayəndəsi Saca Faruq Abdulla ilə görüşüb.   Görüş zamanı Elm və Təhsil Nazirliyi ilə UNICEF tərəfindən həyata keçirilən layihələr, həmçinin əməkdaşlıq perspektivləri ətrafında fikir mübadiləsi aparılıb.

16/04/2024 17:28

Aprelin 1-dən 15-dək Elm və Təhsil Nazirliyi, eləcə də qurumlarına 24 057 vətəndaş müraciəti daxil olub.   Müraciətlərin 16 447-si çağrı mərkəzləri, 584-ü sosial media, 2 779-u "WhatsApp" vasitəsilə, 868-i elektron, 856-sı yazılı formada yönləndirilib. Vətəndaş qəbulu zamanı isə 2 523 müraciət qeydə alınıb.    Müraciətlər doktoranturaya qəbul qaydaları, əlavə təhsil, tələbələrin köçürülməsi, müəllimlərin yerdəyişməsi, lisey və gimnaziyalara qəbul prosesi, məktəbəhazırlıq qruplarına qeydiyyat, sertifikatlaşdırma və digər məsələlərlə bağlı olub.

16/04/2024 16:22

Aprelin 16-da saat 11:00-dan portal.edu.az vasitəsilə ali təhsil pilləsinin doktorantura səviyyəsinə sənəd qəbulu prosesinə başlanılır.   Sözügedən xidmət sayəsində Təhsil Mərkəzləşdirilmiş İnformasiya Sisteminə qoşulmuş ali təhsil müəssisələrinə, elmi müəssisə və təşkilatlara doktorantura üzrə qəbul olmaq istəyənlər “Şəxsi kabinet” vasitəsilə elektron formada müraciət edə, cari status və növbəti addımları izləyə biləcəklər. Müraciətlərinə müəssisələr tərəfindən müsbət rəy verilən şəxslər xarici dil imtahanında iştirak hüququ qazanacaqlar.    Sənəd qəbulu prosesi mayın 15-i saat 18:00-da başa çatacaq.

16/04/2024 11:00

Elm və Təhsil Nazirliyi, Azərbaycan Təhsil İşçiləri Azad Həmkarlar İttifaqı Respublika Komitəsi, Azərbaycan Həmkarlar İttifaqları İdman Təşkilatları İctimai Birliyinin dəstəyi, “Gənclik” Tələbə İdman Cəmiyyəti Respublika Şurasının təşkilatçılığı ilə ali təhsil müəssisələrinin tələbələri arasında keçirilən stolüstü tennis idman növü üzrə çempionata yekun vurulub.   Yarışlarda oğlanlardan ibarət 12, qızlardan ibarət 11 ali təhsil müəssisəsinin komandaları mübarizə aparıblar.   Çempionatın nəticələrinə əsasən, oğlan komandaları arasında I yeri Azərbaycan Dövlət Bədən Tərbiyəsi və İdman Akademiyası, II yeri Bakı Ali Neft Məktəbi, III yeri Azərbaycan Tibb Universiteti, qızlar arasında isə I yeri Azərbaycan Dövlət Bədən Tərbiyəsi və İdman Akademiyası, II yeri Azərbaycan Dövlət Neft və Sənaye Universiteti, III yeri Gəncə Dövlət Universitetinin komandaları tutublar.   Qaliblər təşkilatçılar tərəfindən kubok, medal və diplomla təltif olunublar.  

15/04/2024 17:07

Aprelin 12-də Bakıda 3-cü Beynəlxalq Təcrübə Əsaslı Öyrənmə Konfransının açılış mərasimi olub.   Tədbirdə çıxış edən elm və təhsil nazirinin müavini Kənan Kərimzadə təqdimatında “Azərbaycan Respublikasının 2022–2026-cı illərdə sosial-iqtisadi inkişaf Strategiyası”na uyğun olaraq, təhsilin qarşısında duran vəzifə və hədəflərdən, həmçinin son dövrlərdə Elm və Təhsil Nazirliyi tərəfindən aparılan işlərdən danışıb. Kənan Kərimzadə qeyd edib ki, hazırda əsas təhsil hədəfləri sırasında ölkəmizin beynəlxalq qiymətləndirmələrdə mövqeyinin yaxşılaşdırılması və 3 universitetimizin ilk 800-lükdə təmsilinə nail olmaq yer alır.   Avropa Azərbaycan Məktəbinin baş direktoru Françesko Bançini çıxışında bildirib ki, konfransın məqsədi təhsil liderlərindən ən müasir yanaşmaları öyrənmək, təhsil sahəsinə dair müzakirələr aparmaq, yeni ideya və strategiyaları araşdırmaqdır. Baş direktor həmçinin konfransda Qazaxıstan, Özbəkistan, Gürcüstan, Türkiyə və digər ölkələrdən nümayəndələrin iştirak etdiyini vurğulayıb və tədbir çərçivəsində həm beynəlxalq, həm də yerli səviyyədə bilik və təcrübə mübadiləsi aparılacağını diqqətə çatdırıb.   Qeyd edək ki, təhsil mütəxəssisləri, eləcə də direktor və müəllimlərin iştirakı ilə keçirilən konfransda 3 gün ərzində 60-dan çox seminar təşkil olunacaq.

12/04/2024 16:21