Aprelin 25-də Azərbaycan Respublikasının Prezidenti İlham Əliyev və Qırğız Respublikasının Prezidenti Sadır Japarov Ağdam rayonunun Xıdırlı kənd tam orta məktəbinin birgə təməlqoyma mərasimində iştirak ediblər.   Dövlət başçılarına layihə barədə məlumat verildi.   Bildirildi ki, Xıdırlı kənd tam orta məktəbinin inşası üçün 2,7 hektar ərazi ayrılıb. İki yerüstü və bir yeraltı mərtəbədən ibarət olacaq binada 22 kabinet yaradılacaq. Məktəbdə, həmçinin idman və akt zalları, 2 əmək kabineti, kitabxana, fizika, kimya və biologiya laboratoriyaları, 2 informatika kabineti, ilkin hərbi hazırlıq kabineti istifadəyə veriləcək. Məktəbin ərazisində idman meydançası, köşk, kiçik skamyalar, qazanxana yaradılacaq. Tikinti işlərinin 2024-cü ilin sonunadək başa çatdırılması planlaşdırılır.   Azərbaycan Prezidenti İlham Əliyev və Qırğızıstan Prezidenti Sadır Japarov Xıdırlı kənd tam orta məktəbinin təməlini qoydular.   Qeyd edək ki, Azərbaycan və qırğız xalqları arasında tarixən ənənəvi dostluq və qardaşlıq əlaqələri mövcud olub. İki ölkənin möhkəm təməllər üzərində qurulan münasibətləri yüksələn xətlə inkişaf edir. Qırğızıstan Prezidentinin təşəbbüsü ilə Qırğızıstan dövləti adından Ağdamın Xıdırlı kəndində tam orta məktəb binasının inşası iki ölkə arasında sarsılmaz qardaşlıq münasibətlərinin göstəricisidir.   https://president.az

25/04/2024 14:42

Aprelin 24-də Qırğız Respublikasının Prezidenti Sadır Japarovun rəhbərlik etdiyi nümayəndə heyətinin Azərbaycana səfəri çərçivəsində elm və təhsil naziri Emin Əmrullayev Qırğız Respublikasının təhsil və elm naziri Doqdurkul Kendirbayeva ilə görüşüb.    Görüş zamanı “Azərbaycan Respublikası Hökuməti ilə Qırğız Respublikası Nazirlər Kabineti arasında təhsil və elm sahəsində əməkdaşlıq haqqında Saziş”dən irəli gələn tədbirlərin icrası ilə bağlı məsələlərə dair fikir mübadiləsi aparılıb.    Görüşdə həmçinin iki ölkə arasında elm və təhsil sahəsində əməkdaşlığın cari vəziyyəti və inkişaf perspektivləri müzakirə olunub.

24/04/2024 19:02

Aprelin 24-də Azərbaycan Respublikasının Prezidenti İlham Əliyevin və Qırğız Respublikasının Prezidenti Sadır Japarovun iştirakı ilə Azərbaycan–Qırğızıstan sənədlərinin imzalanması mərasimi olub.   Mərasim zamanı Azərbaycan Respublikasının elm və təhsil naziri Emin Əmrullayev və Qırğız Respublikasının təhsil və elm naziri Doqdurkul Kendirbayeva “Azərbaycan Respublikası Hökuməti ilə Qırğız Respublikası Nazirlər Kabineti arasında təhsil və elm sahəsində əməkdaşlıq haqqında Saziş”i imzalayıblar.   Sazişə əsasən, tərəflər təhsil müəssisələri arasında birbaşa əlaqələrin qurulmasını və inkişafını, təcrübə mübadiləsini təşviq edəcəklər, eləcə də qarşılıqlı maraq doğuran sahələrdə ikitərəfli əməkdaşlığı gücləndirmək məqsədilə müəllim, tədqiqatçı, alim və digər təhsil işçilərinin səfərlərini həyata keçirəcəklər.   Saziş çərçivəsində eyni zamanda hər iki tərəf milli qanunvericiliklərinə uyğun və qarşılıqlılıq əsasında digər dövlətin vətəndaşlarına öz ölkəsinin universitetlərində təhsil almaq üçün bakalavriat proqramları üzrə hər il 5 kvota yeri ayıracaq.

24/04/2024 16:39

Aprelin 27-də IX və X sinif şagirdləri arasında təşkil olunan “Qərbi Azərbaycana qayıdış” olimpiadasının rayon (şəhər) mərhələsi keçiriləcək. Olimpiadanın ilkin mərhələsində 10 minə yaxın şagird iştirak edəcək.    İlkin mərhələdə şagirdlərə qapalı test formatında 30 sual təqdim ediləcək və onların cavablandırılması üçün 70 dəqiqə vaxt veriləcək. Bu mərhələnin nəticələri əsasında olimpiadanın regional mərhələsində iştirak edəcək şagirdlər müəyyən olunacaq.    Olimpiadanın final mərhələsinin iyun ayında Naxçıvan Muxtar Respublikasında keçirilməsi planlaşdırılır.    Qeyd edək ki, olimpiada Elm və Təhsil Nazirliyi, Naxçıvan Muxtar Respublikasının Təhsil Nazirliyi, Təhsil İnstitutu, Qərbi Azərbaycan İcması və Naxçıvan Dövlət Universitetinin tərəfdaşlığı ilə həyata keçirilir.    Olimpiadanın təşkilində məqsəd şagirdlər arasında Qərbi Azərbaycanın tarixi, coğrafiyası, mədəniyyəti, ədəbiyyatı, görkəmli ictimai xadimləri, tarixi şəxsiyyətləri, toponimləri, folkloru haqqında maarifləndirmə işlərini aparmaq və biliklərin dərindən öyrənilməsini təmin etməkdir.

24/04/2024 12:55

Elm və Təhsil Nazirliyinin təşəbbüsü, Məktəbəqədər və Ümumi Təhsil üzrə Dövlət Agentliyinin təşkilatçılığı ilə “Zəfər” respublika yaradıcılıq festival-müsabiqəsinə start verilib.    Festival-müsabiqənin keçirilməsində məqsəd milli mədəniyyət və incəsənətin təbliği, uşaqları vətənpərvərlik, adət-ənənələrə hörmət ruhunda tərbiyə etmək, Vətən müharibəsində şəhid olmuş qəhrəmanlarımızın əziz xatirəsini ehtiramla anmaq, Azərbaycan ordusunun Vətən müharibəsində zəfər yürüşü, şanlı qələbəsi və dünya hərb tarixində açdığı yeni səhifə ilə bağlı uşaq və gəncləri maarifləndirməkdir.   Festival-müsabiqə ümumtəhsil məktəbləri, lisey və gimnaziyaların (uşaq musiqi və incəsənət məktəbləri istisna olmaqla) istedadlı şagirdləri arasında üç yaş qrupunda (6-10, 11-14 və 15-17) aşağıdakı istiqamətlər üzrə keçirilir: ifa üzrə respublika müsabiqəsi; rəqs üzrə respublika müsabiqəsi; təsviri incəsənət və dekorativ-tətbiqi sənət üzrə respublika müsabiqəsi; dram üzrə respublika müsabiqəsi. Festival-müsabiqə aşağıdakı mərhələlər üzrə keçirilir:   Rayon (şəhər) mərhələsi: 15 – 30 aprel tarixlərində keçirilir. Regional təhsil idarələrinin təşkilatçılığı ilə rayon və şəhərlərdə yaradılmış münsiflər heyətinin iştirakı əsasında şagirdlərin seçimi aparılır. Rayon (şəhər) mərhələsində I yerin qalibi olanlar zona mərhələsində iştirak etmək hüququ qazanırlar.  Zona mərhələsi: 2024-cü ilin may ayında keçirilir. Rayon və şəhərlər üzrə I yerlərin qalibləri zona mərhələsində iştirak etmək hüququ qazanırlar. Qaliblər haqqında protokollar zona mərhələsi keçirilən regional təhsil idarəsində yaradılmış təşkilat komitəsinə təqdim edilir.     Final mərhələsi: cari ilin may ayında Bakı şəhərində keçiriləcək. Nominasiya və yaş qrupları üzrə I yerin qalibləri final mərhələsində iştirak etmək hüququ qazanırlar.    Qaliblərin mükafatlandırılması və yekun tədbir 2024-cü ilin oktyabr ayında Bakı şəhərində keçiriləcək.    Qeyd edək ki, yaş qrupu və nominasiyalar üzrə I, II və III yerlərin qalibləri Elm və Təhsil Nazirliyinin fəxri fərmanı və hədiyyələrlə mükafatlandırılacaqlar.    Müsabiqə ilə bağlı sual yaranarsa, qeyd edilən telefon nömrələri ilə əlaqə saxlanıla bilər: (012) 539 21 06; (012) 421 54 66; (012) 597 13 42; (012) 472 72 63.

24/04/2024 10:22

Cari ilin aprel–iyun aylarında Elm və Təhsil, Gənclər və İdman nazirliklərinin birgə qərarı ilə “Məktəblilərin respublika çempionatı” keçiriləcək.  Çempionatın keçirilməsində məqsəd bədən tərbiyəsi və idmanı şagirdlər arasında kütləviləşdirmək, fiziki tərbiyə fənninin tədrisini təkmilləşdirmək, şagirdlər arasında sağlam, aktiv həyat tərzini təşviq etmək, sinifdənxaric və məktəbdənkənar işi yaxşılaşdırmaq, idmançıların yarış təcrübələrini artırmaq, olimpiya idman kompleksləri və idman bazalarından səmərəli istifadəni təmin etməkdir. “Məktəblilərin respublika çempionatı” ağırlıqqaldırma, cüdo, sərbəst güləş, yunan-Roma güləşi, taekvondo idman növləri üzrə beynəlxalq idman federasiyalarının təsdiq etdiyi qaydalara əsasən keçirilir.  Ağırlıqqaldırma: 2007–2011-ci il təvəllüdlü oğlanlar arasında 24–26 may tarixlərində 1 mərhələ (final) üzrə keçiriləcək;    Cüdo: 2012–2014-cü il təvəllüdlü oğlan və qızlar arasında 2 mərhələ üzrə keçirilir. Zona mərhələsi aprel–may aylarında, final mərhələsi 8–10 iyun tarixlərində təşkil olunacaq;     Sərbəst güləş, yunan-Roma güləşi: 2010–2012-ci il təvəllüdlü oğlanlar arasında 2 mərhələ üzrə keçirilir. Zona mərhələsi aprel–may aylarında, final mərhələsi 4–7 iyun tarixlərində təşkil olunacaq;    Taekvondo: 2007–2008, 2009–2010-cu il təvəllüdlü oğlan və qızlar arasında 20–23 may tarixlərində 1 mərhələ (final) üzrə keçiriləcək. Çempionatda müvafiq idman növləri üzrə yarışların proqramında qeyd olunan yaş və çəki dərəcələrinə uyğun bütün rayon və şəhər ümumi təhsil müəssisələrinin şagirdləri iştirak edə bilərlər.

23/04/2024 18:30

16–21 aprel tarixlərində Bolqarıstanın Şumen şəhərində informatika fənni üzrə turnir keçirilib.   Məktəblilərimiz sözügedən turnirə Azərbaycan Texniki Universitetinin laboratoriyalarından onlayn formada qoşulublar.   Şagirdlərimiz yarışda uğurla çıxış edərək 5 gümüş və 5 bürünc olmaqla ümumilikdə 10 medal qazanıblar.

22/04/2024 18:00

Müəllimlərin iş yerinin dəyişdirilməsi müsabiqəsinin növbəti vakansiya seçimi mərhələsinə 23 aprel saat 11:00-da start veriləcək. Qeyd olunan tarixdə keçiriləcək vakansiya seçimində müsabiqə üzrə qeydiyyatdan keçmiş və elektron ərizəsi qəbul olunmuş müəllimlər iştirak edə bilərlər.   Vakansiya seçimi üçün elektron sistem 29 aprel saat 11:00-dək aktiv olacaq.   Xatırladaq ki, 17–19 aprel tarixlərində keçirilmiş vakansiya seçimi mərhələsində 14 nəfər şəhid ailəsinin üzvü olan müəllim iş yerini dəyişdirmək imkanı qazanıb.

22/04/2024 17:00

Elm və Təhsil Nazirliyi, Azərbaycan Təhsil İşçiləri Azad Həmkarlar İttifaqı Respublika Komitəsi, Azərbaycan Həmkarlar İttifaqları İdman Təşkilatları İctimai Birliyinin dəstəyi, “Gənclik” Tələbə İdman Cəmiyyəti Respublika Şurasının təşkilatçılığı ilə ali təhsil müəssisələrinin tələbələri arasında keçirilən voleybol idman növü üzrə çempionata yekun vurulub.   Yarışlarda 10 ali təhsil müəssisəsinin qızlardan ibarət komandaları mübarizə aparıblar.   Çempionatın nəticələrinə əsasən, I yeri Azərbaycan Dövlət Bədən Tərbiyəsi və İdman Akademiyası, II yeri Azərbaycan Dövlət İqtisad Universiteti, III yeri Bakı Dövlət Universitetinin komandaları tutublar.   Qaliblər təşkilatçılar tərəfindən kubok, medal və diplomla təltif olunublar.

22/04/2024 14:14

Aprelin 19-da “Sabahın alimləri” XIII Respublika Müsabiqəsinin final mərhələsinin bağlanış mərasimi keçirilib.   Mərasimdə elm və təhsil nazirinin müavini Firudin Qurbanov qalibləri təbrik edib və onlara gələcək elmi fəaliyyətlərində nailiyyətlər arzulayıb.   Bağlanış mərasimində iştirak edən gənclər və idman nazirinin müavini İndira Hacıyeva layihənin əhəmiyyətindən danışıb, finalçılara uğurlar arzulayıb.    Bakı Ali Neft Məktəbinin rektoru Elmar Qasımov öz növbəsində tədbirə ev sahibliyi etməkdən böyük məmnunluq hissi keçirdiyini bildirib və finalçıları təbrik edib.    Daha sonra müsabiqə çərçivəsində hazırlanan videoçarx nümayiş olunub.   Tədbirdə 1, 2 və 3-cü yerlərin qaliblərinə diplom və medallar, fərqlənən şagirdlərə xüsusi mükafatlar, iştirakçıların hər birinə sertifikatlar təqdim olunub. Qalib layihələrin elmi rəhbərlərinə isə təşəkkürnamələr veriləcək.    Qeyd edək ki, müsabiqə Elm və Təhsil Nazirliyi, Gənclər və İdman Nazirliyi, Təhsil İnstitutu, Heydər Əliyev Mərkəzi, Azərbaycan Təhsil İşçiləri Azad Həmkarlar İttifaqı Respublika Komitəsi və Azərbaycan Milli Elmlər Akademiyasının təşkilatçılığı ilə keçirilib.

19/04/2024 18:00