Mayın 11-dən 2023-2024-cü tədris ili üzrə ümumi təhsil müəssisələrinin birinci siniflərinə şagird qəbuluna start verilir. Qəbul prosesi www.mektebeqebul.edu.az elektron portalı vasitəsilə aparılacaq.     Belə ki, 11 may saat 11:00-dan etibarən elektron portalda uşaqların qeydiyyatı, 15 may saat 11:00-dan etibarən isə Azərbaycan bölməsi üzrə sorğuların yerləşdirilməsi (məktəb seçimi) həyata keçiriləcək.    15 may saat 11:00-dan 31 may saat 18:00-a qədər dövlət ümumi təhsil müəssisələrinin tədris digər dillərdə aparılan birinci siniflərinə qəbulla bağlı uşaqların həmin dil üzrə şifahi nitq bacarıqlarının yoxlanılması məqsədilə təşkil olunan müsahibəyə yazılmaq üçün qeydiyyat aparılacaq.    Qəbul prosesi ilə bağlı digər mərhələlər barədə məlumat veriləcək. Elm və Təhsil Nazirliyinin ümumi və məktəbəqədər təhsil məsələləri üzrə Vətəndaşlara Xidmət Mərkəzi

11/05/2023 09:00

Elm və təhsil naziri Emin Əmrullayev ümummilli lider Heydər Əliyevin 100-cü ildönümü münasibətilə xaricdə təhsil üzrə dövlət proqramları çərçivəsində Böyük Britaniyada təhsil alan bir qrup azərbaycanlı tələbə ilə görüşüb. Görüş həmçinin təhsil və gələcək imkanlarla bağlı fikir mübadiləsi aparmaq məqsədilə təşkil edilib.   Görüşdə həm sovet dönəmində, həm də müstəqillik illərində Heydər Əliyevin azərbaycanlı tələbələrin dövrün ən yaxşı universitetlərində təhsil almalarına dəstək olduğu xüsusi vurğulanıb. Qeyd edilib ki, Azərbaycanın gələcəyi naminə başlıca olaraq təhsilə diqqət ayrılması ulu öndərin irsinin mühüm hissəsi olaraq hələ də davam edir.

10/05/2023 21:00

Mayın 9-da Lordlar Palatasında elm və təhsil naziri Emin Əmrullayev, Böyük Britaniya Baş nazirinin Azərbaycan üzrə ticarət elçisi Baronessa Emma Nikolson və ölkəmizin Böyük Britaniyadakı səfiri Elin Süleymanovun iştirakı ilə görüş keçirilib.   Görüşün məhz ümummilli lider Heydər Əliyevin anadan olmasının 100-cü ildönümünə təsadüf etməsinin rəmzi məna daşıdığı vurğulanıb.    Görüşdə həmçinin iki ölkə arasında təhsil sahəsində əməkdaşlıqdan məmnunluq ifadə edilib, xaricdə təhsil üzrə dövlət proqramları çərçivəsində Böyük Britaniya ali təhsil müəssisələrinin Azərbaycan vətəndaşlarının üstünlük verdiyi universitetlər siyahısında yer aldığı bildirilib. Bununla yanaşı, ümumi, ali təhsil və tədqiqat sahələrində əməkdaşlığın inkişaf perspektivləri üzrə fikir mübadiləsi aparılıb.

10/05/2023 14:28

Mayın 10-da ümummilli lider Heydər Əliyevin anadan olmasının 100-cü ildönümü münasibətilə Elm və Təhsil Nazirliyinin kollektivi Fəxri xiyabanda ulu öndərin məzarını ziyarət edib, önünə gül dəstələri qoyaraq xatirəsini ehtiramla yad edib.   Görkəmli oftalmoloq-alim, akademik Zərifə xanım Əliyevanın xatirəsi də ehtiramla yad edilib, məzarı önünə tər çiçəklər düzülüb.

10/05/2023 14:08

Mayın 8-də Rusiya Federasiyasının Həştərxan vilayətində səfərdə olan Azərbaycan Respublikasının Baş nazirinin müavini Şahin Mustafayevin başçılıq etdiyi nümayəndə heyəti ulu öndər Heydər Əliyevin anadan olmasının 100 illiyinə həsr olunmuş bir sıra tədbirlərdə iştirak edib.   Əvvəlcə Azərbaycan nümayəndə heyətinin üzvləri ümummilli lider Heydər Əliyevin adını daşıyan xiyabanda onun abidəsini ziyarət edərək önünə gül dəstələri qoyublar. Sonra nümayəndə heyətinin üzvləri xiyabanda Heydər Əliyevin 100 illik yubileyi ilə əlaqədar ağaclar əkiblər.   Nümayəndə heyəti Həştərxan vilayətinin qubernatoru İqor Babuşkin və vilayətin rəhbər şəxsləri ilə görüş keçirib.    Sonra qonaqlar “Əbədi məşəl” memorialını ziyarət edib, İkinci Dünya müharibəsi qəhrəmanlarının xatirəsini anıb və memorialın önünə gül dəstələri qoyublar.   Azərbaycan nümayəndə heyəti Heydər Əliyev adına 11 nömrəli ümumi orta məktəbdə də olub, ulu öndərə həsr edilmiş sərgiyə baxış keçiriblər.    Qonaqlara məktəbin fəaliyyəti haqqında məlumat verilib, təhsil ocağından bəhs edən videoçarx nümayiş etdirilib. Sonra ümummilli liderin 100 illik yubileyi münasibətilə beş nominasiya üzrə keçirilən müsabiqənin qaliblərinə mükafatlar təqdim olunub.   Həmin gün ulu öndər Heydər Əliyevin anadan olmasının 100 illiyinə həsr olunmuş “Azərbaycan Respublikası və Həştərxan vilayəti arasında ticari-iqtisadi və humanitar əməkdaşlıq: müasir vəziyyət və perspektivlər” adlı konfrans keçirilib.   Konfransı giriş nitqi ilə açan Həştərxan vilayətinin vitse-qubernatoru Pavel Pautov qeyd edib ki, konfrans sahibkarlara iqtisadi əlaqələr qurmağa və bütün istiqamətlər üzrə qarşılıqlı fəaliyyətləri genişləndirməyə imkan verəcək.    Konfransda çıxış edən Baş nazirin müavini Şahin Mustafayev Azərbaycan xalqının ümummilli lideri Heydər Əliyevin 100 illik yubileyinə həsr olunmuş tədbirlərin təşkilinə görə Həştərxan vilayəti hökumətinə təşəkkürünü bildirib və bu təşəbbüsü xalqlarımız arasında dostluğun daha bir təzahürü kimi qiymətləndirib.    Konfransda çıxış edən elm və təhsil nazirinin müavini Firudin Qurbanov ümummilli lider Heydər Əliyevin Azərbaycanda təhsil sahəsinə xüsusi diqqət ayırdığını qeyd edib.    Azərbaycan və Həştərxanın ali təhsil müəssisələri arasında əməkdaşlığın fəal şəkildə inkişaf etdirildiyini vurğulayan nazir müavini Həştərxan Dövlət Universiteti ilə Bakı Dövlət Universiteti, eləcə də Azərbaycan Dövlət İqtisad Universiteti ilə Bakı Slavyan Universiteti arasında ikili diplom proqramlarının təsis olunması haqqında müzakirələrin aparıldığını diqqətə çatdırıb.    Firudin Qurbanov xatırladıb ki, Rusiya hər il azərbaycanlı tələbələrin təhsili üçün kvota ayırır, Bakıda isə Rusiyanın iki universitetinin – Moskva Dövlət Universiteti və İ.M.Seçenov adına Moskva Dövlət Tibb Universitetinin filialları fəaliyyət göstərir.   Konfransda çıxış edən Həştərxan vilayətinin sənaye, ticarət və energetika nazirinin müavini Mixail Kabakov, Azərbaycanın iqtisadiyyat nazirinin müavini Sahib Ələkbərov da konfransın mövzusu ilə bağlı fikirlərini bölüşüblər.    Konfransdan sonra Azərbaycan nümayəndə heyəti Xəzər Dəniz və Çay Nəqliyyatı İnstitutunda, Federal Dövlət Büdcə Təhsili Müəssisəsinin filialı olan Volqa Dövlət Su Nəqliyyatı Universitetində olub.    Tədbirlər ulu öndər Heydər Əliyevin 100 illiyinə həsr olunmuş konsert proqramı ilə başa çatıb.

09/05/2023 17:00

Elm və təhsil naziri Emin Əmrullayevin rəhbərlik etdiyi nümayəndə heyətinin London şəhərində ənənəvi formatda keçirilən Dünya Təhsil Forumunda iştirakı davam edir.   Emin Əmrullayev forumun “Davamlılığın inkişafında təhsil və təhsil sistemlərinin inkişafında davamlılıq hansı rola malikdir?” adlı 7-ci plenar sessiyasında çıxış edib.   Nazir təhsilin davamlılığı baxımından görülən işlər, xüsusilə işğaldan azad olunmuş ərazilərdə tədrisin bərpası haqqında forum iştirakçılarını məlumatlandırıb.

09/05/2023 15:20

Dünya Təhsil Forumunda iştirak edən elm və təhsil naziri Emin Əmrullayevin iştirakı ilə ikitərəfli görüşlər keçirilib.    Emin Əmrullayev Qazaxıstan Respublikasının elm və ali təhsil naziri Nurbek Sayasat və Özbəkistan Respublikasının məktəbəqədər və ümumtəhsil naziri Xilola Umarova ilə görüşüb.

08/05/2023 18:02

“Dizayn təfəkkürü vasitəsilə daha güclü, daha cəsarətli, daha yaxşı təhsil üçün öyrənmə mədəniyyətinin təkmilləşdirilməsi, dözümlülüyün formalaşdırılması və dayanıqlılığın təşviq edilməsi” devizi altında təşkil edilən Dünya Təhsil Forumu öz işinə başlayıb.   Londonda keçirilən forum çərçivəsində dünya təhsilinin qarşısında duran əsas çətinlik və çağırışlar, onların həlli yolları müzakirə ediləcək. Forumda həmçinin öyrənmə prosesi, insanlar, müəssisə və təhsil sistemləri arasında qarşılıqlı anlaşma məsələlərinə toxunulacaq.   Sessiyalarda bilik, bacarıq, münasibət və dəyərlərin inkişafına yönələn siyasət, liderliyin əhəmiyyəti və təhsilin əsas məqsədləri üçün texnologiya dəstəyi müzakirə olunacaq.   Ümumi təhsil müzakirələrinin gündəliyində təhsilin davamlılığı, onun anlama prosesi və qlobal davamlılığa töhfə verməsi də əks olunacaq.     Qeyd edək ki, Dünya Təhsil Forumunda ölkəmizi elm və təhsil naziri Emin Əmrullayevin rəhbərlik etdiyi nümayəndə heyəti təmsil edir.   Forum çərçivəsində Emin Əmrullayevin “Davamlılığın inkişafında təhsil və təhsil sistemlərinin inkişafında davamlılıq hansı rola malikdir?” adlı 7-ci plenar sessiyada çıxışı nəzərdə tutulur. Bununla yanaşı, elm və təhsil nazirinin iştirakı ilə ikitərəfli işgüzar görüşlərin keçirilməsi planlaşdırılır.

08/05/2023 17:00

“Bir Könüllü” Tələbələrin Əməkdaşlığı İctimai Birliyi və Vətəndaş Cəmiyyətində Debat İctimai Birliyinin təşkilatçılığı ilə pedaqoji və təhsilyönümlü ixtisaslarda oxuyan tələbələr arasında təhsil sahəsinin aktual mövzuları üzrə debat turnirləri təşkil ediləcək.     Birinci mərhələdə debat haqqında ilkin məlumat və oyun qaydalarının izahı üçün təlim kursu təşkil ediləcək. Növbəti mərhələdə isə təlim proqramını uğurla tamamlamış tələbələr arasında debat turnirləri keçiriləcək.     Qeyd edək ki, layihədə iştirak üçün müraciət edəcək tələbələrin pedaqoji sahədəki bilik və bacarıqları, həmçinin təhsil siyasətinə dair ümumi məlumatlılıq səviyyəsinin ölçülməsi məqsədilə qiymətləndirmə mərhələsi təşkil olunacaq.     Unutmayın, təhsil sahəsində müzakirə həmişə faydalı və maraqlıdır!       Qeydiyyat forması: https://forms.gle/mXLwdfuyBsayNRxC7  

08/05/2023 15:54

Qazaxıstanın Astana şəhərində 57-ci Beynəlxalq Mendeleyev Kimya Olimpiadası (IMChO) keçirilib.    Nəzəri və praktiki hissədən ibarət olan olimpiadada 20-dən çox ölkə iştirak edib.    Bilik yarışmasında milli komandamız uğurla iştirak edərək ölkəmizə daha bir medal qazandırıb. Belə ki, Türkiyə Dəyanət vəqfi Bakı türk liseyinin XI sinif şagirdi Dəniz Səttarlı bürünc medala layiq görülüb. Bundan əlavə, Gəncə şəhəri Fizika, riyaziyyat və informatika təmayüllü liseyin XI sinif şagirdi Həmid Xəlilova olimpiada təşkilatçıları tərəfindən xüsusi hədiyyə təqdim edilib.    Məktəblilərimizi təbrik edir və daha böyük uğurlar arzulayırıq!    

08/05/2023 12:36