İyulun 11-dən 2023-2024-cü tədris ili üçün müəllimlərin işə qəbulu üzrə müsabiqənin test imtahanı mərhələsinə start verilib.   İmtahanların ilk seansına riyaziyyat fənni üzrə 4 400, ikinci seansına isə fiziki tərbiyə və kimya fənləri üzrə 5 430 namizəd dəvət olunub.    58 000-ə yaxın namizədin iştirak edəcəyi test imtahanları 11-15 iyul tarixlərində ölkənin 13 şəhəri üzrə 29 imtahan mərkəzində keçiriləcək.   Qeyd edək ki, müəllimlərin işə qəbulu üzrə müsabiqənin təşkilində məqsəd savadlı və bacarıqlı müəllimlərin seçilməsidir.    Test imtahanı mərhələsində iştirak edən bütün namizədlərə uğurlar arzulayırıq!

11/07/2023 09:59

İyulun 10-da elm və təhsil naziri Emin Əmrullayev Lerik rayonunda vətəndaş qəbulu keçirib. Qəbulda Lənkəran, Astara və Lerik rayonlarının sakinləri iştirak ediblər.    Qəbuldan əvvəl ulu öndər Heydər Əliyevin abidəsi ziyarət edilib, önünə gül dəstələri düzülüb.      Qəbulda vətəndaşlar, əsasən, müəllimlərin işə qəbulu və yerdəyişməsi, təhsil müəssisələrinin təmir-tikinti işləri, həmçinin digər məsələlərlə bağlı müraciətlər ediblər.      Elm və təhsil naziri qəbula yazılmış vətəndaşları dinləyib, hər bir müraciətin operativ şəkildə araşdırılması, qaldırılan məsələlərin qanunvericiliyə uyğun həlli istiqamətində nazirliyin aidiyyəti qurumlarının rəhbərlərinə tapşırıqlar verib.

10/07/2023 17:51

İyulun 11-dən müəllimlərin işə qəbulu üzrə müsabiqənin test imtahanı mərhələsinə start verilir. Namizədlər şəxsi səhifələrinə daxil olaraq imtahanların keçiriləcəyi tarix və məkanla tanış ola bilərlər.   Qeyd edək ki, müsabiqənin test imtahanı mərhələsinə ümumilikdə 58 000-ə yaxın namizəd dəvət olunub.   Bütün iştirakçılara uğurlar arzulayırıq!

10/07/2023 12:30

Elm və Təhsil Nazirliyinin SABAH (bakalavriat) qruplarında işləmək üçün son müraciət tarixi 11 iyul saat 00:00-da başa çatır.     Qeyd edək ki, 2023-2024-cü tədris ilinin payız semestrində müxtəlif fənlər üzrə vakant yerlər üçün professor-müəllim heyəti və mütəxəssislər saathesabı qaydada işləmək üçün müraciət edə bilərlər.    Müsabiqədə magistr və daha yüksək elmi dərəcəyə malik, mükəmməl səviyyədə İKT və sahə bilikləri olan, innovativ tədris metodlarından istifadə edən, eyni zamanda, müasir pedaqoji yanaşmaları tətbiq etməyi bacaran namizədlər iştirak edə bilərlər.    Müsabiqə və vakant yerlər barədə məlumatı linkə (https://shorturl.at/atRTZ) daxil olmaqla "Tədbirlər və elanlar" bölməsindən əldə etmək mümkündür.

10/07/2023 09:52

İyulun 7-də Elm və Təhsil Nazirliyinin təşkilatçılığı ilə Bakıda yerləşən ali təhsil müəssisələrinin beynəlxalq əlaqələr və əcnəbi tələbələrlə iş üzrə rəhbər şəxslərinin şəbəkələşmə görüşü keçirilib.    ADA Universitetində keçirilən görüş əcnəbi tələbələrin cəlbi ilə bağlı təcrübə mübadiləsi məqsədilə təşkil olunub.    Görüşdə Elm və Təhsil Nazirliyi, Təhsildə Keyfiyyət Təminatı Agentliyi, Milli Erasmus+ ofisi, eləcə də 32 ali təhsil müəssisəsinin əməkdaşları iştirak ediblər.    Əvvəlcə nazirliyin Beynəlxalq əməkdaşlıq şöbəsinin müdiri Tural Əhmədov və ADA Universitetinin Tələbə qəbulu və qeydiyyat şöbəsinin müdiri Günay Ziyadova açılış nitqi ilə çıxış ediblər.    Daha sonra Beynəlxalq əməkdaşlıq şöbəsinin sektor müdiri Müjdat Həsənov əcnəbi tələbələrin Azərbaycanda təhsilinə dair təqdimatla çıxış edib.    Odlar Yurdu Universitetinin beynəlxalq əlaqələr üzrə prorektoru Fəxrəddin Məmmədov və Xəzər Universitetinin beynəlxalq əlaqələr üzrə prorektoru Vlad Verniqora da qeyd edilən mövzuda təcrübələrini bölüşüblər.    Çıxışlardan sonra iştirakçıları maraqlandıran suallar ətrafında müzakirələr aparılıb.

08/07/2023 18:23

Azərbaycan Dövlət Neft və Sənaye Universiteti ilə İngiltərənin Vorvik Universiteti bərpaolunan enerji mənbələri ixtisası üzrə magistratura səviyyəsində ikili diplom proqramı həyata keçirir.   Tamamilə dövlət hesabına təmin ediləcək bu proqram çərçivəsində tələbələr həm əcnəbi, həm də yerli professor-müəllim heyəti tərəfindən ölkə daxilində təşkil olunacaq dərslərdə, həmçinin əcnəbi heyət tərəfindən İngiltərədə keçiriləcək 4 həftəlik dərslərdə iştirak edərək sahə üzrə kompetensiyalara yiyələnəcəklər. Sözügedən ikili diplom proqramı Böyük Britaniyada günəş fermaları və külək turbinlərinin istismarı zonaları ilə yanaşı, aparıcı bərpaolunan enerji sahələrinə, müvafiq şirkətlərə baş çəkmək fürsəti təqdim edir. Səyahət və viza daxil olmaqla səfər xərcləri, həmçinin yerləşmə, qidalanma ilə bağlı xərclər Dövlət Proqramı qaydalarına əsasən tam şəkildə ödəniləcək.    İlkin mərhələdə 48 tələbənin müvafiq ixtisas üzrə hər iki ali təhsil müəssisəsinin diplomuna yiyələnməsi nəzərdə tutulub.   Proqramla bağlı ətraflı məlumatı http://asoiu.edu.az/info_main internet səhifəsindən əldə edə bilərsiniz.    Digər suallarla bağlı info.warwick@asoiu.edu.az elektron poçt ünvanına müraciət göndərmək mümkündür.   Qeyd edək ki, Vorvik Universiteti 2024 QS reytinq sisteminə əsasən dünyada 67-ci yerdədir.

08/07/2023 13:58

İyulun 7-də Elm və Təhsil Nazirliyi sisteminə daxil olan peşə təhsili müəssisələrində direktor və direktor müavini işləmək istəyənlər üçün elektron qeydiyyat prosesinə start verilib. Müsabiqədə iştirakla bağlı namizədlər  iyulun 20-dək https://portal.edu.az/ üzərindən qeydiyyatdan keçməlidirlər.     Müsabiqə elektron ərizə qeydiyyatı və vakant yerlərin seçimi, ərizədəki göstəricilərin qiymətləndirilməsi, test imtahanı, müsahibə mərhələlərindən ibarətdir. Ərizələri təsdiq edilən namizədlər iyulun 26-da test imtahanına cəlb ediləcəklər. İmtahanda namizədlərə qanunvericilik və məntiq üzrə suallar təqdim olunacaq.     Peşə təhsili müəssisələrində direktor və direktor müavini işləmək istəyən şəxslər üçün qanunvericiliklə müəyyən olunmuş minimum tələblər aşağıdakılardır:        Direktor – ali təhsil müəssisələrini müvafiq ixtisaslar üzrə bitirmiş və dövlət nümunəli diplom almış, xarici ölkədə aldığı ali təhsil haqqında sənədi tanınmış, həmçinin ümumi orta təhsilli, müvafiq sahə üzrə 5 ildən az olmayan əmək stajına malik Azərbaycan Respublikasının vətəndaşları və ya ölkəmizdə daimi yaşamaq üçün icazə verilmiş şəxslər;   Direktor müavini – ali  təhsil müəssisələrini müvafiq ixtisaslar üzrə bitirmiş və dövlət nümunəli diplom almış, xarici ölkədə aldığı ali təhsil haqqında sənədi tanınmış, həmçinin ümumi orta təhsilli, müvafiq sahə üzrə 3 ildən az olmayan əmək stajına malik Azərbaycan Respublikasının vətəndaşları və ya ölkəmizdə daimi yaşamaq üçün icazə verilmiş şəxslər.     Qeyd edək ki, müsabiqə çərçivəsində respublika üzrə 19 direktor və 27 direktor müavini vakansiyası elan olunub.    Vakansiya siyahısı Direktor vəzifəsi üzrə müsabiqə proqramı İnzibati və təsərrüfat işləri üzrə direktor müavini vəzifəsi üçün müsabiqə proqramı Tədris-istehsalat işləri üzrə və tərbiyə işləri üzrə direktor müavini vəzifəsi üçün müsabiqə proqramı

07/07/2023 14:05

İyulun 6-da Heydər Əliyev Mərkəzində “SABAH-ın məzunu – 2023” mərasimi keçirilib.    Mərasimdə elm və təhsil nazirinin müavini Həsən Həsənli, millət vəkilləri, dövlət və özəl qurumların rəsmiləri, ali təhsil müəssisələrinin rektorları, müəllim və tələbələr iştirak ediblər.    Əvvəlcə tədbir iştirakçıları “Mən SABAHam” adlı sərgi ilə tanış olublar.    Tədbir Dövlət Himninin səsləndirilməsi ilə başlayıb, ardınca isə SABAH qrupları ilə bağlı videoçarx nümayiş etdirilib.     Mərasimdə çıxış edən elm və təhsil nazirinin müavini Həsən Həsənli SABAH qruplarının ildən-ilə nailiyyətlərinin artdığını diqqətə çatdırıb, bu qrupların gənclər üçün açdığı imkanlardan danışıb.    Çıxışının sonunda SABAH-ın məzunlarını təbrik edən nazir müavini onlara gələcək həyatlarında uğurlar arzulayıb.    Daha sonra yüksək göstəriciləri ilə fərqlənən məzunlar ali təhsil müəssisələrinin rektorları tərəfindən təltif olunublar.    Tədbirdə hər il təkrarlanan ənənə – rəmzi SABAH açarının hazırkı məzunlardan növbəti ilin məzunlarına ötürülməsi mərasimi də keçirilib.    Mərasimin sonunda SABAH qruplarının himni səsləndirilib, xatirə fotosu çəkdirilib.    Qeyd edək ki, hazırda SABAH qrupları 11 ali təhsil müəssisəsində fəaliyyət göstərməklə 46 ixtisas və 3200-dən artıq tələbəni əhatə edir. Onlardan 1125 nəfəri (827 nəfəri bakalavriat və 298 nəfəri magistratura səviyyəsi) 2022-2023-cü tədris ili üzrə SABAH məzunu adını qazanıb.

07/07/2023 12:00

İyulun 6-da “Baku ID’23” tədbirinin açılış mərasimi keçirilib.    SABAH.HUB İnnovasiya Mərkəzinin təşkilatçılığı ilə keçirilən tədbirin açılış mərasimində elm və təhsil naziri Emin Əmrullayev, mərkəzin icraçı direktoru Rəhim Bayramlı çıxış edərək tədbir iştirakçılarına uğurlar arzulayıblar.    Bildirilib ki, ikigünlük tədbirdə 200-dən çox xarici və yerli investor, 100-dən çox startap, 3000-dən çox qonaq və iştirakçı, 10-dan çox partnyor yer alır.    Tədbir “Elektra Events Hall”, Daş Salnamə Muzeyi və bulvarətrafı ərazilərdə festival formatında təşkil edilib.    Tədbir çərçivəsində startapçıların çıxışları, investorlarla görüşlər, panel çıxışlar, müsabiqə və açıq hava konsertinin təşkili nəzərdə tutulur.    Tədbirin ilk günü sessiyalarla davam etdirilib.   Qeyd edək ki, Elm və Təhsil Nazirliyinin dəstəyi ilə Təhsil İnstitutunun nəzdində yaradılmış SABAH.HUB İnnovasiya Mərkəzinin məqsədi Azərbaycanda akselerasiya proqramları həyata keçirməklə ölkənin innovasiya ekosisteminə töhfə verməkdir.

06/07/2023 17:33

2023-2024-cü tədris ili üzrə 32 təhsil müəssisəsində mərkəzləşdirilmiş qaydada keçirilən lisey və gimnaziyalara qəbul nəticələri elan olunub. Şagirdlərin elektron yerdəyişməsi üzrə portalda (https://sy.edu.az) şəxsi kabinetlər vasitəsilə nəticələrlə tanış olmaq mümkündür.   Şagirdlər seçim etdikləri lisey və ya gimnaziyalara qəbul olduqları təqdirdə şəxsi kabinetlərinə daxil olaraq 17 iyul saat 17:00-dək qəbul olduqları müəssisəni təsdiqləməlidirlər. Qeyd olunan tarixədək müəssisə təsdiqlənmədiyi halda qəbul nəticəsi etibarsız hesab ediləcək.   Lisey, yaxud gimnaziyaya qəbul olan və qəbulu təsdiq edən şagirdlərin sorğuları sistem açılan zaman avtomatik yaradılacaq. Sənəd qəbulu isə avqust ayında həyata keçiriləcək.   Qəbul nəticələri ilə bağlı müraciətləri 11 iyul saat 12:00-dək müvafiq elektron poçt ünvanına (office@arti.edu.az) yönləndirə bilərsiniz.   Qeyd edək ki, 19 925 şagird lisey və gimnaziya seçimi mərhələsində iştirak hüququ qazanıb.   Lisey və gimnaziyalara keçid balları 

06/07/2023 17:16