Azərbaycan Respublikasının Təhsil Nazirliyi ilə Çin Xalq Respublikasının Təhsil Nazirliyi arasında uğurlu əməkdaşlığın nəticəsi olaraq, 2019-2020-ci tədris ili üzrə 37 nəfər azərbaycanlı gənc Çin Xalq Respublikasınin nüfuzlu universitetlərində təhsil almaq imkanı qazanıb.   Müvafiq sazişə əsasən, seçim barədə Çin Xalq Respublikası tərəfindən verilən yekun qərar nəticəsində 37 nəfər bu ölkənin “Peking University”, “Beijing Normal University”, “University of Science and Technology Beijing”, “Central China Normal University”, “Shanghai University of Finance and Economics”, “Fudan University” kimi ali təhsil müəssisələrində neft mühəndisliyi, proqramlaşdırma və kompüter elmləri, beynəlxalq münasibətlər, hüquq, iqtisadiyyat və idarəetmə ixtisasları üzrə bakalavriat (3 nəfər), magistratura (32 nəfər)  və doktorantura (2 nəfər) səviyyələri üzrə  təhsil almaq hüququ qazanıb. Müvafiq təqaüd proqramı barədə elan cari ilin 21 yanvar tarixində Təhsil Nazirliyinin saytında verilib.

18/07/2019 16:07

"Anamla imtahana gəlmişəm. İndi onu gözləyirəm, o, söz verib ki, özümü yaxşı aparıb sakit otursam, gələndən sonra mənə istədiyim hədiyyəni alacaq”- deyə 3 yaşlı balaca Qumral bizimlə şirin-şirin söhbət edir. Anasını imtahana yola salanda isə deyib ki, "ana, imtahandan gülə-gülə çıx...” Həyəcanlı namizədlər, var-gəl edən doğmalar ilə birlikdə Azərbaycan Texniki Universitetinin idman zalında təşkil edilən müəllimlərin işə qəbulu üzrə imtahan prosesini izləyirik. İmtahan verən bacısını gözləyən Nicat Məmmədov söyləyir ki, Masallı rayonundan gəliblər. Artıq ikinci dəfədir ki, müəllimlərin işə qəbul imtahanında iştirak edən bacısı, yaşadıqları ərazi üzrə vakansiyaya düşə bilmədiyinə görə yenidən özünü sınamaq qərarına gəlib: "O, imtahana girən zaman özünəinamlı idi və buna görə də tezliklə yaxşı nəticə əldə etməsi ilə bağlı sevincli xəbər gözləyirəm”. Gülnarə Babayeva isə imtahana qızını gətirib. Gülnarə xanım da qızının yaxşı bal toplayacağına əmin olduğunu deyir və söyləyir ki, artıq neçə müddətdir ki, övladı müəllimlərin işə qəbul imtahanına hazırlaşır. O, Bakı şəhərindəki məktəblərdən birində işləmək istəyir. İmtahanda iştirak etmək üçün həyat yoldaşı ilə bərabər Bərdə rayonundan gələn Yeganə Məhərrəmova söyləyir ki, o da ikinci dəfədir ki, bu imtahanda iştirak edir: "Ötən dəfə cəmi iki balım çatmadı ki, istədiyim vakansiyaya düşüm, amma çox çalışmışam ki, nəticəmi yaxşılaşdırım və əminəm ki, buna nail olacam”. Astara rayonundan gələn Elza Hüseynova isə söyləyir ki, müəllimliyi, uşaqlarla işləməyi çox sevdiyi üçün imtahandan maksimum bal yığmağı planlaşdırır.   Test imtahanı mərhələsində 48 204 namizəd iştirak hüququ qazanıb   Bu il müəllimlərin işə qəbulu üzrə müsabiqənin test imtahanı mərhələsində 48204 namizəd iştirak hüququ qazanıb. İyulun 8-dən etibarən start verilən müəllimlərin işə qəbulu imtahanları iyulun 24-dək davam edəcək. Müəllimlərin işə qəbulu 4 mərhələdən (elektron ərizədəki göstəricilərin qiymətləndirilməsi, test imtahanı, vakant yerlərin seçilməsi və müsahibə) ibarətdir. Test imtahanı mərhələsində namizədə ixtisas, tədris metodikası, təlim strategiyaları və məntiqə aid suallar təqdim ediləcək. Bu mərhələdə keçid balını toplamış namizədlər 8 vakant yer seçə biləcəklər. Namizədlərin vakant yerlərə yerləşdirilməsi elektron ərizələrində qeyd etdikləri seçim ardıcıllığı gözlənilməklə aparılacaq. Müsahibə mərhələsində test imtahanlarının nəticələrinə əsasən vakant yer tutmaq hüququ qazanmış namizədlərin bilik və bacarıqları, psixoloji hazırlığı və ümumi dünyagörüşü yoxlanılacaq. İşə qəbul müsabiqəsi nəticəsində namizədlərin topladığı bal iki tədris ili qüvvədədir və onlar növbəti tədris ili üçün keçirilən müsabiqə zamanı birbaşa vakansiya seçimi mərhələsində iştirak edə bilərlər.   Müəllimlərin işə qəbulu prosesinə son 5 il ərzində xüsusi diqqət var   İmtahanın gedişi barədə məlumat verən Təhsil Nazirliyinin İctimaiyyətlə əlaqələr sektorunun müdiri Cəsarət Valehov söylədi ki, indiyə qədər 23 minə yaxın namizəd imtahan prosesində iştirak edib. Artıq bir sıra fənlər - tarix, coğrafiya, fizika, alman dili və ingilis dili üzrə imtahanlar yekunlaşıb. Hazırda ibtidai sinif ixtisası üzrə imtahan prosesi keçirilir. Cəsarət Valehov bildirir ki, müəllimlərin işə qəbulu prosesinə son 5 il ərzində xüsusi diqqət var. Nəticə onunla bağlıdır ki, ötən 2018-2019-cu tədris ilində ali təhsil müəssisələrində pedoqoji ixtisaslara qəbul olunanların göstəriciləri kifayət qədər artıb. Azərbaycanın təhsil tarixində ilk dəfə 3000 nəfərə yaxın abituriyent 500 və daha yuxarı bal toplayaraq müəllimlik ixtisasını seçib ki, bu da böyük uğurdur. Həmçinin bu o deməkdir ki, artıq Azərbaycanda müəllimlik nüfuzlu peşəyə çevrilib. Buna görə də bu imtahanlarda iştirak ilbəil artır. Məsələn, ötən il 51 min nəfər, bu il isə 55 minə yaxın şəxs elektron qeydiyyatdan keçib, müəllim olmaq üçün müraciət edib. Vakant yer seçimi isə iyulun 24-dən sonra başlayacaq. Ötən il 12 min nəfərdən artıq şəxs müəllimliyə qəbul olub: "Bu isə son illər ərzində ən böyük göstəricidir. Məsələn, 2014-cü ildə müəllimlik üçün vakansiya seçənlər 1500 nəfərdən artıq deyildi. Bu il isə ilkin mərhələdə 7500 vakansiya elan olunub, ilboyu isə bunun 10 min nəfərdən artıq olacağı gözlənilir”. Qurum rəsmisi qeyd edir ki, imtahan iştirakçılarına hər cür rahat şərait yaradılıb. Həyətdə Təcili Tibbi Yardım, həmçinin yanğınsöndürən maşın gözləyir, imtahan keçirilən zalda isə temperatur 22 dərəcədir. İştirakçılar hər hansı məsələ ilə bağlı prosesi izləyən nəzarətçilərə müraciət edə bilərlər. Həmçinin zallarda çoxsaylı kameralar quraşdırılıb və daimi nəzarət aparılır.   Vakant yeri qazanmaq hüququ əldə edən şəxslər müsahibəyə dəvət olunacaqlar   Təhsil Nazirliyinin İnsan resursları şöbəsinin müdiri Eşqi Bağırov söylədi ki, bu il də müddətli əmək müqaviləsi ilə işə qəbul mərkəzləşdirilmiş qaydada həyata keçiriləcək. Bu imtahanlar həmişə təhsil işçilərinin peşəkar inkişafı institutu nəzdində İnsan resursları mərkəzi tərəfindən keçirilir. İlkin mərhələ üçün 7 minə yaxın vakant yer çıxarılacaq. Yeni yaranan yerlər əlavə yerləşdirmə mərhələsi üçün elan ediləcək. İyulun 24-dən sonra isə apelyasiya həyata keçiriləcək. Test imtahanları ilə bağlı müraciətlərə baxılacaq. Sonra vakant yer seçimi prosesi keçiriləcək. Vakant yeri qazanmaq hüququ əldə edən şəxslər müsahibəyə dəvət olunacaq: "İndi də nazirliyə imtahanla bağlı müraciət edənlər olur. Onlar əsasən nəticələrindən narazı olanlardır. Bəziləri sualların çətin olduğundan şikayətlənir. Amma bütün suallar hər bir fənnin proqramına uyğun ali və ümumtəhsil müəssisələrində çalışan ekspertlər tərəfindən hazırlanıb, dəfələrlə ekspertizadan keçirilib. Ona görə suallarda hər hansı bir problem yoxdur. Problem yarandığı təqdirdə imtahan zalında nəzarətçilər də var, fənn ekspertləri də. Onlar tərəfindən dərhal yerindəcə rəy bildirilir”.   58 balın sevinci...   Budur, artıq foyedə canlanma yarandı və imtahan verənlərin bir qismi qazandıqları nəticələri yaxınları ilə bölüşməyə tələsir. Kimisi sevinclidir, kimisi göstərdiyi nəticədən məyus... Şad xəbər tez yayılar frazası da bir daha öz təsdiqini tapır və maksimum 60 baldan 58-ni yığanların müjdəsi də verilir. "58 bal həqiqətən gözlədiyim göstərici idi. Suallar mənə çətin gəlmədi və hər birini asanlıqla cavablandırdım. Sonda gözlədiyim nəticəni əldə etdiyim üçün çox sevinirəm” - deyə Lalə Babayeva sevincini bizimlə bölüşür. Artıq imtahanlarda ikinci dəfədir ki iştirak edən Pedoqoji Kollecin məzunu Aidə Mikayılzadə də 58 bal sevincini yaşayanlardandır: "Birinci dəfə imtahandan 39 bal yığmışdım, amma qarşıma məqsəd qoyub bu il daha yüksək bal topladım. Ən böyük arzum müəllimlik adına layiq görülmək idi”. Həyəcandan sevincini dilə gətirə bilmədiyini söyləyən Günel Namazova isə deyir ki, 2017-ci ildə Lənkəran Dövlət Humanitar Kollecini bitirib. İki dəfə müəllimlərin işə qəbulundan az nəticə toplasa da, məqsədindən dönməyib və çalışaraq yüksək nəticə əldə edib: "Hədəfim 60 bal idi və 58 bal toplayaraq bu nəticəyə yaxınlaşdım. Qarşıda məni müsahibə mərhələsi gözləyir, oranı da uğurla adlayıb müəllimlik adına layiq görüləcəm”. Yavaş-yavaş imtahan keçirilən məkanı tərk edirik. Müəllim olmaq üçün yarışa girənlərin çoxluğu və yüksək bal toplayanların qüruru və sevinci onu deməyə əsas verir ki, bu gün Azərbaycan müəllimi cəmiyyətin ən sevilən, ən nüfuzlu təbəqəsidir.   “Azərbaycan" qəzeti

18/07/2019 09:23

Sənaye və İnnovasiyalar üzrə Bakı Dövlət Peşə Təhsil Mərkəzində Koreya Respublikasının Azərbaycandakı fövqəladə və səlahiyyətli səfiri Kim Tong Opla görüş keçirilib. “Peşə Tədris Mərkəzinin yaradılması” layihəsinin rəhbəri Heo Yo Sydonio layihənin cari vəziyyəti, görülən işlər barədə məlumat verib. Layihə rəhbəri Koreya standartları əsasında fəaliyyət göstərəcək yeni peşə təhsil müəssisəsinin Azərbaycanda rəqabət qabiliyyətli kadr təminatının artırılmasına, peşə təhsili pilləsinin inkişafına faydalı olacağını qeyd edib. Peşə Təhsili üzrə Dövlət Agentliyinin direktoru Pərviz Yusifov mərkəzin qlobal sənaye ehtiyaclarına cavab verə biləcəyini, rəqabətqabiliyyətli kadrların hazırlığına istiqamətləndiyini deyib. Mərkəzin ölkənin ən qabaqcıl sənaye müəssisələri ilə əməkdaşlığa başladığını diqqətə çatdıran agentlik direktoru gələcəkdə Koreya şirkətləri ilə də əməkdaşlıq qurulacağına ümid etdiyini bildirib. Koreya Respublikasının Azərbaycandakı fövqəladə və səlahiyyətli səfiri Kim Tong Op yeni yaradılan Peşə Təhsili Mərkəzindəki cari vəziyyətlə tanışlıqdan məmnunluğunu diqqətə çatdırıb və koreyalı mütəxəssislər tərəfindən yerli müəllimlərə təlimlər keçirilməsinin əhəmiyyətindən danışıb. Birgə tədbirlərin, layihələrin təşkilində maraqlı olduğunu qeyd edən səfir Kim Tong Op Peşə Təhsili üzrə Dövlət Agentliyi və Koreya Respublikası arasında mövcud əməkdaşlığın daha da məhsuldar olmasını arzu etdiyini bildirib. Yeni peşə təhsil müəssisəsi Azərbaycan və Koreya hökumətləri arasında razılaşmaya uyğun olaraq, Koreya təhsil standartları əsasında yaradılmış ilk pilot təhsil müəssisəsidir. Müasir maddi-texniki baza ilə təchiz edilmiş, əsas tədris binası, 2 emalatxana, yataqxana, idman meydançası və digər zəruri infrastrukturu özündə cəmləyən təhsil kompleksində sonuncu tamamlama işləri gedir.

17/07/2019 18:05

2019-2020-ci tədris ili üzrə Sənaye və İnnovasiyalar üzrə Bakı Dövlət Peşə Təhsil Mərkəzinin bazasında yaradılan yeni Peşə Təhsil Mərkəzinə sənəd qəbulu prosesi davam edir. Ən müasir maddi-texniki baza ilə təchiz edilmiş mərkəzdə torna və frezer dəzgahların operatoru, avtomobil diaqnostikası və təmiri ustası, sənayedə quraşdırma işləri üzrə usta, elektronika ustası, elektrik avadanlıqlarına xidmət və təmir üzrə elektrik montyoru, inşaat ustası, veb dizayner və proqram təminatçısı və avtomatika ixtisasları üzrə 1 illik proqramlarda təhsil almaq mümkündür. Peşə Təhsil Mərkəzində təhsil almaq istəyən şəxslər http://bsiic.edu.az/ saytı vasitəsilə elektron qeydiyyatdan keçə bilərlər. Qeydiyyat prosesi iyulun 25-dək davam edəcək. Yeni təhsil müəsisəsi Azərbaycan və Koreya hökumətləri arasında razılaşmaya uyğun olaraq, Koreya təhsil standartları əsasında yaradılmış ilk pilot təhsil müəssisəsidir. Ən müasir maddi-texniki baza ilə təchiz edilmiş təhsil kompleksi əsas tədris binası, 2 emalatxana, yataqxana, idman meydançası və digər zəruri infrastrukturu özündə cəmləyir. Qlobal sənaye ehtiyaclarına cavab verə biləcək, rəqabətqabiliyyətli kadrların hazırlığına istiqamətlənən mərkəz ölkənin ən qabaqcıl sənaye müəssisələri ilə əməkdaşlığa başlayıb.    

17/07/2019 16:47

.

17/07/2019 16:07

İyulun 17-də ibtidai sinif müəllimliyi üzrə keçirilən işə qəbul imtahanlarında Aidə Mikayılova, Günel Məmmədova və Lalə Babayeva 58 bal toplayaraq yüksək nəticə əldə ediblər. Aidə Mikayılova Azərbaycan Dövlət Pedaqoji Universitetin nəzdində Pedaqoji Kollecinin, Günel Məmmədova Lənkəran Dövlət Humanitar Kollecinin, Lalə Babayeva Azərbaycan Dövlət Pedaqoji Universitetinin məzunudurlar. İyulun 18-də ibtidai sinif, təsviri incəsənət və fiziki tərbiyə müəllimi olmaq istəyənlər imtahan verəcək.

17/07/2019 14:46

2018-2019-cu dərs ilində keçirilən respublika pedaqoji mühazirələrinin yekun nəticələri məlum olub. Belə ki, nəticələrə əsasən 13 nəfər I, 18 nəfər II, 24 nəfər III dərəcəli diplomla təltif edilib. Həmçinin 53 nəfərə isə “Tərifnamə” təqdim olunub. Pedaqoji mühazirələr ümumi təhsillə bağlı aktual məsələlərə diqqəti artırmaq, təhsil işçilərinin bu barədə rəy və mülahizələrini öyrənmək, yaradıcı müəllim və məktəb rəhbərlərinin təcrübələrini təbliğ etmək və onlar arasında pedaqoji əməkdaşlıq yaratmaq, həmçinin perspektiv üçün inkişafyönlü təkliflər hazırlamaq məqsədilə keçirilib. Pedaqoji mühazirələrin rayon (şəhər) mərhələsində 3642 məruzə dinlənilib, onlardan 182-si respublika turuna təqdim olunub. Məruzələr mütəxəssislərin ekspertizasından keçirildikdən sonra onlardan 155-i yekun mərhələyə təqdim edilib. Ümumilikdə ölkə mərhələsi üzrə 18 bölmədə 149 mühazirə dinlənilib. Proqrama “Ümumi pedaqoji məsələlər”, “Ümumtəhsil məktəbinin idarəolunmasının təkmilləşdirilməsi”, “Şəxsiyyətyönümlü təhsil: təcrübə və metodika”, “Metodiki xidmətin təkmilləşdirilməsi”, “Qabaqcıl təcrübə”, “Məktəbəhazırlıq təhsilin təşkili”, “İbtidai təhsilin keyfiyyətinin yüksəldilməsi”, “İstedadlı şagirdlərlə işin təşkili”, “Ümumtəhsil məktəbində psixoloji xidmətin təşkili”, “Məktəbdənkənar və sinifdənxaric tədbirlərin təşkili”, “Tərbiyə işlərinin təkmilləşdirilməsi” bölmələri daxil edilib. Yekun mərhələdə  Bakı şəhəri 16,  Təhsil Nazirliyinin birbaşa tabeliyindəki lisey və gimnaziyalar 11, Naxçıvan Muxtar Respublikası, Psixologiya Elmi-Tədqiqat İnstitutu 5, Gəncə, Mingəçevir şəhərləri, Cəlilabad rayonu 4, Sumqayıt şəhəri, Samux rayonu 3, Təhsil İnstitutu 1, respublikanın digər şəhər və rayonları 93 məruzəçi ilə təmsil edilib.   Respublika pedaqoji mühazirələrinin yekunları barədə Azərbaycan Respublikası təhsil nazirinin əmri

17/07/2019 14:12

İyulun 17-də müəllimlərin işə qəbulu üzrə müsabiqənin test mərhələsi davam edir. Bu gün keçirilən imtahanlarda  ibtidai sinif müəllimi olmaq istəyən namizədlər iştirak edir. İmtahana 3280 namizədin qatılacağı gözlənilir. Qeyd edək ki, iyulun 16-da keçirilən ibtidai sinif müəllimliyi üzrə müəllimlərin işə qəbulu imtahanlarında 2 881 namizəd iştirak edib. Namizədlər arasında Azərbaycan Dövlət Pedaqoji Universitetinin (ADPU) məzunu Aysel Məmmədova və ADPU-nun nəzdində Azərbaycan Dövlət Pedaqoji Kollecinin məzunu Sara Xəlilova 58 bal toplayaraq yüksək nəticə əldə ediblər. İmtahanlar iyulun 24-dək davam edəcək.

17/07/2019 09:46

İyulun 16-da ibtidai sinif üzrə müəllimlərin işə qəbulu imtahanlarında yüksək nəticə qeydə alınıb. Belə ki, namizədlərdən Aysel Məmmədova imtahandan uğurla keçərək 58 bal toplayıb. Aysel Məmmədova Azərbaycan Dövlət Pedaqoji Universitetində ibtidai təhsilin pedaqogikası və metodikası ixtisası üzrə təhsil alıb. Müəllimlərin işə qəbulu üzrə imtahanlar iyulun 24-dək davam edəcək.

16/07/2019 17:46

İyulun 16-da Bakı Dövlət Universitetində Təhsil Nazirliyinin təşəbbüsü ilə “Ali təhsil müəssisələrində PR: strukturun və media ilə işin düzgün qurulması, hədəf auditoriyaları” mövzusunda təlim-konfrans keçirilib. BDU-nun rektoru Elçin Babayev son illərdə təhsilin inkişafı istiqamətində həyata keçirilən tədbirlərdən danışıb, bu il 100 yaşı tamam olan universitetin fəaliyyəti barədə məlumat verib. Təlim-konfransın media ilə təhsil dialoqu baxımından mühüm əhəmiyyətini qeyd edən Elçin Babayev bildirib ki, təlimin əsas məqsədi ali təhsil müəssisələri ilə media qurumlarının əlaqələrinin daha da yaxşılaşdırılması, mətbuat xidməti rəhbərlərinin bu sahədə bacarıq və peşəkarlıqlarının artırılmasıdır. Çıxışının sonunda rektor media nümayəndələrini 22 iyul – Milli Mətbuat Günü münasibətilə təbrik edib, onlara uğurlar arzulayıb. Təhsil nazirinin müşaviri Elnur Məmmədov ali təhsil müəssisələrində PR işinin təşkilinin əsas məqsədlərini sadalayıb, təhsilin mediada düzgün və geniş şəkildə işıqlandırılmasının əhəmiyyətindən bəhs edib. Cəmiyyətdə təhsilin mühüm rolunu vurğulayan Təhsil nazirinin müşaviri media ilə təhsil müəssisələri arasındakı əlaqələrlə bağlı fikirlərini bildirib, nazirliyin hər zaman belə tədbirlərin keçirilməsinə önəm verdiyini əlavə edib. Təhsil Nazirliyinin sektor müdiri Cəsarət Valehovun moderatorluğu ilə davam edən konfransda  BDU-nun jurnalistika fakültəsinin dekanı Vüqar Əliyev və Mətbuat və informasiya şöbəsinin müdiri Pərvanə İbrahimova “PR: strukturun və media ilə işin düzgün qurulması… Hədəf auditoriyası kimdir?”, “Alibayov” kommunikasiya və konsaltinq şirkətinin baş direktoru Vəli Əlibəyov isə “Ali təhsil müəssisələrində ictimaiyyətlə əlaqələr fəaliyyətinin strategiya və taktikası” mövzusunda təqdimatla çıxış ediblər. Bildirilib ki, müəssisənin daxili PR-nın təşkili, KİV və sosial mediada monitorinqin aparılması, kommunikasiya və ictimaiyyətlə əlaqələr sahəsində beynəlxalq təcrübənin tətbiqi vacib məsələlərdəndir. Təlim-konfrans mövzu ilə bağlı müzakirələrlə davam etdirilib.

16/07/2019 16:52