Elm və Təhsil Nazirliyinin rəhbərliyi və kollektivi 27 Sentyabr – Anım Günü ilə əlaqədar Zəfər parkını ziyarət edib.   Ziyarət zamanı 8 Noyabr – Zəfər Gününü əks etdirən memorial abidəsinin önünə gül dəstələri qoyulub, Azərbaycanın ərazi bütövlüyünün bərpası və dövlətimizin suverenliyi uğrunda həlak olmuş şəhidlərimizin əziz xatirəsi dərin ehtiramla yad edilib.

27/09/2025 14:32

Sentyabrın 26-da Təhsilin İnkişafı Fondunun İdarə Heyətinin sədri Elnur Nəsibov III "Maarifçi" tələbə-məzun təcrübə proqramının iştirakçıları ilə görüşüb. Görüşün məqsədi təhsil müəssisələri ilə əmək bazarı arasındakı münasibətlərin interaktiv müzakirəsi olub. Elnur Nəsibov "Maarifçi"ləri salamlamlayaraq proqramın məqsədi ilə bağlı məlumat verib. Görüş "Maarifçi"lərin təhsil və təcrübələri, həmçinin proqram çərçivəsində qazandıqları bilik və bacarıqlar haqqında çıxışları ilə davam edib. Daha sonra İdarə Heyətinin sədri fondun fəaliyyəti haqqında danışıb. O, TİF-in icra etdiyi mühüm layihələr barədə məlumat verərək gənclərin inkişafına yönəlmiş strategiyaları diqqətə çatdırıb. "Maarifçi"lər sonda onları maraqlandıran sualları səsləndiriblər. Görüş çərçivəsində "Maarifçi"lər TİF-in əməkdaşlarının müşayiəti ilə fondun yeni layihəsi olan “Peerstack Academy” ilə tanış olublar. Qeyd edək ki, 4 ay davam edəcək proqram çərçivəsində seçilmiş iştirakçılar Elm və Təhsil Nazirliyi, regional təhsil idarələrində, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçəcəklər. Proqramın məqsədi tələbə və məzunlara təcrübə imkanı yaratmaq, onların bilik və bacarıqlarını artırmaq, nəzəri biliklərini real iş mühitində tətbiq etmək və gənclərə peşəkar vərdişlər qazandırmaqdır.

26/09/2025 17:40

Sentyabrın 25-də elm və təhsil nazirinin müavini Həsən Həsənli Doğu Akdeniz Universitetinin rektoru Hasan Kılıç ilə görüşüb.   Görüş çərçivəsində ölkələr arasında universitetlərarası əməkdaşlıq, o cümlədən ali təhsil sahəsində Doğu Akdeniz Universiteti ilə inkişaf perspektivləri müzakirə edilib.

25/09/2025 17:37

Elm və Təhsil Nazirliyinin dəstəyi, Elm və Ali Təhsil üzrə Dövlət Agentliyi və “Times Higher Education” (THE) beynəlxalq reytinq agentliyinin birgə təşkilatçılığı ilə Bakıda keçirilən “THE Avrasiya Universitetlərinin Sammiti”nin sonuncu paneli “Avrasiya universitetləri arasında əməkdaşlığın gələcəyi” mövzusuna həsr olunub.   Paneldə Elm və Ali Təhsil üzrə Dövlət Agentliyinin direktoru Ülkər Səttarova müxtəlif təhsil sistemlərinin bir araya gətirilməsinin çətinliyinə baxmayaraq mövcud sistemlər daxilində müəyyən inteqrasiyaya nail olunduğunu bildirib. O həmçinin elmi fəaliyyət və tədqiqat üzrə Asiya, Orta Asiya, Avropa və digər qərb ölkələri ilə güclü əməkdaşlığa, eləcə də müxtəlif ölkələrdən tədqiqatçılarla birgə yazılan kollaborativ məqalələrin sayının artırılmasına ehtiyac olduğunu vurğulayıb.   Paneldə çıxış edən digər spikerlər – BP şirkətinin Xəzər regionu üzrə vitse-prezidenti Bəxtiyar Aslanbəyli, ADA Universitetinin xarici əlaqələr, hökumət və tələbələrlə iş üzrə prorektoru Fariz İsmayılzadə və Azərbaycan Texniki Universitetinin rektoru Vilayət Vəliyev isə universitetlərin ölkələrarası əməkdaşlığın inkişafında rolunu, sənaye ilə əməkdaşlıq imkanlarını və regionun inkişaf potensialına uyğun yeni istiqamətlərin formalaşdırılmasının vacibliyini qeyd ediblər.   Sammitin rəsmi bağlanış mərasimində “Times Higher Education” beynəlxalq reytinq agentliyinin Qlobal məsələlər üzrə baş direktoru Fil Bati Avrasiya regionunda ali təhsilin innovasiya və tədqiqatlar vasitəsilə yeni bir inkişaf dövrünə qədəm qoyduğunu bildirib və növbəti sammitin Qazaxıstanda keçiriləcəyini elan edib.    Satbayev Universitetinin Strateji inkişaf departamentinin müdir müavini Gülziya Burşukova iştirakçıları Almatı şəhərində keçiriləcək sammitə dəvət edib.   Bağlanış mərasimində Fil Bati sammitin regionda ilk dəfə keçirilməsinə və yüksək səviyyədə təşkilinə görə Elm və Ali Təhsil üzrə Dövlət Agentliyinin direktoru Ülkər Səttarovaya xüsusi xatirə nişanı təqdim edib.   Qeyd edək ki, sammit iki gün ərzində davam edib və 35-ə yaxın ölkədən 300-dən çox nümayəndəni bir araya gətirib. Tədbir çərçivəsində ali təhsildə rəqəmsal transformasiya, inklüzivlik, beynəlxalq tərəfdaşlıqlar, dayanıqlı inkişaf məqsədlərinə töhfə, iqlim dəyişikliyi ilə mübarizə, universitet–sənaye əməkdaşlığı və Avrasiya məkanında gələcək əməkdaşlıq imkanları kimi qlobal mövzular ətrafında geniş müzakirələr aparılıb.

25/09/2025 17:25

Sentyabrın 24-də elm və təhsil nazirinin müavini Həsən Həsənli İğdır Azərbaycan Evinin rəhbəri Ziya Zakir Acar, eləcə də Artvin, Ağrı, Ardahan, Bolu, Qars, İğdır, Ərzurum və Van universitetlərinin rektorları ilə görüşüb.   Görüş çərçivəsində ölkələrimiz arasında universitetlərarası əməkdaşlıq, o cümlədən ali təhsil sahəsində cari inkişaf perspektivləri müzakirə edilib.

25/09/2025 17:00

Oktyabrın 4-də Bakı Slavyan Universitetində Təhsildə Yeni Çağırışlar VI Beynəlxalq Forumu keçiriləcək.   Beynəlxalq Forum Elm və Təhsil Nazirliyi, Təhsilin İnkişafı Fondu, Elm və Təhsil İşçiləri Azad Həmkarlar İttifaqı Respublika Komitəsinin tərəfdaşlığı, Bakı Slavyan Universiteti və “T-Network” təhsil işçilərinin təcrübə və kommunikasiya platformasının təşkilatçılığı ilə hibrid formada reallaşacaq.    Forumun keçirilməsində əsas məqsəd təhsildə yeni çağırışları müzakirə etmək, hər kəs üçün keyfiyyətli təhsil, xarakter və iradə tərbiyəsi, emosional və süni zəkanın balansı məsələlərinə diqqəti artırmaq, yeni dövrün təhsil tələblərini nəzərdən keçirərək keyfiyyətin daha da yüksəldilməsinə töhfə verməkdir.   “Konstitusiya və Suverenlik İli”nə həsr edilən Beynəlxalq Forum “Daha təhsilli gələcək” devizi ilə reallaşacaq.   Forumda İqtisadi Əməkdaşlıq və İnkişaf Təşkilatının təhsil və bacarıqlar üzrə direktoru Andreas Şleyxer, Baltaş Qrupun rəhbəri, tanınmış türkiyəli psixoloq Acar Baltaş, Britaniya Təhsil Təchizatçıları Assosiasiyasının baş direktoru Kəralayn Rayt, Riqa Klassik Dövlət Gimnaziyasının direktoru  Roman Əliyev,  Baltaş Qrupunun qurucusu, tanınmış türkiyəli psixoloq Zuhal Baltaş, xaricdə təhsil üzrə Dövlət Proqramı çərçivəsində Harvard Universitetində təhsilin siyasəti və təhlili üzrə magistratura təhsili almış Lalə Əliyeva, Estoniya Karyera Təhsil Akademiyasının rəhbəri Sənəm Əli təqdimatlarla çıxış edərək öz təcrübələrini bölüşəcəklər.   Forum  “Emosional və süni zəkanın balansı, hər kəs üçün keyfiyyətli təhsil,  sürət dövrü: xarakter və iradə tərbiyəsi, təcili təhsil yardımı: çoxnövlü savadlılıq” mövzularını əhatə edəcək.    Forum çərçivəsində “Təhsildə emosional və süni zəkanın balansı necə tənzimlənməlidir? Necə edək ki, keyfiyyətli təhsil hər kəs üçün əlçatan olsun və heç bir təhsilalan kənarda qalmasın? Sürət dövründə xarakter və iradə tərbiyəsinə diqqəti necə artıra bilərik? Bu kontektsdə hansı ənənəvi yanaşmalar yeni yanaşmalarla əvəzlənməlidir? Təhsil prosesinin iştirakçıları hansı uğur anlayışına köklənməlidirlər? Təcili təhsil yardımını təmin olunması və çoxnövlü savadlılığın təşviq edilməsi üçün hansı addımların atılmasına ehtiyac var? Təhsil prosesinin bütün tərəflərini özünün ən yaxşı versiyası olmaq prosesinə necə cəlb etmək olar?” sualları ətrafında müzakirələr aparılacaq.   Forumda onlayn iştirakçı linkini müvafiq “WhatsApp” kanalına qoşularaq əldə edə bilərsiniz: https://chat.whatsapp.com/BzS0V1ujzqB3In46HWiUb3

25/09/2025 15:37

Elm və təhsil naziri Emin Əmrullayevin 26 sentyabr tarixində Gədəbəy şəhərində keçirilməsi nəzərdə tutulan vətəndaş qəbulunun vaxtı dəyişdirilib. Qəbulun tarixi barədə əlavə məlumat veriləcək.    Qəbulda Gədəbəy, Şəmkir, Tovuz, Ağstafa, Qazax sakinlərinin iştirakı nəzərdə tutulub.    Qeyd edək ki, qəbulda yalnız müvafiq qaydada müraciət etmiş şəxslər iştirak edəcəklər.

25/09/2025 14:00

Elm və Təhsil Nazirliyinin dəstəyi, Elm və Ali Təhsil üzrə Dövlət Agentliyi və “Times Higher Education” (THE) beynəlxalq reytinq agentliyinin birgə təşkilatçılığı ilə keçirilən “THE Avrasiya Universitetlərinin Sammiti” panel müzakirələri ilə işini davam etdirir.   Günün açılışında “Mərkəzi Asiya və Qafqaz universitetləri üçün “THE dayanıqlılıq təsir reytinqlərindən istifadə imkanları” mövzusunda təqdimat keçirilib.    Ardınca “Keyfiyyətin təminatı universitetlərin Dayanıqlı İnkişaf Məqsədlərinə töhfəsini necə gücləndirə bilər?” və “Avrasiya universitetlərinin iqlim dəyişikliyi ilə mübarizədə rolu” mövzuları üzrə müzakirələr aparılıb.   Qeyd edək ki, sammitdə müxtəlif ölkələrdən gəlmiş beynəlxalq spikerlər çıxış edir, 35-ə yaxın ölkədən 300-dən çox iştirakçı müzakirələrdə təmsil olunur.    Tədbir gün ərzində digər sessiya və panellərlə davam edəcək.

25/09/2025 11:31

Sentyabrın 24-də Elm və Təhsil Nazirliyinin dəstəyi, Elm və Ali Təhsil üzrə Dövlət Agentliyi və “Times Higher Education” (THE) beynəlxalq reytinq agentliyinin birgə təşkilatçılığı ilə “THE Avrasiya Universitetlərinin Sammiti”nin açılış mərasimi keçirilib.   Elm və təhsil naziri Emin Əmrullayev çıxışında sammitin Bakıda keçirilməsindən məmnunluğunu ifadə edib. Nazir ali təhsilin əsas missiyasının insan kapitalının inkişafı və cəmiyyət üçün əlavə dəyərin yaradılması olduğunu vurğulayıb, həmçinin ali təhsilin əlçatanlığı, keyfiyyət və kəmiyyət arasında balansın qorunması, beynəlxalq tələbə mübadiləsində ədalətli yanaşma və sosial bərabərliyin təmin olunması kimi məsələlərin müzakirə olunmasının vacibliyini bildirib.   Emin Əmrullayev xarici universitetlər və institutlar arasında əməkdaşlığın əhəmiyyətini nəzərə çatdıraraq Avrasiya kimi önəmli regionda elmi araşdırmaların aparılmasının faydalılığı və Dayanıqlı İnkişaf Məqsədlərinə töhfə verə biləcəyini deyib. Çıxışının sonunda nazir sammitin əməkdaşlıq və yeni ideyalar üçün mühüm əhəmiyyətini qeyd edib.    “Times Higher Education” beynəlxalq reytinq agentliyinin Qlobal məsələlər üzrə baş direktoru Fil Bati Azərbaycanın elm və təhsil sahəsində beynəlxalq əməkdaşlıq üçün unikal platforma yaratdığını bildirib. Eyni zamanda 2026-cı ildə açıqlanacaq dünya universitetləri reytinqində Azərbaycan universitetlərinin sayının əvvəlki illə müqayisədə iki dəfə artaraq 4-ə çatacağını deyib.   Sammitdə çıxış edən Con fon Neyman Universitetinin Müşahidə Şurasının sədri Norbert Csizmadia isə universitetlər, sənaye və hökumətlərin birgə fəaliyyətinin qlobal problemlərə cavab verən dinamik tədqiqat ekosistemləri yaratmaq baxımından əhəmiyyətini vurğulayıb. O, transmilli tədqiqatın biliklərə ədalətli çıxış və yeni həllərin tapılmasına mühüm töhfə verəcəyini qeyd edib.   Sammitin birinci günündə transmilli tədqiqatların qlobal təsiri, ali təhsilin Dayanıqlı İnkişaf Məqsədlərinə töhfəsi, Avrasiya universitetləri arasında əməkdaşlıq imkanları və beynəlxalq tələbə mobilliyi mövzularında panel müzakirələri aparılıb.   Qeyd edək ki, “THE Avrasiya Universitetlərinin Sammiti” 24-25 sentyabr tarixlərini əhatə edir.

24/09/2025 16:30

Elm və Təhsil Nazirliyi tərəfindən özəl məktəbəqədər təhsil müəssisələri üçün qrant müsabiqəsi elan edilir.   Qrant müsabiqəsinin əsas məqsədi 2025-2026-cı tədris ilində məktəbəqədər təhsil sahəsində valideyn-dövlət-özəl əməkdaşlığına əsaslanan maliyyələşmə modelinin tətbiqi ilə məktəbəqədər təhsilin əhatə dairəsinin genişləndirilməsidir.   Müraciət üçün son tarix 10 oktyabr 2025-ci ildir.    Qeyd edək ki, "Azərbaycan Respublikasının 2022‒2026-cı illərdə sosial-iqtisadi inkişaf Strategiyası”nın icrası ilə əlaqədar  məktəbəqədər təhsil sahəsində alternativ təhsil və maliyyələşmə modelləri əsasında əhatəliliyin artırılması və məktəbəqədər təhsilə cəlb edilmiş uşaqların 1-5 yaşlılara nisbətinin 50 faizə çatdırılması nəzərdə tutulub. Strategiyanın hədəfinə nail olunması üçün Elm və Təhsil Nazirliyi tərəfindən həyata keçirilən tədbirlər davam etdirilir.   Müsabiqə ilə bağlı ətraflı məlumatla elan vasitəsilə tanış ola bilərsiniz.   Özəl məktəbəqədər təhsil müəssisələri üçün qrant müsabiqəsi - elan   Layihə təklifi forması

24/09/2025 15:30