Elm və təhsil naziri Emin Əmrullayev Böyük Britaniyanın Lordlar Palatasının üzvü Lord Alderdice ilə ilə görüşüb. Görüş zamanı elm və təhsil sahəsində cari əməkdaşlıq və inkişaf perspektivləri müzakirə edilib.

15/12/2025 10:00

Dekabrın 12-də Elm və Təhsil Nazirliyinin təşkilatçılığı ilə Bakı Musiqi Akademiyasında ümummilli lider Heydər Əliyevin xatirəsinə həsr olunmuş anım mərasimi keçirilib.   Açılış nitqi ilə çıxış edən Akademiyanın rektoru Fərhad Bədəlbəyli ulu öndərlə bağlı xatirələrini bölüşüb, Heydər Əliyevin Azərbaycan mədəniyyətinin inkişafında olan xidmətlərindən söz açıb.    Mərasimdə iştirak edən Milli Məclisin Mədəniyyət komitəsinin sədri Polad Bülbüloğlu ümummilli lider  Heydər Əliyevin mədəniyyət sahəsinə bağlılığından, ulu öndərin daima mədəniyyət xadimlərinə olan diqqətindən danışıb.     Elm və Təhsil Nazirliyinin rəhbərliyi və kollektivinin, eləcə də ali təhsil müəssisələrinin rektorlarının iştirak etdiyi mərasimdə çıxışlardan sonra mahnı və romanslar səsləndirilib.

12/12/2025 18:20

Dekabrın 12-də elm və təhsil naziri Emin Əmrullayev Qazaxıstan Respublikasının Azərbaycan Respublikasındakı fövqəladə və səlahiyyətli səfiri Alim Bayelin rəhbərlik etdiyi nümayəndə heyəti ilə görüşüb.   Görüş çərçivəsində iki ölkə arasında elm və təhsil sahəsində mövcud əməkdaşlığın cari vəziyyəti müzakirə edilib. Həmçinin, Qazaxıstanın təhsil sahəsində fəaliyyət göstərən bir sıra şirkətlərinin təqdimatları dinlənilib.

12/12/2025 16:06

Dekabrın 12-də ümummilli lider Heydər Əliyevin anım günü ilə əlaqədar Elm və Təhsil Nazirliyinin kollektivi Fəxri xiyabanda ulu öndərin məzarını ziyarət edib, önünə gül dəstələri qoyaraq xatirəsini ehtiramla anıb.   Görkəmli oftalmoloq-alim, akademik Zərifə xanım Əliyevanın xatirəsi də ehtiramla yad edilib, məzarı önünə tər çiçəklər düzülüb.

12/12/2025 14:30

Dekabrın 11-də Bakı Slavyan Universitetində (BSU) elm  və təhsil nazirinin müavini Firudin Qurbanov universitetin tələbələri ilə görüşüb.   Açılış nitqində rektor Anar Nağıyev Azərbaycan gəncliyinin ölkəmizin gələcək inkişafında rolunun xüsusi əhəmiyyətini vurğulayıb. Anar Nağıyev gənclərin ulu öndər Heydər Əliyevin əsasını qoyduğu dövlətçilik ideyalarına sadiq, Prezident İlham Əliyevin müəyyən etdiyi inkişaf və Zəfər yoluna layiq vətəndaşlar kimi formalaşmasının vacibliyini qeyd edib.   Elm və təhsil nazirinin müavini Firudin Qurbanov çıxışında ölkəmizin ən çətin dövrlərində xalqın tələbi  ilə yenidən hakimiyyətə gələn ulu öndər Heydər Əliyevin Azərbaycanın inkişafında müstəsna rolunu vurğulayıb. Firudin Qurbanov qeyd edib ki, bu gün güclü iqtisadiyyata malik olmağımızın təməli məhz ulu öndər Heydər Əliyev tərəfindən qoyulub və onun layiqli davamçısı, Prezident İlham Əliyevin uğurlu siyasəti nəticəsində Azərbaycanda güclü, eləcə də dayanıqlı iqtisadiyyat formalaşdırılıb.   Nazir müavini çıxışında Heydər Əliyevin təhsilə və gənclərə daim xüsusi diqqət göstərdiyini qeyd edərək bildirib ki, məhz ulu öndərin uzaqgörən siyasəti və Prezident İlham Əliyevin siyasi iradəsi nəticəsində Azərbaycan xalqı 44 günlük Vətən müharibəsində qələbə qazanaraq qalib xalq kimi tarixə düşdü. Nazir müavini vurğulayıb ki, Vətən müharibəsində təhsil işçilərinin də fəal iştirakı təhsil müəssisələrində vətənpərvərlik tərbiyəsinin yüksək səviyyədə həyata keçirildiyini bir daha sübut edir. Bundan əlavə, ana dili biliklərinə göstərilən diqqət də ulu öndər Heydər Əliyevin və Prezident İlham Əliyevin siyasətinin mühüm istiqamətlərindən biridir.   Nazir müavini Elm və Təhsil Nazirliyi tərəfindən həyata keçirilən layihələr və proqramlar barədə məlumat verib, işğaldan azad edilmiş ərazilərdə təhsil sahəsində görülən işləri xüsusi vurğulayıb.   Çıxışının davamında nazir müavini gənclərin ölkənin gələcək inkişafındakı rolunu, müasir texnologiyaların və sosial şəbəkələrin təsirini, insan kapitalının formalaşdırılmasının əhəmiyyətini, peşə təhsili və yaradıcı təfəkkürün inkişafdakı rolunu qeyd edib və innovasiya mühitinin formalaşdırılmasının vacibliyini diqqətə çatdırıb.    Sual-cavab formatında davam edən görüşdə tələbələrin çoxsaylı sualları cavablandırılıb.

11/12/2025 17:00

Elm və Təhsil Nazirliyi tərəfindən müəllimlər üçün yeni mobil tətbiq istifadəyə verilib. “Rəqəmsal məktəb” layihəsi çərçivəsində hazırlanan “Müəllim” tətbiqi mövcud elektron jurnalın funksional imkanlarını genişləndirir və istifadəçilərə sistemə mobil telefon vasitəsilə daha rahat və operativ çıxış imkanı yaradır.   Tətbiq müəllimlərə tədrisin planlaşdırılması, şagirdlərin davamiyyətinin operativ şəkildə qeydə alınması, akademik nəticələrin izlənilməsi, həmçinin formativ və summativ qiymətləndirmələrin daxil edilməsi kimi əsas prosesləri mobil mühitdə idarə etmək imkanı verir.   Tətbiqin hazırlanmasında təhlükəsizlik və məlumatların qorunması xüsusi prioritet kimi nəzərə alınıb.   Hazırda “Müəllim” tətbiqi “Rəqəmsal məktəb” layihəsində iştirak edən Bakı şəhərinin ümumi təhsil müəssisələrində istifadə olunur. Mobil tətbiqin mərhələli şəkildə ölkə üzrə bütün təhsil müəssisələrində tətbiqi planlaşdırılır ki, bu da təhsil idarəetməsinin vahid rəqəmsal platforma üzərindən daha səmərəli koordinasiyasına əhəmiyyətli töhfə verəcək.   Qeyd edək ki, tətbiq həm iOS, həm də Android əməliyyat sistemləri üçün hazırlanıb. İstifadəçilər tətbiqi müvafiq platformalarda “Müəllim” adı ilə axtarış edərək yükləyə bilərlər.

10/12/2025 15:50

Dekabrın 9-da elm və təhsil nazirinin müavini Həsən Həsənli Qazaxıstan Respublikasının maarif nazirinin müavini Assylbek Akhmetzhanov ilə görüşüb.  Görüş çərçivəsində iki ölkə arasında ümumi təhsil, STEAM, o cümlədən rəqəmsal təhsil sahəsində əməkdaşlığın cari vəziyyəti və inkişaf perspektivləri müzakirə edilib.

09/12/2025 18:00

Dekabrın 9-da Azərbaycan Respublikasının Təhsil İnstitutunun (ARTİ) təşkilatçılığı ilə “Ümumi təhsildə keyfiyyətin yüksəldilməsi: təcrübələr və yeni yanaşmalar” mövzusunda elmi-praktiki beynəlxalq konfrans keçirilib.   Konfrans Dövlət Himninin səsləndirilməsi ilə başlayıb. Ardınca şəhidlərimizin əziz xatirəsi bir dəqiqəlik sükutla yad edilib.   Salamlama nitqi ilə çıxış edən ARTİ-nin direktoru səlahiyyətlərini icra edən, elm və təhsil nazirinin müşaviri Elnur Əliyev konfransın məqsədi barədə məlumat verib. Bildirib ki, konfransın keçirilməsində əsas məqsəd ümumi təhsil sistemində keyfiyyətin artırılması istiqamətində həyata keçirilən islahatların, beynəlxalq təcrübələrin və yeni yanaşmaların müzakirəsi, həmçinin məktəb liderləri, inspektorlar və təhsil mütəxəssisləri arasında peşəkar dialoqun gücləndirilməsidir.   Çıxış edən elm və təhsil nazirinin müavini Kənan Kərimzadə ümumi təhsildə keyfiyyətin artırılmasının dövlətin uzunmüddətli inkişaf strategiyasındakı mühüm rolundan bəhs edib.  Kənan Kərimzadə bildirib ki, məqsədyönlü və məntiqli şəkildə icra olunan islahatlar Azərbaycan təhsilini yeni və yüksək transformasiya mərhələsinə hazırlayıb. Nazir müavininin sözlərinə görə, bu gün təhsil sahəsində aparılan dəyişikliklərin nəticələri artıq yalnız sənəd və strategiyalarda deyil, məktəblərdə, sinif otaqlarında və insanların real həyatında müşahidə olunur. Həyata keçirilən islahatların mərkəzində Azərbaycan müəllimi dayanır.    Kənan Kərimzadə qeyd edib ki, son 20 il ərzində ölkə başçısının diqqət və qayğısı nəticəsində həyata keçirilən proqramlar çərçivəsində ölkə ərazisində 3600-dən çox ümumi təhsil müəssisəsi ya yenidən inşa edilib, ya da əsaslı şəkildə təmir olunub. Görülən bu işlərin nəticəsində 1,3 milyondan çox şagirdimizin təlim və təhsil şəraiti yaxşılaşdırılıb.    Nazir müavini  bildirib ki, ölkənin 400-dən çox məktəbində müasir metodik xidmətin tətbiqinə başlanılıb. 2000-dən çox məktəbdə yenilənmiş monitorinqlər aparılır. Eyni zamanda, 80 mindən çox müəllimin sertifikatlaşdırılması həyata keçirilib. Sertifikatlaşdırmadan uğurla keçən müəllimlərin bir hissəsinin əməkhaqqı 35%, digər hissəsinin isə 10% artırılıb.   Çıxışının sonunda təhsilin məqsədinin artıq öyrənmək və öyrətmək olduğunu vurğulayan Kənan Kərimzadə bu konfransın təkcə bilik mübadiləsi ilə bitməyəcəyinə inandığını vurğulayıb və əlavə edib ki, təhsildə keyfiyyət mütləq tamamlanmalı, qorunmalıdır.    Konfransın əsas məruzələri çərçivəsində London Universitet Kollecinin (UCL) Təhsil Liderliyi və İdarəedilməsi üzrə dosenti Devid Qodfrey “Peşəkar inkişaf və məktəb inkişafı üçün birgə öyrənmə” mövzusunda çıxış edib.  Devid Qodfrey bildirib ki, ənənəvi sistem fərdi öyrənməyə fokuslanır. Yeni yanaşmada isə komandalar və şəbəkələrin öyrənməsi vacibdir. Ənənəvi yanaşma təşkilati sabitliyə əsaslanır, halbuki yeni dövrdə dəyişikliklərlə yanaşı, davamlılıq da vacibdir. Ənənəvi planlaşdırma qısamüddətli hədəflərə yönəlib. İndi təşkilati yenilənmə və davamlı inkişaf əsas hədəfdir.    Daha sonra isə Elnur Əliyev “Metodik dəstək – keyfiyyətin yüksəldilməsi aləti kimi” mövzusunda təqdimatla çıxış edərək  yeni metodik dəstək modelinin mahiyyəti və təhsil müəssisələrində metodik dəstək mexanizmlərinin gücləndirilməsinin əhəmiyyəti barədə danışıb. Bildirib ki, hədəf 2030-cu ilə qədər ölkə üzrə bütün ümumi təhsil müəssisələrində metodik dəstək sistemi qurmaqdır. Bu mexanizmin məqsədi  müəllimlərin peşəkar inkişafını, məktəbdaxili pedaqoji mühitin gücləndirilməsini və tədris keyfiyyətinin yüksəldilməsini təmin etməkdir. Əlavə edib ki, metodistlər sertifikatlaşdırma imtahanında yüksək bal toplayan müəllimlər arasından seçilib. Seçilmiş namizədlər 108 saatlıq metodist hazırlığı təliminə cəlb olunub, mütəmadi seminar və peşəkar müzakirələrdən keçiblər. Nəticədə 325 metodist və 22 aparıcı metodist formalaşdırılıb və onlar müxtəlif istiqamətlər üzrə müəllimlərə dəstək göstərməyə başlayıblar.    Beynəlxalq ekspert, Məktəb İnspektorluqlarının Daimi Konfransının (SİCİ) inkişaf üzrə rəhbəri Erik De Bou isə  “İnspeksiya prosesində aydın çərçivə və inkişafyönümlü ünsiyyətin məktəb fəaliyyətinin obyektiv dəyərləndirilməsinə və məktəb inkişafına verdiyi töhfə” mövzusunda məruzə təqdim edib. Məktəblərdə keyfiyyətin təmin olunması və qiymətləndirilməsi üçün hazırlanmış çərçivədən danışan xarici mütəxəssisin sözlərinə görə, bu çərçivənin mərkəzində şagirdin inkişafı dayanır. Şagirdin inkişafını isə tədris prosesi, təhsil məqsədləri, monitorinq və yönləndirmə (guidance), məktəbin inkişaf keyfiyyəti, həmçinin maliyyə və maddi resursların idarə olunması əhatə edir.   Növbəti məruzəçi məktəb inspeksiyasında akademik rəhbər Aysel Əzimova “Azərbaycanda məktəb liderliyi praktikalarının formalaşmasında keyfiyyət  monitorinqlərinin rolu “mövzusunda çıxış edib. Qeyd edib ki, məktəblərdə aparılan keyfiyyət monitorinqlərinin əsas məqsədi məktəblərin fəaliyyət göstəricilərinə dair dəqiq və sistemli məlumatların toplanması, təhlili və müvafiq dəstək proqramlarının hazırlanmasıdır.   Konfransın ikinci hissəsi  yerli və xarici məruzəçilərin iştirakı ilə panel müzakirələri və vörkşoplarla davam edib.   Konfrans çərçivəsində “Məktəblərdə keyfiyyət mədəniyyətinin formalaşdırılması” və “Məktəblərdə dayanıqlı və real inkişaf strategiyaları”, adlı panel müzakirələr və  “Məktəblərarası əməkdaşlıqda birgə öyrənmə və inkişaf yanaşmaları ”, “Tədrisin keyfiyyətinin yüksəldilməsi məqsədilə milli qiymətləndirmə nəticələrindən istifadə” adlı vörkşoplar keçirilib.   Bu sessiyalarda iştirakçılar məktəblərarası əməkdaşlıqda birgə öyrənmə, inkişafyönümlü ünsiyyət və motivasiya, eləcə də milli qiymətləndirmə nəticələrindən istifadəyə dair praktik müzakirələr aparıblar, interaktiv tapşırıqlar vasitəsilə mövzular üzrə real yanaşmaları müzakirə etmək imkanı əldə ediblər.

09/12/2025 17:45

Dekabrın 9-da elm və təhsil naziri Emin Əmrullayev Qazaxıstan Respublikasının elm və ali təhsil nazirinin müavini Talgat Yeshenkulov ilə görüşüb.   Görüş çərçivəsində Qazaxıstan Respublikası ilə elm və ali təhsil sahəsində cari əməkdaşlıq, eləcə də inkişaf perspektivləri müzakirə edilib.

09/12/2025 17:13

Dekabrın 9-da elm və təhsil naziri Emin Əmrullayev İslam Təhsil, Elm və Mədəniyyət Təşkilatının (ICESCO) Baş direktoru Salim bin Məhəmməd əl-Malik ilə görüşüb.    Görüş zamanı Heydər Əliyev Fondu, Elm və Təhsil Nazirliyi və ICESCO-nun birgə təşəbbüsü ilə keçirilmiş “İslam Dünyası üçün Süni İntellekt İndeksinin Təqdimatı” adlı beynəlxalq konfransın nəticələri və bu istiqamətdə həyata keçirilə bilinəcək növbəti addımlar müzakirə edilib.    Eyni zamanda, görüşdə iki qurum arasında mövcud əməkdaşlıq çərçivəsində həyata keçirilən fəaliyyətlər və gələcək inkişaf perspektivləri ətrafında fikir mübadiləsi aparılıb.

09/12/2025 17:00