2023-2024-cü tədris ili üzrə ümumi təhsil müəssisələrinin 1-ci siniflərinə və məktəbəhazırlıq qruplarına uşaqların qəbulu 14 sentyabr saat 18:00-da yekunlaşacaq.   Qeyd edilən tarixdən etibarən mektebeqebul.edu.az elektron sistemi bağlanacaq.

14/09/2023 09:30

Sentyabrın 13-də “2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” və “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı” çərçivəsində 2023–2024-cü tədris ilində dünyanın nüfuzlu universitetlərində təhsil almaq hüququ qazanmış proqram iştirakçıları, eyni zamanda, "2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın bir qrup məzununun iştirakı ilə görüş keçirilib.    Görüşdə Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, elm və təhsil naziri Emin Əmrullayev, Dövlət Neft Fondunun icraçı direktoru İsrafil Məmmədov və digər qonaqlar iştirak ediblər.    Tədbir “2007–2015 Dövlət Proqramı” məzunu Türkər Qasımzadənin təsis etdiyi “Cadenza” orkestri tərəfindən milli və klassik musiqi əsərlərinin ifası ilə başlayıb.   Tədbirdə iştirak edən elm və təhsil naziri Emin Əmrullayev gənclərin xaricdə təhsil imkanları və perspektivləri barədə danışıb, dünyanın nüfuzlu universitetlərində oxumaq şansı qazananları təbrik edərək onlara uğurlar arzulayıb.   Çıxış edən Dövlət Neft Fondunun icraçı direktoru İsrafil Məmmədov gəncləri təbrik edib və tövsiyələrini çatdırıb.   Daha sonra Azərbaycan Respublikasının Əməkdar artisti, “2007–2015 Dövlət Proqramı” məzunu, skripkaçı Ceyla Seyidovanın ifası dinlənilib.     Qeyd edək ki, 2023–2024-cü tədris ili üzrə “2022–2026 Dövlət Proqramı” çərçivəsində ümumilikdə dünyanın 17 ölkəsinin nüfuzlu xarici ali təhsil müəssisələri üzrə 381 nəfər Azərbaycan Respublikası vətəndaşı təhsil almaq hüququ qazanıb. Proqram iştirakçılarından 49 nəfəri cari il üzrə dünyanın 10 ən yaxşı universitetindən qəbul alıb.

13/09/2023 19:00

Sentyabrın 13-də Şəki şəhəri 7 nömrəli tam orta məktəbin yeni inşa olunan binasının açılış mərasimi keçirilib.   Açılış mərasimində elm və təhsil nazirinin müavini İdris İsayev, Şəki Şəhər İcra Hakimiyyəti başçısının müavini Elman İmamverdiyev, Şəki – Zaqatala Regional Təhsil İdarəsinin müdiri Bəhruz Mehdiyev, həmçinin məktəb kollektivi iştirak ediblər.    Əvvəlcə məktəbin direktoru Bəkir Xəlilov çıxış edərək təhsil müəssisəsinin tarixi və uğurları barədə tədbir iştirakçılarına məlumat verib.   Açılış mərasimində iştirak edən elm və təhsil nazirinin müavini İdris İsayev yeni tədris ili və məktəb binasının açılışı münasibətilə təhsil işçilərini, məktəbli və valideynləri təbrik edərək onlara uğurlar arzulayıb.   İdris İsayev son illər ölkəmizdə çoxlu sayda məktəb binasının tikildiyini və əsaslı təmir olunduğunu vurğulayıb.    Tədbirdə çıxış edən Şəki Şəhər İcra Hakimiyyəti başçısının müavini Elman İmamverdiyev son illərdə təhsilin maddi-texniki bazasının möhkəmləndirilməsinin dövlət siyasətinin prioritet istiqamətlərindən olduğunu vurğulayıb.   Açılış mərasimindən sonra tədbir iştirakçıları yeni tədris ocağında yaradılan şəraitlə tanış olublar.   Bildirilib ki, yenidən tikilmiş məktəb 960 şagird yerlikdir. Məktəbdə 40 sinif otağı ilə yanaşı, hər cür avadanlıqla təchiz olunmuş məktəbəhazırlıq otağı, fizika, kimya, biologiya, texnologiya, informatika, çağırışaqədərki hazırlıq, linqafon kabinetləri, tibb otağı, kitabxana, akt və idman zalları, yeməkxana mövcuddur.   Hazırda məktəbdə 883 şagird, həmçinin 3 məktəbəhazırlıq qrupunda 67 şagird təhsil alacaq. Şagirdlərin təlim-tərbiyəsi ilə 120 müəllim məşğul olacaq.

13/09/2023 17:55

Sentyabrın 15-də  “Təhsildə könüllü fəaliyyətin təşkili” qrant müsabiqəsinə layihə sənədlərinin qəbulu yekunlaşacaq.   Layihə sənədlərinin (layihə təklifi forması, CV forması, iştirak sənədləri) qəbulu musabige@edu.gov.az elektron poçtu vasitəsilə aparılır. Müsabiqə barədə ətraflı məlumatla aşağıdakı elan vasitəsilə tanış ola bilərsiniz. “Təhsildə könüllü fəaliyyətin təşkili” qrant müsabiqəsinin elanı

13/09/2023 17:00

Sentyabrın 13-də elm və təhsil naziri Emin Əmrullayev Asiya İnkişaf Bankının Azərbaycandakı nümayəndəliyinin rəhbəri Kandis MakDeyqan ilə görüşüb.   Görüş zamanı Asiya İnkişaf Bankı tərəfindən hazırlanan “Azərbaycan üzrə 2024–2028-ci illəri əhatə edən Ölkə Tərəfdaşlıq Strategiyası” çərçivəsində Elm və Təhsil Nazirliyi ilə sözügedən təşkilat arasında əməkdaşlığın perspektivləri barədə fikir mübadiləsi aparılıb.

13/09/2023 16:19

Sentyabrın 13-də Şəki – Zaqatala Regional Təhsil İdarəsi üzrə təhsil işçilərinin sentyabr konfransı keçirilib.    Konfransda elm və təhsil nazirinin müavini İdris İsayev, Şəki Şəhər İcra Hakimiyyətinin başçısı Elxan Usubov, Elm və Təhsil Nazirliyinin Ümumi təhsilin təşkili və idarəolunması sektorunun müdiri Fuad Qarayev, Şəki – Zaqatala Regional Təhsil İdarəsinin müdiri Bəhruz Mehdiyev, Qəbələ, Oğuz, Qax, Zaqatala, Balakən rayonları və Şəki şəhəri üzrə təhsil sektorlarının əməkdaşları, həmin ərazilərdə çalışan məktəb direktorları, müəllimlər iştirak ediblər.   Tədbirdən əvvəl ümummilli lider Heydər Əliyevin abidəsi ziyarət edilib, önünə gül dəstələri düzülüb. Sonra şagirdlərin rəsm və əl işlərindən ibarət sərgiyə baxış keçirilib.    Konfransda çıxış edən elm və təhsil nazirinin müavini İdris İsayev ötən tədris ilində təhsil sahəsində əldə olunan nailiyyətlər, “2022–2026-cı illərdə sosial-iqtisadi inkişaf Strategiyası”nın müvafiq istiqamətlər üzrə uğurla icrası, eyni zamanda, təhsildə innovativ layihələrin tətbiq dairəsinin genişləndirilməsi barədə məlumat verib. İdris İsayev növbəti tədris ili üçün prioritet istiqamətləri konfrans iştirakçılarının nəzərinə çatdırıb.    Şəki Şəhər İcra Hakimiyyətinin başçısı Elxan Usubov təhsil sahəsindəki uğurların daha da artacağına əminliyini ifadə edib və yeni tədris ili münasibətilə konfrans iştirakçılarına uğurlar arzulayıb.    Daha sonra Şəki – Zaqatala Regional Təhsil İdarəsinin müdiri Bəhruz Mehdiyev hesabatla çıxış edib.    Konfrans şagirdlərin ifasında ədəbi-bədii kompozisiyalarla davam etdirilib.

13/09/2023 16:05

Moldova Respublikasının Nikolay Testemitsanu adına Dövlət Tibb və Əczaçılıq Universiteti Azərbaycan vətəndaşları üçün bakalavriat/baza ali tibb təhsili üzrə təqaüdlü əsaslarla təhsil təklif edir.   Təqaüd proqramına qeydiyyat üçün son müraciət tarixi 18 sentyabr 2023-cü ildir.   Əlavə məlumatIarla elan vasitəsilə tanış ola bilərsiniz.

13/09/2023 14:49

Cari ildən "İnnovativ məktəb" layihəsi çərçivəsində bir neçə təhsil müəssisəsində sahibkarlıq kursu pilot şəkildə tədris ediləcək. Bu məqsədlə İsrailin ən böyük məktəb şəbəkəsi  “ORT İsrail” tərəfindən müvafiq dərs vəsaiti hazırlanıb.   Sözügedən vəsait şagirdləri gələcəyin çağırışlarına hazırlayacaq sahibkarlıq təfəkkürü, yaradıcı düşüncə və XXI əsr bacarıqlarının aşılanması kimi mövzuları əhatə edir. Vəsaitə həmçinin layihəəsaslı tapşırıqlar, komanda işləri və individual çalışmalar daxildir.    Sahibkarlıq kursunun tədrisi ilə bağlı cari ilin 4-8 sentyabr tarixlərində pilot tədris aparılacaq məktəblərin direktor və müəllim heyəti üçün “ORT İsrail” mütəxəssisləri tərəfindən təlim keçirilib. Təlimdə layihəəsaslı tədris, müəllimlərin şagirdlərə yanaşması, məktəblilərin yaradıcı düşüncəyə təşviqi, sinif otağında müəllim-şagird rolları və digər mövzulara toxunulub, praktiki tapşırıqlar, interaktiv müzakirələr təşkil edilib.    

13/09/2023 11:18

Sentyabrın 12-də Xaçmaz rayonunun Qusarçay kənd tam orta məktəbinin binası əsaslı təmirdən sonra istifadəyə verilib.    Açılış mərasimində Elm və Təhsil Nazirliyinin Aparat rəhbəri Mətin Kərimli, Xaçmaz Rayon İcra Hakimiyyətinin başçısı Elnur Rzayev, Quba – Xaçmaz Regional Təhsil İdarəsinin müdiri Rüfət Hacıyev, məktəb kollektivi, kənd sakinləri iştirak ediblər.   Bildirilib ki, Arif Məmmədov adına Qusarçay kənd tam orta məktəbinin binasında əsaslı təmir işləri aparılmaqla yanaşı, təhsil ocağı üçün 3 mərtəbəli yeni korpus və idman zalının tikintisi həyata keçirilib. 960 şagird yerlik məktəbdə sinif otaqları, fənn kabinetləri, müəllimlər otağı, kitabxana, kompüter otağı, laboratoriyalar, akt və idman zalları, yeməkxana fəaliyyət göstərəcək. Məktəbdə dərslər ikinövbəli şəkildə keçiriləcək.   Tədbirdə çıxış edənlər təhsil müəssisələrinin yenilənməsi, onların maddi-texniki bazasının təminatı ilə bağlı ciddi işlər görüldüyünü, bu işlərin də gənc nəslin daha savadlı və bilikli yetişməsinə xidmət etdiyini qeyd ediblər.   

12/09/2023 17:50

Sentyabrın 12-də Şərqi Zəngəzur Regional Təhsil İdarəsi üzrə təhsil işçilərinin sentyabr konfransı keçirilib.   Konfransda Elm və Təhsil Nazirliyinin Aparat rəhbərinin müavini Fərzəli Qədirov, nazirliyin İnformasiya və vətəndaşlara xidmət şöbəsinin müdir müavini Səbuhi Rzayev, Şərqi Zəngəzur Regional Təhsil İdarəsinin müdiri Fuad Bədəlov, Qubadlı, Kəlbəcər, Laçın, Cəbrayıl və Zəngilan rayonları üzrə təhsil sektorlarının əməkdaşları, həmin rayonlarda çalışan məktəb direktorları, müəllimlər və tədris ili ərzində müxtəlif olimpiada və müsabiqələrin qalibi olan şagirdlər iştirak ediblər.   Konfrans Dövlət Himninin səsləndirilməsi ilə başlayıb.   Elm və Təhsil Nazirliyinin Aparat rəhbərinin müavini Fərzəli Qədirov çıxış edərək  ötən tədris ilində əldə olunan nailiyyətlər, təhsil islahatları, yeni tikilən məktəblər, şagird davranış qaydaları barədə danışıb, yeni dərs ilinin əsas hədəflərini konfrans iştirakçılarının nəzərinə çatdırıb.   Daha sonra Şərqi Zəngəzur Regional Təhsil İdarəsinin müdiri Fuad Bədəlov ötən tədris ilinə dair  hesabatla çıxış edib.   Konfransda həmçinin 2022-2023-cü tədris ilində nümunəvi fəaliyyətləri ilə seçilən məktəblər, direktorlar, müəllimlər təltif olunub.   Tədbir bədii proqramla yekunlaşdırılıb. 

12/09/2023 16:55