Mərkəzi icra hakimiyyəti orqanları rəhbərlərinin 2015-ci ilin avqust ayında şəhər və rayonlarda vətəndaşların qəbulu cədvəlinə uyğun olaraq keçirilən qəbulda vətəndaşlar əsasən, müəllimlərin işə qəbulu və ya iş yerinin bir məktəbdən, həmçinin, bir rayondan digərinə dəyişdirilməsi, işə bərpa olunma, təhsil sənədlərinin tanınması, orta, ali və orta ixtisas məktəbləri tələbələrinin bir təhsil müəssisəsindən digərinə köçürülməsi, xaricdə təhsil, təhsil haqqı və bir sıra digər məsələlərlə əlaqədar müraciət ediblər. Qəbulda 122 vətəndaşın müraciəti dinlənilib və əksər məsələlər yerindəcə həllini tapıb. Bir sıra müraciətlərlə bağlı nazirliyin müvafiq qurumlarına tapşırıqlar verilib. Bəzi vətəndaşların nazirliyin səlahiyyətlərinə aid olmayan və ya şəxsi xarakter daşıyan müraciətləri isə müvafiq qurumlara çatdırılmaq üçün qeydə alınıb və nəzarətə götürülüb.

27/08/2015 14:25

Yeni tədris ilinin başlanmasına artıq sayılı günlər qalıb. Cəmi 20 gündən sonra minlərlə gənc ali təhsil müəssisələrinin qapısından içəri daxil olaraq tələbə həyatına başlayacaq. Tələbə adını qazananlar arasında ali təhsil müəssisələrinə keçirilən qəbul imtahanlarında yüksək bal toplayanları xüsusi fərqləndirmək olar. Onlardan bir neçəsini sizə təqdim edirik. Allahverdiyev Əli Naxçıvan Muxtar Respublikası Şərur rayonu Zeybə kənd tam orta məktəbinin məzunudur. 2012 və 2014-cü illərdə beynəlxalq olimpiadalarda iştirak edib. 2012-ci ildə Türkiyədə keçirilən riyaziyyat fənni üzrə olimpiadada və 2014-cü ildə Nigeriyada keçirilən Beynəlxalq Fənn Olimpiadasında qızıl medala layiq görülüb. 2015-ci ildə isə Respublika Fənn Olimpiadasında riyaziyyat fənni üzrə gümüş medal qazanıb. Əlinin fikrincə, təhsildə uğur qazanmaq üçün səbr və qətiyyətlə oxumaq lazımdır: “Əgər özünə inam varsa, öz üzərində çalışırsansa, sistemli şəkildə oxuyursansa mütləq istədiyinə nail olacaqsan”. Gününün böyük hissəsini  - 12 saatını dərslərinə həsr edən Əli əlavə mütaliəyə də vaxt ayırıb. Ali məktəbə qəbul imtahanında maksimum bal toplamaq isə onun əsas hədəfi olub. Bu hədəfə çatması onun arzuladığı ixtisas üzrə universitetə daxil olmasını reallaşdırıb. Əli texnologiya mütəxəssisi olmaq, müasir texnoloji yeniliklərin ölkəmizdə tətbiqinə öz töhfəsini vermək arzusundadır. Bu il ali təhsil müəssisələrinə qəbul imtahanlarında yüksək nəticə göstərənlərin arasında bacı-qardaş da var. Gəncə şəhər 1 saylı tam orta məktəbin məzunları olan Qasımov Elçin imtahanda 700 bal, bacısı Gülçin 685 bal toplayıb. Elçin hesab edir ki, imtahanda yüksək nəticə əldə etmək üçün yaxşı təmələ malik olmaq lazımdır. Əvvəldən oxumağa ciddi fikir verən, gündəlik dərslərinə hazırlaşan məzunlar adətən imtahanda fərqlənirlər. Elçin I sinifdən XI sinfə qədər əlaçı olub. Əlaçı olmağında valideyn və müəllimlərin böyük əməyini əvəzsiz hesab etsə də, özünün yorulmadan oxuduğunu da nəzərə çarpdırır. Ancaq onun məktəb həyatı təkcə oxumaqla məhdudlaşmayıb. Şahmatı sevən Elçin Gəncə şəhərində keçirilən yarışda mükafat qazanıb. Elçinin bacısı Gülçin isə II ixtisas qrupu üzrə qəbul imtahanlarında 685 bal toplayıb. Bununla yanaşı, Azərbaycanlı gənclərin xaricdə təhsili üzrə dövlət proqramına  müraciət edən Gülçin Ankara şəhərində Orta Doğu Universitetinin “İqtisadiyyat” fakültəsinə qəbul olub. Bu uğuru qazanmaq elə də asan olmayıb. O, gündəlik dərslərini oxumaqla yanaşı repetitorla da məşğul olub. Özünə istirahət verdiyi vaxtlarda isə rəsm çəkən Gülçin hesab edir ki, dəqiq hədəfi olan hər bir məzun ali məktəbə daxil ola bilər. 

26/08/2015 17:57

Təhsildə informasiya texnologiyalarının tətbiqinə həsr olunmuş müsabiqə “Müəllim” və “Şagird” istiqamətləri üzrə müxtəlif nominasiyalarda təşkil olunacaq. Müsabiqənin keçirilməsində məqsəd tədris prosesində informasiya texnologiyalarından fəal istifadə edən  müəllimləri həvəsləndirmək və fəaliyyətlərini dəstəkləmək, ən yaxşı elektron tədris vəsaitlərini geniş istifadəçi auditoriyasına tanıtmaq, internetin imkanlarından istifadə etməklə həyata keçirilən yeni tədris üsulları barədə ölkənin təhsil ictimaiyyətini məlumatlandırmaq, tədris məqsədləri üçün İKT-nin tətbiqinin yeni formalarını axtarmaq, təhsil müəssisələrində elektron resurslardan istifadəni genişləndirmək, müəllim və şagirdləri elektron resurslar yaratmağa və hazır resurslardan istifadəyə stimullaşdırmaqdan ibarətdir. Müsabiqədə ümumtəhsil müəssisələrinin pedaqoji heyəti, pedaqoji kadrların ixtisasartırma və yenidən hazırlanması ilə məşğul olan qurumların  metodist mütəxəssisləri və şagirdlər iştirak edə bilər. Müsabiqədə iştirak etmək istəyənlər www.musabiqe.edu.az səhifəsində qeydiyyatdan keçməli və ərizəni doldurmalıdırlar. Qaliblərə diplom və hədiyyələr təqdim olunacaq.   Təhsildə informasiya texnologiyalarının tətbiqi sahəsində “Elektron Təhsil” Respublika müsabiqəsinin keçirilməsi barədə Azərbaycan Respublikası təhsil nazirinin əmri

24/08/2015 11:28

Müsabiqədə iştirak etmək üçün 3462 vakant yerə 24437 nəfər ərizə verib. Onlardan 21795 nəfərin ərizəsi təsdiqlənərək müsabiqənin birinci mərhələsinə - test imtahanlarına buraxılıb. Müsabiqənin birinci yerləşdirilməsi nəticələrinə görə, 1877 nəfər işə qəbul olunmaq hüququ qazanıb. Ümumi təhsil müəssisələrinə və peşə liseylərinə müəllimlərin işə qəbulu üzrə müsabiqədən sonra boş qalan yerlər üzrə əlavə yerləşdirilmə aparılıb. Müsabiqədə iştirak edərək keçid balını toplayan, lakin heç bir yer tutmayan 3599 nəfər əlavə yerləşdirmədə iştirak üçün müraciət edib. Əlavə yerləşdirmə nəticəsində 356 nəfər işə qəbul olunub. Beləliklə, müsabiqənin nəticələrinə əsasən, ümumilikdə 2233 nəfər işə qəbul edilib. Onlardan 1589 nəfərinə (71%) həvəsləndirmə tədbirləri tətbiq olunub. Bu il müsabiqə nəticəsində vakant yerlərin tutulma göstəriciləri ötən ilin nəticələrindən 32 % artıqdır. Belə ki, ötən tədris ilində işə qəbul olunanların sayı 1692 nəfər olmuşdusa, cari dərs ilində onların sayı 540 nəfər artıb. Bu il keçirilmiş müsabiqədə 20 min nəfərdən çox namizədin iştirak etməsinə baxmayaraq, nəticələrdən apellyasiya şikayəti verən olmayıb. Müəllimlərin işə qəbulu üzrə müsabiqənin nəticələri barədə Azərbaycan Respublikası təhsil nazirinin əmri

24/08/2015 10:45

Layihənin icraçıları üçün təşkil olunan təlimlər alman mütəxəssisləri tərəfindən keçirilir. Layihə Təhsil Nazirliyi və BMT-nin Uşaq Fondu (UNİCEF) ilə birgə 2014-2015-ci illərə dair İllik Fəaliyyət Planına uyğun olaraq reallaşdırılır. Layihə ilə bağlı beynəlxalq məsləhətçi xidməti BMT-nin Uşaq Fondu UNİCEF tərəfindən təmin olunur. “İbtidai təhsil səviyyəsi üzrə inklüziv təhsilin tətbiqi” pilot layihəsi ilk olaraq 2015-2016-cı tədris ilində Bakı şəhərində yerləşən 220 və 138 nömrəli məktəblərdən seçilmiş 4 birinci sinifdə həyata keçiriləcək.

22/08/2015 04:48

Belə ki, təhsil naziri Mikayıl Cabbarov 27 avqust 2015-ci il tarixində saat 10:00-da Sumqayıt şəhərindəki Tarix Muzeyində Sumqayıt şəhəri, Abşeron, Qubadlı və Zəngilan rayon sakinlərini qəbul edəcək. 24 avqust 2015-ci il tarixinə nəzərdə tutulmuş qəbul üçün qeydiyyatdan keçmiş vətəndaşlar 27 avqust 2015-ci il tarixində qəbul ediləcəklər. Qeydiyyatdan keçmiş vətəndaşlardan xahiş olunur ki, qəbula gələrkən aidiyyatı məsələləri dolğun ifadə edən ərizə ilə müraciət etsinlər.

21/08/2015 11:38

Bundan IV və VI siniflər üçün 71 adda 2033290 nüsxə dərslik və müəllim üçün metodik vəsait artıq yerlərə çatdırılıb. VIII siniflər üçün hazırlanmış 70 adda (2062080 nüsxə) yeni dərslik və müəllim üçün metodik vəsaitin isə yerlərə göndərilməsi prosesi davam edir. Bundan əlavə, bir il öncədən 2016/2017-ci tədris ilinə ümumtəhsil məktəblərinin IX sinifləri üçün kurikulum əsasında 70 adda dərslik və müəllim üçün metodik vəsaitin hazırlanmasına (nəşrinə) dair 22 lot üzrə açıq tender elan olunub. Müsabiqənin oktyabrın sonunda yekunlaşdırılması nəzərdə tutulur. 

19/08/2015 07:27

Təhsil naziri Mikayıl Cabbarov 24 avqust 2015-ci il tarixində saat 10:00-da Sumqayıt şəhərindəki Tarix Muzeyində mərkəzi icra hakimiyyəti orqanları rəhbərlərinin 2015-ci ilin avqust ayında şəhər və rayonlarda vətəndaşların qəbulu cədvəlinə uyğun olaraq, Sumqayıt şəhərində və Abşeron rayonunda yaşayan, həmçinin Qubadlı və Zəngilan rayonlarından olan vətəndaşları qəbul edəcək. Qəbula gəlmək istəyən vətəndaşlar 19, 20 və 21 avqust 2015-ci il tarixlərində Təhsil Nazirliyinin Telefon Məlumat Mərkəzinin 146 nömrəli telefonuna (“Qaynar xətt” xidməti) və ya http://edu.gov.az/az/contacts/request elektron poçt ünvanına müraciət edərək qeydiyyatdan keçməlidirlər. Qeydiyyatdan keçmiş vətəndaşlardan xahiş olunur ki, qəbula gələrkən aidiyyatı məsələləri dolğun ifadə edən ərizə ilə müraciət etsinlər. 

19/08/2015 05:05

  Görüş zamanı təhsil nazirinin müavini Firudin Qurbanov Azərbaycan vətəndaşlarının xarici ölkələrdə təhsil almasının əhəmiyyətindən danışıb. F.Qurbanov Macarıstan və Çində bu ölkələrin ayırdıqları təqaüdlər hesabına təhsil almaq hüququ qazanmış tələbələri təbrik edərək onlara təhsillərində uğurlar arzulayıb və təhsildə əldə etdikləri nailiyyətlərin ölkəmizin dinamik inkişaf prosesinə əhəmiyyətli təsir göstərəcəyinə əminliyini vurğulayıb. Xatırladaq ki, Azərbaycan Respublikası Prezidentinin 2014-cü ilin noyabr ayında Macarıstana rəsmi səfəri çərçivəsində Azərbaycanın Təhsil Nazirliyi və Macarıstanın İnsan Resursları Nazirliyi arasında 2015-2017-ci illər üzrə İş Proqramı imzalanıb. Proqrama uyğun olaraq Macarıstan tərəfi birtərəfli qaydada Azərbaycan vətəndaşlarına Macarıstan ali təhsil müəssisələrində təhsil almaları üçün təqaüdlər ayırır. Proqram şərtlərinə görə, Macarıstan tərəfi təqaüd hesabına təhsil alacaq tələbələri ödənişsiz təhsil, universitet yataqxanasında yaşayış, tibbi sığorta və aylıq təqaüdlə təmin edir. Beləliklə 2015/2016-cı tədris ilində Macarıstanda bu ölkənin büdcəsi hesabına təhsil alacaq tələbələrin seçimi keçirilib, bununla da 51 nəfər Azərbaycan vətəndaşı Macarıstanın “Debrecen University”, “Budapest Business School”, “Corvinus University of Budapest” kimi ali təhsil müəssisələrində insan resurslarının idarəolunması, kompüter elmləri, biznesin idarəolunması, turizm, kimya mühəndisliyi, iqtisadiyyat və s. ixtisas istiqamətləri üzrə təhsil almaq hüququ qazanıblar. Bunlardan 18 nəfəri bakalavriat, 28 nəfəri magistratura, 5 nəfəri doktorantura təhsil səviyyələri üzrə təhsil alacaqlar. Bu il Təhsil Nazirliyi tərəfindən həmçinin Azərbaycan Respublikası və Çin Xalq Respublikası arasında 13 iyul 2012-ci il tarixində imzalanmış “Təhsil sahəsində əməkdaşlıq haqqında Saziş”ə uyğun olaraq ÇXR ali təhsil müəssisələrində 2015/2016-cı tədris ilində təhsil alacaq tələbələrin seçimi aparılıb, yekun yerləşdirmələr nəticəsində 8 nəfər namizəd “Huazhong University of Science&Technology”, “China Medical University” kimi ali təhsil müəssisələrində çin dili, biologiya, tibb ixtisas istiqamətləri üzrə təhsil almaq hüququ qazanıblar. Onlar ÇXR ali təhsil müəssisələrində bakalavriat, magistratura, doktorantura təhsil səviyyələri üzrə təhsil alacaqlar. 

18/08/2015 13:21

Qızıl və gümüş medal alanların 69 nəfəri Bakı, 83 nəfəri isə bölgə məktəblərini təmsil edir. Onların 135 nəfəri dövlət, 17 nəfəri özəl məktəblərdə təhsil alıb. Medal sahiblərinin 75 nəfəri oğlan, 77 nəfəri qızdır. Medala namizədlər Nazirlər Kabinetinin “Ümumi təhsili xüsusi nailiyyətlərlə başa vuran məzunların qızıl və ya gümüş medalla təltif olunma Qaydası”na uyğun olaraq müəyyənləşdirilib. Medalla təltif zamanı namizədlərin ümumtəhsil məktəbində oxuduğu müddətdə təhsildə xüsusi nəticələri ilə bərabər, nümunəvi davranışı ilə fərqlənməsi, fənn olimpiadalarında, ölkə və beynəlxalq səviyyəli bilik yarışlarında, müsabiqə və layihələrdə yüksək mükafat qazanması nəzərə alınmışdır. Həmçinin, təhsildə yüksək nəticələr göstərmiş bir qrup məzun Təhsil Nazirliyinin Fəxri Fərmanı ilə təltifə təqdim olunmuşdur.   Ümumtəhsil məktəblərinin məzunlarının qızıl və gümüş medalla təltifi haqqında Azərbaycan Respublikası təhsil nazirinin əmri 

11/08/2015 08:32