Mərasimdə təhsil naziri Mikayıl Cabbarov, Şəmkir Rayon İcra Hakimiyyətinin başçısı Alimpaşa Məmmədov və rayonun təhsil ictimaiyyətinin nümayəndələri iştirak ediblər. Qonaqlar öncə məktəbin binası ilə tanış olublar. Bildirilib ki, Təhsil Nazirliyi tərəfindən tikilən 640 şagird yerlik Şəmkir şəhər Nizami Gəncəvi adına tam orta məktəbin inşasına  ötən ilin dekabr ayından başlanılıb. Cəmi 10 aya yüksək keyfiyyətlə tikilən məktəbdə 26 sinif otağı, 2 kimya, 2 biologiya və 2 fizika laboratoriyası, 2 əmək təlimi otağı, kompüter otağı, distant təhsil sistemi üçün 2 tədris otağı, akt zalı, idman zalı, kitabxana və futbol meydançası var. Məktəb binasına videomüşahidə, yanğın əleyhinə siqnalizasiya sistemləri quraşdırılıb, internet və telefon xətləri çəkilib. Mərasimdə təhsil naziri Mikayıl Cabbarov çıxış edərək bildirib ki, son 12 ildə Azərbaycanda 3000-dən artıq ümumtəhsil müəssisəsi tikilib və əsaslı təmir olunub. Şəmkir şəhərində belə bir təhsil ocağının inşa olunması ölkə Prezidentinin təhsil sahəsinə olan yüksək diqqət və qayğısının bariz nümunəsidir. Bu diqqətin sayəsində artıq ölkəmizin bütün rayon və şəhərlərində yeni-yeni məktəb binaları tikilir, təhsil müəssisələrinin maddi-texniki bazasının möhkəmləndirilməsi istiqamətində davamlı tədbirlər həyata keçirilir.  Yeni istifadəyə verilən bu məktəbdə də yüksək keyfiyyətli təhsil almaq üçün bütün şərait nəzərdə tutulub. Sonda rayonun təhsil ictimaiyyəti və bu təhsil ocağının pedaqoji kollektivi ilə söhbət aparılıb.

09/10/2015 12:18

Oktyabrın 9-da Bakı Ekspo Mərkəzində Təhsil Nazirliyinin rəsmi dəstəyi ilə 9-cu Azərbaycan Beynəlxalq “Təhsil” və “Karyera” sərgiləri öz işinə başlayıb. Tədbirin açılış mərasimində təhsil nazirinin müavini Ceyhun Bayramov, ali və orta ixtisas təhsili müəssisələrinin rəhbərləri, ölkəmizdəki diplomatik korpusun nümayəndələri iştirak ediblər. Mərasimdə çıxış edən Ceyhun Bayramov qeyd edib ki, təhsilin iqtisadi həyatdakı  rolu  müasir dövrün əsas çağırışlarından biridir. Belə ki,  təhsil həm insanların bilik və bacarıqlarının artırılmasında, həm də onların uğurlu gələcəyə hazırlanmasında müstəsna rol oynayır. Nazir müavini bu sərginin müxtəlif təhsil müəssisələri arasında əməkdaşlıq əlaqələrinə töhfə verəcəyini, təhsilverən və təhsilalanlar üçün əlavə imkanlar yaradacağını deyib. İşə bu gün başlayan Beynəlxalq “Təhsil” sərgisində dünyanın 16 ölkəsindən 124 müəssisə iştirak edir. İştirakçılar arasında Azərbaycan, ABŞ, BƏƏ, Rusiya, Latviya, Litva, Niderland Krallığı, Polşa, Türkiyə, Qazaxıstan, İsveçrə, Macarıstan və digər ölkələrin ali təhsil müəssisələri, eləcə də kolleclər, tədris-təlim kursları, habelə dövlət təşkilatları və müəssisələri var. İ.M.Seçenov adına Birinci Moskva Dövlət Tibb Universiteti, akademik S.P.Korolyov adına Samara Dövlət Aerokosmik Universiteti, Latviya Nəqliyyat və Rabitə İnstitutu, Milli Tədqiqat Texnoloji Universiteti “MİSiS”, N.P.Oqaryov adına Mordoviya Dövlət Milli Tədqiqat Universiteti, Polşanın Avro-Regional İqtisadiyyat Universiteti sərgidə ilk dəfədir iştirak edir. İştirakçıların böyük marağına səbəb olan Təhsil Nazirliyinin stendində isə nazirliyin yaxın illər üçün nəzərdə tutduğu plan və proqramlar haqqında geniş məlumatlar təqdim edilir. Sərgi çərçivəsində Azərbaycan Texnologiya Universitetinin rektoru Akif Süleymanov və “Caspian Event Organisers” MMC-nin direktoru Bəhruz Hidayətzadə əməkdaşlıq memorandumu imzalayıblar. Təhsil nazirinin müavini Ceyhun Bayramovun iştirakı ilə imzalanan memorandum Müştəriyə Yönəlmə Proqramının həyata keçirilməsinə əlavə imkanlar yaratmaq və proqramın effektiv icrasına dəstək olmaqdır. Qeyd edək ki, Təhsil Nazirliyinin həyata keçirdiyi Müştəriyə Yönəlmə Proqramı pilot olaraq Azərbaycan Texnologiya Universitetində reallaşdırılır. Proqramın əsas hədəfi ali təhsil müəssisələrini müştəri yönümlü fəaliyyətə təşviq etməkdır. İki gün davam edəcək sərgiyə təhsil ictimaiyyəti böyük maraq göstərir.

09/10/2015 11:56

Təhsil Nazirliyində Nizami Rayon Uşaq Yaradıcılıq Mərkəzinin “Fəxri Fərman”la təltif olunmuş bir qrup əməkdaşına mükafatların təqdim edilməsi mərasimi keçirilib. Tədbirdə təhsil nazirinin müavini Firudin Qurbanov iştirak edib.    “Fəxri Fərman”lar Yaradıcılıq Mərkəzinin əməkdaşlarına Bakı şəhərində fəaliyyət göstərən uşaq yaradıcılıq mərkəzlərinin bədii özfəaliyyət kollektivlərinin Gənc Tamaşaçılar Teatrında keçirilmiş baxış konsertinin təşkilindəki fəal iştirakına görə verilib. Konsert proqramı rəqs, mahnı və musiqi çalğı alətlərində ifa üzrə 30 ən yaxşı çıxışdan ibarət olub. 300-ə yaxın dərnək üzvünün iştirak etdiyi konsertin keçirilməsində məqsəd uşaqların asudə vaxtının səmərəli təşkilində, onların istedadlarının üzə çıxarılmasında xüsusi rolu olan uşaq yaradıcılıq mərkəzlərinin gördüyü işləri ictimaiyyətin diqqətinə çatdırmaq, istedadlı uşaqların həmin mərkəzlərə cəlb edilməsini genişləndirməkdən ibarət olub. Tədbirdə valideynlər, rəsmi qonaqlar, yaradıcılıq mərkəzlərinin rəhbərləri və pedaqoji işçilər iştirak ediblər. Mükafatlandırma mərasimində Firudin Qurbanov təltif olunanlara təbriklərini çatdırıb və “Fəxri Fərman”ları onlara təqdim edib.

09/10/2015 10:53

Oktyabrın 8-də Gürcüstanın təhsil və elm naziri Tamar Sanikidzenin dəvəti ilə bu ölkəyə səfər edən təhsil naziri Mikayıl Cabbarov öncə Tbilisidə yerləşən Heydər Əliyev Parkını ziyarət edərək ulu öndərin abidəsi önünə güllər qoyub. Sonra Gürcüstanın təhsil və elm naziri Tamar Sanikidze ilə görüş keçirilib. Görüşdə nazirlər Azərbaycanla Gürcüstan arasında əlaqələrin yüksək səviyyədə inkişafını və hər iki ölkə rəhbərliyinin qarşılıqlı əməkdaşlığın inkişaf etdirilməsində maraqlı olduğunu qeyd ediblər. Görüş zamanı iki ölkə arasında təhsil sahəsində əlaqələrin mövcud vəziyyəti və gələcək inkişafı perspektivləri, təhsilin müxtəlif sahələri üzrə qarşılıqlı təcrübə mübadiləsi, ali təhsil sahəsində əməkdaşlıq, Gürcüstanda yaşayan azərbaycanlı icmasının təhsil problemləri və onların həlli istiqamətində səylərin artırılması, xüsusilə də müəllim hazırlığı və məktəblərin Azərbaycan dili və ədəbiyyatı dərslikləri ilə təmin olunması kimi məsələlər müzakirə olunub. Daha sonra Mikayıl Cabbarov azərbaycanlı icmasının təhsil aldığı M.F.Axundzadə adına Tbilisi şəhəri 73 saylı və 64 saylı orta məktəblərdə olub, hər iki təhsil müəssisəsinin müəllim və şagird heyəti ilə görüşüb, onların vəziyyəti ilə maraqlanıb. Səfər çərçivəsində Mikayıl Cabbarov Azərbaycan Respublikasının Gürcüstandakı səfirliyində Gürcüstandakı azərbaycanlı icmasının nümayəndələri ilə görüşüb, onların problemləri ilə maraqlanıb və suallarını cavablandırıb. Görüşdə Azərbaycan Respublikasının Gürcüstandakı fövqaladə və səlahiyyətli səfiri Azər Hüseyn, Gürcüstan Baş nazirinin müşaviri Savalan Mirzəyev,  Gürcüstan Parlamentinin deputatları və digər icma nümayəndələri iştirak ediblər. Səfər zamanı Mikayıl Cabbarov həmçinin, Tbilisi şəhərində yerləşən Mirzə Fətəli Axundzadənin ev muzeyini ziyarət edib.

09/10/2015 05:56

Təhsil Nazirliyinin yığma komandaları MDB ölkələri arasında keçirilən III Beynəlxalq Məktəbli İdman Festivalında uğur qazanıblar.           Rusiyanın Ulyanovsk şəhərində təşkil edilən festivalda 12 ölkənin məktəbli komandaları 7 idman növü üzrə mübarizə aparıblar. Yarışlarda ölkəmizi Təhsil Nazirliyinin tabeliyində fəaliyyət göstərən idman məktəblərinin şagirdlərindən ibarət basketbol, şahmat, stolüstü tennis və badminton idman növləri üzrə komandalar təmsil ediblər.           Komanda hesabında basketbol və şahmat idman növləri üzrə təmsilçilərimiz 2-ci yerə, stolüstü tennis idman növü üzrə 3-cü yerə, badminton idman növü üzrə isə qoşa yarışlarda iki idmançımız 3-cü yerə çıxıblar. Ümumilikdə, təmsilçilərimiz yarışlarda 12 medal qazanıblar.

08/10/2015 11:44

2015-2016-cı tədris ilində Azərbaycan Dövlət İqtisad Universitetinə (ADİU) 51 əcnəbi tələbə qəbul olunub. Onlardan 21-i əcnəbi tələbələr üçün hazırlıq kurslarını, 19-u bakalavr, 3-ü magistratura, 7-si MBA, 1-i isə doktorantura təhsilini seçiblər. Əcnəbi tələbələr əsasən, dünya iqtisadiyyatı və maliyyə ixtisaslarına üstünlük veriblər. Tələbələr arasında 21 nəfərlik heyətlə Nigeriya vətəndaşları üstünlük təşkil edir. Ümumilikdə, ADİU-da təhsil alan əcnəbi tələbələr əsasən Rusiya, Türkiyə, Özbəkistan, Gürcüstan, İran, Küveyt və Pakistan vətəndaşlarıdır. Əcnəbi tələbələrin ADİU-ya qəbul prosesi bu ildən etibarən yalnız elektron formada aparılıb. Bu məqsədlə yaradılan http://admission.unec.edu.az/ səhifəsi vasitəsilə 85 elektron müraciət qəbul olunub. Müraciətlər Azərbaycan Respublikasının Nazirlər Kabinetinin 15 may 2015-ci il tarixli, 125 saylı qərarı ilə təsdiq olunmuş “Azərbaycan Respublikası vətəndaşlarının xarici ölkələrdə, əcnəbilərin və vətəndaşlığı olmayan şəxslərin Azərbaycan Respublikasında təhsil alması Qaydaları”nın tələblərinə əsasən yoxlanılıb. Bundan sonra tələblərə cavab verən müraciətçilərlə skype vasitəsilə onlayn müsahibələr təşkil olunub. Sonda ADİU-da təhsil almaları uyğun hesab edilən 51 nəfər seçilib. Ümumilikdə, hazırda ADİU-da 225 əcnəbi tələbə təhsil alır.

08/10/2015 11:14

Təhsil Nazirliyinin Məktəbdənkənar fəaliyyətin təşkili şöbəsinin, eyni zamanda Nazirlik sistemində fəaliyyət göstərən idman məktəblərinin, yaradıcılıq mərkəzlərinin rəhbərləri və əməkdaşlarının təltifetmə mərasimi keçirilib. Mərasimdə bildirilib ki, mayın 27-dən başlayaraq 1 ay müddətində “Bakı-2015” I Avropa Oyunlarına dəstək məqsədilə paytaxtın Fəvvarələr meydanında qurulan “İfam” xalq səhnəsində Təhsil Alan Gənclərin Respublika Bədii Yaradıcılıq Evində fəaliyyət göstərən bədii qiraət, nitq mədəniyyəti, mahnı, vokal və rəqs dərnəklərinin üzvləri çıxış ediblər. Ümumilikdə “İfam” səhnəsində çıxış edən 956 iştirakçıdan 400-ə yaxını Bədii Yaradıcılıq Evinin dərnək üzvləri olub. Şagird və tələbələrin bu işə cəlb olunması, koordinasiyası, ictimaiyyətin konserti izləməsi üçün şəraitin yaradılması və digər işlərin həyata keçirilməsində Bədii Yaradıcılıq Evinin kollektivi və nazirliyin Məktəbdənkənar fəaliyyətin təşkili şöbəsi mühüm rol oynayıb. Bunları nəzərə alaraq Bədii Yaradıcılıq Evinin direktoru və bir neçə əməkdaşı “Fəxri Fərman”a layiq görülüb. I Avropa Oyunları zamanı Nazirliyin tabeliyində fəaliyyət göstərən Uşaq-Gənclər İdman Məktəblərinin kollektivləri isə kütləvi idman yarışlarının keçirilməsində, eyni zamanda yarışlar zamanı təşkilati işlərin görülməsində göstərdikləri xidmətə görə “Fəxri Fərman”la təltif olunublar. Bundan əlavə aprel may ayları ərzində 14 idman növü üzrə respublika ərazisində yarışlar təşkil olunub. Mərasimdə təhsil nazirinin müavini Firudin Qurbanov təltif olunanlara təbriklərini çatdırıb və mükafatları onlara təqdim edib.

08/10/2015 10:57

Oktyabrın 8-də Təhsil Nazirliyi ilə “British Council” arasında “İş dünyası üçün bacarıqlar” və “Mehmanxana inzibatçısı” layihələrinin dəstəklənməsi barədə Əməkdaşlıq Memorandumunun imzalanması mərasimi keçirilib. Sənədi təhsil nazirinin müavini Firudin Qurbanov və “British Council”un Azərbaycan nümayəndəliyinin rəhbəri Elizabet Uayt imzalayıb. Mərasimdə bildirilib ki, “İş dünyası üçün bacarıqlar” layihəsində ilk peşə-ixtisas təhsili müəssisələrində IKT və telekommunikasiya üzrə təhsil alan şagirdlərin bilik və bacarıqlarının artırılması, eyni zamanda həmin təhsil müəssisələrində müvafiq ixtisaslar üzrə fəaliyyət göstərən müəllimlər üçün təlimlərin keçirilməsi nəzərdə tutulub. Layihənin reallaşdırılmasında məqsəd şagirdlərə iqtisadiyyat və biznes üzrə baza biliklərinin verilməsidir. Bununla yanaşı, layihə şagirdlərə telekommunikasiya və İKT sahəsində təcrübə proqramı vasitəsilə praktiki biliklər qazanmaq imkanı yaradacaq. “Mehmanxana inzibatçısı” layihəsinin məqsədi isə 5 nömrəli Bakı Peşə Liseyində mehmanxana inzibatçılığı üzrə ixtisas fənn müəllimlərinin potensialının artırılmasıdır. Bu layihə çərçivəsində milli standartlara uyğun müvafiq kurikulumun hazırlanması, şagird və mühəndis-pedaqoji heyət üçün iş üzrə təcrübə proqramlarının həyata keçirilməsi nəzərdə tutulub.

08/10/2015 10:22

Konfransda 2015-2016-cı tədris ili üçün müəllimlərin işə qəbulu üzrə müsabiqənin nəticələri açıqlanıb. Qeyd olunub ki, müsabiqədə iştirak etmək üçün 3462 vakant yerə ərizə verən 24437 nəfərdən 18574-ü imtahanda iştirak edib. Müsabiqənin nəticələrinə əsasən, 2441 nəfər Azərbaycan bölməsi, 177 nəfər rus bölməsi üzrə, ümumilikdə 2618 nəfər işə qəbul olunub. İşə qəbul olunanlardan 1887 nəfəri həvəsləndirmə tədbirlərinin tətbiq olunduğu kənd məktəblərini seçənlərdir. Əlavə olaraq, müsabiqənin nəticələrinə əsasən, 434 nəfərin müddətli müqavilə ilə işə qəbuluna razılıq verilib. Tədbirdə Təhsilin inkişafı üzrə Dövlət Strategiyasına uyğun olaraq, peşəkar bilik və kompetensiyalara malik müəllim və təhsil menecerlərinin hazırlanması, eləcə də müəllim peşəsinin nüfuzunun artırılması istiqamətində həyata keçirilən islahatyönümlü tədbirlərdən söz açılıb. Bildirilib ki, bu il də ali təhsil müəssisələrinə qəbulda 500 və daha yüksək bal toplayan, ixtisas seçimində birinci müəllimlik ixtisasını qeyd edən ilk 300 tələbəyə 100 manat məbləğində “Gələcəyin müəllimi” təqaüdü verilib. Bununla da “Gələcəyin müəllimi” təqaüdü alan tələbələrin sayı 600 nəfərə çatıb. Bu il qəbul imtahanında 8656 nəfər müəllimlik peşəsini seçib. Onlardan 1269 nəfəri 500 və 500-dən artıq bal toplayıb. Bu isə ötən illə müqayisədə 5 faiz çoxdur.  Eyni zamanda, 2015-2016-cı tədris ilində müəllimlik ixtisasını seçənlərin orta keçid balı artaraq 364 olub. Mətbuat konfransında bu ilin sonunadək ölkəmizin daha 12 şəhər və rayonunda - Gəncə, Sumqayıt, Şirvan, Abşeron, Hacıqabul, İmişli, Masallı, Xaçmaz, Cəlilabad, Saatlı, Qubadlı və Sabirabadda dövlət ümumtəhsil müəssisələrində çalışan müəllimlərin bilik və bacarıqlarının diaqnostik qiymətləndirilməsinin keçiriləcəyi və qiymətləndirmədə 35000-dən çox müəlimin iştirak edəcəyi barədə məlumat verilib. Konfransın sonunda media nümayəndələrini maraqlandıran çoxsaylı suallar cavablandırılıb.

05/10/2015 12:02

Azərbaycan Respublikası Nazirlər Kabinetinin “Xüsusi təhsilə cəlb olunanların valideynlərinə və ya digər qanuni nümayəndələrinə uşaqlarını xüsusi təhsil müəssisəsinə, sağlamlıq və reabilitasiya mərkəzlərinə və tibb müəssisələrinə aparıb-gətirmək üçün müavinətin həcminin müəyyən edilməsi haqqında” Azərbaycan Respublikası Nazirlər Kabinetinin 2001-ci il 25 dekabr tarixli 200 nömrəli qərarında dəyişikliklər edilməsi barədə 2015-ci il 15 aprel tarixli 108 nömrəli qərarını rəhbər tutaraq   ƏMR EDİRƏM:   1. Azərbaycan Respublikası Nazirlər Kabinetinin 2015-ci il 15 aprel tarixli 108 nömrəli qərarı rəhbərlik və icra üçün qəbul edilsin.           2. Bakı Şəhəri üzrə Təhsil İdarəsinin, şəhər (rayon) təhsil idarə və şöbələrinin, Nazirliyin tabeliyində olan ümumi təhsil müəssisələrinin rəhbərləri tabeliklərində olan, eləcə də rəhbərlik etdikləri ümumi təhsil müəssisələrində mövcud qanunvericiliyin tələblərinə uyğun olaraq evdə təhsilə cəlb olunanların valideynlərinə və ya digər qanuni nümayəndələrinə 2015-ci ilin fevral ayından hesablanmaqla uşaqlarını sağlamlıq və reabilitasiya mərkəzlərinə və tibb müəssisələrinə aparıb-gətirmək üçün ayda 20 (iyirmi) manat həcmində müavinətin ödənilməsini təmin etsinlər. 3. İqtisadiyyat şöbəsi (Rauf Orucov) Nazirliyin və Bakı Şəhəri üzrə Təhsil İdarəsinin tabeliyində olan mərkəzləşdirilmiş xərclərdən maliyyələşən ümumi təhsil müəssisələrində evdə təhsilə cəlb olunanların nümayəndələrinə uşaqlarını sağlamlıq və reabilitasiya mərkəzlərinə və tibb müəssisələrinə aparıb-gətirmək üçün ayda 20 (iyirmi) manat həcmində müavinətlərin ödənilməsi ilə bağlı müvafiq tədbirlərin görülməsini təmin etsin. 4. İnformasiya şöbəsinin müdiri (Elnur Əliyev) əmrin çoxaldılaraq Bakı Şəhəri üzrə Təhsil İdarəsinə, şəhər (rayon) idarə və şöbələrinə, eləcə də Nazirliyin tabeliyində olan ümumi təhsil müəssisələrinə çatdırılmasını təmin etsin. 5. Əmrin icrasına nəzarət nazir müavininə (Ceyhun Bayramov) həvalə edilsin.   Mikayıl CABBAROV,  Azərbaycan Respublikasının təhsil naziri  13 may 2015-ci il  №557

05/10/2015 10:46