Oktyabrın 24-də Bakıda Qoşulmama Hərəkatının Gənclər Sammiti keçirilib. AZƏRTAC xəbər verir ki, çıxış edən Xarici İşlər nazirinin müavini Ramiz Həsənov tədbir haqqında ətraflı məlumat verib. Ramiz Həsənov qeyd edib ki, Birləşmiş Millətlər Təşkilatından sonra ikinci ən böyük beynəlxalq siyasi təşkilat olaraq Qoşulmama Hərəkatı siyasi məsləhətləşmələr və praktik əməkdaşlıq üçün geniş və əhatəli bir platformanı təmin edir. Gənclər və İdman naziri Azad Rəhimov bildirib ki, ilk dəfə olaraq keçirilən Qoşulmama Hərəkatı Gənclər Sammiti Azərbaycanın təşəbbüsüdür. “Son 15 il ərzində Bakıda dörd beynəlxalq gənclər platforması təsis edilib. Bundan başqa, Bakı 2007-ci ildə “Gənclər sivilizasiyaların alyansı naminə” nəsillərarası yüksək səviyyəli konfransa, 2008-ci ildə “İslamofobia və ksenofobiyanın müxtəlif növləri: gənclərə təsiri və qarşısının alınmasında gənclərin fəaliyyəti” mövzusunda beynəlxalq konfransa, 2011-ci ildə BMT-nin Sivilizasiyaların Alyansı Uğrunda Qlobal Gənclər Hərəkatının birinci Konqresinə, 2012-ci ildə birinci “Böyük İpək Yolu” Beynəlxalq Gənclər Konqresi və Festivalına, 2014-cü ildə Gənclər siyasəti üzrə birinci Qlobal Foruma, 2017-ci ildə Dünya Skaut Konfransına, 10 gün bundan əvvəl Türk Şurası Gənclər Platformasının birinci Baş Assambleyası kimi beynəlxalq gənclər tədbirlərinə ev sahibliyi edib. Bu siyahını uzatmaq da olar. Bir sözlə, Azərbaycan beynəlxalq gənclər hərəkatının inkişafına ciddi töhfələr verib.”                Təhsil Nazirinin müavini Firudin Qurbanov Qoşulmama Hərəkatının beynəlxalq sülhün bərpası, dialoqun aparılması kimi məsələlərin müzakirə olunduğu qlobal platformaya çevrildiyini deyib. Azərbaycanda təhsillə bağlı görülən işlərdən danışan nazir müavini əlavə edib ki, ölkəmiz bu sferada böyük uğurlara nail olub. Azərbaycanda təhsilə böyük dövlət qayğısı var. Təhsil sahəsinin inkişafı Azərbaycanda prioritet istiqamətlərdən biridir. Azərbaycan təhsilinin bugünkü inkişafının mənbəyi ümummilli lider Heydər Əliyevin rəhbərliyi ilə əsası qoyulan məqsədyönlü siyasətdən qaynaqlanır. Prezident İlham Əliyev tərəfindən Azərbaycan təhsilində sistemli islahatlar aparılaraq Ümummilli Liderin təhsil siyasəti uğurla davam etdirilir. Təhsilin müasir hədəflərinə doğru qəbul olunmuş strateji inkişaf sənədlərinin müddəaları yüksək dəqiqliklə həyata keçirilir.

24/10/2019 20:06

Ümumi təhsil müəssisələrində internetdə təhlükəsiz davranışla bağlı sosial maarifləndirici seminarlar keçirilib. Tədbirdə “Giving Back” sosial proqramı çərçivəsində geniş tərkibdə nümayəndə heyəti ilə Azərbaycana səfər edən “Cisco” şirkətinin əməkdaşları Bakının 10 məktəbində, eyni anda II-V sinif şagirdləri üçün məlumatlandırıcı sessiyalar təşkil edib. Tədbirdə qeyd edilib ki, təhsil müəssisələrində ölkənin ən iri daxili təhsil şəbəkəsi olan Azərbaycan Təhsil Şəbəkəsi (ATŞ) fəaliyyət göstərir və bu şəbəkə təhsil mühitində şagirdlərin internetin zərərli təsirlərindən maksimal müdafiə olunmasını təmin edir. Tədbirin sonunda “Azercell” şirkəti tərəfindən məktəblərə aylıq 10 GB internet paketi ilə MiFi modemləri və şagirdlərə müxtəlif hədiyyələr təqdim olunub. Qeyd edək ki, seminarlar Təhsil Nazirliyinin dəstəyi, “Cisco”, “Azercell Telekom” və “AzEduNet” şirkətlərinin birgə təşkilatçılığı ilə baş tutub. Tədbirin keçirilməsində məqsəd şagirdlərə internet məkanında mövcud olan risklərdən, mümkün təhlükələrdən qorunma yolları və arzuolunmaz nəticələrin qarşısının alınması barədə məlumat vermək olub.

24/10/2019 17:46

Oktyabrın 24-də Təhsil naziri Ceyhun Bayramov Xorvatiya Respublikasının Azərbaycan Respublikasında yeni təyin olunmuş fövqəladə və səlahiyyətli səfiri Branko Zebiç ilə görüşüb. Görüşdə iki ölkə arasında təhsil sahəsində əlaqələrin mövcud vəziyyəti və əməkdaşlıq perspektivləri müzakirə edilib.

24/10/2019 16:53

Təhsil naziri Ceyhun Bayramovun Sabirabad şəhərindəki Heydər Əliyev Mərkəzində Sabirabad və Saatlı rayon sakinlərinin 25 oktyabr 2019-cu il tarixində nəzərdə tutulmuş qəbulunun vaxtı dəyişdirilib. Qeydiyyatdan keçmiş vətəndaşlara qəbulun vaxtı barədə əlavə məlumat veriləcəkdir.

24/10/2019 09:16

2019-2020-ci tədris ili üçün 15 müxtəlif istiqamət üzrə peşə təhsili müəssisələrinin 49 nəfərdən ibarət mühəndis-pedaqoji heyəti  Türkiyədə təlimlərdə iştirak edirlər. Hazırda  İzmir və İstanbul şəhərlərində avtomobil, elektrik, incəsənət, inşaat, mebel və kənd təsərrüfatı istiqamətləri üzrə təlimlər davam etdirilir. Təlim zamanı müəllimlər kənd təsərrüfatı üzrə meyvə-tərəvəz sahəsindəki aqrotexniki, incəsənət istiqaməti üzrə isə müxtəlif çəkiliş studiyalarında praktiki işlərlə yaxından tanış olublar. Qeyd edək ki, Azərbaycan və Türkiyə  arasında peşə təhsil sahəsində əməkdaşlığa əsasən təlimlərin İstanbul, Ankara və İzmir şəhərlərində keçirilməsi nəzərdə tutulub. Təlimlərin təşkilində məqsəd peşə təhsili müəssisələrinin mühəndis–pedaqoji heyətinin kvalifikasiyasının artırılmasıdır. Təlimlərin 2-12 həftə müddətində, liderlik, turizm, inşaat, dərzi, dizayn, incəsənət, avtomobil, kənd təsərrüfatı, elektrik və zərgərlik istiqamətləri üzrə həyata keçirilməsi planlaşdırılıb.

23/10/2019 17:12

Oktyabrın 22-də Təhsil Nazirliyində Yeni Azərbaycan Partiyası Nərimanov Rayon Təşkilatının Təhsil Nazirliyi ərazi üzrə ilk partiya təşkilatının iclası keçirilib. İclasda Təhsil Nazirliyi ərazi üzrə ilk partiya təşkilatının İdarə heyətinin yeni tərkibi seçilib, 10 nəfər gənc mütəxəssisin partiya sıralarına qəbul olunması ilə bağlı qərar  verilib.   Təhsil nazirinin müavini Firudin Qurbanov yeni üzvləri təbrik edib və onlara uğurlar arzulayıb. Nazir müavini, həmçinin son illərdə təhsil sahəsində qazanılan uğurlar, əldə olunan nailiyyətlərdən danışıb və görülən işlərdə gənclərin fəal iştirakının vacibliyini qeyd edib.

22/10/2019 19:15

“İcma əsaslı məktəbəqədər təhsil” pilot layihəsi çərçivəsində hazırda 32 rayon (şəhər) üzrə ümumilikdə 320 icma əsaslı məktəbəqədər təhsil qrupu fəaliyyət göstərir. 6197 nəfər 3 və 4 yaşlı uşaq bu qruplarda məktəbəqədər təhsilə cəlb edilib. Layihə çərçivəsində təlimlərdə iştirak etmiş 320 tərbiyəçi bu qruplarda çalışır. Qeyd edək ki, layihə  Təhsil Nazirliyi tərəfindən 2017-ci ildən etibarən həyata keçirilir. Layihə çərçivəsində 2018-ci ildə regionlar üzrə 50 icma əsaslı məktəbəqədər təhsil qrupları yaradılıb. 2019-cu ildə əlavə olaraq 13 icma əsaslı məktəbəqədər təhsil qrupu açılıb. Cari ilin oktyabr ayından isə Təhsil Nazirliyi tərəfindən 257 ümumi təhsil müəssisəsində eyni sayda icma əsaslı məktəbəqədər təhsil qrupları fəaliyyətə başlayıb. İcma əsaslı məktəbəqədər təhsil qruplarının yaradılmasında əsas məqsəd məktəbəqədər təhsil müəssisələri ilə əhatə olunmayan yerlərdə 3-4 yaşlı uşaqlara məktəbəqədər təhsil imkanı qazandırmaq, eyni zamanda məktəbəqədər təhsilin keyfiyyətinin yaxşılaşdırılmasında vətəndaş cəmiyyəti nümayəndələri və icma əsaslı qrupların, o cümlədən valideynlərin rolunu artırmaqdır. Mərkəzlərdə dərslər yerli və eston mütəxəssislərdən ibarət işçi qrup tərəfindən hazırlanmış proqram əsasında aparılır. Proqrama əsasən, məşğələlər zamanı uşaqların 4 inkişaf dinamikası - sosial emosional inkişaf, idrak və ümumi bilik, yaradıcı və fiziki inkişafı izlənilir. İcma əsaslı məktəbəqədər təlimlərdə valideynlər də dərs prosesində yaxından iştirak edir, müəllimlərin köməkçisinə çevrilirlər. 20 nəfər üçün nəzərdə tutulan qruplarda məşğələlər həftədə 4 dəfə, 2-2.5 saat olmaqla keçirilir.

22/10/2019 17:06

“Təhsil” Respublika İdman Mərkəzinin təşkilatçılığı ilə 2019-2020-ci il mövsümündə basketbol idman növü üzrə 13 yaşadək (U-13), 15 yaşadək (U-15) və 17 yaşadək (U-17) qızlar və oğlanlardan ibarət komandalar arasında təşkil olunan “Təhsil Liqası”nın oyunlarına başlanılıb. Liqanın keçirilməsində məqsəd yaş qrupları üzrə perspektivli basketbolçuların aşkar edilməsi, uşaqların yarış təcrübələrinin artırılması, onlar arasında dostluq əlaqələrinin yaradılmasından ibarətdir. Bildirək ki, 17 yaşadək (U-17) oğlanlar, 13 yaşadək (U-13) və 15 yaşadək (U-15) qızlardan ibarət komandalar arasında liqalar bu mövsümdən təşkil olunub. Qeyd olunan yaş qrupları üzrə liqalarda idman məktəbləri, müxtəlif idman təşkilatlarının 49 komandası mübarizə aparacaq. İki dövrədən ibarət olan liqaların oyunları 2020-ci ilin iyun ayında başa çatacaq. Mövsümün sonunda liqalar üzrə I, II və III yeri tutan komandalar diplom, kubok, medallarla mükafatlandırılacaq, müxtəlif nominasiyalar üzrə seçiləcək basketbolçular xüsusi mükafatlarla təltif olunacaqlar.

22/10/2019 12:22

Təhsil Nazirliyi yanında İctimai Şuranın növbəti iclası keçirilib. İclasda İctimai Şuranın Əsasnaməsi (reqlamenti) qəbul edilib, həmçinin Bakı Dövlət Universitetinin professoru Şahlar Əsgərov İctimai Şuranın sədri, təhsil eksperti Nadir İsrafilov sədr müavini və Azərbaycan Gənc Alim, Aspirant və Magistrlər Cəmiyyətinin sədri İlqar Orucov isə məsul katib seçilib. İclasda Şura üzvləri şuranın fəaliyyət planı ilə bağlı ilkin təklifləri müzakirə ediblər. Növbəti iclasda fəaliyyət planının təsdiqi nəzərdə tutulur. Qeyd edək ki, Təhsil Nazirliyi yanında İctimai Şura Təhsil naziri Ceyhun Bayramovun 11 iyul 2019-cu il tarixli əmrinə əsasən yaradılıb. Şuranın yaradılmasında əsas məqsəd nazirliyin fəaliyyətində şəffaflığı artırmaq, eyni zamanda təhsil sahəsində ictimaiyyətlə qarşılıqlı fəaliyyəti gücləndirməkdir.

22/10/2019 09:49

Təhsil Nazirliyinin “Məktəbimizdə” fotorubrikası davam edir. Budəfəki görüntülər Gəncə şəhəri Samir Vəliyev adına 34 nömrəli tam orta məktəbdən çəkilib. Məktəb 1981-ci ildən fəaliyyət göstərir. Cari ildə tədris binası Təhsil Nazirliyi tərəfindən əsaslı təmir edildikdən sonra şagird və müəllimlərin istifadəsinə verilib. Təhsil müəssisəsində  oxuyan 710 şagirdin təlim-tərbiyəsi ilə 82 müəllim məşğul olur. Son 5 ildə sözügedən məktəbin məzunlarının ali təhsil müəssisələrinə qəbul göstəricisi 50-60  faiz olub. "Məktəbimizdə" rubrikasının məqsədi ümumi təhsil müəssisələrində tədris prosesinin bir gününü diqqətə çatdırmaqdır.

21/10/2019 16:42