Noyabrın 3-dən “Sabahın alimləri” XIII respublika müsabiqəsinə qeydiyyat başlayıb.   Müsabiqə ABŞ-nin “Society for Science” təşkilatı tərəfindən təşkil olunan Beynəlxalq Elm və Mühəndislik Sərgisi (ISEF) çərçivəsində keçiriləcək.    Müsabiqənin məqsədi ölkəmizdə fəaliyyət göstərən ümumi təhsil müəssisələrinin IX-XI siniflərində təhsil alan şagirdləri elmi axtarışlara sövq etmək, həmçinin 8 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarəolunması, mühəndislik, kompüter elmləri) üzrə elmi-tədqiqata marağı olan istedadlı şagirdləri aşkara çıxarmaqdır.   İştirak etmək istəyən şagirdlər 15 dekabradək https://sabahinalimleri.edu.az/ portalında qeydiyyatdan keçməlidirlər.   Müsabiqə ilə bağlı ətraflı məlumatı qeyd olunan linkdən əldə edə bilərsiniz: https://bit.ly/3MrX9hu

03/11/2023 14:32

Noyabrın 2-də Nizami Kino Mərkəzində Elm və Təhsil Nazirliyi və İctimai TV-nin birgə hazırladığı "Şuşa maarifi" sənədli filmi nümayiş etdirilib.    Mərasimdə Elm və Təhsil və Mədəniyyət nazirliklərinin əməkdaşları, millət vəkilləri, ali təhsil müəssisələrinin rektorları, tanınmış ictimaiyyət nümayəndələri, dövlət qurumlarının mətbuat katibləri, 44 günlük Vətən müharibəsində döyüşmüş müəllimlər, tələbələr və digər qonaqlar iştirak ediblər.    Açılış nitqi ilə çıxış edən mədəniyyət nazirinin müşaviri Orxan Fikrətoğlu filmin həsr olunduğu Şuşa maarifinin ölkəmizdə bütün sahələrin inkişafındakı rolunu vurğulayıb. Şuşa məktəbinin Azərbaycan təhsilinə verdiyi töhfələrə toxunan nazir müşaviri hazırda aparılan təmir-quruculuq işlərindən sonra Şuşada yeni məktəb mənzərəsinin formalaşacağına və müasir dövrün dahilərinin həmin məktəbdə yetişəcəyinə inamını bildirib.    Açılış nitqindən sonra film nümayiş etdirilib.   49 dəqiqəlik film Şuşanın maarif tarixindən bəhs edir.  Azərbaycanın ilk dünyəvi məktəbi – Şuşada açılan qəza məktəbindən başlanan tarixdən söz açılan filmdə bu qədim şəhərin xalqımız üçün tarixi və mədəni əhəmiyyəti, həmçinin maarifçilik sahəsində önəmli rolu xüsusilə qeyd olunur. Filmin ssenari müəllifləri Cəsarət Valehov, Ramil Ələkbərov, rejissoru isə Elçin Qasımovdur.   Filmdə Şuşanın Azərbaycanın təhsil və elm sahəsinə tanınmış alimlər, görkəmli ziyalılar bəxş etdiyi diqqətə çatdırılır, eləcə də maarif tarixini yaradan şəxsiyyətlər barədə danışılır.  

03/11/2023 12:24

Cari ildə 8 600-dən çox təhsilverən rəqəmsal savadlılığın artırılması istiqamətində təlimlərdə iştirak edib.  Təlimlər ölkənin müxtəlif bölgələri üzrə təşkil olunub.    Bununla yanaşı, ümumi təhsil müəssisələrinin təhsilverənləri üçün “Microsoft” sertifikatlı pedaqoq” adlı beynəlxalq sertifikatlaşdırmaya hazırlıq təlimlərində 1 307 müəllim iştirak edib. Sözügedən sertifikatlaşdırma pedaqoji işçilərin texnoloji savadlılığını qiymətləndirmək, müxtəlif səviyyələrdə innovativ texnologiya və metodikaların təhsilə tətbiqini öyrənmək məqsədi daşıyan beynəlxalq proqramdır.    Elektron resursların hazırlanması və istifadəsi bacarıqları üzrə təlimlərdə isə 1 418, informatika müəllimləri üçün “Python” proqramlaşdırma təlimlərində 355 təhsilverən bilik və bacarıqlarını inkişaf etdiriblər. Ölkə üzrə 4 500-dən artıq inzibati və pedaqoji heyət üçün isə elektron qiymətləndirmə üzrə təlimlər təşkil olunub.    Qeyd edək ki, hər il keçirilən təlimlərin məqsədi müəllimlərin İKT üzrə bilik, bacarıqlarını təkmilləşdirmək və daha səmərəli istifadə imkanlarını artırmaqdır. Təlim proqramına şagirdlərdə internet resurslarından düzgün istifadə vərdişlərinin formalaşdırılması da daxildir.

02/11/2023 13:05

Noyabrın 1-də Elm və Təhsil Nazirliyi, Təhsilin İnkişafı Fondunun təşkilatçılığı ilə ümummilli lider Heydər Əliyevin 100 illik yubileyinə həsr olunan Təhsilin İnkişafı Forumu keçirilib.    “Təhsildən tərəqqiyə” devizi ilə təşkil olunan forumda iştirakçılarla işgüzar əlaqələrin qurulması, birgə layihələrin planlaşdırılması, həmçinin innovasiya ekosisteminin yaradılması, dövlət – özəl tərəfdaşlığı, təhsil və iqtisadiyyatın inteqrasiyası kimi mövzular üzrə müzakirələr, həmçinin iştirakçıları maraqlandıran sualların yerli və beynəlxalq mütəxəssislər tərəfindən cavablandırılması əsas hədəflərdəndir.   Tədbirdə elm və təhsil naziri Emin Əmrullayev, dövlət rəsmiləri, millət vəkilləri, ali təhsil müəssisələrinin rəhbərləri, özəl sektor əməkdaşları və digər qonaqlar iştirak ediblər.    Tədbirdə əvvəlcə Dövlət Himni səsləndirilib.    Daha sonra foruma dair videoçarx nümayiş etdirilib.    Açılış nitqi ilə çıxış edən elm və təhsil naziri Emin Əmrullayev təhsil sisteminin nailiyyətlərindən söz açıb. Nazir bildirib ki, təhsil olmadan innovasiya mümkün deyil. Təhsil sisteminin nailiyyətləri isə uzunmüddətli vaxtda innovasiyanın inkişafına təkan verir.    Nazir çıxışının sonunda forumun işinə uğurlar arzulayıb.    Daha sonra Türkiyənin TED Universitetinin rektoru İhsan Sabuncuoğlu məruzə ilə çıxış edib.    Təhsilin İnkişafı Fondunun İdarə Heyətinin sədri Elnur Nəsibovun moderatorluq etdiyi  “İnnovasiya ekosisteminin yaradılması” adlı ilk paneldə elm və təhsil naziri Emin Əmrullayev, əmək və əhalinin sosial müdafiəsi naziri Sahil Babayev, iqtisadiyyat nazirinin birinci müavini Elnur Əliyev, rəqəmsal inkişaf və nəqliyyat nazirinin müavini Samir Məmmədov çıxış ediblər.   Forumun ikinci paneli “Universitet – sənaye tərəfdaşlığı” mövzusuna həsr olunub.   Paneldən öncə “Bilişim Vadisi” Texnoparkının baş icraçı direktorunun müavini Tuba Öztepe məruzə ilə çıxış edib.   Daha sonra “SABAH.HUB”ın icraçı direktoru Rəhim Bayramlının moderatorluğu ilə keçirilən paneldə Bakı Dövlət Universitetinin rektoru Elçin Babayev, Bakı Ali Neft Məktəbinin rektoru Elmar Qasımov, “bp” şirkətinin Xəzər regionunda xarici əlaqələr və kommunikasiya üzrə vitse-prezidenti Bəxtiyar Aslanbəyli, “NEQSOL Holding”in baş direktoru Yusif Cabbarov, Azərbaycan Beynəlxalq Bankı İdarə Heyətinin sədri Abbas İbrahimov, Sumqayıt Texnologiyalar Parkının baş insan resursları inzibatçısı Şölə Əliyeva spiker qismində çıxış ediblər.   Panel çərçivəsində təhsil və əmək bazarı, sənaye ilə tərəfdaşlıq strategiyası, sənayenin təhsildən gözləntiləri, əlavə dəyərin yaradılması, ekosistemin inkişafında bankların rolu, təhsil ilə iqtisadiyyatın inteqrasiyası, tədqiqat və inkişaf ekosistemi mövzuları ətrafında müzakirələr aparılıb.   Forumun üçüncü paneli “Gələcək üçün təhsil” mövzusuna həsr olunub.   Paneldən əvvəl ABŞ-nin “Coursera” şirkətinin baş müşaviri Çad Paşa məruzə ilə çıxış edib.   Daha sonra ADA Universitetinin prorektoru Fariz İsmayılzadənin moderatorluğu ilə keçirilən paneldə Azərbaycan Dövlət İqtisad Universitetinin rektoru Ədalət Muradov, Azərbaycan Texniki Universitetinin rektoru Vilayət Vəliyev, Dövlət Məşğulluq Agentliyinin İdarə Heyətinin sədri Mustafa Abbasbəyli, “212” şirkətinin baş direktoru Numan Numan, TED Universitetinin Tədqiqat, texnologiya və innovasiyalar bölməsinin direktoru Sanem Yalçıntaş, "AzerTelecom" MMC-nin Direktorlar Şurasının sədri Fuad Allahverdiyev spiker qismində çıxış ediblər.    Panel çərçivəsində ömürboyu təhsil, əmək bazarının dəyişən tələbləri, süni intellekt və təhsil mövzularından bəhs olunub.   Qeyd edək ki, “Təhsildən tərəqqiyə” devizi ilə təşkil olunan forum “NEQSOL Holding”, “bp” şirkəti, SOCAR, Sumqayıt Texnologiyalar Parkı, Azərbaycan Beynəlxalq Bankı, “Azersun Holding” və “BestComp Group”un sponsorluğu ilə keçirilib.

01/11/2023 17:57

Nazirlər Kabinetinin “İş və istirahət günlərinin yerlərinin dəyişdirilməsi haqqında” müvafiq qərarına əsasən, beşgünlük iş həftəsi ilə fəaliyyət göstərən təhsil müəssisələrində cari həftə  son iş günü 4 noyabr, növbəti həftənin iş günləri 6, 7 noyabr, bayramdan sonra ilk iş günü isə 13 noyabrdır.   Altıgünlük iş həftəsi ilə fəaliyyət göstərən təhsil müəssisələrində cari həftə son iş günü 4 noyabr, növbəti həftənin iş günləri 6, 7 noyabr, bayramdan sonra iş günləri 10-11 noyabr tarixləri müəyyən olunub.

01/11/2023 17:42

Oktyabrın 31-də ölkə Prezidenti cənab İlham Əliyevin müvafiq sərəncamı ilə dövlət qulluğunda səmərəli fəaliyyətlərinə görə təltif olunmuş Elm və Təhsil Nazirliyinin əməkdaşlarına dövlət təltifləri təqdim edilib.    Elm və təhsil naziri Emin Əmrullayev təltif olunmuş əməkdaşları təbrik edib və onlara uğurlar arzulayıb.    Çıxış edən əməkdaşlar onların əməyinə verilən yüksək dəyər üçün minnətdarlıqlarını bildiriblər.   Daha sonra təltiflər təqdim olunub.    Qeyd edək ki, müvafiq sərəncama əsasən, elm və təhsil nazirinin müşaviri Nicat Məmmədli, Hüquq şöbəsinin müdir müavini Aynur Atayeva, Məktəbdənkənar fəaliyyətin təşkili şöbəsinin İdman sektorunun müdiri Hilal Salmanov, Təhsilin iqtisadiyyatı və statistika şöbəsinin Statistika sektorunun baş məsləhətçisi Mirbaba Babayev "Dövlət qulluğunda fərqlənməyə görə” medalı ilə təltif olunublar.

01/11/2023 16:44

Noyabrın 1-də Elm və Təhsil Nazirliyi, Təhsilin İnkişafı Fondunun təşkilatçılığı ilə ümummilli lider Heydər Əliyevin 100 illik yubileyinə həsr olunan Təhsilin İnkişafı Forumu öz işinə başlayıb.    “Təhsildən tərəqqiyə” devizi ilə təşkil olunan forumda iştirakçılarla işgüzar əlaqələrin qurulması, birgə layihələrin planlaşdırılması, həmçinin innovasiya ekosisteminin yaradılması, dövlət – özəl tərəfdaşlığı, təhsil və iqtisadiyyatın inteqrasiyası kimi mövzular üzrə müzakirələr, həmçinin iştirakçıları maraqlandıran sualların yerli və beynəlxalq mütəxəssislər tərəfindən cavablandırılması əsas hədəflərdəndir.   Tədbirdə əvvəlcə Dövlət Himni səsləndirilib.    Daha sonra foruma dair videoçarx nümayiş etdirilib.    Açılış nitqi ilə çıxış edən elm və təhsil naziri Emin Əmrullayev təhsil sisteminin nailiyyətlərindən söz açıb. Nazir bildirib ki, təhsil olmadan innovasiya mümkün deyil. Təhsil sisteminin nailiyyətləri isə uzunmüddətli vaxtda innovasiyanın inkişafına təkan verir.    Nazir çıxışının sonunda forumun işinə uğurlar arzulayıb.    Daha sonra Türkiyənin TED Universitetinin rektoru İhsan Sabuncuoğlu məruzə ilə çıxış edib.    Təhsilin İnkişafı Fondunun İdarə Heyətinin sədri Elnur Nəsibovun moderatorluq etdiyi  “İnnovasiya ekosisteminin yaradılması” adlı ilk paneldə elm və təhsil naziri Emin Əmrullayev, əmək və əhalinin sosial müdafiəsi naziri Sahil Babayev, iqtisadiyyat nazirinin birinci müavini Elnur Əliyev, rəqəmsal inkişaf və nəqliyyat nazirinin müavini Samir Məmmədov çıxış ediblər.    Forum hazırda işini davam etdirir.    Qeyd edək ki, forum çərçivəsində  “Universitet – sənaye tərəfdaşlığı”, “Gələcək üçün təhsil” panelləri də təşkil olunacaq.    Təhsilin İnkişafı Forumu “NEQSOL Holding”, “British Petroleum” şirkəti, SOCAR, Sumqayıt Texnologiyalar Parkı, Azərbaycan Beynəlxalq Bankı, “Azersun Holding” və “BestComp Group”un sponsorluğu ilə keçirilir.

01/11/2023 13:00

Oktyabrın 31-də elm və təhsil naziri Emin Əmrullayev Rusiya Federasiyasının ölkəmizdə yeni təyin olunmuş fövqəladə və səlahiyyətli səfiri Mixail Yevdokimovla görüşüb.   Görüş zamanı iki ölkə arasında elm və təhsil sahəsində əməkdaşlığın cari vəziyyəti, perspektivləri müzakirə olunub. Tərəflər Azərbaycan Respublikasında rus dilinin tədrisi ilə bağlı mövcud vəziyyət, habelə Rusiya Federasiyasında Azərbaycan dilinin tədrisinə dəstəyin göstərilməsi ətrafında fikir mübadiləsi aparıblar. Bundan başqa, peşə təhsili sahəsində əlaqələrin önəmi vurğulanıb, bu istiqamətdə mütəxəssislərin hazırlanması imkanları müzakirə olunub.

31/10/2023 17:02

Oktyabrın 31-dən Elm və Təhsil Nazirliyi “Alternativ məktəbəqədər təhsil xidmətlərinin təşkili” pilot qrant proqramını elan edir.   Qrant proqramına təqdim olunacaq layihə sənədlərinin (layihə təklifi forması, CV forması, iştirak sənədləri) qəbulu 15 noyabr tarixinədək alternativxidmet@edu.gov.az elektron poçtu vasitəsilə aparılacaq.   Müsabiqə barədə ətraflı məlumatla aşağıdakı elan vasitəsilə tanış ola bilərsiniz. “Alternativ məktəbəqədər təhsil xidmətlərinin təşkili” pilot qrant proqramının elanı Layihə təklifi forması CV forması  

31/10/2023 16:30

Elm və Təhsil Nazirliyinin 146 Çağrı Mərkəzi yeni region üzrə vətəndaşların sorğularını cavablandıracaq. Belə ki, vətəndaşlar Quba – Xaçmaz Regional Təhsil İdarəsinin tabeliyində olan məktəbəqədər və ümumi təhsil müəssisələrinin fəaliyyətinə dair sorğu və şikayətlərinə 146-0-7 nömrəsi ilə əlaqə yaratmaqla cavab əldə edə bilərlər.

31/10/2023 15:42