14 fevral saat 11:00-dan etibarən məktəbəhazırlıq qruplarına cəlb olunmuş uşaqların və I-X siniflərdə təhsil alan şagirdlərin elektron yerdəyişməsi prosesinə yenidən start verilir.  Şagirdlərin yerdəyişməsi prosesi www.sy.edu.az portalı vasitəsilə həyata keçirilir. Qeyd edək ki, buraxılış imtahanlarına görə XI sinif şagirdlərinin yerdəyişməsi tədris ilinin sonunadək aktiv edilməyəcək.   

11/02/2022 15:30

21 fevral saat 21:00-da “Yeni çağırışlar” onlayn müzakirə proqramının növbəti buraxılışı yayımlanacaq. Proqramın budəfəki qonağı tanınmış türkiyəli psixoloq, Baltaş Qrupunun rəhbəri, professor Acar Baltaşdır. Qabaqcıl elm adamı Acar Baltaş ilə xoşbəxt məktəblər barədə danışılacaq. Professor Cərrahpaşa Universitetində doktorantura təhsili zamanı Türkiyədə ilk dəfə olaraq neyro-psixologiya mövzusunu araşdırıb, “Beynin yüksək funksiyaları” haqqında tədqiqatlar aparıb. Acar Baltaş 1983-cü ildən bu günə kimi təşkilati psixologiya mövzusunda təcrübəsini iş həyatının ehtiyacları ilə uzlaşdıraraq liderlik və komanda işi mövzusunda seminarlar verir, kitablar yazır və insan resursları sahəsində xidmət göstərən Baltaş Qrupunu idarə edir. “Həyatı dolu-dolu yaşamaq”, “Xəyalını yorğanına görə uzat”, “Türk mədəniyyətində idarəçilik”, “Yeni minillikdə iş uğurunun 12 açarı”, "Bir səyahət olaraq liderlik” və digər kitabların müəllifidir.   Qeyd edək ki, Təhsil Nazirliyinin dəstəyi və “T-Network” platformasınının təşkilatçılığı ilə davam edən proqram Təhsil Nazirliyinin rəsmi “Facebook” səhifəsi üzərindən canlı yayımlanacaq.   

11/02/2022 11:35

Yaponiya və Dünya Bankı tərəfindən 2022-2023-cü tədris ili üçün Amerika, Avropa, Afrika, Okeaniya və Yaponiyanın 26 ali təhsil müəssisəsində müxtəlif ixtisaslar üzrə istedadlı gənclərin magistratura səviyyəsində təhsili məqsədilə birgə həyata keçirilən təqaüd proqramına sənəd qəbulu elan edilib.   Müraciət üçün son tarixlər 28 fevral və 27 may 2022-ci il nəzərdə tutulub.  Təqaüd proqramı barədə ətraflı məlumatı elan vasitəsilə əldə edə bilərsiniz.  

11/02/2022 09:20

İtaliya Respublikasının Xarici İşlər və Beynəlxalq Əməkdaşlıq Nazirliyi istedadlı gənclərin İtaliyada magistratura səviyyəsində təhsili məqsədilə “İstedadına sərmayə et” adlı təqaüd proqramına sənəd qəbulu elan edib. Proqram mühəndislik və informasiya texnologiyaları, memarlıq, dizayn, idarəetmə və iqtisadiyyat üzrə nəzərdə tutulub.  Müraciət üçün son tarix 15 fevral 2022-ci ildir.  Təqaüd proqramı barədə ətraflı məlumatı elan vasitəsilə əldə edə bilərsiniz.  

10/02/2022 14:11

Macarıstanda 2022-2023-cü tədris ili üzrə təqaüd proqramına müraciətlərin qəbulu prosesi davam edir. Müraciət üçün son tarix 28 fevral 2022-ci il nəzərdə tutulub.   Təqaüd proqramı Macarıstanın Kənd Təsərrüfatı Nazirliyi və BMT-nin Ərzaq və Kənd Təsərrüfatı Təşkilatı tərəfindən birgə elan edilib. Proqram qida təhlükəsizliyi və keyfiyyət mühəndisliyi ixtisasları üzrə magistr pilləsini özündə ehtiva edir. Ətraflı məlumatı elan vasitəsilə əldə edə bilərsiniz.  

10/02/2022 10:40

“Ruhumun ünvanı Şuşa!” adlı respublika rəsm müsabiqəsinə müraciətlərin qəbulu davam edir. Təhsil Nazirliyinin dəstəyi, Gənclərin Respublika Bədii Yaradıcılıq Evinin təşkilatçılığı ilə keçirilən müsabiqəyə Təhsil Nazirliyinin sistemində fəaliyyət göstərən ümumtəhsil məktəblərinin şagirdləri və uşaq-gənclər inkişaf mərkəzlərinin dərnək üzvləri qatıla bilərlər. Müsabiqə 3 yaş qrupu üzrə (7-10, 11-15, 16-20 yaş) 2 mərhələdə keçirilir: I mərhələ- 3 fevral - 10 mart 2022-ci il - Bu mərhələdə Bakı və regionlarda yerləşən ümumtəhsil məktəblərinin  və uşaq-gənclər inkişaf mərkəzlərinin daxilində yaradılmış təşkilat komitəsi tərəfindən hər üç yaş qrupu üzrə seçilmiş rəsmlər və iştirakçı barədə məlumat etiketə qeyd edilməklə (adı, soyadı, ata adı, təvəllüdü, təmsil etdiyi müəssisə, şəhər, çəkdiyi rəsmin adı, müəllimin və ya dərnək rəhbərinin adı və soyadı rəsmin arxasında yuxarı sol küncə) Gənclərin Respublika Bədii Yaradıcılıq Evinin elektron ünvanına (grbye@mk.edu.az) və  (Azərbaycan, Bakı şəhəri, Nəsimi rayonu 2-ci mikrorayon, Hüseyn Seyidzadə küçəsi 27, AZ 1111  (9 nömrəli tam orta məktəbin binası)) poçtla göndərilməlidir. II mərhələ -11 mart - 16 mart 2022-ci il – Yekun mərhələdə qaliblər münsiflər heyəti tərəfindən seçilir. Müsabiqə üzrə tələblər aşağıdakılardır: - Müsabiqəyə mövzuya uyğun Azərbaycanın qədim şəhəri  Şuşanın vəsfini özündə əks etdirən rəsmlər təqdim olunmalıdır; - Təqdim olunan rəsm əsərləri A3 formatda işlənməlidir; - Rəsmin işlənmə texnikası sərbəstdir; (quaş, sulu boya, rəngli qələmlər, kollaj, yağlı boya və s.); - Müsabiqədə bir müəllif  1 rəsmlə iştirak edə bilər; - Müsabiqəyə qatılan təhsil müəssisəsi hər yaş qrupu üzrə 1 rəsm işi təqdim etməlidir; - Müəllif haqqında məlumatlar etiket nümunəsinə uyğun çap olunub rəsmin arxa tərəfində sol küncünə yapışdırılmalıdır; -  Müsabiqəyə təqdim olunan rəsm əsərləri geri qaytarılmır. - Müsabiqənin birinci mərhələsinin qalibləri respublika mərhələsində münsiflər heyətinin qarşısında müsabiqənin mövzusuna uyğun təyin olunmuş müddətdə rəsmlər çəkəcək. Həmin müddətdə çəkilən işlərin qiymətləndirilməsi aparılmaqla, müsabiqənin qalibləri müəyyən ediləcək. Müsabiqənin I, II, III yerin qalibləri və fəal iştirakçılar Gənclərin Respublika Bədii Yaradıcılıq Evinin diplom və sertifikatları ilə təltif olunacaqlar. Müsabiqə ilə bağlı sualı olanlar (+994) 12 568 42 19 və (+994)  55 539 55 22 telefon nömrələri ilə əlaqə yarada bilərlər. Qeyd edək ki, müsabiqənin məqsədi Şuşa şəhərinin zəngin abidələrini, memarlıq komplekslərini, göz oxşayan füsunkar  təbiətini, işğal və inkişaf dövrünü uşaq və gənclərin yaddaşına həkk etmək, milli  mədəniyyəti və incəsənəti təbliğ etmək, xüsusi istedada malik olan uşaq və gənclərin yaradıcılıq potensialını inkişaf etdirmək və yeni istedadları üzə çıxarmaqdan ibarətdir.

10/02/2022 09:21

“2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində xaricdə doktoranturaya dair 2022-ci il üzrə sənəd qəbulu prosesi davam edir. Nüfuzlu xarici ali təhsil müəssisələrində prioritet ixtisas istiqamətləri üzrə doktoranturaya qəbul olmağa hazırlaşan və ya hazırda müvafiq sahələr üzrə xaricdə doktorantura səviyyəsində təhsil alan Azərbaycan Respublikası vətəndaşları müraciət edə bilərlər. Proqrama müraciət üçün tələb olunan sənədlərlə müvafiq linkə daxil olaraq tanış ola bilərsiniz:  https://dp.edu.az/az/news/1203#.YffrAOpBzIW Müraciət müddəti 1 aprel 2022-ci il tarixinədək davam edəcək. Sözügedən Dövlət Proqramı çərçivəsində xaricdə doktorantura təhsilinə müraciət üçün qeydiyyat linkini keçiddən əldə etmək mümkündür. Hər hansı əlavə sual yarandığı zaman FAQ/MVS və ya dpinfo@edu.gov.az mail ünvanına müraciət oluna bilər.

09/02/2022 12:10

Bruney-Darüssalamda 2022-2023-cü tədris ili üzrə təqaüd proqramına müraciətlərin qəbulu davam edir. Müraciət üçün son tarix 15 fevral 2022-ci il nəzərdə tutulub.  Proqram bakalavriat, magistratura və doktorantura səviyyələrini əhatə edir.   Təqaüd proqramı barədə ətraflı məlumatı elan vasitəsilə əldə edə bilərsiniz. 

09/02/2022 10:55

“Azərbaycan Respublikası Hökuməti ilə Türkiyə Respublikası Hökuməti arasında peşə təhsili sahəsində əməkdaşlığa dair Protokol” çərçivəsində Türkiyə Peşə Təhsili Baş İdarəsi ilə Peşə Təhsili üzrə Dövlət Agentliyi arasında növbəti onlayn görüş keçirilib.  Görüş çərçivəsində imzalanmış protokola uyğun olaraq, 4 ixtisas üzrə təhsil proqramları və planlarının hazırlanması müzakirə edilib. Belə ki, birgə əməkdaşlıq çərçivəsində mebel sənayesi, turizm və ictimai iaşə, həmçinin İKT sahəsini əhatə edən 4 ixtisas üzrə tədrisin təşkili nəzərdə tutulur. Bundan əlavə, Türkiyə təcrübəsinə əsaslanan təhsil planlarının yerli şəraitə uyğunlaşdırılması üzrə işlərə başlanılıb.  Protokol çərçivəsində hazırlanacaq 4 ixtisas üzrə təhsil proqramlarının Bakı və Qəbələ şəhərində yerləşən peşə təhsili müəssisələrində tətbiqi gözlənilir. Qeyd edək ki, sözügedən protokol iki ölkə arasında peşə təhsili sahəsində əməkdaşlığın genişləndirilməsini və müvafiq istiqamət üzrə Türkiyə təcrübəsinin öyrənilməsini özündə ehtiva edir.

08/02/2022 14:34

Atletika idman növü üzrə 38-ci Azərbaycan çempionatı keçirilib.  Çempionatda ölkənin müxtəlif rayon və şəhərlərindən olan klublar, cəmiyyətlər və idman təşkilatlarından 9 komanda olmaqla 140 idmançı iştirak edib.  Yarışda Təhsil Nazirliyinin tabeliyində fəaliyyət göstərən uşaq-gənclər idman-şahmat məktəblərinin idmançılarından ibarət Mərkəzin yığma komandası 7 qızıl, 4 gümüş, 2 bürünc medal qazanaraq ümumi hesabda I yeri tutub.   

08/02/2022 11:25