Oktyabrın 20-də Azərbaycan Texniki Universitetinin Davamlı İnkişaf Mərkəzində Elm və Təhsil Nazirliyi, həmçinin Təhsilin İnkişafı Fondunun təşəbbüsü ilə “Maarifçi” tələbə-məzun təcrübə proqramının təqdimat mərasimi keçirilib.   Təqdimat mərasimində giriş nitqi ilə çıxış edən Elm və Təhsil Nazirliyinin İnformasiya və vətəndaşlara xidmət şöbəsinin müdir müavini Səbuhi Rzayev proqramın mahiyyəti barədə məlumat verib.     Çıxış edən Təhsilin İnkişafı Fondunun İdarə Heyətinin sədr müavini vəzifəsini icra edən Nərgiz İsmayılova və nazirliyin Korporativ idarəetmə sektorunun müdiri Şəhriyar Laçınov proqram barədə fikirlərini bölüşüblər.     Daha sonra nazirliyin əməkdaşı Sara Mirzəyeva tərəfindən “Maarifçi” tələbə-məzun təcrübə proqramının məqsədləri, hədəf qrupu, gözlənilən nəticələri və fəaliyyətinin təşkili barədə təqdimat nümayiş etdirilib.   Təqdimat mərasimində həmçinin proqram barədə fikir mübadiləsi aparılıb, suallar cavablandırılıb.   Qeyd edək ki, tələbələr, məzunlar üçün Elm və Təhsil Nazirliyi və qurumlarında təcrübə imkanları yaradan “Maarifçi” proqramının məqsədi elm və təhsil sahəsində insan resurslarının formalaşdırılması, iştirakçıların sahəvi bilik, bacarıqlarının artırılması, onların təhsil sahəsində müasir yanaşmaları öyrənmələri, həmçinin təhsil islahatlarının həyata keçirilməsi prosesinə dəstək olmaqdır.    Proqramda iştirak etmək istəyən şəxslər oktyabrın 20-dən https://t.ly/25uSR keçidi vasitəsilə müraciət ünvanlaya bilərlər.   Seçim prosesində uğur qazanan namizədlər proqram çərçivəsində Elm və Təhsil Nazirliyinin Aparatı, qurumları və regional təhsil idarələrində təcrübə keçmək imkanı əldə edəcəklər. Proqram çərçivəsində tələbə və məzunlar nazirliyin struktur bölmələrində həyata keçirilən layihə və proqramlarda, müxtəlif mövzular üzrə təlimlərdə, eləcə də təcrübəli rəhbər şəxslərlə mentorluq proseslərində iştirak imkanı qazanacaqlar.   Daha ətraflı: linktr.ee/maarifchi, https://t.ly/4GAhd  

20/10/2023 16:48

İnternat və internattipli təhsil müəssisələrinə tərbiyəçi, həmçinin loqoped vəzifələri üzrə işə qəbul üçün vakansiya seçiminə start verilir. Vakansiya seçimində iştirak etmək istəyən şəxslər aşağıdakı linkə daxil olaraq müraciət ünvanlaya bilərlər: https://forms.gle/ovVwBH2DJqFYrNW67   Vakansiya seçimi 23 oktyabr saat 11:00-dək davam edəcək.   Seçimlər zamanı müvafiq ixtisasa dair baza təhsili, iş stajı və müraciət etdiyi vakansiya üzrə faktiki yaşayış yeri uyğun olan namizədlərə üstünlük veriləcək. Namizədlər yuxarıda göstərilən linkə daxil olaraq müvafiq xanaları doldurduqdan sonra 1 vakant yer seçimi edə bilərlər.   Növbəti mərhələdə isə uyğun hesab edilən namizədlər üçün müsahibə təşkil olunacaq. Qeyd edək ki, müsahibə zamanı namizədlərin müvafiq sahə üzrə bilik və bacarıqları yoxlanılacaq.   

19/10/2023 16:59

Noyabrın 1-də Elm və Təhsil Nazirliyi, Təhsilin İnkişafı Fondunun təşkilatçılığı ilə ümummilli lider Heydər Əliyevin 100 illik yubileyinə həsr olunan Təhsilin İnkişafı Forumu keçiriləcək. “İnnovasiya ekosisteminin yaradılması”, “Universitet – sənaye tərəfdaşlığı”, “Gələcək üçün təhsil” panellərindən ibarət olacaq Forumda peşəkar moderator və spikerlər iştirak edəcəklər. Panellər zamanı təhsil və iqtisadiyyatın inteqrasiyası, təhsil və əmək bazarı, sənaye ilə tərəfdaşlıq strategiyası, sənayenin təhsildən gözləntiləri, əlavə dəyərin yaradılması, ekosistemin inkişafında bankların rolu, tədqiqat və inkişaf ekosistemi, ömürboyu təhsil, əmək bazarının dəyişən tələbləri, süni intellekt və təhsil mövzularından bəhs olunacaq. “Təhsildən tərəqqiyə” devizi ilə təşkil olunan forumda iştirakçılarla işgüzar əlaqələrin qurulması, birgə layihələrin planlaşdırılması, həmçinin innovasiya ekosisteminin yaradılması, dövlət – özəl tərəfdaşlığı, təhsil və iqtisadiyyatın inteqrasiyası kimi mövzular üzrə müzakirələr, iştirakçıları maraqlandıran sualların yerli və beynəlxalq mütəxəssislər tərəfindən cavablandırılması əsas hədəflərdəndir. Təhsilin İnkişafı Forumu “NEQSOL Holding”, bp şirkəti, “SOCAR”, Sumqayıt Texnologiyalar Parkı, “ABB”, “Azersun Holding” və “BestComp Group”un sponsorluğu ilə həyata keçiriləcək.  Forum haqqında ətraflı məlumatı www.tif.az veb-saytı və fondun sosial media hesablarından əldə etmək mümkündür.

19/10/2023 15:35

Beynəlxalq STEAM Azərbaycan Festivalına (SAF 2023) qeydiyyat prosesi başa çatıb. Festivalda iştirak üçün ümumilikdə 4 795 nəfər qeydiyyatdan keçib. Onlardan 4 459 nəfəri yerli, 336 nəfəri isə xarici iştirakçıdır.   Oktyabrın 20-dən final mərhələsi üçün seçim turlarına start veriləcək.   Qeyd edək ki, festival Elm və Təhsil Nazirliyinin dəstəyi ilə 4 – 8 dekabr 2023-cü il tarixlərində Bakı Ekspo Mərkəzində keçiriləcək. Festival 14 kateqoriya üzrə yarış və 1 kateqoriya üzrə innovativ layihələr sərgisi formatında təşkil ediləcək.    Festivalın keçirilməsində məqsəd STEAM əsaslı tədrisin təşviqi, təhsilalanlar arasında XXI əsr bacarıqlarının inkişaf etdirilməsi, yaradıcı, rəqəmsal texnologiya biliciləri olan şagird və tələbələrin aşkarlanması, şəbəkələşməsi, innovasiyalar və rəqəmsallaşma üzrə beynəlxalq təcrübənin öyrənilməsidir.    STEAM təhsil metodu 5 əsas disiplinin birgə təşkilidir. Bu metod elm (Science), texnologiya (Technology), mühəndislik (Engineering), incəsənət (Art), riyaziyyatı (Math) inteqrasiya olunmuş şəkildə tədris etmək ideyası üzərində qurulub.   

19/10/2023 14:20

“Stipendium Hungaricum in Azerbaijan” layihəsi çərçivəsində Bakı Dövlət Universitetinin Qazax filialı, Azərbaycan Texnologiya Universiteti (ATU), Gəncə Dövlət Universiteti (GDU), Azərbaycan Dövlət Aqrar Universiteti (ADAU) və Mingəçevir Dövlət Universitetinin (MDU) tələbələri ilə Qazax, Gəncə və Mingəçevirdə görüşlər keçirilib.   Sözügedən görüşlərdə universitet rəhbərləri tədbir iştirakçılarını salamlayaraq iki ölkə arasında təhsil sahəsində əlaqələrin inkişaf etdirilməsi istiqamətində layihənin əhəmiyyətini vurğulayıblar.   Macarıstanın Azərbaycandakı səfirliyinin təhsil və mədəniyyət üzrə nümayəndəsi Monika Felföldi çıxış edərək təqaüd proqramı barədə tələbələrə məlumat verib.   Gəncəyə səfər çərçivəsində nümayəndə heyəti 44 günlük Vətən müharibəsi zamanı Gəncə şəhərinə raket hücumu nəticəsində həlak olan dinc sakinlərin xatirəsinə həsr edilmiş Gəncə Memorial Kompleksi ilə tanış olub.   Məlumat üçün qeyd edək ki, layihə Macarıstanın “Stipendium Hungaricum” təqaüd proqramının 10-cu ildönümünə həsr olunub. Adıçəkilən layihə Macarıstanda təhsil almış məzunların ölkəmizin müxtəlif bölgələrində fəaliyyət göstərən universitetlərin tələbələri ilə görüşünü təşkil etmək, təcrübə və karyera imkanlarını regionlardakı universitetlərdən olan tələbələrlə bölüşmək, həmçinin Hökumətlərarası Təqaüd Proqramları çərçivəsində Macarıstanda təhsil barədə məlumatlandırma işini aparmaq məqsədi daşıyır.

19/10/2023 11:30

20 oktyabr saat 17:00-da “Yeni çağırışlar” müzakirə proqramında “Microsoft” şirkətinin öyrənmə təcrübələri üzrə direktoru Castin Edvards qonaq olacaq. Castin Edvards ilə oyunəsaslı öyrənmə barəsində danışılacaq.   Castin Edvards dünyanın ən məşhur kompüter oyunlarından sayılan “Minecraft”ın təhsil versiyasının kurikulum, təhsil siyasəti və qiymətləndirmə üzrə komandasına rəhbərlik edir.    Castin Edvards Nobel Sülh Mərkəzi və UNESCO ilə əməkdaşlıq çərçivəsində 100-dən çox ölkədə tətbiq edilən təhsil layihələri üzərində işləyib, həmçinin Böyük Britaniyanın Kurikulum, İmtahan və Qiymətləndirmə Şurasının (CCEA) baş icraçı direktoru vəzifəsində çalışıb.   Qeyd edək ki, proqram Elm və Təhsil Nazirliyinin rəsmi “Facebook” səhifəsi üzərindən Azərbaycan dilinə tərcümə ilə canlı yayımlanacaq.

19/10/2023 10:30

Oktyabrın 18-də Heydər Əliyev Mərkəzində növbəti ümumrespublika bilik yarışı keçirilib.   “Heydər Əliyev və Azərbaycan tarixi” IX ümumrespublika bilik yarışı Heydər Əliyev Mərkəzinin təşkilatçılığı, Elm və Təhsil Nazirliyinin dəstəyi ilə baş tutub.    Artıq ənənəyə çevrilən bu layihə Azərbaycan tarixi və bu il 100 illiyi qeyd edilən ümummilli lider Heydər Əliyevin həyatı, çoxşaxəli fəaliyyəti, irsinin tədqiqi, öyrənilməsi və təbliği məqsədini daşıyır.   18 Oktyabr – Müstəqilliyin Bərpası Günündə keçirilən yarışda əvvəlcə Heydər Əliyevin gənclərlə görüşlərini, ulu öndərin onlara mühüm tövsiyələrini və Heydər Əliyev yolunun Prezident İlham Əliyev tərəfindən davam etdirilməsini əks etdirən videoçarx nümayiş olunub.    Builki bilik yarışında ölkənin 50 ali təhsil müəssisəsinin komandaları iştirak ediblər.  İştirakçılar “Heydər Əliyevin uşaqlıq və gənclik illəri”, “Heydər Əliyev və Azərbaycanın müstəqillik illəri”, “Heydər Əliyev və Qarabağ həqiqətləri”, “Azərbaycan ordusunun Vətən müharibəsində zəfər yürüşü” və digər mövzularda biliklərini sınayıblar.    Qeyd edək ki, komandalar yarışa hazırlıq mərhələsində Heydər Əliyev Mərkəzində təşkil olunan təlimlərdə iştirak edib, Heydər Əliyev Muzeyində saxlanılan arxiv materialları ilə tanış olublar.  Hər ali təhsil müəssisəsini 6 nəfərdən ibarət komanda təmsil edib. Münsiflər heyətinin qiymətləndirməsinə əsasən I, II və III yerləri tutan komandalar mükafatlandırılıblar. Qaliblərə mükafatları Azərbaycan Respublikası Prezidentinin köməkçisi, Heydər Əliyev Mərkəzinin direktoru Anar Ələkbərov, elm və təhsil naziri Emin Əmrullayev təqdim ediblər.    Bilik yarışında I yeri Dövlət Təhlükəsizliyi Xidmətinin Heydər Əliyev adına Akademiyası, II yeri Daxili İşlər Nazirliyinin Akademiyası, III yeri isə Daxili İşlər Nazirliyinin Daxili Qoşunlarının Akademiyası qazanıb.

18/10/2023 17:55

Ölkə Prezidenti cənab İlham Əliyev “2023–2024-cü tədris ilində Azərbaycan Respublikasının ali məktəblərinə daxil olmuş tələbələrə Prezident təqaüdünün verilməsi haqqında” sərəncam imzalayıb.   Sərəncama əsasən 2023–2024-cü tədris ilində tələbə qəbulu imtahanlarında ixtisas qrupları üzrə ən yüksək nəticələr göstərmiş və Azərbaycan Respublikasının ali məktəblərinə daxil olmuş 102 tələbəyə Prezident təqaüdü veriləcək.  

18/10/2023 15:03

“Bir Könüllü” Tələbələrin Əməkdaşlığı İctimai Birliyi və Azərbaycan Gənc Müəllimlər Assosiasiyasının əməkdaşlığı ilə “Təhsildə könüllülük” təşəbbüsünə start verilir.    Təşəbbüs çərçivəsində ali və orta ixtisas təhsili müəssisələrinin məktəbəqədər təlim və tərbiyə ixtisası üzrə təhsil alan tələbələrinin bağçalarda praktiki fəaliyyətlərə cəlb edilməsi nəzərdə tutulur.    Təşəbbüsün məqsədi sözügedən ixtisas üzrə təhsil alan tələbələri resurs imkanlarının məhdud olduğu məktəbəqədər təhsil müəssisələrində pedaqoji fəaliyyətə cəlb edərək onların sahəvi bilik və bacarıqlarını artırmaq, gələcək kadr hazırlığı prosesinə töhfə vermək, eləcə də ali və orta ixtisas təhsili müəssisələri ilə bağçaların əməkdaşlığını formalaşdırmaqdır.   Ətraflı məlumat və müraciət qaydası üçün aşağıdakı keçidə daxil ola bilərsiniz:  https://forms.gle/Jzc2QCskYMpfw3CY9    

18/10/2023 09:37

İqtisadi İslahatların Təhlili və Kommunikasiya Mərkəzində (İİTKM) Qlobal İnnovasiya İndeksində Elm və Təhsil Nazirliyinin əsas icraçı olduğu alt-indikatorların müzakirə edilməsi məqsədilə Biznes Mühiti və Beynəlxalq Reytinqlər üzrə Komissiyanın “İnsan kapitalı” İşçi Qrupunun iclası keçirilib.   İclasda Biznes Mühiti və Beynəlxalq Reytinqlər üzrə Komissiyanın Katibliyi, Elm və Təhsil Nazirliyi, İqtisadiyyat Nazirliyi, Dövlət Statistika Komitəsi, İİTKM və digər dövlət qurumlarının məsul şəxsləri iştirak ediblər.    Elm və Təhsil Nazirliyinin məsul olduğu aidiyyəti alt-indikatorların Qlobal İnnovasiya İndeksi 2023-cü il hesabatındakı mövqeyi, hesabatın 2022-ci illə müqayisəli təhlili, göstəricilərin yaxşılaşdırılması istiqamətində görülmüş tədbirlər, eləcə də növbəti hesabatda ölkənin mövqeyinin daha da yaxşılaşdırılması üçün atılacaq addımlar müzakirə olunub və müvafiq qərarlar qəbul edilib.   Eyni zamanda Qlobal İnnovasiya İndeksində yer alan alt-indikatorlar və onların metodologiyalarının mütəmadi olaraq araşdırılmasının vacibliyi vurğulanıb.    İclasda müzakirə edilən müvafiq indikatorlar üzrə bir sıra tədbirlərin “İnsan kapitalı” İşçi Qrupunun 2024-cü il üçün hazırlanacaq Fəaliyyət Planına da daxil edilməsi qərara alınıb.  

17/10/2023 18:00