Azərbaycan Respublikası Təhsil Nazirliyinin SABAH Qruplarında 2016/2017–ci tədris ilinin yaz semestrində müxtəlif fənlərin tədrisini aparmaq məqsədilə professor-müəllim heyəti və mütəxəssislər işə dəvət olunurlar. Fənnlərin siyahısını buradan yükləyə bilərsiniz.   Öhdəliklər • Kurs sillabusunun hazırlanması; • Bakalavr səviyyəsində keyfiyyətli tədrisin aparılması; • Tələbə biliyinin vaxtında qiymətləndirilməsi;   Namizədə Tələblər • Əlaqədar sahədə Fəlsəfə Doktoru və ya Magistr dərəcəsi olan; • İKT və sahə bilikləri yüksək səviyyədə olan; • İnnovativ tədris metodikalarından istifadə edə bilən; • Müasir pedaqoji yanaşmalardan xəbərdar olan; • Dinamik, pozitiv və ünsiyyətcil;   Tələblərə cavab verən namizədlərdən verilən müraciət formasını doldurub, fənn üzrə sillabus, diplom və sertifikatların kopiyasını hr@sabah.edu.az ünvanına göndərmələri xahiş olunur. Seçim zamanı sahə üzrə ən azı 3 il ali tədris təcrübəsi olan, PhD və xaricdə təhsil alan namizədlərə üstünlük veriləcək. Müraciətdə 3 fənnə qədər seçə bilərlər.   Son müraciət tarixi: 26 yanvar 2017, saat 18:00

23/01/2017 15:19

Rusiya Federasiyasının 2017/2018- ci tədris ili üzrə elan etdiyi Təqaüd Proqramı barədə elanı nəzərinizə çatdırırıq: Təqdim edən tərəf: Rusiya Federasiyası Qarşılanan xərclər (Rusiya Federasiyası tərəfindən): • ödənişsiz təhsil; • aylıq təqaüd. QEYD: Təhsil yerinə gediş-gəliş xərcləri, tibbi sığorta, universitet yataqxanasında yaşayış tələbələrin özləri tərəfindən qarşılanır. Müraciət tarixi:  09.01.2017-dək Müraciət forması: namizədlər russia.study portalı vasitəsilə qeydiyyatdan keçməli və müraciət formasını doldurmalıdırlar. Göstərilən tarixdən sonra qeydiyyatdan keçənlərin namizədlikləri nəzərə alınmır. Qeydiyyat başa çatdıqdan sonra I mərhələnin şərtləri barədə məlumat namizədlərə bildiriləcəkdir. I mərhələdən uğurla keçmiş namizədlərə müvafiq sənədlərini elektron müraciət formasına yükləmək imkanı yaradılacaq. Ali təhsil müəssisələri: Universitetlərin siyahısı və digər vacib məlumatlarla http://минобрнауки.рф, www.russia-edu.ru internet səhifələri vasitəsilə tanış olmaq mümkündür. Əlaqə vasitələri: riccabiturient@yandex.ru, iş günləri, saat: 11:00-13:00 aralığında tel:+994124964500 (Пономарёва Юлия Валерьевна), bununla yanaşı russia.admissions@edu.gov.az

29/12/2016 11:02

Fransız-Azərbaycan Universitetində (UFAZ) 2-ci semestr üçün vakansiyalar elan olunur :   • Fizika müəllimi • Kimya müəllimi • İnformatika müəllimi • Kimya laborantı* • Fizika  laborantı*   Namizədlər pdf formatda ərizə və ingilis dilində yazılmış CV-lərini 01.02.2017-ci il  tarixinədək ufaz-coordinator@asoiu.edu.az  elektron ünvanına göndərə bilərlər.   • Ərizəçilərin yuxarıda göstərilən sahələr üzrə ən azı magistr dərəcəsi və iki illik tədris təcrübəsi olmalıdır; • Namizədlərin yüksək ingilis dili biliyi və bu dildə fənlərin tədrisi səriştəsi olmalıdır; 
 • CV-də əlavə olaraq xaricdə təhsil təcrübəsi, ingilis dilində yazılmış dərslik və müasir təhsil metodları ilə tanışlıq, fransız dili biliyi, doktorantura dərəcəsi göstərilməlidir; 
 • Sənəd və sertifikatların pdf versiyaları, peşəkar layihəni təsvir edən və UFAZ- dakı vəzifəyə marağı ifadə edən motivasiya məktubu da əlavə olunmalıdır. 
                 *Kimya və fizika laborantının öhdəlikləri:   • Laboratoriya və sinifdə əşya və avadanlıqların təmizliyi; • Neytrallaşdırıcı məhlulların olmasına nəzarət, turşuların və əsasların saxlanılması və tullanılması; • Məhlullar üçün qablaşdırmanın təchizi; • Dərs planıına uyğun avadanlığın hazırlanması ; • Materialların miqdarı və yararlığının, avadanlığın iş fəaliyyətinin, elektro vəsaitlərin yoxlanılması; • Kimya otağı laborantı tərəfindən dərs gününün sonunda dolabların, su-boru xəttinin bağlanılmasının, elektro cihazların söndürülməsinin yoxlanılması.   Fransız-Azərbaycan Universiteti (UFAZ) layihəsi Fransa Respublikası və Azərbaycan Respublikası Prezidentlərinin təşəbbüsü ilə irəli sürülmüş bir layihədir. Layihəyə əsasən, 2016-2017-ci tədris ilindən etibarən Azərbaycan Dövlət Neft və Sənaye Universiteti nəzdində 4 ixtisas üzrə tədris başlanılıb. Bu ixtisaslar aşağıdakılardır:   • Kimya mühəndisliyi ixtisası • Kompüter elmləri • Geofizika mühəndisliyi • Neft və qaz mühəndisliyi

15/12/2016 15:19

“İsveçrənin “Universita della Svizzera İtaliana” tərəfindən xarici tələbələr üçün 2017-ci ilin mart ayından 2018-ci ilin dekabr ayına qədər Mədəniyyətlərarası Kommunikasiya üzrə magistr proqramı təşkil olunur. Kurs ərzində tələbələr immiqrantların inteqrasiyası, onlarda ünsiyyət bacarıqlarının inkişaf etdirilməsi, fərqli mədəniyyətlərə malik qrupların ehtiyaclarının dərk edilməsi kimi nəzəri və praktiki biliklərə yiyələnəcəklər. Qeyd olunan magistr proqramı ilə maraqlanan şəxslər mic@usi.ch electron ünvan və ya +41586664652 telefon nömrəsi ilə əlaqə saxlıyaraq ətraflı məlumat əldə edə bilərlər.”

05/12/2016 11:03

“Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Təhsil Nazirliyinin 2016-cı il üçün Tədbirlər Planına uyğun olaraq “Azərbaycanda məktəb və maarifçilik ənənəsi: tarixdən gələcəyə” mövzusunda yazı müsabiqəsi elan edir Müsabiqədə ölkənin elm və təhsil müəssisələrində çalışan alimlər, müəllimlər, pedaqoq və tədqiqatçılar, eləcə də magistr və doktorantlar, araşdırmaçı jurnalistlər iştirak edə bilərlər. İştirak etmək istəyənlər təhsilimizdə milli-mənəvi dəyərlər; Azərbaycan təhsilinin gələcək inkişaf istiqamətləri; gələcəyin müəllimi; təhsilin yeni məzmunu; səriştəli müəllim və təhsil menecerləri; ömürboyu təhsil; şəffaf və səmərəli idarəetmə modellərinin tətbiqi istiqamətləri üzrə yazılarını 26 noyabr 2016-cı il tarixdən 15 dekabr 2016-cı il tarixinədək muallim@edu.gov.az  elektron poçt ünvanına göndərə bilərlər. Təqdim olunan yazılar tanınmış pedaqoq, alim və təcrübəli mütəxəssislərdən ibarət münsiflər heyəti tərəfindən qiymətləndiriləcək. Qaliblərin qiymətli hədiyyə və diplomlarla mükafatlandırılması nəzərdə tutulur.   Müsabiqənin əsas şərtləri: İştirakçılar təqdim olunan yazıların sonunda zəruri məlumatları (ad, soyad, əlaqə telefonu, çalışdığı müəssisənin adı və tutduğu vəzifə) qeyd etməlidir. Hər iştirakçı müsabiqəyə bir yazı təqdim edə bilər. Yazıların əvvəlində müsabiqə üçün hazırlandığı qeyd olunmalıdır.   Əlaqə üçün: (012) 538-51-41 Təşkilat Komitəsi

30/11/2016 10:29

Qazaxıstanın Nazarbayev Universitetinin Biznes üzrə Ali məktəbi (NUGSB) xarici tələbələr üçün magistratura pilləsi üzrə təqaüd elan edir. ABŞ-ın Duke Universitetinin Fuqua Biznes məktəbi ilə strateji əməkdaşlıq əsasında yaradılmış bu ali məktəb bugünə kimi 2000 nəfərdən çox xarici tələbəyə təhsil proqamı təqdim etmişdir. Sözügedən təqaüd haqqında ərtaflı məlumat almaq üçün mba.admissions@nu.edu.kz  ünvanına e-mail göndərə və +7 (7172) 709183 nömrələrinə zəng edə bilərsiniz.

23/11/2016 16:23

İsveçin 2017/2018- ci tədris ili üzrə elan etdiyi “ Visby Təqaüd Proqramı” barədə elanı nəzərinizə çatdırırıq:   Təqdim edən tərəf: İsveç Proqramın adı: Visby Təqaüd Proqramı Ölkələr: Azərbaycan, Belarus, Ermənistan, Gürcüstan, Moldova, Russiya, Ukrayna Təhsil səviyyəsi: magistratura, doktorantura, doktorantura sonrası tədqiqat (postdoct) Təqaüdün müddəti: magistratura - 1-2 il; doktorantura - 12 ay; doktorantura sonrası tədqiqat (postdoct) - 6,9 və 12 ay; böyük elmi işçilər (senior scientists)  – 6 ay Qarşılanan xərclər: magistratura üçün - 9 000 İsveç kronu (SEK) aylıq təqaüd, sığorta və yol xərcləri; doktorantura üçün – 15 000 İsveç kronu (SEK),  doktorantura sonrası tədqiqat və  böyük elmi işçilər (senior scientists) üçün -18 000 İsveç kronu (SEK) Kvota sayı: magistratura üçün -50, doktorantura, doktorantura sonrası tədqiqat, böyük elmi işçilər (senior scientists)  – 40 Yaş məhdudiyyəti: Yoxdur Müraciət tarixi: 1-10 Fevral 2017-ci  il tarixi Müraciət forması: Fərdi İnternet səhifəsi: www.sweden.se; www.si.se   Əlaqə vasitələri: si@si.se  

11/11/2016 17:19

Təhsil Nazirliyi “Azərbaycan Respublikasında ümumi təhsilin dövlət standartları” sənədinin layihəsini ictimai müzakirəyə təqdim edir.   Sənəd “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planının müvafiq bəndlərinin icrasını təmin etmək məqsədi ilə hazırlanıb. İctimai müzakirədə iştirak etmək istəyənlər  Təhsil Nazirliyinin internet saytının “Sənədlər” bölməsində (http://edu.gov.az/upload/file/layihe-senedi/umumi_tehsilin_dovlet_standartlari.pdf) həmin sənədlə tanış ola bilərlər. Rəy, təklif və iradları layihe@edu.gov.az elektron poçtuna göndərməklə bildirmək mümkündür. Təhsil Nazirliyi “Azərbaycan Respublikasında ümumi təhsilin dövlət standartları” sənədinin təkmilləşdirilməsində geniş ictimaiyyəti fəal olmağa dəvət edir.

11/11/2016 16:14

Təhsil Nazirliyi “Azərbaycan Respublikasında məktəbəqədər təhsilin dövlət standartları” sənədinin layihəsini ictimai müzakirəyə təqdim edir.   Sənəd “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planının icrasını təmin etmək məqsədi ilə hazırlanıb. İctimai müzakirədə iştirak etmək istəyənlər  Təhsil Nazirliyinin internet saytının “Sənədlər” bölməsində  http://edu.gov.az/upload/file/layihe-senedi/mektebeqeder_tehsilin_dovlet_standartlari.pdf həmin sənədlə tanış ola bilərlər. Rəy, təklif və iradları layihe@edu.gov.az elektron poçtuna göndərməklə bildirmək mümkündür. Təhsil Nazirliyi “Azərbaycan Respublikasında məktəbəqədər təhsilin dövlət standartları” sənədinin təkmilləşdirilməsində geniş ictimaiyyəti fəal olmağa dəvət edir.

29/10/2016 14:41

Xidmətlər haqqında qısa məlumat: Dərsliklərin qiymətləndirilməsi “Dərslikləri qiymətləndirmə meyarları”na əsasən Azərbaycan Respublikası Təhsil Nazirliyinin yanında fəaliyyət göstərən Dərslikləri Qiymətləndirmə Şurası (bundan sonra Şura) tərəfindən həyata keçirilir. Şura müstəqil qurumdur və əsas funksiyası ümumtəhsil məktəblərində istifadə ediləcək dərslik komplektləri (DK) üzrə ekspert qrupları formalaşdırmaqla onların qiymətləndirilməsi prosesini təşkil etməkdən ibarətdir. Seçilmiş ekspertlər dərslik komplektlərinin dövlət standartlarına və təhsil proqramına (kurikuluma) uyğunluğunu, onların məzmununun elmi etibarlılığını və sosial həssaslığını, pedaqoji yanaşmalarını, texniki tərtibatını və dizaynını, dil və yazı üslubunu qiymətləndirəcəklər. Tələb olunan xidmətlər: Ümumi təhsilin bütün təhsil səviyyələrində aşağıda göstərilmiş milli azlıqların dilləri üzrə dərsliklərin qiymətləndirilməsi sahəsində ekspert xidmətləri: Saxur dili Avar dili Ləzgi dili Talış dili Kürd dili Xınalıq dili Tat dili Udi dili Xidmətin icra olunduğu yer: Azərbaycan Respublikası Təhsil Nazirliyi Xidmətin icra müddəti: 31.12.2017-ci ilədək. Namizədlərə verilən tələblər: 1. Təhsili: Namizəd müraciət etdiyi xidmətlərin istiqamətinə uyğun ali təhsilə malik olmalıdır. 2. Təcrübəsi: Namizəd müraciət etdiyi xidmətlərin istiqamətinə uyğun ən azı 5 illik elmi-pedaqoji təcrübəyə malik olmalıdır. 3. İKT-dən istifadə bacarıqları: Namizəd Microsoft Word proqramından istifadə etməyi bacarmalıdır. Müraciət forması: Müraciət edən şəxslər müraciət etdikləri xidmət istiqamətini göstərmək şərti ilə bildirişə əlavə olunmuş formatda öz avtobioqrafiyasını (CV) 30.10.2016-cı il tarixədək derslik@edu.gov.az elektron poçtuna göndərə bilərlər. Müraciətə baxılması: Daxil olan CV-lər əsasında tələblərə ən yüksək səviyyədə cavab verən namizədlər seçilərək onlardan müraciət etdiyi istiqamət üzrə ən azı bir dərsliyi qiymətləndirmək xahiş ediləcəkdir. Təqdim edilən qiymətləndirmə əsasında ən uğurlu namizədlər müəyyənləşdiriləcək və onlar müsahibəyə dəvət ediləcək. Əlavə məlumatları iş günləri saat 09.00-dan 18.00-dək bu ünvandan əldə etmək olar: Ünvan: AZ1008, Bakı şəhəri, Xətai prospekti, 49. Azərbaycan Respublikasının Təhsil Nazirliyi Əlaqələndirici şəxs: Zülfiyyə Hüseynova Əlaqə telefonları: (+ 994 012) 599-11-55 (əlavə 5264) E-poçt: derslik@edu.gov.az   Avtobioqrafiya (CV) formatı

14/10/2016 12:56