Qurbanov Firudin İsa oğlu 1974-cü ildə Azərbaycan Dövlət Xalq Təsərrüfatı İnstitutunun İqtisadiyyat və planlaşdırma fakültəsini fərqlənmə diplomu ilə bitirib. 

1974-1975-ci illərdə orduda xidmət edib. 

1975-1982-ci illərdə Elmi-Tədqiqat İqtisadiyyat İnstitutunda iqtisadçı, kiçik və baş elmi işçi vəzifələrində işləyib. 1982-1989-cu illərdə Moskva Kooperativ İnstitutunun Bakı filialında assistent, baş müəllim, dosent və dekan vəzifələrində, 1989-1994-cü illərdə Azərbaycan Respublikası Təhsil Nazirliyinin Dövlət İnspeksiyasında inspektor, aparıcı inspektor, baş inspektor, şöbə rəisi vəzifələrində, 1994-cü ildən Azərbaycan Respublikası Gənclər və İdman Nazirliyinin Elm və tədris müəssisələri şöbəsinin müdiri, 2001-ci ildən Gənclər, İdman və Turizm Nazirliyinin Elm və Təhsil İdarəsinin rəisi, 2006-cı ildən Gənclər və İdman Nazirliyinin Elm və təhsil şöbəsinin müdiri vəzifəsində işləyib. 

1998-ci ildə təhsil sahəsində islahatlar üzrə Dövlət Komissiyasının nəzdində işçi qrupunun üzvü, 2002-2005-ci illərdə turizmin inkişafı üzrə Dövlət Proqramı, eləcə də 2003-2005-ci illərdə yoxsulluğun azaldılması və iqtisadi inkişaf üzrə Dövlət Proqramının hazırlanmasında gənclər, idman, turizm və mədəniyyət sektorları üzrə işçi qruplarının sədri, BMT-nin İnkişaf Proqramı, Azərbaycan Respublikasında yoxsulluğun azaldılması məqsədilə daxili turizmin səmərəli inkişafının təmin olunması üzrə “Azərbaycan Respublikasının Gənclər, İdman və Turizm Nazirliyinə İnstitusional yardım” (2004-2005-ci illər) layihəsinin milli direktoru olub. 2007-2014-cü illərdə Azərbaycan Respublikasının Mədəniyyət və Turizm Nazirliyinin Aparat rəhbəri olub. Azərbaycan Respublikasının Prezidentinin 2014-cü il 18 iyul Sərəncamı ilə təhsil nazirinin müavini təyin edilib. 

2001-2008-ci illərdə Milli Olimpiya Komitəsinin üzvü, 2015-ci ilin mart ayında AFFA-nın İcraiyyə Komitəsinin üzvü, may ayında isə Tələbə Futbol Federasiyasının prezidenti seçilib. 

2007-ci ildə Azərbaycan Respublikasının Prezidentinin müvafiq sərəncamı ilə Azərbaycan Respublikasının milli təhlükəsizlik siyasəti sahəsində İşçi Qrupunun üzvü olub. 

2011-ci ildə “dövlət qulluğunun baş müşaviri” ixtisas dərəcəsi verilmişdir. Azərbaycan Respublikasının Prezidentinin 25 iyun 2011-ci il tarixli müvafiq sərəncamı ilə “Dövlət qulluğunda fərqlənməyə görə” medalı ilə təltif olunub. 2014-cü ildə Mədəniyyət və Turizm Nazirliyinin "Fəxri mədəniyyət işçisi" döş nişanı ilə təltif edilib. 2019-cu ildə “Azərbaycan Respublikası diplomatik xidmət orqanlarının 100 illiyi (1919-2019)” Azərbaycan Respublikasının yubiley medalı ilə təltif edilib.  “Bakı Dövlət Universitetinin 100 illiyi (1919-2019)” Azərbaycan Respublikasının yubiley medalına layiq görülüb. 2022-ci ildə dövlət qulluğunda səmərəli fəaliyyətinə görə 2-ci dərəcəli “Vətənə xidmətə görə” ordeni ilə təltif edilib. 

İngiltərə, Danimarka, ABŞ, Uruqvay, İsveçrə, Hollandiya, Almaniya, Fransa, Bolqarıstan, İspaniya, Çin, Portuqaliya, Avstriya, Nepal, Türkiyə və s. ölkələrdə beynəlxalq konfrans, simpozium və seminarların iştirakçısı olmuş, aktual mövzularla çıxış etmişdir.

İqtisadiyyat üzrə fəlsəfə doktoru, dosentdir. Bir monoqrafiya və 60-dan çox elmi əsərin müəllifidir.

Nərimanov rayon YAP təşkilatının idarə heyətinin üzvüdür. 
 

Rus və fransız dillərini bilir. 

Evlidir, 2 övladı var. 

Azərbaycan Respublikasının Prezidenti cənab İlham Əliyevin 28 iyul 2022-ci il tarixli “Azərbaycan Respublikasında elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında” Fərmanına əsasən elm və təhsilin qarşılıqlı əlaqəsinin möhkəmləndirilməsi və bu sahələrdə idarəetmənin təkmilləşdirilməsi məqsədilə Azərbaycan Respublikasının Təhsil Nazirliyi Azərbaycan Respublikasının Elm və Təhsil Nazirliyi adlandırılıb.