18.01.2016

Azərbaycan məktəblilərinin daha bir uğuru

Qazaxıstanın Almatı şəhərində məktəblilərin Jautıkov adına XII Beynəlxalq fizika, riyaziyyat və informatika fənn olimpiadası keçirilir. 13-19 yanvar 2016-cı il tarixlərində keçirilən bu olimpiadada öz bilik və bacarıqlarını nümayiş etdirmək məqsədilə Azərbaycan məktəbliləri də iştirak edirlər.

Rumıniya, Bolqarıstan, İndoneziya, Rusiya, Ukrayna, Belarus olmaqla, 25-ə yaxın ölkənin iştirak etdiyi olimpiadadan şagirdlərimiz Vətənə nailiyyətlərlə geri dönəcəklər. Belə ki, Azərbaycan bayrağını layiqincə təmsil edən məktəblilərimiz fizika fənni üzrə 2 gümüş, 1 bürünc, riyaziyyat fənni üzrə 2 bürünc və informatika fənni üzrə 2 bürünc medal olmaqla 7 medal əldə ediblər.

Qeyd edək ki, şagirdlərimiz 5 illik fasilədən sonra informatika fənni üzrə beynəlxalq yarışda yenidən nailiyyət qazanıblar.


Açar sözlər: ,