22.09.2015

Təhsil Nazirliyinin Respublika Ekoloji Tərbiyə və Təcrübəçilik Mərkəzinin (RETTM) təşəbbüsü ilə Quba rayonunda məktəblilərin ilk yay ekoloji məktəbi - təhsil düşərgəsi təşkil olunub.

Azərbaycan Dövlət İqtisad Universitetinin təhsil-idman istirahət kompleksində ilk dəfə təşkil olunmuş yay ekoloji məktəbində təbiəti mühafizə təşkilatlarının və gənc təbiətçilər klublarının ən fəal üzvü olan 8-14 yaşlı 30 məktəbli iştirak edib.

Beynəlxalq Savadlılıq Gününə həsr edilmiş ekoloji məktəbinə dəvət olunmuş AMEA, BP və BDU-nin ekspertləri, RETTM-in əməkdaşları və ekoloq tələbələr uşaqlarla meşənin ekologiyasının əsasları, istiqamətin təyin olunması, yaşıl turizm, bitki və heyvan növlərinin təyini, bioindikasiya və bioakustika üzrə treninqlər keçiblər. Praktik məşğələlərlə birlikdə idman-sağlamlıq proqramlarının, futbol və üzgüçülük yarışlarının təşkili məktəblilərin istirahətinin mənalı keçməsinə şərait yaradıb. 5 gün ərzində uşaq və gənclər qrup halında ilk elmi tədqiqat layihələrini reallaşdırıblar.