Sual: Azərbaycanda uşaq ədəbiyyatı, orta məktəb dərslikləri, dövlət əhəmiyyətli nəşrlər vergidən azad oluna bilər? Məsələ ilə bağlı Təhsil Nazirliyinə müraciət daxil olubmu?

Cavab: Qeyd olunan məsələ ilə əlaqədar Azərbaycan Respublikasının Vergilər Nazirliyinə müraciət etməyinizi məqsədəmüvafiq hesab edirik.

Sual: Sağlamlıq imkanları məhdud uşaqlar üçün 5 nömrəli Respublika xüsusi internat məktəbi haqqında məlumat verilməsini xahiş edirik.

Cavab: İnternat məktəbi 1936-cı ildən fəaliyyət göstərir. İnternat məktəbi “Uşaq evləri və internat məktəblərinin İnkişafı Proqramı” çərçivəsində Heydər Əliyev Fondu tərəfindən 2006-cı ildə yenidən bərpa edilmiş, müasir avadanlıqla təmin edilmişdir.
Sağlamlıq imkanları məhdud uşaqlar üçün 5 nömrəli Respublika xüsusi internat məktəbində 260 nəfər gözdən əlil və zəifgörən şagird təhsil alır. Onlardan 70 nəfəri qız, 190 nəfəri isə oğlandır. Son 3 ildə internat məktəbinə daxil olan şagirdlərin sayı aşağıda qeyd olunan kimidir:
2011-2012-ci tədris ili üzrə- 31 nəfər
2012-2013-cü tədris ili üzrə- 22 nəfər
2013-2014-cü tədris ili üzrə- 28 nəfər
Bildiririk ki, Təhsil Nazirliyinin tabeliyində fəaliyyət göstərən internat məktəblərində yaşayıb təlim-tərbiyə alan şagirdlər tam dövlət təminatındadırlar. 15.09.2013-cü il tarixindən Təhsil Nazirliyinin tabeliyində olan internat məktəblərində qidalanmanın təşkilinin vahid mərkəzdən idarə edilməsinə başlanılmışdır.
Menyulara xəstəliklərin nozoloji formasına, gedişinə, ağırlıq dərəcəsinə, remissiya və ya residiv dövrlərinə uyğun fərdi dəyişikliklər edilmişdir. Bundan əlavə, qidalanma yaş qrupları, uşaq və yeniyetmələrin üzərinə düşən əqli və fiziki yükün xüsusiyyətləri, bu müəssisələrdə dərs və iş rejimi nəzərə alınmaqla təşkil edilmişdir.
Qidalanmanın təşkilinin vahid mərkəzdən idarə edilməsi beynəlxalq və yerli standartların, sanitar-gigiyenik və sanitar-epidemioloji tələblərin yerinə yetirilməsini daim nəzarətdə saxlamaq və baş verən hər hansı bir çatışmazlığın operativ şəkildə aradan qaldırılması məqsədlərinə xidmət edir.İnternat məktəbində dəuşaq və yeniyetmələr arasında qidalanmanın düzgün təşkili və yemək çeşidlərinin müxtəlifliyi uşaqlara seçim imkanları yaratmışdır.
Sağlamlıq imkanları məhdud uşaqlar üçün 5 nömrəli Respublika xüsusi internat məktəbinin nəzdində Azərbaycan Respublikası Mədəniyyət və Turizm Nazirliyinin tabeliyində olan gözdən əlil və zəifgörən uşaqlar üçün musiqi məktəbi fəaliyyət göstərir. İnternat məktəbinin 187 nəfər şagirdi tar, kamança, qarmon, nağara, xanəndə, forte piano, skripka sinifləri fəaliyyət göstərir.
İnternat məktəbini bitirən məzunlar ali və orta ixtisas təhsili müəssisələrinə yüksək nəticələrlə qəbul olmuşlar. Belə ki, 2010-cu ildə Sağlamlıq imkanları məhdud uşaqlar üçün 5 nömrəli Respublika xüsusi internat məktəbinin 11 nəfər şagirdi ali, 8 nəfər şagirdi kollec və 3 nəfər şagirdi isə orta ixtisas təhsil müəssisələrinə, 2011-ci ildə 11-ci sinfi bitirən məzunlar arasından 7 nəfər şagird ali, 3 nəfər şagird kollecə, 2012-ci ildə 6 nəfər şagird ali, 4 nəfər şagird kollecə və 2013-cü ildə 9 nəfər şagird ali, 4 nəfər şagird isə kollecə qəbul olmuşdur.
Qolbol üzrə Azərbaycan milli komandasının 7 nəfər üzvü sağlamlıq imkanları məhdud uşaqlar üçün internat məktəblərinin şagirdləridir. Milli komanda 2 dəfə Avropa çempionatında, 3 dəfə beynəlxalq yarış və turnirlərdə iştirak etmişlər. Hazırda milli komanda 2016-cı ilə Braziliya Yay Paralimpiya Oyunlarında iştirak etmək üçün məşq edirlər.
Heydər Əliyev Fondunun təşəbbüsü ilə Gözdən əlil uşaqlar üçün xüsusi internat məktəbinin nəzdində mətbəə yaradılmışdır ki, burada Brayl əlifbasında dərslik və dərs vəsaitləri çap olunur. Mətbəədə çap olunan dərs vəsaitləri gözdən əlil uşaqların dərsliklərə olan ehtiyacını tam təmin edir. Eyni zamanda internat məktəbi Almaniyadan gətirilmiş xüsusi kompüter dəsti ilə təchiz edilmişdir.

Sual: Bəzi ekspertlər bildirirlər ki, qəbul imtahanlarında pedaqoji kadr hazırlığı aparılan ixtisaslara qəbul yüksək balla həyata keçirilsin. Bununla bağlı Təhsil Nazirliyinin mövqeyi necədir?

Cavab: Pedaqoji kadr hazırlığı aparılan ixtisaslara qəbul imtahanlarında yüksək bal toplamış abituriyentlərin qəbul olunmasına dair ekspertlərin fikrinə Təhsil Nazirliyi müsbət yanaşır.

Sual: Məlumatımıza görə, əgər sinifdə 15 nəfər şagird olarsa, həmin sinif bağlanılmalı və ya paralel sinfə birləşdirilməlidir. Bu doğrudurmu?

Cavab: Nazirlər Kabinetinin 13.01.2011-ci il tarixli, 5 nömrəli Qərarı ilə təsdiq olunmuş “Ümumtəhsil məktəbinin Nümunəvi Nizamnaməsi”nə əsasən, ümumtəhsil məktəblərində siniflər şagirdlərin sayı 20 nəfər olmaqla müəyyən edilir. Zəruri hallarda mövcud qanunvericiliyin tələbləri gözlənilməklə siniflər şagirdlərin sayı 20 nəfərdən az olmaqla müəyyən edilə bilər.
Bununla yanaşı, Nazirlər Kabinetinin “Ümumtəhsil məktəbinin Nümunəvi Nizamnaməsi”ndə dəyişikliklər edilməsi haqqında” 19.01.2012-ci il tarixli (№10) Qərarında qeyd olunmuşdur ki, bir sinifdə şagirdlərin ümumi sayı 20 nəfərə çatmadıqda mövcud şagird sayı ilə sinif təşkil edilməsinə yol verilir. Eyni bir sinifdə şagirdlərin sayı 30 nəfərdən çox olduqda və ya şagirdlərin bir sinifdə tədrisinə sinif otağının ölçüsü imkan vermədikdə həmin sinif üzrə ikinci paralel sinif təşkil olunur.

Sual: Təhsil Nazirliyi ucqar orta məktəblərdə şagirdlərin davamiyyətinə nəzarət məqsədilə davamlı tədbirlər həyata keçirməyi planlaşdırırdı. Bu tədbirlərə başlanılıbmı? Həmin tədbirlər konkret olaraq nələrdən ibarətdir?

Cavab:Şagirdlərin dərsə davamiyyətinə nəzarətlə bağlı məsələlər təhsil işçilərinin sentyabr konfranslarında ciddi müzakirə olunmuş, məktəb direktorlarına lazımi təlimati göstərişlər verilmişdir. Təhsil şöbələri bu məqsədlə davamlı araşdırmalar aparır. Təhsil Nazirliyi də seçmə yolla yoxlamalar aparmağı planlaşdırır və dərs ilinin I yarısının sonunadək bu sahədə müvafiq işlər həyata keçirəcəkdir.

Sual: Təhsil Nazirliyi müəllim hazırlığı aparılan ixtisaslar üzrə təhsil proqramlarına yenidən baxmağı nəzərdə tutur. Bu işə başlanılıbmı?

Cavab: Ali təhsilin bakalavriat səviyyəsində müəllim hazırlığı aparılan ixtisaslar üzrə yeni nəsil təhsil proqramları hazırlanmış,  ekspertizası keçirilmiş və təsdiq edildikdən sonra növbəti tədris ilindən onların tətbiqinə başlanılması nəzərdə tutulur.

Sual: Təhsil Nazirliyi bu proqramlara yenidən baxdıqdan sonra orada hansı dəyişikliklər edilə bilər? Proqramlar asanlaşdırılacaq, yoxsa müəllimlərin işə qəbulu imtahanlarında təqdim edilən sualların çətinlik səviyyəsi artırılacaq? Hazırda bunlardan hansının edilməsinə daha çox ehtiyac var?

Cavab: Bu proqramların əvvəlki təhsil proqramlarından əsas fərqli cəhəti odur ki, onlar hazırlanacaq mütəxəssislərin bilik, bacarıq və kompetensiyalarına əsaslanır və proqrama daxil olan fənlərin məzmunu tələbələrin həmin bilik, bacarıq kompetensiyalara yiyələnməsini təmin edir.

Sual: Təhsil Nazirliyi ali və orta ixtisas təhsili müəssisələrində tələbə köçürmələri ilə bağlı yeni qaydalar hazırlayıb. Həmin qaydaların müzakirəsi başa çatıbmı? Yeni qaydalar  nə zamandan tətbiq edilə bilər?

Cavab: Təhsil Nazirliyi tərəfindən ali və orta ixtisas təhsili müəssisələri tələbələrinin bir təhsil müəssisəsindən və ya ixtisasdan digərinə köçürülmələri ilə bağlı yeni qaydalar hazırlanmış və hazırda onların müzakirəsi başa çatmaqdadır. Sənəd təsdiq olunduqdan sonra növbəti ildən tətbiqi nəzərdə tutulur.

Sual: Bu qaydalarda gözlənilən əsas dəyişiklik nədən ibarət olacaq? Tələbə köçürmələri asanlaşacaq, yoxsa bu proses sərtləşdiriləcək?

Cavab: Qaydalarda tələbələrin köçürülmələrinə dair müəyyənləşdirilmiş şərtlər köçürülmə prosedurunun asanlaşdırılmasına yönəlmişdir.

Sual: Özəl ali təhsil müəssisələrində hüquq, jurnalistika və tibb fakültələrinə qəbulun dayandırılması zamanı hansı standartlar əsas götürülüb?

Cavab:Mövcud qaydalara görə, ali təhsil müəssisələrində hər hansı ixtisas üzrə mütəxəssis hazırlığına yalnız tədris, maddi-texniki baza və kadr potensialı olduqda icazə verilir. Bir sıra özəl ali təhsil müəssisələrində digər sahələrlə yanaşı, jurnalistika, tibb və hüquq sahələrinə aid olan ixtisaslar üzrə həmin tələblər ödənilmədiyinə görə kadr hazırlığı dayandırılmışdır.