Sual: Yüksək və maksimum (700) bal toplayan tələbələrə ayrılan vəsaitin ümumi məbləği nə qədərdir?

Cavab: Azərbaycan Respublikası Prezidentinin “Azərbaycan Respublikasının ali məktəb  tələbələri üçün Prezident təqaüdünün təsis edilməsi haqqında” 2001-ci il 3 sentyabr tarixli 564 nömrəli       Fərmanına uyğun olaraq ölkə başçısının Sərəncamına əsasən müvafiq tədris ili üzrə hər il tələbə qəbulu imtahanlarında ixtisas qrupları üzrə ən yüksək nəticələr göstərmiş və Azərbaycan Respublikasının ali  məktəblərinə daxil olmuş 100 nəfər tələbəyə Prezident təqaüdü verilir. Prezident təqaüdünün məbləği hazırda 150 manat təşkil edir.

Sual: Tələbələrin təqaüdləri necə müəyyənləşdirilir? Minimum təqaüd nəyə əsasən təyin olunur?

Cavab: Ali təhsil müəssisələrində təhsil alan tələbələrə verilən təqaüdlərin məbləği Azərbaycan Respublikası Prezidentinin Sərəncamlarına uyğun tənzimlənir. Hazırda ali təhsil  müəssisələrinin  tələbələrinə təqaüdlər aşağıdakı məbləğlərdə ödənilir:
 
Magistratura səviyyəsi üzrə:
 
əla qiymətlərlə oxuyan tələbələrə
- 93,50 manat
əla və yaxşı qiymətlərlə oxuyan tələbələrə
- 77,00 manat
yaxşı-kafi qiymətlərlə oxuyan tələbələrə
- 49,50 manat
 
Bakalavriat səviyyəsi üzrə:
 
əla qiymətlərlə oxuyan tələbələrə
- 88,00 manat
əla və yaxşı qiymətlərlə oxuyan tələbələrə
- 71,50 manat
yaxşı-kafi qiymətlərlə oxuyan tələbələrə
- 44,00 manat

Sual: Növbəti illərdə tələbələrin təqaüd sistemində hər hansı bir dəyişiklik gözlənilirmi?

Cavab: Növbəti illərdə tələbələrin təqaüd sistemində dəyişiklik barədə Təhsil Nazirliyində məlumat  yoxdur.

Sual: Orta məktəblərdə tibb məntəqələri mövcuddurmu? Həmin tibb məntəqəsinin iş fəaliyyəti nədən ibarətdir? Sağlamlığında problem olan şagirdlərlə bağlı həmin məntəqənin tibb bacısı müəllimlərə məlumat verməlidirmi?

Cavab: Ümumtəhsil məktəblərində tibb otağı fəaliyyət göstərir, həkim, tibb bacısı ştatları mövcuddur. Tibbi xidmət işçiləri yerli səhiyyə təşkilatları ilə əlaqə saxlayır, şagirdlərin sağlamlığının vəziyyəti haqqında məlumatları toplayıb sistemləşdirir, zəruri hallarda tibbi yardım göstərirlər. Onlar uşaqların səhhətindəki hər hansı bir çatışmazlıq haqqında məktəbin rəhbərliyinə, müəllimlərə məlumat verməyə borcludurlar.

Sual: Azərbaycanda distant təhsilə keçidlə bağlı mövcud durum hansı səviyyədədir? Hansı ali təhsil müəssisələrində distant təhsilə keçid tam baş tutub. Bu işin neçənci ilədək yekunlaşdırılması nəzərdə tutulur?

Cavab: «Təhsil haqqında» Azərbaycan Respublikasının Qanununda distant təhsilalma forması təsbit edilmişdir.
Bu təhsilalma formasında informasiya texnologiyalarından əsas vasitə kimi istifadə olunduğundan onun tətbiqi üçün müvafiq ali təhsil müəssisələri müasir informasiya texnologiyaları vasitələri və avadanlıqları ilə təchiz olunmalı, tədrisi məsafədən təşkil etmək üçün ixtisaslaşdırılmış internet-auditoriyaları yaradılmalıdır. Hazırda Respublikanın bir neçə ali təhsil müəssisələrində bu istiqamətdə müəyyən işlər aparılır. Onlar başa çatdıqdan sonra həmin ali təhsil müəssisələrində distant təhsilalma formasının tətbiqi məsələsinə baxılacaqdır.

Sual: Özəl universitetlərdə jurnalistika fakültələri yenidən açıla bilərmi?

Cavab: Gələcəkdə hər hansı ali təhsil müəssisəsində “jurnalistika” ixtisası üzrə müasir tələblərə cavab verən maddi-texniki baza və kadr potensialı yaradıldığı halda bu ixtisas üzrə tələbə qəbulu bərpa oluna bilər.

Sual: Ali və orta ixtisas təhsili ocaqlarını nə qədər tələbə bitirəcək?

Cavab: Təhsil Nazirliyinin tabeliyində olan ali təhsil müəssisələri üzrə 2012-2013-cü tədris ilində tələbələrin gözlənilən buraxılışı 26137 nəfər, Nazirliyin tabeliyində olan orta ixtisas təhsili müəssisələri üzrə isə gözlənilən tələbə buraxılışı 10399 nəfər təşkil edir.

Sual: Əlil uşaqların təhsilə cəlb olunması üçün yeni planlar nədən ibarətdir?

Cavab: Sağlamlıq imkanları məhdud uşaqların bütün təhsil pillələri üzrə digər uşaqlarla birgə keyfiyyətli təhsilə (inkluziv təhsilə) cəlb olunması üçün UNİCEF-in texniki dəstəyi ilə “2013-2020-cu illərdə Azərbaycan Respublikasında İnkluziv Təhsilin İnkişafı üzrə Dövlət Proqramı” hazırlanmış və Nazirlər Kabinetinə təqdim olunmuşdur. Proqramın məqsədi bütün təhsil pillələri üzrə sağlamlıq imkanları məhdud şəxslərin təhsilə cəlb olunmasını və onların təhsil ala bilmələri üçün maneəsiz mühitin yaradılmasını təmin etməkdir. Sənəd layihəsi həmçinin “Azərbaycan 2020: gələcəyə baxış” İnkişaf Konsepsiyası çərçivəsində təsdiq olunması nəzərdə tutulan dövlət proqramlarının siyahısına da daxil edilmişdir. 
Dövlət Proqramının təsdiq olunub reallaşacağı təqdirdə sağlamlıq imkanları məhdud uşaqların təhsilinin təşkili ilə bağlı mövcud problemlər öz həllini tapacaqdır.
Dövlət Proqramının əsas vəzifələri bunlardır:
  • Bütün təhsil pillələri üzrə inkluziv təhsilin təşkil edilməsi üçün qanunvericilikdə müvafiq dəyişikliklərin edilməsi;
  • Təhsil müəssisələrinin və tədris proqramlarının sağlamlıq imkanları məhdud uşaqların ehtiyaclarına uyğunlaşdırılması üçün müvafiq tədbirlərin görülməsi;
  • İnkluziv təhsilinin təşkili ilə bağlı pedaqoji kadrların hazırlanması və təkmilləşdirilməsi;
  • Sağlamlıq imkanları məhdud şəxslər üzrə məlumat bazasının yaradılması;
  • Sağlamlıq imkanları məhdud şəxslərin təhsilə cəlb olunması və sosial inteqrasiyasının vacibliyi barədə maarifləndirmə işinin aparılması;
  • Sağlamlıq imkanları məhdud şəxslərin cəmiyyətə inteqrasiyası ilə bağlı müvafiq xidmətlərin yaradılması;
  • Şəhər, rayon infrastrukturunun və nəqliyyatın sağlamlıq imkanları məhdud şəxslərin maneəsiz hərəkət etməsi üçün onların ehtiyaclarına uyğunlaşdırılması.

Sual: Ölkədəki 60 000 əlil uşaqdan cəmi 300 nəfəri inkluziv təhsilə cəlb olunub. Bu, bir-iki il əvvəlin göstəricisidir. Bu göstəricinin yüksəlməsi üçün hansı işlər görülür?

Cavab: İnkluziv təhsilin bütün ölkə ərazisində tətbiq edilməsi, sağlamlıq imkanları məhdud uşaqların yaşadıqları ərazidə təhsilə cəlb olunması istiqamətində Təhsil Nazirliyi tərəfindən yuxarıda adı qeyd olunan proqram layihəsi hazırlanıb. Dövlət Proqramının təsdiq olunub reallaşacağı təqdirdə sağlamlıq imkanları məhdud uşaqların təhsilinin təşkili ilə bağlı mövcud problemlər öz həllini tapacaqdır.

Sual: Bir neçə il əvvəl “İnkluziv təhsil haqqında” qanun layihəsinin hazırlandığı deyilirdi.  Bununla bağlı vəziyyət nə yerdədir ?

Cavab:  “İnkluziv təhsil haqqında” qanun layihəsi hazırlanıb, baxılması üçün Azərbaycan Respublikasının Milli Məclisinə təqdim edilmişdir. Milli Məclisdə aparılan müzakirələr zamanı qanun layihəsinin ayrıca qanun kimi deyil, qanun layihəsində qeyd olunanların “Sağlamlıq imkanları məhdud şəxslərin təhsili (xüsusi təhsil) haqqında”Azərbaycan Respublikası Qanununda  və "Təhsil Haqqında" Azərbaycan Respublikasının Qanununda müvafiq dəyişikliklərin edilməsi  yolu ilə əks olunması məqsədəmüvafiq hesab edilmişdir.
Hal-hazırda bu məqsədlə iki nəfər hüquqşünas işə cəlb olunmuşdur. Yuxarıda adları qeyd olunan qanunlara əlavə və dəyişikliklərlə bağlı təkliflər hazırlanır.